मत्ती 13

बीह् बाणे वाले रा उदारण

1तिस्सी रोज यीशु घरे का निकली करी झील्ले रे कनारे जाई करी बेई गे। 2बड़े भरी मणू यीशु रे चारो पास्से कठ्ठी गे इधेरे तांइ से किस्ती पर चढ़ी गे अते लोक्कां री भीड़ कनारे खड़िह् रेह्ई। 3यीशु ने उन्हा कने उदारण देई करी मती सारी गल्लां कित्ती, उन्हा ने बोल्लेया कि, इक्क किसान भी बाणे निकलेया। 4अते भी बांदे-बांदे किच्‍छ भी सड़का रे कनारे पर पेई गे अते से पैरां हेठ आई गे, ते चिड़ू-पखेरुआं ने से भी चुग्गी लै। 5किच्‍छ पत्थरा वाली मिट्टी पर पे, जित्ते तिन्हा जो जादा मिट्टी नी मिल्ली अते डूग्गी मिट्टी नी मिलणे री वजह कने से झट उगी आये। 6पर जां सूरज निकलेया तां से फुक्कीह् गे, ते जड़ नी पकड़ने री वजह कने से सुकी गे। 7अते किच्‍छ झिल्लां बिच पे, अते से बदधे तां बदधे पर झिल्ला ने तिन्हा जो दब्बी दित्तेया। 8पर किच्‍छ ठीक मिट्टी पर पे, अते फल्ल भी लियाये, किच्‍छ सौ गुणा, किच्‍छ साठ्ठ, अते किच्‍छ तीह् गुणा। 9जे सुनणा चाए, से ध्यान कने सुणे!

उदारण दसणे रा मकसद

10अते चेल्‍लेयां ने यीशु का आई करी बोल्लेया, तुसा उन्हा कने उदारणां बिच गल्लां किजो करेया करदे हिन? 11यीशु ने जवाब दित्तेया, तुसा जो स्वर्ग रे राज रे भेदां री समझ दित्ती गे री है, पर इन्हा जो नी। 12किजोकी जिस का घट्ट है, तिसजो दित्तेया जाणा अते उस का बड़ा जादा होई जाणा पर जिस का किच्‍छ भी नी है, तिसका जे किच्‍छ है, से भी लेई लित्तेया जाणा। 13मैं तिन्हा कने उदारणां बिच इधेरे तांइ गल्लां करदा किजोकी से दिखदे होए भी नी दिखदे ते सूणदे होए भी नी सूणदे, ते ना समजदे। 14अते तिन्हेरे बारे बिच यशायाह री ए भविष्यवाणी पूरी हुंदी,

तुसा सूणदे तां रैह्णा, पर तुसा री समझ बिच नी आणा, अते दिख्खदे तां रैह्णा, पर तुसा जो किच्‍छ भी सूझणा नी।

15किजोकी इन्हेरे मन मोट्टे होई गेरे हिन, अते ए कन्ना का उच्चा सूणदे हिन, ते इन्हा ने अपणी आख्खियां बांद्द करी रख्खे री हिन ताकि से दिख्खी ना पांन, ते कन्ना का किच्‍छ भी सुणी ना पांन, ते दिल्ल का समजन, अते मेरे पास्से आई जांन, ते मैं तिन्हा जो खरा करां।

16पर धन्न हिन तुसा जे दिखदे सूणदे हिन सूणदे हिन 17किजोकी मैं तुसा रे कने सच बोलदा कि बड़े जणे भविष्यद्वक्ता ने अते भले ते नेक मणूआं ने ए चाया कि जे तुसा दिख्खेया करदे हिन तिसजो दिखण, पर नी दिख्खी पाये, अते जे तुसा सूणेया करदे हिन, सूणन, पर नी सुणी पाये।

उदारण रा मतलब

18अवे तुसा भी बाणे वाले रे उदारण रा मतलब समझो; 19से भी जे रस्ते पर पेया थिया, उसेरा मतलब है कि जां कोई राज रा वचन सूणान्दा अते तिसजो नी समजदा, तां से शैतान आई करी, जे किच्‍छ तिन्हेरे दिलां बिच बाया गे रा थिया, तिसजो से चुराई लिन्दा। 20अते जे भी पत्थरा वाली मिट्टी पर पेया थिया, ए से हिन, जे वचन सुणी करी झट ही खुसी कने उस्सी बेल्ले ही मन्नी लिन्दे। 21पर से अपणे बिच जड़ नी पकड़ी पाणे री वजह कने थोड़ी ही हाण तांइ हुन्दे, अते जां वचन री वजह कने दुख या कोई मुसीबत आंदी तां से झट ही डगमगाई जांदे। 22जे भी झिल्लां बिच पेया थिया, ए से हिन, जे वचना जो सूणदे, पर इस दुनिया री फिकरां अते पैसेयां रा लालच वचनां जो दबी रखदा, अते से कामयाब नी हुन्दे। 23जे ठीक मिट्टी पर भी पे थिये, ए से हिन, जे वचनां जो सूणदे अते समजी करी फल्ल लियान्दे, किच्‍छ सौ गुणा, ते किच्‍छ साठ्ठ, ते किच्‍छ तीह् गुणा।

