If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

तिस्सी रोज यीशु घरे का निकली करी झील्ले रे कनारे जाई करी बेई गे। बड़े भरी मणू यीशु रे चारो पास्से कठ्ठी गे इधेरे तांइ से किस्ती पर चढ़ी गे अते लोक्कां री भीड़ कनारे खड़िह् रेह्ई। यीशु ने उन्हा कने उदारण देई करी मती सारी गल्लां कित्ती, उन्हा ने बोल्लेया कि, इक्क किसान भी बाणे निकलेया। अते भी बांदे-बांदे किच्‍छ भी सड़का रे कनारे पर पेई गे अते से पैरां हेठ आई गे, ते चिड़ू-पखेरुआं ने से भी चुग्गी लै। किच्‍छ पत्थरा वाली मिट्टी पर पे, जित्ते तिन्हा जो जादा मिट्टी नी मिल्ली अते डूग्गी मिट्टी नी मिलणे री वजह कने से झट उगी आये। पर जां सूरज निकलेया तां से फुक्कीह् गे, ते जड़ नी पकड़ने री वजह कने से सुकी गे। अते किच्‍छ झिल्लां बिच पे, अते से बदधे तां बदधे पर झिल्ला ने तिन्हा जो दब्बी दित्तेया। पर किच्‍छ ठीक मिट्टी पर पे, अते फल्ल भी लियाये, किच्‍छ सौ गुणा, किच्‍छ साठ्ठ, अते किच्‍छ तीह् गुणा। जे सुनणा चाए, से ध्यान कने सुणे!

अते चेल्‍लेयां ने यीशु का आई करी बोल्लेया, तुसा उन्हा कने उदारणां बिच गल्लां किजो करेया करदे हिन? यीशु ने जवाब दित्तेया, तुसा जो स्वर्ग रे राज रे भेदां री समझ दित्ती गे री है, पर इन्हा जो नी। किजोकी जिस का घट्ट है, तिसजो दित्तेया जाणा अते उस का बड़ा जादा होई जाणा पर जिस का किच्‍छ भी नी है, तिसका जे किच्‍छ है, से भी लेई लित्तेया जाणा। मैं तिन्हा कने उदारणां बिच इधेरे तांइ गल्लां करदा किजोकी से दिखदे होए भी नी दिखदे ते सूणदे होए भी नी सूणदे, ते ना समजदे। अते तिन्हेरे बारे बिच यशायाह री ए भविष्यवाणी पूरी हुंदी,
तुसा सूणदे तां रैह्णा, पर तुसा री समझ बिच नी आणा, अते दिख्खदे तां रैह्णा, पर तुसा जो किच्‍छ भी सूझणा नी।
किजोकी इन्हेरे मन मोट्टे होई गेरे हिन, अते ए कन्ना का उच्चा सूणदे हिन, ते इन्हा ने अपणी आख्खियां बांद्द करी रख्खे री हिन ताकि से दिख्खी ना पांन, ते कन्ना का किच्‍छ भी सुणी ना पांन, ते दिल्ल का समजन, अते मेरे पास्से आई जांन, ते मैं तिन्हा जो खरा करां।
पर धन्न हिन तुसा जे दिखदे सूणदे हिन सूणदे हिन किजोकी मैं तुसा रे कने सच बोलदा कि बड़े जणे भविष्यद्वक्ता ने अते भले ते नेक मणूआं ने ए चाया कि जे तुसा दिख्खेया करदे हिन तिसजो दिखण, पर नी दिख्खी पाये, अते जे तुसा सूणेया करदे हिन, सूणन, पर नी सुणी पाये।

अवे तुसा भी बाणे वाले रे उदारण रा मतलब समझो; से भी जे रस्ते पर पेया थिया, उसेरा मतलब है कि जां कोई राज रा वचन सूणान्दा अते तिसजो नी समजदा, तां से शैतान आई करी, जे किच्‍छ तिन्हेरे दिलां बिच बाया गे रा थिया, तिसजो से चुराई लिन्दा। अते जे भी पत्थरा वाली मिट्टी पर पेया थिया, ए से हिन, जे वचन सुणी करी झट ही खुसी कने उस्सी बेल्ले ही मन्नी लिन्दे। पर से अपणे बिच जड़ नी पकड़ी पाणे री वजह कने थोड़ी ही हाण तांइ हुन्दे, अते जां वचन री वजह कने दुख या कोई मुसीबत आंदी तां से झट ही डगमगाई जांदे। जे भी झिल्लां बिच पेया थिया, ए से हिन, जे वचना जो सूणदे, पर इस दुनिया री फिकरां अते पैसेयां रा लालच वचनां जो दबी रखदा, अते से कामयाब नी हुन्दे। जे ठीक मिट्टी पर भी पे थिये, ए से हिन, जे वचनां जो सूणदे अते समजी करी फल्ल लियान्दे, किच्‍छ सौ गुणा, ते किच्‍छ साठ्ठ, ते किच्‍छ तीह् गुणा।

