DUUCA 18

Äcamma’jonei chäänöngemjönö dö’seeno

1Edä mmaja Jesuuquidiito chäwwäiñe cöneecammai chea, yö’seenoje, töweejäduuque’ancädä’da weiñäje Wanaadi wwä wa’deunä jäcä. 2Töwö cönä’döaacä chäwwäiñe:

—Äcamma’jonei töweiye cönä’jaacä jataawä. Töwö Wanaadi onnontä’da cönä’jaacä, soto onnontä’da mmaja. 3Yää jataawä töweiye cönä’ja’dea wodi, iiño wääma’jödö. Weiñäje töwö töötä cönä’jaacä ñäädä äcamma’jonei wwadäädä. Edääje töwä’döe cönä’jaacä: “Yuunacaanei yäätuujacä;” quee. 4Ñäädä äcamma’jonei numa cönä’jaacä yää tödö’se’dä. Äcuude’cä edääje cöntö’tajäätöi: “Wanaadi onnontä’da weichaame, soto onnontä’da weichaame mmaja, 5määdhä iiño wääma’jödö wi’wa’ta, weiñäje yaaquiimadö weijäcä chäwwä, weiñäje yeejödö queiñe yaawä, yeetömaajodö jonaane;” quee cöntö’tajä’acä ñäädä äcamma’jonei; quee cönä’döaacä Jesuuquidiito.

6Edääje cönä’döaacä yaawä Cädhaajotoncomo:

—Mädääje cöntö’tajäätöi ñäädä äcamma’jonei chäänöngemjönö. 7¿Wanaadi ’ña? ¿Töneichö ani’wa’tä’daiñe eijai nichö’taanä, ñanno ano, coijai’jödöödä töwwä töwa’deuwe weneenetoodö? ¿Numa ca ani’wa’tä’daiñe eijai ñai? 8Chäänönge yääje wä’döa äwwäiñe, töwö ni’wa’taato’de yaawä dea mma. Yääje yeichaame, Soto nnedö we’a’jäcä, ¿ecamjödö ’je soto edantätaicho’de? quee cönä’döaacä Jesuuquidiito.

Jaadiseeo, acu’shänä jödaatai i’jummanei mmaja Wanaadi wwä ya’deuwö’jocoomo

9Yäätä cönä’ja’to anejjacoomo aashicha’como wääcamjödö, anejjacoomo soto chimmajä’nenaamo. Ñanno netaadöcoomoje Jesuuquidiito cöneecammajäätöi yaawä yö’seeno joi. Töwö cönä’döaacä:

10—Aacä dhanwaacomo Wanaadi weichojo taca cönoomomöicho, Wanaadi wwä a’deuwe. Tooni cönä’jaacä jaadiseeo. Yeichacoono mmaane cönä’jaacä acu’shänä jödaatai i’jummanei mmädä. 11Ñäädä jaadiseeo jiidi cöna’deuwacä; edääje cönä’döaacä: “Amäädä Wanaadi, ta’cwaiñe wa anejjacoomo soto nönge’da weijäcä. Ñanno tämeena’como, chäänöngemjöncomo mmaja, masuuduija’como mmaja, nöngeiñe’da wa öwö, määdhä acu’shänä jödaatai i’jummanei nönge’da mmaja. 12Öwö mmaane aacäde semaana waadäi töwäänema wäänene. Äwwonooje tunu’e wäänene tameedä öncana’cadö dhantai;” quee cönä’döaacä ñäädä jaadiseeo. 13Ñäädä acu’shänä jödaatai i’jummanei mmaane amoinche cönä’jaacä; caju wwadäädä ene’se’da’jödö jadäädä. Tu’dhe mma cönä’jaacä. Wentumje cöna’deuwacä; cönä’döaacä: “Amäädä Wanaadi, wentumje cäneecä, öwö conemjönö tödöönei;” quee cönä’döaacä ñäädä acu’shänä jödaatai i’jummanei. 14Öwö yääje wä’döa äwwäiñe: Ñäädääne, acu’shänä jödaatai i’jummaneiñe töcoone’nadiiyö täncwanno’jo cönennacai tömmai chaca, jaadiseeojöönööne. Ñäädä o’jodhaato tö’tajäätödö dho’noncomooje nä’döja’de. Ñäädä dho’noncomo tö’tajäätödö mmaane o’jodhe nä’döja’de; quee cönä’döaacä Jesuuquidiito.

