JUAN 5
5
Cädäijato adonca’jödö Weteesada ña
1Yää ’jeje Jesuuquidiito cönennacai chea Jeduusadén ña, judhíocoomo comjedensiyai’chädö tödöödö döiña. 2Yäätä Jeduusadén ña cönä’jaacä tuna wa’donnatoojo choonecaajä. Amoinche’da yää cönä’jaacä oweeja etöijatoojo nata’tadö jäcä. Yää chu’jä eewedeeo a’deucwe töne’tä cönä’ja’to Weteesadaaje. Yää awoodhecääcä cönä’jaacä ijaatoodea amääajä. 3Yää amääajä tawä töweiye cönä’ja’to jooje cädäija’como, tänuuquemjöncomo mmaja, secumja’como mmaja, anönnä’ja’como mmaja. Tönwanno tönwomo’que cönä’ja’to tuna wätu’medö. 4Tucu’näque amoode töwä’tä töweiye cönä’jaacä caju ñanno yää chu’jä aca, tuna e’jimi’che. Yaawä ñäädä awa’deeto tuna wä’jimi’chödö acaano we’ducca’jödö töweeja’ca cönä’jaacä tadoiñe, cädäije’da. 5Yäätä cönä’jaacä cädäijato, aacä wedu mmädä aacä sotooto wedu aneejodö’da chäädäichö cönä’jaacä. 6Jesuuquidiito cöneeneaacä ñäädä wemo’taajä. Töwö dhowaanäcä cönä’jaacä numa cädäije yeichö; cönä’döaacä chäwwä:
—¿Awaadonca’se manä?
7Ñäädä cädäijato cöneccujä’acä:
—Ö’wa’tänei ’je’da weneene, chu’jä aca yeenö’tänei tuna wä’jimi’chödaawä. Wammödaawä dea mma anejja töwe’ducca weneene yoowajo; quee cönä’döaacä.
8Jesuuquidiito cönä’döaacä chäwwä:
—Aanöncä, adhe’wötö shoomacä; äjääne; quee.
9Yaawä dea mma ñäädä cädäijato cönaadoncai. Tä’wötö shoomadö’jo cöntämä yaawä. Yää cönä’jaacä wäädeetatoojo anooto. 10Yääje yeijäcä judhíocoomo cönä’döa’to ñäädä cädäijato’jödö wwä:
—Wäädeetatoojo anooto dajaane mädä eduuwa; adhe’wötö adääjai’cha ma.
11Töwö cönä’döaacä chäwwäiñe:
—Ñäädä yaadoncaichö dea yääje nä’döaanä öwwä: “Adhe’wötö shoomacä; äjääne;” quee nä’döaanä öwwä; quee cönä’döaacä ñäädä dhanwa cädäijato’jödö.
12Tönwanno cöneecamma’joicho yaawä:
—¿Änääcö yääje nä’döaanä äwwä: “Adhe’wötö shoomacä; äjääne;”? quee.
13Ñäädä dhowaanäcä’da cönä’jaacä tadoncanei’jödö, jooje soto wei’jocoomo weijäcä yäätä, Jesuuquidiito wootone’tä’jödö weijäcä mmaja yo’tacaiñe. 14Äcuude Jesuuquidiito tönaadonca’jödö cöneejodöi Wanaadi weichojo taca; cönä’döaacä chäwwä:
—Amäädä töwaadonca ma eduuwa. Conemjönö mma männöi’che eduuwa, anejja conemjönö’cä jaiñoone äjääcä e’ducca’no yaawä; quee cönä’döaacä Jesuuquidiito chäwwä.
15Ñäädä dhanwa cöntämä; judhíocoomo wwäiñe cöneecammai yaawä Jesuuquidiito tadoncanei’jödööje yeichö. 16Yääje yeijäcä judhíocoomo yuunaca’se töweiye cönä’ja’to Jesuuquidiito. Tönwanno ema’se cönä’ja’to yää tönnöe yeijäcä wäädeetatoojo anooto awä. 17Yaawä Jesuuquidiito cönä’döaacä chäwwäiñe:
—Yääje yeichaame Jaaja tönnöe dea; öwö mmaja tödöödöje dea eijai wa; quee.
18Yääje yeijäcä judhíocoomo jooje’cä jeene Jesuuquidiito ema’se cönä’ja’to, wäädeetatoojo anooto awä tödööemjönö tönnöe yeijäcä, Wanaadi wa’cotooje töwäätä’tä yeijäcä mmaja iiñedööje töwäätä’tädö que.
Jesuuquidiito Tumö acä äänönge yeichöcoomo
19Yaawä Jesuuquidiito cönä’döaacä chäwwäiñe:
—Chäänönge yääje wä’döa äwwäiñe, Wanaadi nnedö töwoije mma tödööjai’cha na, Tumö nödöödö eneedö’jo mmaane tödööjai. Tameedä Tumö nödöödö tönnöe mmaja Iiñedö. 20Jaaja Tönnedö nijumma; chäwwä töneenejo weneene tameedä tönnödö. Mädä tönnöe wääneneedö e’jodhaato’cä mmaja töwö neneeja’de öwwä, töwääcatoncaane määcatoncatäiye. 21Jaaja yä’ja’a’como tönaadonca, yeichöcoomo tunu’e. Mädääje mmaja Iiñedö tumjummadö wwäiñe tunu’e yeichöcoomo. 22Jaaja soto anemmenca’da na. Töwö Tönnedö wwä cuntui soto emmencato’como. 23Yääje yeijäcä tameedä soto tönoiñe eneejai ñaato ñäädä Iiñedö, Yuumö nontädö wa’cä mmaja. Ñäädä Iiñedö ñontäneijönö Yuumö onnontä’da mmaja na dea, ñäädä Iiñedö anontänei’jödö.
