Nte 14

Faulo nanë Barinaba Kuuko Ikonio

1Kuuko Ikonio Faulo nanë Barinaba vëgaingëa itambëëmwe mung'ë a sinagogi ra Gëyahudi, na uvii vëgarighëëtya na iburi iküü ra antu vëgahuvëa, Ayahudi nanë Ayunani. 2Ëgweeso Ayahudi nëti ahuvëi vëgavasoseya antu nëti Ayahudi na vëgafëntua mahaa awe vavahitë ahuvëi. 3Uvii Faulo ina Barinaba vëgasagha kuuko gwa matiku maingë, vëurighëëtya gwa nguu gusoko a Müküü, unë agaraghëëra mwino nkhani yawe nëighokee mboto akwe arë ya tutë. Mweeso agavafa veeso udaho wa utenda makua nanë mantu a utako. 4Ëgweeso antu va umujini vëgatemanuka maburi avëë: antu vëgëtunga vëgatendeka vë gu uvaru wa Ayahudi, na vangëja vë gu uvaru wa atumami. 5Itungo naarë Ayahudi na antu nëti Ayahudi vala nyonyi, itambëëmwe na aküü vao, uvafunduya ivë veeso na uvatua gwa magwe, 6veeso vëgamanya rasëë na vëgadurëa uLisitira na uDeribe, miji nëëmung'ë a Lukaonia na miji nëëfimëye ng'ë asëë. 7Na haafo vëgatanantya sayu në njija.

Faulo ina Barinaba Kuuko uLisitira na uDeribe

8Kuuko uLisitira arë urëfo muntu në arë ugikhaa, në ainadaha uenenda gwa mëghuu akwe. Mweeso arë munyagëtevee ufuma ufafo, naarë kamwe ainaenenda. 9Mweeso agamutegheeya Faulo nëugurighëëtya, na Faulo, agamukhamëchëya miho na agaona mwino wina uhuvëi wa uforiwa, 10agahanya gwa ruri në aküü, “Ëmëka sësë gwa mëghuu ako,” Na agahumbuka gunto na agaenenda. 11Na mwirundo naarë waona në Faulo watendaa, vëgahumbua nduri yao, vëuhanya gwa Gëlukanoia, “Arungu vasima fang'ë kunë sese gwa ikeru ra antu.” 12Barinaba vëgamwëtaana Zeu, na Faulo, gusoko arë murëghëëtii në müküü vëgamwëtaana Herima. 13Na mukumbëki wamwa Zeu, unë hekalu rakwe arë rë usonge a muji, agaeta njaghamba nanë sembe ya uruva në arë utumie gënyaa ngaa ugënyamwango na agafenja uvafunyëya ikumbëko itambëëmwe na antu. 14Ëgweeso atumami Barinaba nane Faulo naarë vategheeya uyi, vëgahafua masaa ao na vëgaenda vadurie vëgaingëa mukhatëkhatë a mwirundo, vakuriye mukindo, 15vëuhanya, “Antu, asikë në mutenda ayai? Sese noo gwë antu, gwikhwete na nyenye gwa ntundo, na gwamwetea nyenye sayu në njija, gusoko nyenye mudahe ufentuka ufuma u mantu ayai a ndeende muje kunë Muungu në mufanga unë watundie irunde nanë ng'ë nanë irambo na oong'e në arëfo mung'ë ayo. 16Itungo ra mpafo ya khae mweeso agayirekea ndughu yoong'e yienenda u njëa yao nyeeso aghonjo. 17Këe mweeso mughonjo ainadëa ureka usudangëi, gusoko mweeso watendie ija na uvaetea mbua ufuma girunde na ntënange gwa itungo rayo, nauyikutya nkhoo yanyu gwa malëwa nanë uyanjo.” 18Itambëëmwe na nkhani iyii atumami vëgahanga ukaku uküü wa uvaghëëya antu vekeufunya ikumbëko kunë veeso.

19Ëgweeso Ayahudi vëgaja hafo ufuma Antiokia na Ikonio. Naarë vaafema antu veeso vëgamutua Faulo na magwe na vëgamuututa umufunya unji a muji vëgaghema wakuya. 20Ëgweeso itungo naarë atumami vihangwëëya vamufëmëye ng'andë yoong'e, agauka na againgëa u muji. Na fadiu ayo mweeso agaenda ina Barinaba faka uDeribe.

Faulo ina Barinaba vasuka Antiokia a uSiria

21Naarë vatanantya sayu në njija u muji wasuu vëgahanga asëywi vaingë, vëgasuka uLisitira na faka Ikonio na faka Antiokia, 22vëukhamia nkhoo ya asëywi, vëuvakhonkhomeka veeso vëfwaghëëre mu uhuvëi, na vëuhanya mwino sese inoneye gingëe gu utemi wa Muungu ukëërea makhasëko maingë. 23Na naarë vahwania anyampaa gusoko awe mu kanisa, itambëëmwe na marombi nanë ufunga#14:23 Ufunga: Ntende a udëa ula malëwa itungo në muntu wina marombi a uvavi. vëgavaëka u mëkhono a Müküü unë vamuhuvëe.

Antiokia

24Uvii veeso vëgakëëra uFisidia, na vëgafika faka uFamfilia. 25Naarë vatanantya ukhani uFerige, veeso vëgaenda faka Atalia. 26Na ufuma hafo vëgenda gwa njëa a irambo faka Antiokia, fana veeso varaghëëywe gwa mboto a Muungu gusoko a mwëëmo unë veeso vautendie ukhondekeke. 27Na naarë veeso vafika, vëgahangwëëya mwirundo woong'e wa kanisa itambëëmwe na utanantya oong'e në Muungu watendie itambëëmwe inao, na mwino warughue gënyamwango gwa uhuvëi gwa Anyagëlungu. 28Na vëgasagha itambëëmwe na asëywi gwa itungo ririfu.

നിലവിൽ തിരഞ്ഞെടുത്തിരിക്കുന്നു:

Nte 14: RNT

ഹൈലൈറ്റ് ചെയ്യുക

പങ്ക് വെക്കു

പകർത്തുക