Nte 13

Barinaba ina Sauli Vahwaniwa na Utumwa

1Na kuuko mung'ë a kanisa ra Antiokia arë varëfo anyagëdaghu nanë asëyi. Na vasaa unë Barinaba, Simioni unë rina rëngëja Nigeri, Lukio ufuma uKirene, Manaani munya chao wa ibarasa ramwa Herode unë Herode agamutenda mutemi në müküü, nanë Sauli. 2Itungo naarë veeso vëumukurya Muungu nanë ufunga#13:2 Ufunga: Ntende a udëa ula malëwa itungo në muntu wë mu marombi a uvavi. Mwahu Mweru agahanya, “Vabaghui gusoko ane nene Barinaba ina Sauli gusoko a mwëëmo unë nene navaëtanëe.” 3Uvii naarë vafunga na uromba veeso vëgavaëkea mëkhono ao unto na vëgavatuma veeso vende kunë vinjë.

Muhënjo wa Mwandyo wa Utanantya

4Barinaba nanë Sauli naarë vatumwa na Mwahu Mweru, vëgaenda faka uSeleukia, na ufuma kuuko vëgaenda gwa njëa a irambo faka uKipuro. 5Naarë veeso vafika uSalamu vëgatanantya ukhani wa Muungu mu masunagogi a Ayahudi. Na arë inaa Yohana gwa uvaarëëya veeso. 6Naarë veeso vënenda goong'e mugatumbë nëgëmukhatë a irambo faka uFafo, vëgaja u muntu umwedu muroghi, munyagëdaghu wa uregheghe, wa Gëyahudi rina rakwe Baa-Yesu.

7Mweeso arë wëitambëëmwe na mutemi në müküü, Serigio Faulo, në muntu naarë wina ihaa, në agamuraghëëya Barinaba nanë Sauli na agafenja utegheeya ukhani wa Muungu. 8Ëgweeso Elima unë arë (gusoko rasëë në ryana ra rina rakwe) agavafënga veeso, ugufenja umufentua mutemi në müküü ufuma mu uhuvëi. 9Ëgweeso Sauli, në rina rëngëja Faulo, arë wijue Mwahu Mweru, agamuraava gwa umukhamëëchëya miho 10na gahanya, “Veve mwana wamwa ibilisi, veve umurughu wa mu gëntu goong'e nëgatutë, wijue uregheghe woong'e na uhughangu, veve utiurekaa uifempua njëa ya Müküü nëighookiena? 11Na itungwee, raava, mukhono wa Müküü wë unto ako, na winjë utendeka wë mufoku na utiudaha urëona yuva gwa itungo rëgëtunga.” Gënyahafo ukungu nanë kiti gëgamukunëkëa na mweeso agaandya ufenja antu va umutungata gwa umukwatëëra mukhono. 12Uvii mutemi në müküü agahuvëa, naarë mweeso waona asaa në adwëëra, gusoko mweeso agataka ufuma mu ësëyo ra Müküü.