24“Chäänönge yääje wä’döa äwwäiñe, ñäädä ya’deddu etaanei, yaanontänei’jödö ecaanö’nei, ñäädä wwä töweiye na yeichö töwaatamemjönö. Ñäädä töwännanö’emööje’da na; töwö töwäämamjönööje töwä’döe yaawä töwäämaamöje töweichö jonno. 25Chäänönge yääje wä’döa äwwäiñe, chu’nädö aca wä’dönääje na eduuwa yä’ja’a’como nönga’como wwä etaatojo Wanaadi nnedö a’deddu. Ñanno etannamo’jödö wwäiñe töweiye na’de yeichöcoomo. 26Jaaja wwä töweiye do’ta u’tojo. Töwö Tönnedö wwä cuntui chea do’ta u’tojo. 27Töwö cuntui chea chäwwä soto emmencato’como, Soto nnedööje yeijäcä. 28Mädä wa’deuwödö jäcä määcatoncatäi; aneedawä na’de äwa acancomo wwä etaatojo Soto nnedö a’deddu. 29Tönwanno naanöngaato’de yaawä täwaadöcoomo acanno. Ñanno aashichaato tödönnamo’jödö naanöngaato’de yeichöödäje töweicho’comooje; conemjönö tödönnamo’jödö mmaane naanöngaato’de töwännanö’to’comooje daja.
Jesuuquidiito jäcä ecammannamo
30“Öwö jäädudu que mma tödööjai’cha wa. Wanaadi wwä yaanontädö woije tönemmenca öwö. Chäänönge öwö nemmencadö. Öwö woije mma ännö’da wa, ñäädä Jaaja, yaanontänei’jödö woijeene. 31Öwö jääcä dea wääcamma’jäcä chäänönge’da wääcammadö eijai ña. 32Anejja töweiye na jääcä töwa’deuwemö; yoowanääcä na chäänönge yeichö töwö ya’deuwödö jääcä. 33Änwanno Juan Wautiita mecamma’jojootäne; töwö chäänönge cöneecammaacä äwwäiñe. 34Soto wwä yeecammajäätödö tujunne’da yeichaame. Edääje mmädä yääje wä’döaanä äwwäiñe, äwääwanaacadööcomo wetä. 35Juan cönä’jaacä adhaawa nönge; töwö tawaane tönweijo cönä’jaacä. Änwanno a’dhe ta’cwaiñe mä’ja’quene töwö tönweijo cönä’ja’dawä. 36Töweiye öwwä na Juan necamma’jödö e’jodhaato jaiñoone. Mädä Jaaja waanontädö tönnöe wääneneedö nene’ju’ja Jaaja yaanontänei’jödööje yeichö. 37Ñäädä Jaaja, yaanontänei’jödö dea, töneenejo weneene tanoonöje weichö. Änwanno aneeta’da maato dha’deddu, aneene’da mmaja maato dea töwö. 38Töwö dha’deddu ’je’da na äwwäiñe, dhanoonö aneecamjö’da maatoodö naane’. 39Änwanno Wanaadi a’deddu imennaajä töna’de’tä määnetääne; yää a’de’tädö que mma aweichöcoomo chaana’cajai aweiyaatäiñe. Öwö jääcä ecammajä’taame yää imennaajä 40öwwadäädä aweejö’seiñe’da maato yää aweichöcoomo wutuiye yaawä.
41“Aashicha jääcä soto wa’deuwödö tujunne’da öwwä na. 42Yoowanääcä maato a’que äwwäiñe yeichö Wanaadi jummadö. 43Jaaja woije weejö’jödö weichaame änwanno jumma’da maato. Anejja töwoijato we’ajä yeiya’jäcä mmaane ecaanö’jai maato. 44¿Aaquene änwanno mmädä maneecanö’tädööde’ ? Änwanno awaacö’comje naadö naane’ aashicha soto wa’deuwödö äjääcäiñe, Wanaadi yäätonno ’jemjönö necammadö ämjumma’da. 45Chäänönge’da aweichöcoomo Jaaja wwä adheecammajä’täiñe’da wa’de öwö. Moisé mmaane adheecammaato’de, ñäädä mecaanö’atoodö. 46Moisé nimennä’jödö töneecanö’e meicho’jo öwö mmaja cäcaanö’tädö dea, öwö jääcä imennäätö’da chäwwä. 47Änwanno immennä’jödö aneecamjö’da maatoodö naane’, ¿aaquene mmaja ya’deddu maneecanö’tädööde’ ? quee cönä’döaacä Jesuuquidiito judhío wwäiñe.
നിലവിൽ തിരഞ്ഞെടുത്തിരിക്കുന്നു:
JUAN 5: MCH
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2014 Reservados todos los derechos