Mudeeshi’chä jäcäiñe Wanaadi wwä Jesuuquidiito wa’deuwö’jödö

15Mudeeshi’chä jadä’jödöödä soto cönne’a’to Jesuuquidiito wwadäädä, ye’cäcäiñe tamäädö tödöödö wetä chäwwä. Yää eneea’jäcä ñoowanoomadö cömjiiyeme’jä’a’to ñanno mudeeshi’chä edhaamo. 16Yaawä Jesuuquidiito tönoowanoomadö cöna’dejjaicho töwwadäädä; cönä’döaacä:

—Neejö’ña’to mudeeshi’chä öwwadäädä; monoowatäätäi. Canno nönga’como ñanno Wanaadi sotoi. 17Chäänönge yääje wä’döa äwwäiñe, ñäädä mude’cä’cä tönnöe naichöje Wanaadi töcaajichaanaije ännöjöönö, Wanaadi sotoije eijai’cha na; quee cönä’döaacä Jesuuquidiito tönoowanoomadö wwäiñe.

Ääjömaanö tönsomaacato wei’jödö

18Yääje mma yaawä dhanwa cajiichaanajaato Jesuuquidiito cöneecamma’joi:

—Owaanomaanei aashichaato, ¿ane’cäämö tödööjai wanä weichö töwaatamemjönö chaana’catoojoje? quee.

19Jesuuquidiito cönä’döaacä chäwwä:

—¿Ane’cotoojo aashichaatoje cä’taanä? Aashichaato ’je’da na soto. Wanaadi mma ñäädä aashichaato. 20Waanontänä odhoowanääcä na, yää: “Mä’masuuduijai; soto maneemai; adheememöi; jönaawä soto maneementäi; oomo aashicha tödööcä, aanö mmaja”; quee naadö; quee cönä’döaacä Jesuuquidiito.

21Yaawä ñäädä cönä’döaacä Jesuuquidiito wwä:

—Tameedäädä mädä waanontä’jä woije wäänene, mude’cä’cäje weichö jonnoto’jödöödä; quee cönä’döaacä.

22Yää eta’jäcä töwwä, Jesuuquidiito cönä’döaacä:

—Töweiye dea na tooni äwwä tödööemö. Tameedä äwwono ejeemajoocä, änsomaadö, anaudä’jödö mmaja. Chääje’jödö u’jä’cä yaawä a’ca’como wwä, caju ñaane tönsomaaque meiye. Ä’cäde’de yaawä, jaadä meiye; quee cönä’döaacä Jesuuquidiito.

23Yää etaadö’jo ñäädä dhanwa cone’da cönä’döjoi, jooje tönsomaaque töweijäcä, jooje tönaudäque töweijäcä mmaja. 24Cone’da yä’döjoodö eneea’jäcä, Jesuuquidiito cönä’döaacä:

—Tadaawaajuje na tönsomaaca’como wwäiñe Wanaadi töcaajichaanaichomooje tödöödö, tönaudäca’como wwäiñe chäänönge mmaja. 25Macuusa dha’tadö ai wa’shadi omonque’jönö naichö naane’; töwaacö’je mma tönsomaacato wwä Wanaadi töcaajichaanaije tödööque’jönö na; quee cönä’döaacä Jesuuquidiito tönoowanoomadö wwäiñe.

26Yää etannamo’jödö cönä’döa’to yaawä:

—¿Änääcööne ääwanaacajai ñai yääje yeiya’jäcä?

27Jesuuquidiito cönä’döaacä chäwwäiñe:

—Yää soto tödööjaichojöönö Wanaadi mmaane tödööjai ña; quee cönä’döaacä.

