Lukasi 10
10
1Hanuma na genaya Guku wavitanaga vangi makumi mpungati na wavatumizaja vavilivavili, vatongele ku kila kaya na kose uko wakovaga kuja mwenekili. 2Na wavawilaga, Fimbulwa fili fihanya, alisi vatumami vado; kunguno yeniyi mumulombe Guku wa fimbulwa kuvatumizya vatumami mu fimbulwa fyakwe. 3Jagi, lolagi, ndimutumizya inwe kitisi ngʼholo mugati na mapuge. 4Kuduhu mujane mufuko ninga ngʼo gwa mapesa, ninga ngʼo filatu; kuduhu mumugisye munhu mu nzila. 5Na kila numba umo mulikova kwingila, muyombe hambele, Kuhola kuvemo mu numba yeniyi. 6Na ulu mwana wa kuhola akuvimo, haho kuhola kwinwe kukudila kwigulya nawe; alisi ulu ngʼo, haho kukusyoka hangi kuwinwe. 7Mwikale mu numba yeniyo, mulye na munwe cheniki kilifuma kuwavo, kwisi mutumami ali na chakwe kupiwa musyahala gwakwe. Na muleke kufuma mu numba yimo na kwingila mu yingi. 8Na mu kila kaya umo mulingila na valimwanukula inwe, mulye icho valimuvonecha 9inwe, na muvapizye valwile vali mwenumo na muvawile, 10Vutemi wa Mulungu wegelaga kuwinwe. Alisi mu kila kaya umo mulingila na vakavile kumwanukula, 11mufume ku barabara zyayo na muyombe, Luvuvu lwene lwa mu kaya yinwe lwagagamilaga magulu giswe tulimukunkumulila inwe, alisi mumaniche ati vutemi wa Mulungu wegelagaho. 12Ndimuwila inwe ati genayo galayikwilile Sodoma ha lusiku ulo gakuvi mabuhu kukila ago ga kaya yeniyo. 13Musyolo kuwako Korazini, musyolo kuwako Betsaida! kwisi ulu migaka hoyene yitagwa mugati ninwe, mbe yitagwa mu Tiro na Sidoni mbe vapilukaga myoyo kale na kuzwala magunila na kwikala mu mavu. 14Alisi ago galagakwilile Tiro na Sidoni ha vuyanguzi galave mabuhu kukila ginwe. 15Na veve Kapernaumu, ukavukivilwe kusika mwilunde? Ukukandamiziwa kusika hamizimu. 16Homwene alimwigwa inwe alinigwa nene, na homwene alimukana inwe alinkana nene; alisi homwene alinkana nene alimukana uyo wantumizaja.
17Na avo makumi mpungati vasyokaga na kudeha, vuhaya, Guku, migavo zyene zilitudonhoka mu lina lyako! 18Nawe wavawilaga, Namuvonaga Shetani wagwaga kufuma kwilunde kitisi lukuva. 19Lolagi, namupaga vukovozi kutova kwigulya na nzoka na tumina, na nguzu zyose kwigulya na mwanisi, na kuduhu kinhu kikumugulazya inwe. 20Alisi muleke kudeha kunguno migavo zilimudonhoka inwe, sumbwa mudehe kunguno mina ginwe gatonilwe mwilunde.
21Na mwitungo lyenilo Yesu wihalalaga mu Roho Nsondo, uhaya, Ndikulumbila veve Vava, Guku wʼilunde na liwelelo, kunguno wavavisaga vavalaganu na va ngelo genaya, na wavafumbulilaga velele. Ahene 22Vava, kwisi hosyene yakutogezaja veve. Na wavikevelaga vahemba vakwe, uhaya, Gose gapanilwe kuwane na Vava; na kuduhu umo alimanicha Mwana ali nani, sumbwa Vava duhu, ninga Vava ali nani, sumbwa Mwana duhu, na homwene Mwana alimufumbulila. 23Na kumhelo wavikevelaga vahemba vakwe na wayombaga, Gelukilwa minso genayo galigavona genayo inwe muligavona. 24Kwisi ndimuwila inwe, vafumbuzi vingi na vatemi vakovaga kugavona genayo muligavona, na vakawine, na kugigwa genayo muligigwa, na vakigilwe.
25Haho mbati, wamanicha ngʼhama, wavukaga kumugema, uhaya, Muhembeki, niteki nasalike vuzuvuku wa hanahana? 26Nuyu wamuwilaga, Yitonilweki mu ngʼhama? 27Ulisomaki? Alisi uyu witavukaga, uhaya Umutogwe Guku Mulungu wako na moyo gose gwako, na myuye zyose zyako, na nguzu zyose zyako, na ngelo zyose zyako, na muzenganwa wako kitisi uliwitogwa mwenekili. 28Nawe wamuwilaga, Veve witavukaga sisoga, 29uyite yeniyi na ukuzuvuka. Alisi uyu wakovaga kwigolola mwenekili na wamuwilaga Yesu, 30Honani ali muzenganwa wane? Yesu witavukaga, uhaya, Munhu mbati wafumaga ku Yerusalema kutelemuka ku Yeriko, na wagwaga mu makono ga vadumuzi, hovene vamuzulaga myenda yakwe na vamutulagulaga, vapelaga na vamulekaga uyu wafwaga kavimba ka mbele. 31Na yakwilaga ati muhozya watelemukaga ku nzila yeniyo, na aho wamuvonaga, wamuvambalaga. 32Na sisyo savasava Mulefiti wafikaga 33henaho, wamuvonaga na wamuvambalaga. Alisi Musamaria mbati homwene wavagi na lugendo wafikaga 34kuwakwe, wegelagaho, wamutungaga malonda gakwe na waditilagamo maguta na mvinyo, wamulinaja ku mpunda yakwe na wamutongekaga ku numba ya kuzimana na wamulwazaja. 35Na hawangaluke wafumaja madenari avili, wamupa muzimani, uhaya, Umusunge mwenuyu, na icho ulakifumye veve mwenekili, ndakusyokezye ulu nasyoka. 36Veve uliganika nani wa venava vadatu wavagi muzenganwa wa mwenuyo 37wagwaga mu makono ga vadumuzi? Na uyu wahaya, Uyo homwene wamuvonelaga kisa. Yesu wamuwilaga, Uje ukite sisyo savasava.
38Na yakwilaga aho vayumbayumbaga, uyu wingilaga mu kaya yimo, na mukima mbati, lina lyakwe Marta, wamwanukulaga mu numba yakwe. 39Na uyu wavagi na muzunaye, lina lyakwe Maria, homwene wikalaga ha magulu gamwa Yesu na wagudegelekaga muhayo gwakwe. 40Alisi Marta wadizivagwa na vuzimani vuhanya, wegelaga, uhaya, Guku, ulizumya muzuna wane andekanizye ninene kukuzimana? Umuwile, angwasye. 41Alisi Guku witavukaga, umuwila, Marta, Marta ulisusuma na uli na myanya mingi, alisi kinhu kimo kilifundwa. 42Maria walahaga ifungu isoga holyene kwingiwa ngʼo kuwakwe.
നിലവിൽ തിരഞ്ഞെടുത്തിരിക്കുന്നു:
Lukasi 10: Nym51
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nyamwezi New Testament © Bible Society of Tanzania, 1951.
