Lukasi 9
9
1Na wavitanaga avo ikumi na vavili, wavapaga nguzu na vukovozi kwigulya na migavo zyose na kugapizya mavulwile. 2Wavatumizaja kuvutanizya vutemi wa Mulungu na kuvapizya valwile. 3Na wavawilaga, Kuduhu mujane kinhu ku lugendo, ninga ngʼo mulanga, ninga mufuko, ninga mukate, ninga ngʼo mapesa, hangi kuduhu umo ave na myenda ivili. 4Na mu numba iyo mukwingilila, mwikalemo na kufuma mwenumo muvuke hangi. 5Na avo vakavile kumwanukula, mufume mu kaya yavo na mugungʼhumule luvuvu ku magulu ginwe, kigele luve vusangilwaho kuwavo. 6Na vajaga na vavitaga mu tukaya valiyitanizya Mhola ya Chelu, na kuvapizya valwile hosehose.
7Alisi Herode mutemi wagigagwa genaya gakwilaga, witimagwa mu moyo, kunguno vamo vayombaga ati, Yohana wahembukile ku lufu, na vangi ati, Elia wigelile, 8na vangi ati, umo wa vafumbuzi va kale wahembukile. 9Alisi Herode wayombaga, Yohana namutinaga mutwe, alisi uyu ali nani homwene ndigwa genaya kwigulya nawe. Na wakovaga kumuvona.
Na Vatume aho vasyokaga vamupozezaja genaya vitaga. 10Na wavasolaga na wisundaga na wajaga navo ku kaya yimo yilitanwa Betsaida. 11Alisi aho mbuto ya vanhu vamanikaja, vamulondaga, nawe wavanukulaga na wayombaga navo kunguno ya vutemi wa Mulungu, na wavapizaja venavo vafundaga kupiziwa. 12Na limi lya mhindi venavo ikumi na vavili vamwegelaga, vumuwila, Uvadahye vanhu, kigele vaje mu tukaya na mwihala vakavone hakulala na chakulya, kwisi henaho tuliho ipolu duhu. 13Alisi wavawilaga, Inwe muvape chakulya. Na vamuwilaga, Tukavile na kinhu, sumbwa mikate itano na masomba avili, ninga tuje kuvagulila vanhu vose venava chakulya. 14Kwisi vavagiho vagosya vingi kusika fihumbi fitano. Alisi wavawilaga vahemba vakwe, Muvikazye vanhu mavanza mavanza, 15kila ivanza makumi atano. Na vitaga sisyo na vavikazaja vose. 16Na uyu wazisolaga mikate itano na masomba avili, walangamilaga kwilunde, wazidosaja, wazimegulaga na wavapaga vahemba, navo vavagavanaja vanhu. 17Na valyaga na vigutaga vose, na vagasolelaga matonge matala ikumi na avili ku genayo galekelilwe navo.
18Na yakwilaga aho wavagi alilomba inene na vahemba vakwe vavagi hamohene nawe, wavavuzaja, 19Mbuto ya vanhu valiyomba nene ndi nani? Na vitavukaga, vuhaya, Yohana Moja, alisi vangi, Elia, na vangi, Umo wa vafumbuzi va kale wahembukile. 20Nawe wavavuzaja, Alisi inwe muliyomba nene ndi nani? Petro witavukaga, uhaya, Kristo wa Mulungu. 21Alisi wavahanaga na wavalagilaga, valeke kumuwila 22umo muhayo ugu, na wayombaga, Yilimudima Mwana wa Munhu kuduka kingi na kukanwa na vanamhala na vahozya vahanya na vamanicha fitabu na kuvulagwa na kuhembukiwa ha lusiku lwa vudatu.
23Na wavawilaga vose, Ulu umo alikova kundonda nene, ikanye mwenekili na idwike musigiti gwakwe nsiku zyose na andonde. 24Kwisi homwene alikova kuzipizya myuye zyakwe akuzizimizya; alisi homwene alizizimizya myuye zyakwe kunguno yane akuzipizya. 25Yilamuveleleki munhu kuligada liwelelo lyose, ulu 26wizimizaja ninga wivipaja mwenekili? Kwisi homwene ali na nsoni kunguno ya nene na mihayo yane, ha mwenuyo Mwana wa Munhu akuvi na nsoni ulu akwiza mu lukumo lwakwe na lwa Vava na lwa vamalaika vasondo. 27Ndimuwila inwe loleyene, valiho vamo mugati navo vimile henaha hovene kululavuzya ngʼo lufu kusika vavuwine vutemi wa Mulungu.