28Yaawä Peedhodo cönä’döaacä chäwwä:

—Ñaa mmaane tameedä ñaa cöne’nomjai ajaadä töweichö wetä.

29Jesuuquidiito cönä’döaacä chäwwäiñe:

—Chäänönge yääje wä’döa äwwäiñe, ñäädä tömmai ñännei, tumö, señö jeiñe mma, tacontomo jeiñe mma, tuduichomo jeiñe mma, töjiiñamo jeiñe mma, tönnacoomo jeiñe mma, Wanaadi töcaajichaanaije weiñä jäcäinchädä ñänga’jäcä, 30ñäädä wwä yää nöngato nä’tua’de jooje’cä jeene eduuwa weiñawä; äcuude weiñawä yeichö töwaatamemjönö daja nä’tua’de chäwwä; quee cönä’döaacä Jesuuquidiito.

Töwäämatoojo jäcä Jesuuquidiito necammajäätö’jödö mmaja

31Yaawä Jesuuquidiito töudäje cönaadoicho ñanno amoojadooto de’wä aaco’como tönaanontädö. Töwö cönä’döaacä chäwwäiñe:

—Jeduusadén ña cöötaato eduuwa. Iiña tameedä chäänönge nä’döa’de Soto nnedö jäcä Wanaadi wa’deuwödö ecammannamo nimennä’jocoomo. 32Töwö nä’tuja’de judhíojöncomo wwäiñe, tonno’jätöödö wetä chäwwäiñe, töquiiñemeecödö wetä mmaja, täta’däjäätödö wetä mmaja. 33Aiju’jätö’jeje tönwanno nemaato’de yaawä. Yaawä aaduwaawä anoototo ai töwö naadonca’de; quee cönä’döaacä Jesuuquidiito.

34Ääta’da cönä’jaacä chäwwäiñe yääje ya’deuwö’jödö. Dhowaanäcäiñe’da Jesuuquidiito cöna’deuwacä, etaajai’cha yeichomjäcä.

Tänuuquemjönö Jeedicó ñano enu’tä’jödö

35Yääje mma yaawä Jeedicó ña ä’döjai Jesuuquidiito wä’döa’comjäcä, yäätä cönä’jaacä tänuuquemjönö, ääma taawä yaatajiimaajä, waateme’näje. 36Töwö tödö’täcä jooje soto weja’dätäädöcoomo eta’jäcä ñäädä tänuuquemjönö cönä’döaacä:

—¿Ane’cäämö mädä? quee.

37Yäätoncomo soto cönä’döa’to chäwwä:

—Jesuuquidiito Naasade ñano edä ai neja’dä’a; quee cönä’döa’to.

38Yaawä ñäädä tänuuquemjönö cöncä’tömöi:

—Wentumje cäneecä Jesuuquidiito, amäädä Dawí weichö; quee cönä’döaacä.

39Ñanno awa’deena’como wötäädö cöneeta’jöichaja’to. Yääje yeichaame töwö jooje’cä mma cöncä’töngacä:

—Wentumje cäneecä, amäädä Dawí weichö; quee.

40Yaawä Jesuuquidiito cöneedennai; tänuuquemjönö tödöiña cönne’joi. Tödöiña yä’döa’jäcä, töwö cöneecamma’joi:

41—¿Aaquene öwwä äwä’döjo’se manä? quee cönä’döaacä.

Ñäädä cönä’döaacä:

—Äwwä wäänu’tojo’se wa, Cajiichaana; quee cönä’döaacä.

42Yaawä Jesuuquidiito cönä’döaacä chäwwä:

—Ee, äwwä ecamjödö weijäcä määjichö’täi; quee.

43Yaawä dea mma töneene ñäädä cönä’döi. Jesuuquidiito jadä cöntaacä yaawä, aashicha töwa’deuwancädä Wanaadi jäcä. Yää eneea’jäcä töwwäiñe tameedä soto aashicha cöna’deuwöicho dea Wanaadi jäcä.

നിലവിൽ തിരഞ്ഞെടുത്തിരിക്കുന്നു:

DUUCA 18: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക