Yohane 5
5
1Numa yayo ukafika nkonu nnini wa Vayuda. Yesu karwa na kulya Yerusalemu. 2Na ifo Yerusalemu kufui na ngiṛi ya maanri liifo iniva livaangwaa Kiebrania Betesida. Nalyo liwore matengo araanu. 3Na ifo veefo vandu veengi valole veelalaa-fo, mmidoń na fitoṛokombo na manketenkete. 4Na woose veekee iverea mura ukoole. (Amu kiifoo kyeeri malaika eeolokaa iruveń lia kaolaola mura ulya. Na ulya ambooka yoloka-fo ili mura wakoola kava nsha saka yamwi na ikava ki.) 5Na io eeiyoo nndu eemmayaa-wo myaka makumi araru na nyaanyi eelunganaa na saka yamwi. 6Nndu ulya Yesu kallolia alele-fo kamanya sheeli ammaa feeri faasha. Kamwia: Kufurie iva nsha? 7Nndu ulya alole kamwaṛua: Nndumi, noore nndu wa ishiolota ifo iruveń ili mura ukoolaa ndi. Ili niishi nkee yoloka-fo, nndu ungi kashiiria mbele kaoloka-fo. 8Yesu kamwia: Kwimboo imboo kiraa kyafo kuṛueṛue. 9Lia eni nndu ulya kava nsha deń kaimboo kiraa kilya kyamwi kamakii yenda. Na nkonu ulya ukee nkonu wa Sabato. 10Na Vayuda vakaia nndu ulya andekiṛwa: Nnu ni nkonu wa Sabato tee, nawe koore muumu wa ikurika kiraa ndi. 11Nae kavaia: Ni nndu to ashaaṛua nava nsha yye ashiia: Kurike kiraa kyafo kuṛueṛue. 12Nawo vakamwuṛa: A nndu to akuia: Imboo kiraa kyafo kwende ni ungau? 13Kake nndu ulya andekiṛwa andemanya ni i ndi. Fulya Yesu eenrekiaa vanduń veekuumbiee io. 14Numa yayo Yesu kankooya akee ifo numba ya Iṛuva kamwia: Lla te kwanshiań. Manya kutakitane lingi fikasha kuwoywa lingi nnrenga nini kita ii.
15Nndu ulya kakwimboo kaenda kandeia Vayuda, yye Yesu amwaṛua kava nsha. 16Kiimba kya ikyo Vayuda vakasua Yesu, fulya atana ikyo nkonu wa Sabato. 17Nae kavaaṛua: Nde yakwa akee iṛunda mashoṛa kumande alli, nań nkee iṛunda mashoṛa. 18Kiimba kya ikyo Vayuda vakaengeṛia induiya mwaanya wa iwwaa, nta nkiimba kya iimbua Sabato da ndi, kake nna kiimba kyo avaanga Iṛuva Nde yamwi kakwaṛua kimwi na Iṛuva. 19Kyasia Yesu kaaṛua kavaia: Nkue nkue namuia: Mwana amakii itana kindo ye muni kitaare nkilya alolia Nde eetanaa ndi. Amu kilya kyoose akee itana ye nkyo na Mwana akitanaa da. 20Amu Nde akundie Mwana kamwonga kyoose atana ye muni. Na akwaa mmashoṛa manini kita iwo amworusaa, amu neeni muṛiike. 21Amu sheeli Nde aṛutaa valya vafu na ivawiiṛia muu, mfo kuro da na Mwana aaṛuaa va muu valya ankunda. 22Amu Nde nta aumisiaa nndu ndi, kake uumisio loose anrambikie Mwana, 23naamu woose vaindie Mwana, sheeli vaindiaa Ndee. Na nndu atakee iindia Mwana amakii iindia na Nde ito anrumie ndi. 24Nkue nkue namuia: Nndu akee yaranya kirero kyakwa na ikusura ito ashirumie awwaria muu wa miṛeṛe na miṛeṛe, nta akiumisio̱o̱ ndi. Fulya ansomuka ufuń kafika muuń. 25Nkue nkue namuia: Kishaa kyeeri na akwaa ni alli kiifo da, ili vafu vaitaa ununga lwa Mwana wa Iṛuva, na valya vaitaa vavaa na muu. 26Amu sheeli Nde akee na muu kari kamwi, mfo kuro da andeniinga na Mwana iva na muu kari kamwi. 27Kanniinga na finya ya yumisia, fulya akee Mwana wa nndu. 28Manya mutaṛiikiswa ni ifi! Amu kyeeri kishaa na vandu woose valele mbangeń vaitaa ununga lwamwi, nawo vakwimboo-fo. 29Na valya vandetana finuru vaṛuke vakooye muu. Na valya vandetana fikasha vaṛuke vakooye uumisio. 30Niń mmakii itana kindo na finya yakwa shi muni ndi. Nkee ifukya kindo kisumani na ikyo namiita. Na uumisio lwakwa llwa usumani, fulya nduyaa mifurie yakwa niń ndi, kake mmifurie ya ito ashirumie.
31Kwakooya niń nakurambua shi muni, ikurambua lyakwa llya dede ndi. 32Eefo ungi akee ishirambua. Nań niishi sheeli irambua akee ishirambua nalyo llya dede. 33Ini mwaruma vandu kwa Yohane, nae karambua kilya kikee kya dede. 34Kake niń nkee iwaria irambua limilie kwa vandu ndi. Kake nkee irera ifi, amu ini mukooye ikia. 35Ulya eekee sha taa ikee yaaka na imulika. Neeni mukakunda isenywa llanga yayo kwa kyeeri kyaangu tubu. 36Kake irambua nkee nalyo niń ni inini kita irambua lya Yohane. Amu mashoṛa alya Nde andeshiniingia mmarisie mmashoṛa wo meni nkee yaṛunda. Wwo akee ishirambua sheeli nNde ashirumie. 37Na Nde to ashirumie yye anshirambua ye muni. Neeni nta mwamiita ununga lwamwi ndi, ana nta mwallolia fwana yamwi ndi. 38Ana nta kirero kyamwi kikee kari kanu ndi, fulya ini mutakusurie ulya arumio̱ yye. 39Mukee ikwataria mitisine mwikusaṛaa sheeli ini mukooyaa-wo muu wa miṛeṛe. Nayo yyo meni ikee ishirambua niń. 40Neni nta mufurie isha na kwakwa mukooye muu ndi. 41Niń wwariaa tikisi yuka na vanduń ndi. 42Kake niń nammumanya ini sheeli kitaare muwore ikunda lya Iṛuva kari kanu. 43Niń nansha kwa irina lya Nde yakwa ana nta ini ishiwaria. Kake ungi kwakooya akee isha na irina lyamwi muni yye mu wwariaa. 44Mumakii are ishikusura ini mukee ikwitikisa mu veni na mu veni, na nduma ulya ukee yuka kwa Iṛuva muni mutakee iṛuya? 45Manya mutakusaṛe sheeli niń mmuṛiingaa kwa Vaava. Eefo nndu amuṛiingaa yye Mose ito munkusurie ini. 46Amu kikooye mwikusuriee Mose, mwishikusuraa nań, amu yye atisiṛie kya mboni takwa. 47Kake kwakooya kitaare mwakusura mitisine yo yamwi, naare mwirikiaa firero fakwa niń?
നിലവിൽ തിരഞ്ഞെടുത്തിരിക്കുന്നു:
Yohane 5: RWK72
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