Antiokia a uFisidia

13Faulo na auyavakwe vëgatenda muhënjo gwa njëa a majë ufuma uFafo, na vëgaja faka uFerige mung'ë a uFamfilia. Na Yohana agavareka veeso na agasuka uYerusalemu. 14Ëgweeso veeso vëgafwaghëëra na muhënjo ufuma uFerige na vëgafika Antiokia a uFisidia. Na itiku ra sabato#13:14 Sabato: Itiku ra mwikhari wa dini a Gëyahudi.veeso vëgaenda mung'ë a sunagogi vëgikhaa fang'ë. 15Naarë vadaha usoma seria amwa Musa nanë Maandëko a anyagëdaghu, aküü va sinagogi vëgavatumëa veeso ukhani, vëuhanya, “Anyandughu, nësa nyenye mukweti ukhani wa uvakhomya nkhoo antu, wuhanyi.” 16Uvii Faulo agaëmëka wëma, na agavahumbwëëra mëkhono akwe uguhanya, “Antu va Isiraeli, na nyenye në mumukuryaa Muungu, tegheeyi. 17Muungu wa antu avai Isiraeli wavahwaniye va tata vitu na agavatenda vatendeke ndughu në nküü itungo naarë vëgikhaa ung'ë a u Misiri, na gwa mukhono nëuhumbuwe agavatongeera ufuma kuuko. 18Na gwa mëakha makumi ane mweeso agavaarëëya mung'ë a mbugha. 19Na mweeso naarë wadaha uruvanga ndughu ëmufungatë ya ung'ë a uKanaani, agavafa veeso ng'ë awe mwino usai, ng'ë ne veeso vamikhaire gënya mëakha maghana ane na makumi atano. 20Na asaa naarë akëa agavafa veeso aramwui faka ufikëa kunë Samweli munyagëdaghu. 21Uvii veeso vëgaromba vafewe mutemi. Muungu agavafa Sauli mwana wamwa Kishi, wa u ndughu amwa Benjameni, atendeke mutemi wao gwa mëakha makumi anë. 22Muungu naarë wamuheya Sauli, agamwëmëcha Daudi atendeke mutemi wao; në mweeso agamusudangëa na agahanya, ‘Namwona Daudi mwana wamwa Yese muntu nëumëyanjisiye nkhoo ane, në ujie utenda mafenji ane oong'e.’ 23Na ufuma ufafo wa muntu uyi Muungu wavaetee antu va Isiraeli Mutyoi, Yesu, mwino mweeso arë warafie. 24Naarë mweeso këë ainaja Yohana agatanantya ubadiso wa ufei gwa antu voong'e va Isiraeli. 25Na mwino Yohana arë waumarëëya mwëëmo wakwe, mweeso agahanya, ‘Wurë nyenye mugheema nene nëanyuhë? Nene nti mweeso. Aa, ëgweeso muntu umwedu ujie unyuma ane, unë nene ntinoneye unyonyoa mëkhua a maatu akwe.’

26“Aruna ane, vana va ugënyamwango gamwa Iburahimu, na avoo mukhatë anyu në vëumukuryaa Muungu, kunë sese sayu ëyëë a utyoi atumiwe. 27Gusoko avoo unë vëgikhaa uYerusalemu nanë aküü vao, gusoko veeso vinamurekanua mweeso namba vinamanyaa matanantyo a anyagëdaghu unë ëgusomwaa mu sabato i veeso vëgatenda nkhani ya anyagëdaghu itendeke ya tutë gwa umuramwua Yesu akuye. 28Na mbesa veeso vinahangaa ihutye nërënoneye mweeso akuye, këë veeso vëgamuromba Filato amuuraghe mweeso. 29Naarë veeso vafichëëya oong'e në arë ëandikiwe nëëmughookee mweeso, veeso vëgamusimia fang'ë ufuma u musalaba, vëgamwëka mung'ë a mbëlëlo. 30Ëgweeso Muungu agamufëtya ufuma gwakuyi. 31Na gwa matiku maingë mweeso agavadwëëra vasaa naarë vaajie itambëëmwe inao ufuma uGalilaya faka uYerusalemu, unë itungwee në masudanga vakwe gwa antu. 32Na sese gwamwetea nyenye sayu në njija ësëë në Muungu wamëraghanie kunë vatata. 33Sayu ëyëë mweeso wamëfichërëye kunë sese në gwë vana vao gwa umufëtya Yesu; mwino noo ëandikiwe mu Saburi a gavëë,

‘Veve wë mwanane,

reo nene nagufafa veve,’

34Na mwino gwa tutë mweeso agamufetya ufuma gwakuyi, ataje kamwe akuye kangë na atasukëe ughora, Muungu agahanya vii, ‘Nene ninjë ugufa veve mboto në njeru na ya tutë mwino naa namurafëye Daudi.’ 35Gwa uvii mweeso uhanyiye noo mu saburi ëngëja,

‘Veve utiumurekea mutumami wako në Mweru aghore.’ 36Gusoko Daudi, naarë mweeso wëtumëkëa mafenji a Muungu mu itungo rakwe mughonjo, na agaëkwa itambëëmwe na vatata vakwe, na agaghora. 37Ëgweeso mweeso në Muungu wamufëtiye mwëërë wakwe winaghoraa.

