JUAN 4
4
Wodi Samaadiya ñano acä Jesuuquidiito wa’deuwö’jocoomo
1Yääje mma yaawä jaadiseeo cöneeta’to jooje Jesuuquidiito nowaanomaadö weichöcoomo, jooje soto wautisaaje tönnöeiñe yeichö mmaja, Juan e’jodhe’cä. 2Jesuuquidiito jaiñoone wautisaaje ännö’da yeichaame, ñoowanoomadööne wautisaaje soto tönnöeiñe cönä’ja’to. 3Jaadiseeo wwä tacaade töweichö eta’jäcä Jesuuquidiito cönääma’täi Judheea ñanno; Caadideea ña cöntaacä.
4Samaadiya chäcä chäämadö cönä’jaacä Judheea ña iichotoojo. 5Yaawä töwö cönä’döi Sicaada ña, yää Samaadiya nonoodö de’wono jata. Yää Sicaada ñano cönä’jaacä amoinche’da Jacoowo nonoodö’jödö jäcä, tönnedö José wwä inchudu’jödö. 6Yäätä cönä’jaacä Jacoowo nöca’jödö tuna weja’catoojo. Yaawä anunnaque yeichö Jesuuquidiito cönaatajiimai yää tuna weja’catoojo dö’tä, ääma tai töweejödaawä töquincha’jödö weijäcä. 7Yaawä wodi Samaadiya ñano cöneejä, tuna wetä. Jesuuquidiito cönä’döaacä chäwwä:
—Woocödö änne’cä tuna; quee.
8Jesuuquidiito nowaanomaadö ’je’da cönä’ja’to yäätä; jataaca cönä’ja’to äwanshi ejeemadööje. 9Yaawä ñäädä wodi Samaadiya ñano cönä’döaacä Jesuuquidiito wwä:
—¿Ane’que’nei judhíoje aweichaame tuna me’ca’anä öwwä, Samaadiya ñano wwä mmädä? quee cönä’döaacä.
Töwö yääje cönä’döaacä judhíocoomo oojodö’da yeichomjäcä Samaadiya ñancomo jadäiñe. 10Yaawä Jesuuquidiito cöneccujä’acä:
—Wanaadi nutuudu odhoowanääcä ei’jo, äwwä tuna ne’ca’aadö odhoowanääcä ei’jo mmaja, amäädääne e’catäädö meiya öwwä, öwö utuudu weiya yaawä äwwä weichojo tuna; quee cönä’döaacä Jesuuquidiito wodi wwä.
11Yaawä ñäädä wodi cönä’döaacä:
—Tuna anöntojo ’je’da dajaane ma; sö’je mmaja mädä tuna weja’catoojo. ¿Äshannoto yää weichojo tuna manammödö deeade’ ? 12Cadai’choncomo Jacoowo cöwwäiñe cönnämäi edä tuna weja’catoojo. Edä acaano dea töwö yoocödööje cönä’jaacä, iiñacoomo wocöödöje mmaja, chääcöntomo wocöödöje mmaja. ¿Ñäädä e’jodhaato ca amäädä?
13Yaawä Jesuuquidiito cönä’döaacä chäwwä:
—Edä tuna ennei emjätö’se mmaja na’dede yää ’jeje. 14Öwö untudu ennei mmaane emjätö’se’da na’de yaawä yeichöje. Öwö untudu na’de tuna weja’catoojo nönge yo’taca, yeichöödäje yeichojooje; quee cönä’döaacä Jesuuquidiito.
15Ñäädä wodi cönä’döaacä yaawä:
—Änu’cä öwwä yää tuna, emjätö’se ä’dö’da weiye’de yaawä, eejö’da weiye’dede sadä tuna wetä; quee.
16Jesuuquidiito cönä’döaacä chäwwä:
—Äjääne, oiño a’dejjata; yää ’jeje ä’täcä’de.
17Wodi cöneccujä’acä:
—Töiñoque’da wa; quee cönä’döaacä.
Yaawä Jesuuquidiito cönä’döaacä:
—Chäänönge yääje mä’döa: “Töiñoque’da wa;” quee. 18Ijaatoodea cönä’ja’to oiñotoomo; ñäädä eduuwa yö’tä maadö oiñojöönö ñäädä. Chäänönge yääje mä’döaanä; quee cönä’döaacä.
19Yää eta’jäcä wodi cönä’döaacä:
—Wanaadi wa’deuwödö ecammaneije ätö’ta öwwä. 20Wanaadi wwä ñaa adai’jödö tönnöe cönä’ja’to edä jöö de’wä. Änwanno judhíocoomo äwä’dödööcomo ’quene Jeduusadén ña Wanaadi wwä tödöötojo; quee cönä’döaacä ñäädä wodi Samaadiya ñano Jesuuquidiito wwä.
21Jesuuquidiito cönä’döaacä yaawä chäwwä:
—Amäädä wodi, chäänönge yääje wä’döa äwwä, aneedawä na’de äwwäiñe Wanaadi wwä tödöötojo, edä jöö de’wä’daane, Jeduusadén ña’da mmaja. 22Änwanno samaaditaanocoomo iiña mmädä Wanaadi wwä töwa’deuwe määnetääne, töwö odhoowanääcäiñe’da yeichaame. Ñaa mmaane towaano wwä töwa’deuwe ñaa weneene, judhíocoomo jonnoto we’ajääne wääwanaacatoojo weiyajä. 23Chu’nädö aca wä’dönääje na eduuwa chäänöngato que Jaaja wwä tödöötojo; yaawä ñanno Jaaja wwä tödönnamo täwaanöcoomo jadäädä nödööaato’de, chäänönge töweiyancädäiñe mmaja. Yääja’como Jaaja tumjumma weneene tujummannamooje. 24Äänejöönö töwö Wanaadi. Ñanno ijummannamo täwaanö jadäädä ijummajai ñaato, chäänönge töweiyancädäiñe mmaja; quee cönä’döaacä Jesuuquidiito.
25Yaawä ñäädä wodi cönä’döaacä:
—Yoowanääcä na ñäädä Mesía we’tojo, ñäädä Äwaanacaanei. Töwö ye’a’jäcä tameedä necammajä’a’de cöwwäiñe; quee.
26Jesuuquidiito cönä’döaacä:
—Öwö ñäädä Äwaanacaanei, adhaacä ya’deuwaadö; quee.
27Yaawä ñoowanoomadö cönä’döicho; cone’da cönä’döjoicho yaawä wodi acä ya’deuwödö weijäcä. Yääje yeichaame aneecamma’jo’da cöneiya’to. “ ¿Ane’cäämö mijummaanä? ¿Ane’que’nei mä’dä acä adha’deujä’anä?” ca’da cönä’ja’to. 28Yää ’jeje ñäädä wodi tutuucudiiyö cönnämäi; jataaca cöntämä. Töwö cönä’döaacä soto wwäiñe:
29—Soto eneetantäcä. Töwö necammai öwwä tameedä wei’jödö. ¿Ñäädä’da ñäädä Äwaanacaanei? quee cönä’döaacä.
30Yaawä ñanno soto jata wwonno cöntonto Jesuuquidiito döiña. 31Soto ä’dö’dadooto ñoowanoomadö cönä’döa’to Jesuuquidiito wwä:
—Ääwashinchäcä Owaanomaanei.
32Töwö cönä’döaacä chäwwäiñe:
—Töweiye öwwä yeewanshiñö odhoowanoocomoojönö; quee cönä’döaacä.
33Yaawä ñoowanoomadö cönä’döa’to tönwannoje dea:
—¿Anejja’da chääwanshiñö nutui? quee.
34Jesuuquidiito cönä’döaacä chäwwäiñe:
—Öwö yeewanshiñö yää yaanontänei’jödö waanontä’jödö tödöödö, chaadawaajui acoichadö wa’cä. 35¿Edääje jönca töwä’döe määnetääne: “Aacäichea nuunä a’que na eduuwa natö wau’cwantojo, amu’tojo cu’nädö aca yä’dötoojo;” quee jönca töwä’döe määnetääne? Öwö yääje wä’döa äwwäiñe, eneetäcä’ma, töwau’cwange dajaane natö na eduuwa; amu’tojo cu’nädö aca yä’döaajä mädä. 36Ñäädä natö amu’nei’jödö täjeema töweiye nai. Töwö ñi’jumma’jödö yeichöödoto yeichojooje na. Yaawä a’nädä ta’cwaiñe eijai ñaato, ñaatö’tänei’jödö acä amu’nei’jödö. 37Chäänönge yääje soto töwä’döe weneeneto: “Anejja ñaatö’täneije, anejja daja amu’neije;” quee. 38Öwö manaanontätääne anaatödööcomoojönö amu’que. Anejjacoomo cönnatö’toicho, änwanno mamu’cato eduuwa chaadawaajuichomo’jödö; quee cönä’döaacä Jesuuquidiito.
39Jooje yäätoncomo Samaadiya ñancomo Jesuuquidiito cöneecamjöicho ñäädä wodi wä’dö’jödö weijäcä: “Tameedä wei’jödö necammai öwwä;” quee yä’dö’jödö weijäcä. 40Yaawä Jesuuquidiito döiña samaaditaanocoomo wä’döa’comjäcä tönwanno cönä’döa’to chäwwä:
—Eetä eichä’de ñaa jadä; quee.
Yäätä Jesuuquidiito cönä’jaacä chääjadäiñe aacä anooto. 41Jooje anejjacoomo cöneecamjöicho yaawä töwö dha’deddu jaiñoone. 42Tönwanno cönä’döa’to ñäädä wodi wwä:
—Ñaa necaanö’a eduuwa amäädä aneecamma’jödö jäcäinchädä mma’da; ñaa daja ñaa cöneetai chea dha’deddu. Ñaa owaanäcä na Äwaanacaanei chäänöngatooje yeichö, tameedä soto Ewaanacaaneichomooje yeichö; quee cönä’döa’to.
Acu’shänä sotoi nnedö adonca’jödö
43Aacä anoototo ai Jesuuquidiito cönääma’täi yäätonno; Caadideea ña cöntaacä. 44Töwö Jesuuquidiito dea cönä’döaacä: “Wanaadi a’deddu ecammanei töquiiñeme’que töweiye nai ijaatawä;” quee. 45Yaawä Caadideea ña yä’döa’jäcä iiñancomo eta’se cönä’ja’to dha’deddu, töwwäiñe ene’jödö weijäcä Jesuuquidiito nödö’jödö Jeduusadén ña, tönwanno mmaja Jeduusadén ña iichäjäätö’jocoomo weijäcä Weja’dätä’jä anooto comjedensiyai’chädö döe.
46Yaawä Jesuuquidiito cönennacai chea Caná ña, yää Caadideea nonoodö de’wono jata, tuna chääjedöödö eccuduuje tönaamode’nä’jödö döiña. Yäätä cönä’jaacä dhanwa, acu’shänä sotoi. Töwö iiñedö cädäije cönä’jaacä Cajeedamu ña. 47Ñäädä acu’shänä sotoi wwä eta’jäcä Judheea ñanno Caadideea ña Jesuuquidiito weejö’jödö, töwö cöntämä yaawä Jesuuquidiito döiña; cönä’döaacä chäwwä:
—Ma’che jaadä; önnedö adoncata. Wäämanääje na; quee cönä’döaacä.
48Jesuuquidiito cönä’döaacä chäwwä:
—Ene’ju’tojo mmaja, aashichaato mmaja, aneene’da aweiya’comjäcä ecaanö’jai’cha maato; quee.
49Ñäädä acu’shänä sotoi cönä’döaacä chäwwä:
—Ma’da’cä ma’che, Owaanomaanei, önnedö ääma’dadä.
50Yaawä Jesuuquidiito cönä’döaacä:
—Äjääne, ännedö ääma’da na; quee cönä’döaacä.
Ñäädä cöneecamjöi Jesuuquidiito a’deddu; cöntämä yaawä. 51Ääma tai töötädaawä töwö tanoonö jadäiñe cönoojodöicho. Ñanno cönä’döa’to chäwwä:
—Ännedö ääma’da na; quee.
52Yaawä töwö cöneecamma’joicho:
—¿Äsha shii weichö cönaadoncai? quee cönä’döaacä.
Tönwanno cönä’döa’to:
—Coiñadä, anunnaque yei’jeje wedööcö cuncuna’mai; quee.
53Ñäädä yuumö dhowaanäcä cönä’jaacä yaawä yäätä shii weichö Jesuuquidiito wa’deuwö’jödö, “Ännedö ääma’da na;” quee yä’dö’jödö. Töwö Jesuuquidiito cöneecamjöi yaawä, tameedä yä’jimmä’tädö mmaja.
54Yää cönä’jaacä aacädeeto täneemö tödöödö Jesuuquidiito wwä Judheea ñano’jödö Caadideea ña töwä’döa’jäcä.
നിലവിൽ തിരഞ്ഞെടുത്തിരിക്കുന്നു:
JUAN 4: MCH
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2014 Reservados todos los derechos