यीशु ने तिन्हा लोक्कां जो इक्क होर उदारण दित्तेया, कि स्वर्ग रा राज तिस किसान सांई है जिनिये अपणे खेत्रा बिच खरा बीह् बाये। पर जां से सुत्ते रा थिया तां तिसेरा दुश्मण आई करी कणक रे बीह् बिच जंगली बीह् पाई करी चली गेया। जां जंगली बीह् बड्डी होई करी बडणे तांइ तैयार होई गई, तां तिस बिच जंगली घा भी लिब्बी। ए दिख्खी करी घरे रे नौक्कर ने आई करी अपणे मालक जो बोल्लेया, ओ मालका, कै तुसा अपणे खेत्रा खरा बीह् नी बाया थिया? फिरी तिस बिच जंगली घा कुते का आई? तिसने अपणे नौकरांं जो बोल्लेया, ए कुसकी दुश्मण रा कम्म है, नौकरांं ने तिसजो बोल्लेया कै तुसा चाह्‍ंदे कि असी जाई करी तिस जंगली घा जो इकट्ठा करी लेंन? पर तिसने बोल्लेया, ना, इय्यां मत करदे, कुदखी इय्यां ना होई जाये कि जंगली घा कठ्ठेरदे-कठ्ठेरदे तुसा तिसेरे कने कणक जो भी कठ्ठेरी लेंन। दोनां जो बडणे रे बेल्ले तांइ बधणा देयो, अते बडणे बेल्ले इन्हा जो बडणे वाले जो बोल्गा, पैल्ले जंगली घा जो फुक्कणे तांइ कठ्ठेरी करी बन्नी लै, अते कणक जो मेरे खत्ते बिच इकट्ठा करी दे।

यीशु ने तिन्हा जो इक्क होर उदारण दित्तेया, कि स्वर्ग रा राज सरेयाँ रे इक्क दाणे रे बराबर है, जिस जो कुसकी मणू ने अपणे खेत्रा बाई दित्तेया। से सबणी बीआं का हल्का हुन्दा पर जा बद्धदा तां सब साग पात का बड्डा हुन्दा, अते इदेया बूट्टा बणी जांदा, कि आसमान रे चिड़ू-पखेरु आई करी तिसेरी डालियां पर रैह्‍न्दे हिन।

यीशु ने तिन्हा लोक्कां जो समझाणे तांइ इक्क होर उदारण दित्तेया, “स्वर्ग रा राज आट्टे री तराक्क सांई है, ते जिय्यां थोड़ी जदेई तराक्क पूरी प्रात रे आट्टे जो भी त्राक्की दिंदी तिय्यां ही स्वर्ग रा राज भी थोड़े लोक्कां रे जरिए सारी लोक्कां बिच फैलदा जाणा।”

ए सब गल्लां यीशु ने उदारण बिच लोक्कां कने बोल्ली, अते बिना उदारण रे यीशु तिन्हा कने किच्‍छ भी नी बोल्दे थिये। जे वचन भविष्यद्वक्ता रे जरिए बोल्लेया गेया थिया, से पूरा हो,
मैं उदारण बोलणे तांइ अपणा मुँह खोलणा,
मैं उन्हा गल्लां जो बोलणा जे दुनिया री सुरुआत का लुके रे रेई।