38“Gwa uvii, aruna ane, reki ëmanyëke kune nyenye, mwino ukëërëa kunë muntu uyi irekewa ra mahutye rëutanantiwa kunë nyenye. 39Na kunë mweeso mu muntu nëuguhuvëa ugutungwëërwa u mantu asaa oong'e në nyenye mutiudaha utungwërwa gwa seria amwa Musa. 40Gwa uvii, ighoji, ëtaje mujeuhangwa na ayoo nëëhanyiywe mung'ë a maandëko a anyagëdaghu.

41‘Raravi, nyenye në mwina horo. Mutake na mukuye.

Gusoko nene ngutenda ntendo mung'e a matiku anyu,

ntendo në nyenye mutinje umëhuvëa kamwe,

nësa muntu amutanantëye nyenye.’”

42Faulo nanë Barinaba naarë vafuma mwisinagogi rasëë, antu vëgavaramba vaje kangë itiku ra mwikhari nërëjie vaje uvasëya kangë nkhani yasii. 43Na naarë mwirundo wa isinagogi wafaghata Ayahudi vaingë nanë ndughu ingëja naarë yafetukëe dini a Gëyahudi vëgavasambëya Faulo ina Barinaba, unë vëgarighëëtya inawe na uvasusutëya vafwaghëëre uduva u mboto a Muungu.

44Itiku ra mwikhari nërëhongie fifë antu voong'e va umuji vëgagihangwëya itambëëmwe utegheeya ukhani wa Muungu. 45Ëgweeso Ayahudi naarë vaona iburi ra antu, veeso vëgijua wiru, na vëgafenga nkhani në Faulo arë uguyirighëëtya na umutuka mweeso. 46Na Faulo ina Barinaba vëgarighëëtya gwa nguu, vëuhanya, “Arë inoneye ukhani wa Muungu utanantiwe tanju kunë nyenye. Gusoko nyenye mwausutëya ufuma kunë nyenye, na nyenye aghonjo mwaramwua mutinoneye ufanga wa khae na khae, raavi, sese gwifetukëya gwa antu nëti Ayahudi. 47Gusoko uvii Müküü waguraghëëye sese, uguhanya,

‘Nene namwëëkie nyenye mutendeke weru

gusoko a antu neti Ayahudi,

uvii nyenye mudahe gwëta utyoi gwa

matumbë oong'e a mu urëmi.’”

48Nane antu nëti Ayahudi naarë vategheeya uyi, vëgayanja na vëgaukurya ukhani wa Muungu. Vasaa naarë vahwaniywe gusoko a ufanga wa khae na khae vëgahuvëa. 49Na ukhani wa Müküü uganing'anea ng'andë yoong'e ya u mukoa wasuu. 50Ëgweeso Ayahudi vëgavafema akhema nëvëumukurya Muungu nanë vëna ukumu uküü nanë aghosya në atongeeri va u muji na uwuchawucha makhasëko kunë va Faulo ina Barinaba na uvafunya gunji a itumbë rawe. 51Ëgweeso veeso vëgakununta ukungu naarë u gumëghu ao kunë veeso, na vëgaenda Ikonio. 52Na asëywi arë vijue uyanjo na itambëëmwe na Mwahu Mweru.

നിലവിൽ തിരഞ്ഞെടുത്തിരിക്കുന്നു:

Nte 13: RNT

ഹൈലൈറ്റ് ചെയ്യുക

പങ്ക് വെക്കു

പകർത്തുക