Lukasi 21
21
1Aho wasanukaga wavonaga ati vasavi valitula fipanwa fyavo mwisanduku lya mapesa. 2Na wamuvonaga musimbe mupina alitulamo tusenti tuvili, 3na wayombaga, Loleyene ndimuwila inwe, musimbe mwenuyu mupina wagatulagamo mingi kukila vose, 4kwisi venava vose vatulaga fipanwa fingi ku vusavi wingi wavo, alisi mwenuyu watulaga ku vupina wakwe gose genaya wavagi nago na hogene gafundagwa nawe.
5Na aho vamo vayombaga kunguno ya isengelo ati lyazwikagwa na mawe masoga na fipanwa fisondo, uyu 6wayombaga, Lelo muligavona genaya, alisi nsiku zikwiza aho iwe kulekwa ngʼo kwiwe lingi holyene 7kuhomagulwa ngʼo. Na vamuvuzaja, vuhaya, Muhembeki, nanali genaya gakuviho, na lukuviho lumeho ki 8ati genaya gakuviho bihi mu kukwila? Na uyu wahayaga, Mulole mukapuviwe ngʼo, kwisi vingi vakwiza mu lina lyane na vakuyomba, Honene, ninga, Itungo lyegelaga bihi. 9Muleke kuvalonda venava. Alisi ulu mukwigwa mavulugu na mavugome muleke kukangwa, kwisi hambele genaya gakwile, alisi mhelo yitali duhu.
10Haho wavawilaga, Va chalo kimo vakuvagomela va 11chalo kingi, na vutemi vumo ku vutemi vungi, na manyamuditimya na nzala, uko na uko, na masilanda gakuviho, na malumeho mahanya ga kogoha gakuviho mwilunde. 12Alisi hambele na gose genaya vakumudima na vakumupezya na vakumufila inwe ku masinagogo na majela, na mukutongekwa hambele na vatemi na vanachalo kunguno ya lina lyane. 13Genaya gakumukwilila inwe kigele muve vasangilwaho. 14Mwizukile haho muleke kuyikovelezya hambele mihayo ya kusuvilizya. 15Kwisi nene mwenekili nkumupa inwe mulomo na ngelo hoyene vakandi vinwe kukovola 16ngʼo kuyikana na kuyanilizya. Inwe mukugambwa na vavyazi vinwe na vadugu na va mugana gwinwe na 17vanwani, na vakuvavulaga vamo mugati ninwe, na mukugaywa na vose kunguno ya lina lyane. 18Alisi ninga luzwili lumo ku mitwe zinwe kuzimila ngʼo; 19mugati na vujamu winwe mukuzigada myuye zinwe.
20Alisi ulu mulivona Yerusalema yilipindiliziwa na mbuto zya valugaluga, haho mumaniche ati itungo lya kuhomagulwa kwayo lili bihi. 21Haho venavo vali mu Uyahudi vapelele ku malugulu, navo valimo mu kaya vafume, navo vali kwihala valeke kwingila hangi mu 22kaya, kwisi zili nsiku zya kwihola, kigele gose gatonilwe gamalilwe. 23Alisi musyolo muhanya kuwavo vali na mwitungo na valongʼhya mu nsiku zyenizyo, kwisi lukuviho luduko luhanya mu liwelelo, na kisila kwigulya na va chalo cheniki, 24na vakugwa ku vugi wa lupanga na vakutungwa kufilwa mu vusese mugati na va mafyalo gose, na Yerusalema yikutovagulwa na vapagani kusika matungo ga vapagani gamalililwe. 25Na malumeho gakuviho mu limi na mu mwezi na mu masonda, na ku liwelelo va mafyalo vakwiganulizya mugati na kudetema hambele na kulindima kwa nyanza na mavimbi gayo; 26haho vanhu vakuhundagala myuye mu vova na kunguno ya kugalindila genaya galiza kwigulya na liwelelo; kwisi nguzu zya ilunde zikutinginiwa. 27Na haho vakumuvona Mwana wa Munhu aliza mu malunde na nguzu nhanya na lukumo. 28Na ulu genaya galivukizya kukwila, mwidibe na musanuke mitwe zinwe, kunguno vupiziwa winwe vulegelaho.
29Na wavawilaga mukolani, Mugulole mukuyu na miti 30yose, ulu mulivona ati yamalile kufuluma, haho mulimanicha inwe venekili ati itungo lya nembo lili bihi. 31Sisyo inwe vene ulu muligavona genaya galikwila, mumaniche ati vutemi wa Mulungu vuli bihi. 32Loleyene ndimuwila inwe, vuvyalwa wenuvu kusila ngʼo kusika genaya galikwila. 33Ilunde na liwelelo gakuzimanguka, alisi mihayo yane kuzimanguka ngʼo.
34Alisi mwikomye inwe venekili myoyo yinwe yileke kwitimbika na kanwa na vukozya na kwisusuma 35kunguno ya filiwa, kwigela ngʼo lusiku lwenulo lumusange kitisi mutego; kwisi lukwiza kwigulya na vose valikala ku vusyu wa liwelelo lyose. 36Alisi mudile minso matungo gose na mulombe, kigele mukovole kugapela gose ago galakwile, na kwimila hambele na Mwana wa. Munhu.
37Na uyu wavagi alihembeka nsiku zyose mwisengelo, alisi vuziku wafumaga kukalala ha lugulu ulo lulitanwa Lugulu lwa Maguta. 38Na vanhu vose vipunaga handiyu kuja kuwakwe kumudegeleka mwisengelo.
നിലവിൽ തിരഞ്ഞെടുത്തിരിക്കുന്നു:
Lukasi 21: Nym51
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nyamwezi New Testament © Bible Society of Tanzania, 1951.