फिरी यीशु लोक्कां री भीड़ जो छड्डी करी घरे चली गे तां चेल्‍ले आई करी यीशु जो बोल्णा लग्गे, खेत्तर री जंगली घा रा उदारण असा जो समझाई देयो। यीशु ने जवाब दित्तेया, “खरे बीह् बाणे वाला किसान मणू रा पुत्तर है, जे मैं ही है, खेत्तर दुनिया रे मणू हिन, ठीक बीह् स्वर्ग राज रे मणू हिन, अते जंगली घा शैतान रे मणू हिन। अते जिस दुश्मण ने तिन्हा जो बाया थिया से शैतान है, कणक री बाड्डी दुनिया रे अंत जो दर्शांदी, कणक बडणे वाले स्वर्गदूत हिन। जिय्यां जंगली घा कठ्ठेरी करी आग्ग बिच फुक्की दित्ती, तिय्यां ही दुनिया रे अंत भी होणा। मणू रे पुत्तर, जे मैं ही है, ने अपणे स्वर्गदूतां जो भेजणा, अते तिन्हा मेरे राज बिच का सब पापियां जो अते उन्हा जो, जे पाप करणे री वजह बणदे थिये, तिन्हा जो इकट्ठा करणा। अते स्वर्गदूतां ने तिन्हा जो आग्ग रे भठ्ठे बिच पाई दैणा, तित्ते सबने रोणा अते अपणे दान्द पिहिणे। तिस बेल्ले धार्मिक लोक्कां ने अपणे परम-पिता रे राज बिच सूरज सांई चमकणे। जे सुनणा चाए, से ध्यान कने सुणे!”

“स्वर्ग रा राज खेत्रा बिच छिपे रे धन्न रे बराबर है जे कुसकी मणू जो मिल्लेया अते तिन्ने खेत्तर बिच लुकाई दित्तेया, अते खुसी रे मारे तिन्ने अपणा सब किच्‍छ बेच्ची करी से खेत्तर खरीदी लेया।”

“फिरी स्वर्ग रा राज इक्क काम्म-धंदा करणे वाले सांई है, जे ठीक मोतियां री तोप बिच थिया। जां तिसजो इक्क कीमती मोती मिल्लेया तां तिसने जाई करी अपणा सब किच्‍छ बेच्ची करी तिसजो खरीदी लेया।”

फिरी स्वर्ग रा राज तिस मच्छी पकड़ने वाले बड्डे जाल सांई है, जिस जो समुंद्र बिच पाया अते हरेक किस्म री मच्छियाँ जो बटोरी लेई आया। अते जां से जाल मच्छियाँ कने भरी गेया तां मछुआरे तिसजो खिच्ची करी कनारे लेई आये, अते बेई करी खरी-खरी मच्छियाँ जो भान्डेयां बिच इकट्ठा करी लित्तेया अते बेकार मच्छियाँ सूटी दित्ती। दुनिया रे अंत बिच भी किच्‍छ इय्यां ही होणा, स्वर्गदूत ने आई करी बुरे लोक्कां जो भले अते नेक मणूआं का बखरा करी के नरक रे आग्ग बिच पाई दैणा। बुरे लोक्कां ने तित्ते रोणा अते ने अपणे ददं पीह्णे।

यीशु ने अपणे चेल्‍लेयां का पूच्छेया, कै तुसा ए गल्लां समजे? तिन्हा ने यीशु जो बोल्लेया,
हाँ! यीशु ने उन्हा जो बोल्लेया, दिख्खो, इधेरे तांइ हर इक्क शास्त्रि जे मेरे पर विश्वास करदा, से इक्क घर रे मालक सांई है, जे अपणे ज्ञान रे भण्डार बिच का पुराणी ते नौई शिक्षा लोक्कां जो सिखांदा।

जां यीशु ए उदारण बोल्ली बैठे, तां से तित्ते का चली गे। अते अपणे सहर आई करी सभास्थल बिच तिन्हा जो उपदेस दैणा लगे इस कने हर कोई हैरान होई गेया ते बोल्णा लगे, इसजो इदेयी समझ अते चमत्कारी ताकत कुते का मिल्ली? कै ए यूसुफ रा निक्का है? अते कै इसेरी मां रा ना मरियम नी है अते इसेरे भ्यालां रे ना याकूब, यूसुफ, शमौन, यहूदा नी हिन? अते कै इसेरी सारी भैणा असा रे बिच नी रेह्न्दी? तां फिरी इसजो ए सब किच्‍छ कुते का मिल्लेया? अते उन्हा ने तिसजो अपणाया नी, पर यीशु ने बोल्लेया “इक्क भविष्यद्वक्ता जो अपणे घरे ते अपणे सहर बिच ही इज्जत नी मिलदी।”
अते यीशु ने तिन्हेरे घट विश्वास री वजह कने तित्ते जादा चमत्कारी कम्म नी कित्ते।

കേൾക്കുക मत्ती 13