28Na yakwilaga bihi na nsiku mnane hanuma namihayo yeniyi, wavasolaga Petro na Yohana na Yakobo na walinaga ku lugulu kukalomba. 29Na yakwilaga aho wavagi alilomba musimo gwa vusyu wakwe gwagalukaga na mwenda gwakwe gwayekemaga pee. 30Na lolagi, vanhu vavili vavagi valiyomba nawe, Mose 31na Elia, hovene vigelaga mu lukumo na vayombaga nawe kunguno ya kufwa kwakwe, hokwene akumazya mu Yerusalema. 32Petro na viye vatindilaga tulo; alisi aho vamisaja, valuvonaga lukumo lwakwe na vagosya ava vavili hovene vimile hamohene nawe. 33Na yakwilaga aho avo vingaga kuwakwe, Petro wamuwilaga Yesu, Guku, yili sisoga ati iswe tuliho henaha; tuzenge nhambi idatu: yimo kuwako, yimo kumwa Mose, na yimo kumwa Elia; alisi wavagi akamanikizye genaya wayombaga. 34Na aho wavagi aliyomba genaya, ilunde ligelaga na lyavakinganizaja, na aho vingilaga mwilunde lyenili vogohaga. 35Alisi muzwi gwafumaga kwilunde lyenili, gwayombaga. Mwenuyu ali Mwana wane, mumwigwe uyu. 36Na aho muzwi gwavagi guliyomba, Yesu wavonagwa inene. Na avo vahulikaga sele na vakamuwilile umo mu nsiku zyenizyo muhayo gumo gwa genaya vagavonaga.
37Na yakwilaga ha lusiku lwʼigolo aho vatelemukaga ku lugulu, mbuto nhanya ya vanhu yasangaja nawe. 38Na lolagi, mugosya umo mugati na mbuto wahamukaga, Muhembeki, ndikwigongela umulole mwana wane, kwisi mwenuyu ali mwana umo duhu kuwane, na lolaga, mugavo gulimudima na itungo lili alilila, na 39gulimusulungutya nʼifulo lilifuma, na gukavile kuzumya wangu kuleka kumuyugumbya. 40Na navalombaga vahemba vako vagufumye, 41alisi vilagwa. Alisi uyu witavukaga, uhaya, Ee, vuvyalwa wʼivengwe na wa vutagike, nidamilizye hawinwe kusika nanali? Muletage mwana wako henaha. 42Na aho wavagi alimwegela, mugavo gwamutenkaga na gwamusulungutaja; alisi Yesu waguhilimilaga mugavo gwa zoma, na wamupizaja muyanda na wamusyokaja kumwa ise. Na vose vavukumaja vuhanya wa Mulungu. 43Alisi aho vose vavagi valigakumya gose genaya witaga, wavawilaga vahemba vakwe.
44Mihayo yeniyi yingile mu matwi ginwe: Mwana wa Munhu ali bihi mu kutavulwa mu makono ga vanhu. 45Alisi venava vavagi vakagumanikizye muhayo ugu, na gwavagi guvisilwe hambele navo, valeke kugumanicha; na vogohaga kumuvuzya kunguno ya muhayo gwenugu.
46Na miganiko genaya gingilaga muwavo, imba nani mugati navo akuvi muhanya. 47Na Yesu agamanikizye miganiko ga myoyo yayo, wasolaga mwana na wamutulaga bihi nawe na wavawilaga, 48Homwene alimwanukula mwana mwenuyu mu lina lyane alinanukula nene, na homwene alinanukula nene alimwanukula mwenuyo wantumizizye; kwisi homwene ali mudo mugati ninwe vose, homwenuyu ali muhanya.
49Haho Yohana witavukaga, uhaya, Guku, twamuvonaga munhu alizifumya migavo mu lina lyako, na twamuhangilizaja, kunguno akavile kutulonda iswe. 50Alisi Yesu wavawilaga, Muleke kumuhangilizya, kwisi homwene akavile mukandi wiswe ali mwikinu. 51Na yakwilaga aho nsiku zya kulina kwakwe zyafikaga, mwenuyu wavutungilizaja vusyu wakwe kuja ku 52Yerusalema, na wavatumizaja vatumwa hambele nawe; navo vajaga na vingilaga mu kaya yimo ya Vasamaria, kigele vamuvezezye hakupanga. 53Na vakamwanukulile, kunguno vusyu wakwe walolaga kuja Yerusalema. 54Na aho vahemba, Yohana na Yakobo, vayivonaga yeniyi, vayombaga, Guku, veve ulikova tulagile moto 55gufume kwilunde kuvazimizya venava? Alisi uyu wikevelaga, wavadakilaga, uhaya, Mukamanikizye roho ki muli nayo. 56Kwisi Mwana wa Munhu akizile kuzizimizya myuye zya vanhu, sumbwa kuzipizya. Na vajaga ku kaya yingi.
57Na aho vavagi valija mu nzila, munhu umo wamuwilaga, 58Nene nkukulonda kosekose uko ulija. Na Yesu wamuwilaga, Makeye gali na fivili na manoni ga mwilunde gali na fyali, alisi Mwana wa Munhu akavile na hakusagamizya mutwe gwakwe. 59Na wamuwilaga ungi, Ndondage! Nawe wayombaga, Hambele umpe luhusa kumuzika vava. 60Wamuwilaga, Uvaleke vafu vavazike vafu vavo, alisi veve uje kukavutanizya vutemi wa Mulungu hosehose. 61Na ungi wayombaga, Guku, nkukulonda veve, alisi hambele umpe luhusa kuvadahya va munumba yane. 62Alisi Yesu wamuwilaga, Kuduhu munhu homwene walidimaga igembe na alikevela kunuma avelile ku vutemi wa Mu lungu.
നിലവിൽ തിരഞ്ഞെടുത്തിരിക്കുന്നു:
Lukasi 9: Nym51
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nyamwezi New Testament © Bible Society of Tanzania, 1951.