जगंली बीह् रा उदारण

24यीशु ने तिन्हा लोक्कां जो इक्क होर उदारण दित्तेया, कि स्वर्ग रा राज तिस किसान सांई है जिनिये अपणे खेत्रा बिच खरा बीह् बाये। 25पर जां से सुत्ते रा थिया तां तिसेरा दुश्मण आई करी कणक रे बीह् बिच जंगली बीह् पाई करी चली गेया। 26जां जंगली बीह् बड्डी होई करी बडणे तांइ तैयार होई गई, तां तिस बिच जंगली घा भी लिब्बी। 27ए दिख्खी करी घरे रे नौक्कर ने आई करी अपणे मालक जो बोल्लेया, ओ मालका, कै तुसा अपणे खेत्रा खरा बीह् नी बाया थिया? फिरी तिस बिच जंगली घा कुते का आई? 28तिसने अपणे नौकरांं जो बोल्लेया, ए कुसकी दुश्मण रा कम्म है, नौकरांं ने तिसजो बोल्लेया कै तुसा चाह्‍ंदे कि असी जाई करी तिस जंगली घा जो इकट्ठा करी लेंन? 29पर तिसने बोल्लेया, ना, इय्यां मत करदे, कुदखी इय्यां ना होई जाये कि जंगली घा कठ्ठेरदे-कठ्ठेरदे तुसा तिसेरे कने कणक जो भी कठ्ठेरी लेंन। 30दोनां जो बडणे रे बेल्ले तांइ बधणा देयो, अते बडणे बेल्ले इन्हा जो बडणे वाले जो बोल्गा, पैल्ले जंगली घा जो फुक्कणे तांइ कठ्ठेरी करी बन्नी लै, अते कणक जो मेरे खत्ते बिच इकट्ठा करी दे।

राई रे बीह् रा उदारण

31यीशु ने तिन्हा जो इक्क होर उदारण दित्तेया, कि स्वर्ग रा राज सरेयाँ रे इक्क दाणे रे बराबर है, जिस जो कुसकी मणू ने अपणे खेत्रा बाई दित्तेया। 32से सबणी बीआं का हल्का हुन्दा पर जा बद्धदा तां सब साग पात का बड्डा हुन्दा, अते इदेया बूट्टा बणी जांदा, कि आसमान रे चिड़ू-पखेरु आई करी तिसेरी डालियां पर रैह्‍न्दे हिन।

खमीर रा उदारण

33यीशु ने तिन्हा लोक्कां जो समझाणे तांइ इक्क होर उदारण दित्तेया, “स्वर्ग रा राज आट्टे री तराक्क सांई है, ते जिय्यां थोड़ी जदेई तराक्क पूरी प्रात रे आट्टे जो भी त्राक्की दिंदी तिय्यां ही स्वर्ग रा राज भी थोड़े लोक्कां रे जरिए सारी लोक्कां बिच फैलदा जाणा।”

उदारण रा इस्तेमाल

34ए सब गल्लां यीशु ने उदारण बिच लोक्कां कने बोल्ली, अते बिना उदारण रे यीशु तिन्हा कने किच्‍छ भी नी बोल्दे थिये। 35जे वचन भविष्यद्वक्ता रे जरिए बोल्लेया गेया थिया, से पूरा हो,

