Epacerero 6
6
Mirupi
1Yaapacereya waandyeererana atthu mweelaponi, yaahaayara anamwane asithiyana. 2Vano, anamwane a Muluku yaahoona weera anamwane asithiyana a atthu yaari ooreera ni yaahiithanlela yaawo yaatthunaaya. 3Vano Yave aaheera: “Munepaaka khoorwa omaka mwa mutthu mahuku ootheene, weenre omutthu owehereraka okhwa. Owo anaakhale ni okumi iyaakha ncira ni miloko miili paahi. 4Wa mahuku ale ni vahoolowaya yaakhala aNeefili* mweelaponimu, eyo tiiyo ehuhuweene yeele anamwane a Muluku yaathelanaaya ni anamwane asithiyana a atthu yaayarelaka anamwane. Vano aNeefili* ale yaari atthu oolipaxa murima a ehuhu ya khalayi, aani atthu a epili. 5Yave aahoona waandyeerereya wa sootakhala sa atthu mweelaponi ni weera soowuupuwela sa mirimasaya sannaasaasa mahuku ootheene seiye siri soonanara paahi. 6Yave aathananihiwa niwoko na ompakawawe mutthu mweelaponimu, ni eyo yaamvoreya vamurimaniwawe. 7Yave aaheera: “Kinoophwata omutthu mwa elapo ya vathi, mwa yoowo kipattunxaaka. Aani kinimwaaphwata atthu ootheene vamoha ni inama soopattuxiwa sitokweene ni sikhaani ni ipalame sa musulu, niwoko kooriipiwa murima woopattuxa.” 8Wa soothesene, Nowe aamusiveliha Yave.
Nikula ntokotoko na Nowe
9Ola ori mwaha wa Nowe: Nowe aari mulopwana mmoha oororomeleya ni oohikhalano milattu variyari wa muloko wa ehuhuwaawe. Vano owo anneetta vamoha ni Muluku. 10Aakhalano anamwane asilopwana araru: Xemi, Hami ni Yafeti. 11Muluku aahoona weera elapo ya vathi yaasareya soonanara ni nipuhero. 12Muluku awehaka elapo ya vathi, aahoona sootakhala sincipale niwoko ootheene yaamanke elapo ya vathi, yaatthara iphiro sootapanyeya. 13Tivawo Muluku aamweerenlaawe Nowe: “Koolakela waaphwata atthu ootheene, niwoko elapo ya vathi yootheene yoosareya nipuheronaya. Vekhaikhai, kinimwaaphwata vamoha ni elapo yootheene. 14Mpake nikula ntokotoko na mwiri wa goferi* ni ikwartu soohiyanahiyana ni muttikitthele nnyoma mpuwa ni omokoni. 15Mpakeke ni miringo iya: mweerakameloni imeetru* ncira ni miloko miraru niithanu, mweekhuveeloni imeetru* miloko miili ni piili ni eriyari ya emeetru*, ni orakamawaya okhuma vathi wookela osulu imeetru* muloko nitthaaru ni eriyari ya emeetru*. 16Mpake nipatho moota wooweera ehale ekhato eriyari ya nikula ni nipatho, orakamawaya eriyari ya emeetru*. Mpake mulako mpararinimwaya ni mukawanyihe nikula mpatta mmoha vathi, mukina eriyari ni wookisera osulu. 17Miyo kinoorupiha mirupi sincipale mweelaponi yootheene ya vathi weera kiphwate soopattuxiwa sootheene siri ni okumi. Sootheene siri mweelaponi yootheene sinimookhwa. 18Vano kinookhaliha wiiraana ni nyuwo. Ontthuneya ovolowa munikulani nyuwo vamoha ni amwaarinyu, anamwaniinyu ni axaarayatho. 19Vanonto, moota wootheene wa soopattuxiwa soohiyanahiyana muvoloiheke munikulani piili-piili, ethiyana ni elopwana, weera sikhale ni okumi vamoha ni nyuwo. 20Piili sa mikhalelo sootheene sa ipalame, sa asinama ni sa siniipurula sirweeke wa nyuwo weera sipwaherere ni okumi. 21Mukuxeke moota wootheene wa sooca ni muthokororeke weera muce nyuwosa ni iyo.” 22Nowe aapaka sootheene ntoko Yave aamulamulenlaawe.
നിലവിൽ തിരഞ്ഞെടുത്തിരിക്കുന്നു:
Epacerero 6: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
