DUUCA 17
17
Soto shaadijannä’cannamo
1Jesuuquidiito cönä’döaacä tönoowanoomadö wwäiñe:
—Sadiijannä’catä weiñä ataamejai’cha na. Yaawääne’ jooje wentumje na’de ñäädä soto sadiijannä’caneichomo’jödö. 2Ñäädä mude’cä’cä yeecanö’nei shaadijannä’canei, täju ijöncäcä tö’wadö’tämje yei’jödö na, dama sö’jato ’cwaca emaadöje mma. 3Odhoowoinchadäiñe’da eichäcä.
“Äjääcä conemjönö todööa’jäcä aweichacoono wwä, yäätuujacä. Yää jonno tötö’tajäätödö sha’dumincha’jäcä chäwwä, choone’nadiiyö encwanno’jocä. 4Yää anooto awä dea aacä amoojatoode conemjönö tödööa’jäcä äjääcä, aacä amoojatoode mmaja äwwadäädä ye’a’jäcä: “Yää ännö’da wa’de eduuwa;” quee ä’döe, choone’nadiiyö encwanno’jocä; quee cönä’döaacä Jesuuquidiito tönoowanoomadö wwäiñe.
Ecamjödö jäduuje yeichö
5Yääje mma yaawä ñanno anonta’como cönä’döa’to Cädhaajotoncomo wwä:
—Jooje’cä ñaa necamjödö ijäädu’täcä; quee.
6Yaawä Jesuuquidiito cönä’döaacä:
—Wishu adöödö ’cäwa’cä aneecamjödööcomo weichaame, edääje ä’döjai maato edä meje wwä: “Ätu’cacä määtonno; dama ’cwaca ä’natö’täta;” quee ä’döjai maato. Adha’deddu nönge ä’döjai ña yaawä.
Dhanoonö wwä tödööemö
7“Ä’saca adhaanonö womonga’jäcä naadö naane’, nono saca’nänei’jödö, jaaca edai’chäneichomo’jödö jeiñe mma, ¿yääje ä’döjai manä chäwwä: “Ä’cäde, määtä ataajimaacä, määwashinchäiye;” quee ä’döjai manä? 8Ng’jn, yääje ä’döjaichaane. ¿Edääjeene jönca ä’döjai manä: “Yeewanshiñö aneejodööcä; adheesomaajä’cäde amäädä, cädai’chäiye wääwashinchädö wadaadä. Woocödö enöödö wä’ca’jäcä jeene ääwashinchäjai ma amäädä;” queene jönca ä’döjai manä? 9¿Änääcö tanoonö änwa’demeecödööde’ tanontä’jödö tödö’jödö weijäcä mmädä chäwwä. 10Mädääje mmaja änwanno, tameedä Wanaadi wwä adhaanonto’jocoomo tödööa’jäcä äwwäiñe, edääje mma ä’döjai maato: “Dhanoonö aashicha’comoojönö ñaa; ñaa wwä tödööemö mma ñaa cönnöi;” quee ä’döjai maato; quee cönä’döaacä Jesuuquidiito.
Amoojado’como woi ’ja’como wääjichö’to’jocoomo
11Jeduusadén ña Jesuuquidito wötäädawä töwö cöntaacä Samaadiya ñano acä Caadideea ñano amoinche’da yeichö antai. 12Jataaca yä’dödaawä amoojadä woi ’ja’como chäwwadäädä cöneejoto. Amoincheiche dea cöneedennaicho. 13Tönwanno cöncä’tömöicho:
—Amäädä Jesuuquidiito, Owaanomaanei, wentumje ñaa eneecä; quee cönä’döa’to.
14Ñanno eneea’jäcä Jesuuquidiito wwä, töwö cönä’döaacä chäwwäiñe:
—Ojoncomo; äänejootantäcä Wanaadi wwä töwa’deuwaamo wwäiñe; quee cönä’döaacä.
Yaawä töötädaawäiñe töwääjichö’tä cönäädantoicho. 15Yaawä tooni töwääjichö’tä töwäädanta’jäcä cönennacai Jesuuquidiito döiña, töcä’de aashicha töwa’deuwancädä Wanaadi jäcä. 16Töwö tä’mudhe cönä’döi Jesuuquidiito o’wawä, cönääje’dui yaawä nono wwadäädä; täjiichö’tä’jödö cönwa’deme’cacä. Ñäädä dhanwa cönä’jaacä Samaadiya ñano. 17Yaawä Jesuuquidiito cönä’döaacä:
—¿Amoojadä’da ca mä’jaato änwanno yääjichö’ta’como? ¿Äsha naicho ajimmä, ñanno aacäichea amoojato’como? 18¿Anejja ennaca’da ca neiya aashicha a’deuwe Wanaadi jäcä, määdhä mma, aneiñajaano mma? quee cönä’döaacä.