मैं उदारण बोलणे तांइ अपणा मुँह खोलणा,

मैं उन्हा गल्लां जो बोलणा जे दुनिया री सुरुआत का लुके रे रेई।

जगंली बीह् रे उदारण रा मतलब

36फिरी यीशु लोक्कां री भीड़ जो छड्डी करी घरे चली गे तां चेल्‍ले आई करी यीशु जो बोल्णा लग्गे, खेत्तर री जंगली घा रा उदारण असा जो समझाई देयो। 37यीशु ने जवाब दित्तेया, “खरे बीह् बाणे वाला किसान मणू रा पुत्तर है, जे मैं ही है, 38खेत्तर दुनिया रे मणू हिन, ठीक बीह् स्वर्ग राज रे मणू हिन, अते जंगली घा शैतान रे मणू हिन। 39अते जिस दुश्मण ने तिन्हा जो बाया थिया से शैतान है, कणक री बाड्डी दुनिया रे अंत जो दर्शांदी, कणक बडणे वाले स्वर्गदूत हिन। 40जिय्यां जंगली घा कठ्ठेरी करी आग्ग बिच फुक्की दित्ती, तिय्यां ही दुनिया रे अंत भी होणा। 41मणू रे पुत्तर, जे मैं ही है, ने अपणे स्वर्गदूतां जो भेजणा, अते तिन्हा मेरे राज बिच का सब पापियां जो अते उन्हा जो, जे पाप करणे री वजह बणदे थिये, तिन्हा जो इकट्ठा करणा। 42अते स्वर्गदूतां ने तिन्हा जो आग्ग रे भठ्ठे बिच पाई दैणा, तित्ते सबने रोणा अते अपणे दान्द पिहिणे। 43तिस बेल्ले धार्मिक लोक्कां ने अपणे परम-पिता रे राज बिच सूरज सांई चमकणे। जे सुनणा चाए, से ध्यान कने सुणे!”

गुप्त धन

44“स्वर्ग रा राज खेत्रा बिच छिपे रे धन्न रे बराबर है जे कुसकी मणू जो मिल्लेया अते तिन्ने खेत्तर बिच लुकाई दित्तेया, अते खुसी रे मारे तिन्ने अपणा सब किच्‍छ बेच्ची करी से खेत्तर खरीदी लेया।”

अनमोल मोती रा उदारण

45“फिरी स्वर्ग रा राज इक्क काम्म-धंदा करणे वाले सांई है, जे ठीक मोतियां री तोप बिच थिया। 46जां तिसजो इक्क कीमती मोती मिल्लेया तां तिसने जाई करी अपणा सब किच्‍छ बेच्ची करी तिसजो खरीदी लेया।”

जाल रा उदारण

47फिरी स्वर्ग रा राज तिस मच्छी पकड़ने वाले बड्डे जाल सांई है, जिस जो समुंद्र बिच पाया अते हरेक किस्म री मच्छियाँ जो बटोरी लेई आया। 48अते जां से जाल मच्छियाँ कने भरी गेया तां मछुआरे तिसजो खिच्ची करी कनारे लेई आये, अते बेई करी खरी-खरी मच्छियाँ जो भान्डेयां बिच इकट्ठा करी लित्तेया अते बेकार मच्छियाँ सूटी दित्ती। 49दुनिया रे अंत बिच भी किच्‍छ इय्यां ही होणा, स्वर्गदूत ने आई करी बुरे लोक्कां जो भले अते नेक मणूआं का बखरा करी के नरक रे आग्ग बिच पाई दैणा। 50बुरे लोक्कां ने तित्ते रोणा अते ने अपणे ददं पीह्णे।

पुराणी ते नौई सीख रा महत्व

51यीशु ने अपणे चेल्‍लेयां का पूच्छेया, कै तुसा ए गल्लां समजे? तिन्हा ने यीशु जो बोल्लेया,

हाँ! 52यीशु ने उन्हा जो बोल्लेया, दिख्खो, इधेरे तांइ हर इक्क शास्त्रि जे मेरे पर विश्वास करदा, से इक्क घर रे मालक सांई है, जे अपणे ज्ञान रे भण्डार बिच का पुराणी ते नौई शिक्षा लोक्कां जो सिखांदा।

नासरत बिच यीशु री बेज्ज़ती

53जां यीशु ए उदारण बोल्ली बैठे, तां से तित्ते का चली गे। 54अते अपणे सहर आई करी सभास्थल बिच तिन्हा जो उपदेस दैणा लगे इस कने हर कोई हैरान होई गेया ते बोल्णा लगे, इसजो इदेयी समझ अते चमत्कारी ताकत कुते का मिल्ली? 55कै ए यूसुफ रा निक्का है? अते कै इसेरी मां रा ना मरियम नी है अते इसेरे भ्यालां रे ना याकूब, यूसुफ, शमौन, यहूदा नी हिन? 56अते कै इसेरी सारी भैणा असा रे बिच नी रेह्न्दी? तां फिरी इसजो ए सब किच्‍छ कुते का मिल्लेया? 57अते उन्हा ने तिसजो अपणाया नी, पर यीशु ने बोल्लेया “इक्क भविष्यद्वक्ता जो अपणे घरे ते अपणे सहर बिच ही इज्जत नी मिलदी।”

58अते यीशु ने तिन्हेरे घट विश्वास री वजह कने तित्ते जादा चमत्कारी कम्म नी कित्ते।

നിലവിൽ തിരഞ്ഞെടുത്തിരിക്കുന്നു:

मत्ती 13: CDHNT

ഹൈലൈറ്റ് ചെയ്യുക

പങ്ക് വെക്കു

പകർത്തുക