Lukasi 22
22
1Na sikukulu ya mikate zikatumbile, hoyene yilitanwa 2Pasaka, yegelaga bihi. Na vahozya vahanya na vamanicha fitabu vakovaga nzila ya kumuvulaga, kwisi vavagi valivogoha vanhu.
3Alisi Shetani wamwingilaga Yudasi, homwene alitanwa Iskariote, 4homwene wavagi mu luvalo lwa avo ikumi na vavili, na wajaga kuyomba na vahozya vahanya na vatwale, amufumye kuwavo mu nzila ki. 5Navo vadehaga na valinganilaga kumupa mapesa, 6nawe wazumaja na wakovaga itungo isoga lya kumufumya kuwavo vuduhu kumanicha vanhu.
7Na lusiku lwa mikate zikatumbile lwafikaga, ulo lwa kukasika kadilana ka Pasaka, na Yesu wavatumizaja 8Petro na Yohana, uhaya, Muje na mukatuvezezye 9Pasaka, kigele tulye. Navo vamuwilaga, Ulikova 10tuyivezezye kuhe? Na uyu wavawilaga, Lolagi, ulu mulingila mukaya munhu akusanja ninwe avukizye muzoga gwa minzi, mumulonde mu numba umo alingila,, 11na mumuwile mwene numba, Muhembeki alivuzya, Kuhe chumba cha kupanga umo nalye Pasaka na vahemba vane? 12Na uyu akumolecha chumba kihanya cha higulya chavezelezivilwe, mwenumo muyivezye. 13Na vajaga vavonaga kitisi wavawilaga; na vavezaja Pasaka.
Na aho itungo lyafikaga wikalaga hakulila hamohene na vahemba vakwe. 14Na wavawilaga, Natamanilagwa 15muno kulya Pasaka yeniyi hamohene ninwe aho ntali kuduka; 16kwisi ndimuwila inwe ati, nene kulya ngʼo yeniyi hangi kusika yikumaliziwa mu vutemi wa Mulungu. 17Na wakisolaga kineneko, walumbilaga uhaya, Solagi cheniki na mukigavanye mugati ninwe; 18kwisi ndimuwila inwe ati, vukumbu na lelo nene kunwa ngʼo hangi ku fisumo fya mizabibu kusika vutemi wa Mulungu vuliza. 19Na wagusolaga mukate, walumbilaga, wagumegulaga na wavapaga, uhaya, Gwenugu guli muvili gwane hogwene gulipanwa kuwinwe; mwite yeniyi kunizukila nene. 20Na sisyo savasava wakisolaga kineneko hanuma na kivembo, uhaya, Kineneko cheniki kili kuswana kupya kunguno ya magazi gane hogene galizwikiwa kuwinwe. 21Na lolagi, kukono kwa mwenuyu alingamba kuli hamohene nane aha hakulila. 22Mwana wa Munhu, ahene, alija nzila yakwe kitisi yalomagwa, alisi musyolo ku mwenuyu alifumiwa nawe. 23Na vavukizaja kwitozya hamohene, imba nani mugati navo homwene akuvezya yeniyi.
24Na lwanilo lwene lwavukaga mugati navo, imba nani mugati navo ali muhanya. 25Alisi uyu wavawilaga, Vatemi va mafyalo valivatema, na avo vali na vukovozi valitanwa Vavezya. 26Alisi mugati ninwe yikavile sisyo, sumbwa uyu ali muhanya mugati ninwe ave kitisi mudo, na kilongozi ave kitisi mukumba. 27Kwisi nani ali muhanya, uyu alikala hakulila, ninga uyo alitumama? Kinahe, akavile uyo alikala hakulila? Alisi nene ndi mugati ninwe kitisi uyo alitumama. 28Inwe muli venava hovene mwajama hamohene nane mu magemelo gane. 29Na ndivalaganya inwe vutemi, kitisi Vava wandaganaja nene, kigele mulye na munwe 30hakulila hawane mu vutemi wane, na mwikale ku masumbi kuvayangula va magongo ikumi na avili ga Israeli. 31Simoni, Simoni, lolaga, Shetani wamukovaga inwe amusenseve kitisi ngano. 32Alisi nakulombelaga, kwigela ngʼo luhigi lwako luzimile. Na veve, ulu wamalaga kupiluka moyo, 33uvajamilizye vaduguyo. Alisi uyu wamuwilaga, Guku, nene ndi tayari kwingila mu 34jela na mu lufu hamohene naʼho! Uyu wayombaga, Ndikuwila veve Petro, ikungulume kuhila ngʼo lelo kusika veve wakanaga kadatu ati, ukanimanikizye nene.
35Na wavawilaga, Aho namutumizaja inwe vuduhu mufuko ninga ngʼo gwa mapesa na vuduhu filatu, 36mwagayivagwa kinhu? Navo vayombaga, Ninga ngʼo kinhu kimo. Na wavawilaga, Alisi lelo homwene ali nago mufuko gwa mapesa ninga gwa lugendo agujane, na homwene akavile nago aguguzye mwenda gwakwe na alugule lupanga. 37Kwisi ndimuwila inwe ati genaya gatonilwe gamaliziwe hawane, Wasolozivilwe hamohene na vʼivengwe, kwisi ago gatonilwe kunguno yane galifikila. 38Aho vayombaga, Lolaga, henaha galiho malupanga avili; nuyu wayombaga, Galikwila.
39Na wafumaga, na ha kitilwe chakwe wajaga ku Lugulu lwa Maguta, na vahemba vakwe vamulondaga. 40Na aho vafikagako, wavawilaga, Mulombe, muleke kwingila mu kuhumbikwa na kavi. 41Na mwenekili wisundaga kuwavo, katanalo kitisi ka kutagila kawe, 42wasukambaga, walombaga, uhaya, Vava, ulu mbe ulikova umbitizye kikombe cheniki, alisi ngʼo kitisi nene ndikova, sumbwa kitisi veve ulikova, sisyo yikwile. 43Na malaika kufuma kwilunde wigelaga hawakwe kumujamilizya. Na mu vusungu wa kudetema walombaga muno na migangadiko. 44Na luyilo lwakwe lwavagi kitisi matonye ga magazi galitwina hasi. 45Na wavukaga kufuma kulomba, wizaga ku vahemba vakwe na wavasangaga valalile tulo kunguno ya misayo, na 46wavawilaga, Kinahe, mulilala tulo? Muvuke na mulombe, kwigela ngʼo mwingile mu kuhumbikwa na kavi.
47Na aho wavagi atali aliyomba, lolaga, mbuto ya vanhu vigelaga, na uyo alitanwa Yudasi, umo wa ikumi na vavili, wavatongelaga na wamwegelaga Yesu kumunonela. 48Yesu wamuwilaga, Yudasi, ulimugamba 49Mwana wa Munhu mu kumunonela? Alisi aho avo vavagi nawe, vagavonaga kitisi gakukwila, vayombaga, 50Guku, ulikova tuvatule na lupanga? Na umo mugati navo wamutulaga mukumba wa muhozya na wamutinaga itwi lyakwe lya mulila. 51Na Yesu witavukaga, uhaya, Leka mbezye yeniyi duhu! Na walikumaja itwi na wamupizaja. 52Haho Yesu wavawilaga avo vamwizilaga, vahozya vahanya na vatwale vʼisengelo na vanamhala, Mwafumaga kitisi ku musambo na malupanga na mavuhili? 53Aho navagiho nsiku zyose hamohene ninwe mwisengelo mukagololile makono kundima. Alisi lyenili lili itungo linwe na vukovozi wa giti.
54Na aho vamudimaga vamutongekaga na vamufilaga mu numba ya muhozya muhanya; alisi Petro walondaga kufuma kule. 55Na aho vamalaga kupemba moto hagati na ngomwa na kwikala, Petro wikalaga mugati navo. 56Na aho mukumba mukima wamuvonaga mu mwanga gwa moto na wamwikomaja muno, wayombaga, 57Uyu mwene wavagi hamohene nawe. Alisi uyu wakanaga, uhaya, Mukima, nkamumanikizye. 58Hanuma na katungo ungi wamuvonaga, uhaya, Naʼho wavagi mugati navo. Alisi Petro wayombaga, Wee, 59mugosya, nene ngʼo. Na hanuma na hamo saa yimo ungi walambaga, uhaya, Loleyene, uyu mwene wavagi 60nawe, kwisi nawe mwene ali Mugalilaya. Alisi Petro wayombaga, Mugosya, nkayimanikizye yeniyi uliyomba. Na itungo lili, aho atali aliyomba, ikungulume lyahilaga. 61Na Guku wikevelaga na wamwilolelaga Petro; na Petro wagwizukilaga muhayo gwamwa Guku kitisi wamuwilaga, Aho ikungulume litali kuhila lelo, veve ukunkana kadatu. 62Na wafumaga hanze na walilaga munogwene.
63Na vagosya, hovene, vamudimaga, vamufusaga, vamutulagulaga, 64na mugati na kumukumba vamuvuzaja, 65vuhaya, Ufumbule, nani wakutulaga? Na mugati na kumufusa vayombaga na gangi mingi.
66Na aho wangalukaga vanamhala va chalo, vahozya vahanya na vamanicha fitabu vivilingaga hamohene na vamutongekaga ku baraza yavo, vuhaya, Ulu veve 67uli Kristo, haho utuwile. Uyu wavawilaga, Ulu ndimuwila, 68inwe kusanizya ngʼo; ulu ndimuvuzya, haho 69inwe kwitavuka ngʼo. Vukumbu na lelo Mwana wa Munhu akwikala ha mulila gwa nguzu zya Mulungu. 70Alisi vose vayombaga, Haho veve uli Mwana wa Mulungu? Nawe wavawilaga, Ndi mwenuyu inwe muliyomba. 71Alisi avo vayombaga, Tulivufunda hangi vusangilwaho? Kwisi iswe venekili twigagwa ku mulomo gwakwe.
നിലവിൽ തിരഞ്ഞെടുത്തിരിക്കുന്നു:
Lukasi 22: Nym51
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nyamwezi New Testament © Bible Society of Tanzania, 1951.