19Yaawä Jesuuquidiito cönä’döaacä ñäädä dhanwa wwä:
—Aanöncä; äjääne; äwwä ecamjödö weijäcä maadoncai; quee.
Wanaadi töcaajichaanaije weiñä
20Jaadiseeo Jesuuquidiito cöneecamma’joicho Wanaadi cajiichaanaje yä’dötoojo cu’nädö jäcä. Yaawä Jesuuquidiito cöneccujä’a’to:
—Täne’daane Wanaadi cajiichaanaje yä’dödö nai; 21“Edä yää;” “Mänö yää;” quee wä’döto’me’da, ataacaiñeene yeijäcä; quee cönä’döaacä jaadiseeo wwäiñe.
22Edääje cönä’döaacä yaawä tönoowanoomadö wwäiñe:
—Aneedawä mma Soto nnedö ene’se meichantäi’che, eneejai’chaane. 23Yaawä edääje soto nä’döaato’de äwwäiñe: “Määdhä ñäädä;” quee, “Mäccö ñäädä;” quee jeiñe mma. Ene mma mötäätäi’che yaawä; dha’dedducoomo mma maneetatäi’chede. 24Tameedä täneemö jeene öwö, Soto nnedö, weejödö na’de, tameedä caju yäncucuudu tönaawanaanö’ca töweiye naichöje mmaja. 25Töwäätä’maminchajoomöje wa awa’de, töwä’tu’de’tojoomöje mmaja canno soto eduuwa naatoodö wwäiñe. 26Noé weichawä cönä’ja’döje mmaja na’dede yaawä Soto nnedö we’tojo anooto awä. 27Ñanno soto wääwashinchäjä’näje töweiye cönä’ja’todö naane’, wocö emjätöödöje mmaja. Jötaajä’näje töweiye cönä’ja’to dea, tönnacontoncomo iiñonoojätöödöje mmaja, jidaawa aca Noé womontojo anootoi’chädö aca tödööene. Tunaamä cöneejä yaawä; tameedä cönä’jajoicho dhawä. 28Mädääje mmaja cönä’ja’dea Doote weichawä. Tönwanno wääwashinchäjä’näje töweiye cönä’ja’to, wätäätöijanääje mmaja, audaajä aichödööje mmaja, maa amääjätöödöje mmaja. 29Yaawä Sodhooma ñanno Doote weja’ca’jäcä wa’to cönä’mei caju ñanno, acuudajadä dhatu’jödö joccato jadä, tameedä töja’to’comooje. 30Mädääje mmaja na’dede yaawä Soto nnedö wäänejoodawä.
31“Yää anooto awä ñäädä tömmai ye’wono tönnöjäätödö wetä tä’saca omoomöi’che töwä’ta’jäcä. Yääje mmaja ñäädä audaajä acaano, jataaca mma ennacai’chede. 32Ätö’tatääcä Doote jiñamo wei’jödö jäcä. 33Ñäädä töweichö ewontänei, töweichö nennanö’ca’de. Ñäädä töweichö u’nei mmaane, töweichö neneea’de.
34“Edääje wä’döa äwwäiñe, Soto nnedö we’tojo coijaichawä aacä naato’de äänawä. Tooni nataadäja’de; yeichacoono mmaane tadä’da na’de. 35Aacä wodiiñamo naato’de äätönnäcä, cödheede cödööje. Tooni nataadäja’de, yeichacoono mmaane tadä’da na’de. 36Aacä dhanwaacomo naato’de audaajä aca; tooni nataadäja’de; yeichacoono mmaane tadä’da na’de; quee cönä’döaacä Jesuuquidiito.
37Yää eta’jäcä Jesuuquidiito cöneecamma’joicho:
—¿Äsha tameedä mädä neja’dä’aanä’de, Cajiichaana? quee cönä’döa’to.
Töwö cönä’döaacä chäwwäiñe:
—Tänäämö cätaajä dö’tä cuduumu we’jummadööcomo töweiye nai; quee cönä’döaacä Jesuuquidiito.
നിലവിൽ തിരഞ്ഞെടുത്തിരിക്കുന്നു:
DUUCA 17: MCH
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2014 Reservados todos los derechos
