Epacerero 7
7
1Vahoolowaya Yave aamweerela Nowe: “Mvoloweke munikulani, nyuwo vamoha ni emusaanyu, niwoko kohoona weera ti nyuwo paahi muri oororomeleya mwa ekhapireene yeela. 2Mwarowaneke sootheene sa asinama ootteela: Ithannapiili soothelana – elopwana ni ethiyana, nitho wa sootheene sa asinama oohitteela: Piili-piili – elopwana ni ethiyana. 3Mukuxetho soothelana ithannapiili sa ipalame, sa moota wootheene wa ipalame – elopwana ni ethiyana, weera sipwaherereke okhala ni okumi mweelaponi yootheene. 4Yavira mahuku mathannameeli, kinoorupiha epula elapo yootheene wa mahuku miloko mixexe ni ohiyutho miloko mixexe. Kinoottakaneeliha itthu sootheene siri ni okumi mweelaponi kipattunxaaka.” 5Nowe aapaka sootheene ntoko Yave aamulamulenlaawe.
Mirupi
6Nowe aarino iyaakha macira mathannamosa saaphiyalaaya mirupi mweelaponi. 7Nowe vamoha ni amwaariye, anamwanaawe, ni axaaraya yaavolowa munikulani weera etthawe maahi a mirupi. 8Eeli-eeli a asinama oothelana ootteela ni oohitteela ni piili-piili sa moota wootheene wa ipalame soothelana muloko neeli-eeli a moota wootheene wa asinama aniipurula 9yaavolowa munikulani vamoha ni Nowe ntoko Muluku aamulamulenlaawe. 10Eviraka mahuku mathannameeli, saapacera mirupi omorela elapo ya vathi yootheene. 11Naari nihuku na naamuloko ni mathannameeli na mweeri wanaaveeli wa eyaakha Nowe aarinaawe iyaakha macira mathannamosa. Nihuku nenenenne anaattuuttu ootheene a mphareiyani yaahuleya ni erimu yaahuleyatho. 12Epula yaarupa mweelaponi othana miloko mixexe ni ohiyutho miloko mixexe. 13Nihuku nenenenne Nowe vamoha ni anamwanaawe Xemi, Hami ni Yafeti, ni amwaariye nitho axaaraya anamwanaawe araru yaavolowa munikulani. 14Vamoha ni yaawosa saavolowa mikhalelo sootheene sa asinama, sa mihuwo, sa soowiipurula ni sa ipalame – sootheene saarino mapupha. 15Soopattuxiwa sa inama sootheene soothelana saarino okumi saavolowa piili-piili munikulani vamoha ni Nowe. 16Inama saavolongwe munikulani saari piili-piili, ethiyana ni elopwana, ntoko Muluku aamulamulenlaawe Nowe. Vahoolowaya Yave aawala mulako. 17Mirupi iye saarupa wookwana mahuku miloko mixexe ni maahi yaahaandyeerereya, nnaphamba nikula. 18Vano maahi ale yannaandyeerereya vancipale, ni nikula naaphamba. 19Vanonto, maahi yeera yaandyeerereyaka mweelaponi mpaka nyaako sootheene siriwo saamireya. 20Nyaako saamireya mpaka maahi yaapwahera vasulu wa nyaako wookwana imeetru* ithannapiili. 21Soopattuxiwa sa okumi sootheene – siniipurula, ipalame, mihuwo sootheene ni inama sa ntuphini – soopattuxiwa sootheene sinkhala mweelaponi ya vathi yootheene vamoha ni atthu ootheene – saahookhwa. 22Sootheene saari vatthayani yoowuuma ni saarino okumi saahookhwa. 23Soopattuxiwa sa okumi sootheene saari mweelaponimu saaphwatiwa – okhuma atthu, hiihotho mpaka inama sitokweene ni ikhaani, seiye siniipurula vathi ni ipalame sa wiirimu – sootheene saaphwatiwa. Vano aahanle Nowe ni seiye saari ni yoowo munikulani paahi. 24Maahi ekhuneenleene elapo ya vathi yaamanle mahuku ncira ni miloko mithanu.
നിലവിൽ തിരഞ്ഞെടുത്തിരിക്കുന്നു:
Epacerero 7: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
