Yoane 7
7
Awirina Yesu azanga idapase
1Fuo agi apai re Yesu ki nita Gariraya yo; bambiko ko akpi nga nyemu ta Yuda yo te, bambiko aYudo agbata ko ka imo ko. 2Were ga aYudo pumbo, nga gu pumbo nga ga abasura, si ambeda. 3Awirinako ki nimo ka ya fu ko, “Mo gúari erẽ ki ndu ku Yuda yo, gamo abawiriki bi gu gamo apai mo amanga ha tigayo. 4Bambiko a nga boro sa namanga pai ni gbuko, ni kpi nyemu i ini ni gbayaga te. Si ngia mo namanga agi apai re, mo yúgu tiro fu aboro zegino.” 5Bambiko awirinako aida nga pa ko ate. 6Yesu ki nimo ka ya fu yo, “Ragore ata da nga te; ono ragoroni nada a waragoagira. 7Ka aboro sogo nga roni zegino te; mi i asoga re, bambiko mi nga dezire yo; ya gayo apai nga gbegberẽ pai. 8Oni ndú sa pumbo; mi ata ndu nga sa gi pumbo te re; bambiko ragore ata da nga te.” 9Ko ki nye kina Gariraya yo, ko nagumba agi apai fu yo re.
Yesu pati pumbo abasura
10Ono ho awirinako andu ni sa pumbo, ko ki ndu a tigako tie, gbayaga te, si adu wa si ni gbuko. 11AYudo ki nimo ka gbata ko kporo pumbo yo, ki ya, “Ko wari?” 12I ki nigumba rimoko dagba yo bakere. Agu yo ki ya wẽ, “Wene kumba nga ko”; akura yo ki ya wẽ, “Wo te, ko naingisa rimbasa aingisa.” 13Were a nga boro sa nagumba pa ko gbayaga be gunde aYudo te.
14Ho pumbo ada ni bangbanda Yesu ki ndu ku rogo yekaru yo, ki yugu pai. 15Si ki nimo ka iriwo airiwo ti aYudo, i ki niya, “Gi kumba re ko awiri pa ina pa apai wãi, wa ko awirika nga pai ya?” 16Yesukinimo ka karaga ha fu yo, ki ya, “Gi yugopai nga gimi te, ono si nga ga gu ko nakedi re. 17Ka boro kpi nyemu ka amanga wa Mbori akpi nyemu he, ni aina pa yugopai, watadu si naye yo du Mbori ni, na mi nagumba ha ni tire. 18Gu ni ka gumba pai ni tini ni nakpi nyemu gani taarimo; ono gu ni ka kpi nyemu ga gu ko taarimo nakedi ni, ni du ni irarengo, irairapai ti ni te. 19Ati Mose afu rugute fu roni, a nga gu ni sa dagba roni yo namanga sangba rugute te? Tipagine oni agbata re ti ni ka imo re?” 20Rimbasa ki karaga ha ki ya, “Daimona ti ro! Da nagbata ro ka imo ro?” 21Yesu ki karaga ha fu yo ki ya, “Mi amangi pai sa, si ki iriwo airiwo ti roni dũ. 22Mbiko gere Mose afu yeratise fu roni bambiko si aenga nga ti Mose te, ti kina aba; oni nayera boro rago sabiti. 23Ka i yere boro rago sabiti, ka ni agu nga auru ga Mose rugute ya; oni zingi fere, bambiko mi abatasi kumba rago sabiti? 24Ka oni sápu nga ngbanga ni agba ha ya, oni sápu ngbanga ni ruru ngbanga.”
Kristo du re?
25Agu yo ki nimo ka ya dagba yo nga aboro Yerusarema “A nga ko du re nga gu ko i agbata ko ka imo ko te? 26Oni ngere, ko nafura afura gbayaga, ka i agumba nga pai fu ko wa sa ya. Azogokporo ini he ni rengo ya Kristo nga gi kumba re? 27Ono ani ini ho gi kumba aye ni re; ono ho Kristo ka ye ni, a nga boro sa nikaina ho ko aye ni te.” 28Yesu ki nimo ka paa ku ari rogo yekaru yo, wa ko ayugo pai ki niya, “Oni ini re, ki ini ho mi aye ni a; mi aye nga ni tire te, gu ko nakedi re ko nga ndikidi Mbori, gu ko oni aina nga ko ya. 29Mi ini ko; bambiko mi du yo du ko ni, ko nakedi re.” 30I ki nikpi nyemu ka zia ko; ono a nga boro sa namoi beni ti ko te, bambiko ragoko ada nga ho te. 31Ono agu yo aidi pa ko ni dungu yo dagba rimbasa yo; i ki ya, “Ho Kristo ka ye ni, ko amanga agu apai i aina pai ti ni si ki susi gu mangi gi kumba re?”
Abaziaboro akpi nyemu ka zia Yesu
32AFarusi ki gi pa rimbasa nigumba rimoko tipa agi apai re; abairamotumo na aFarusi i ki kedi abaziaboro i zi ko. 33Yesu ki nimo ka ya, “Ani naima na oni ngbutuko, mi ki ndu koyo du gu ko ni nakedi re. 34Oni agbáta re, ka oni abí nga re ya; ho du mi ni, ka oni ye nga ku ho te.” 35AYudo ki nimo ka ya dagba yo, “Wari gi kumba ka ndu ku ho ni re ka ani abi nga ko ya? Ko andú koyo du Gbandakagbandaka aboro ni dagba aGiriki ki yugu pai fu aGiriki? 36Gini pai nga gi ko agumba re ya wẽ, ‘Oni agbáta re ka oni abí nga re ya’; ‘Ho du mi ni, ka oni ye nga ku ho te’?”
Gugaabi unga ime
37Were ni gu yangara rame, nga bakere rago pumbo, Yesu ki ru ki nipoi ku ari, niya, “Si ngia gomoro ime namanga boro, ni ye kono du mi ni, ki mbiri he. 38Gu ni ka idi pa re, wa Ziazia Kekeapai aya, ‘Di unga ime afuka afuka vuni yo’.” 39Ko agumba gere tipa gu Toro, agu yo ka idi pa ko ka dia ko, bambiko i afu nga Toro ho te; bambiko Yesu adu nga ho ni taasitaasi ko te.
Aboro akparaka
40Ho agu yo agi he ni dagba rimbasa yo, i ki nimo ka ya, “Ko nga gu nebi re ni rengo.” 41Akura yo ki ya, “Kristo du.” Ono agu yo ki ya “E! Kristo ye Gariraya yo? 42Ziazia Kekeapai aya nga Kristo aye ni ngbatunga Dawidi. Betereme yo rogo gu kporo yo Dawidi adu ni te?” 43Si du rimbasa akparaka ti ni bambiko ko. 44Agu yo ki nikpi nyemu zia ko; ono a nga boro sa namoi beni ti ko te.
Abazogo azanga idapase
45Abaziaboro ki nimo ka ye koyo du abairamotumo ni na aFarusi; i ki ya fu yo. “Tipagine oni aye nga ti ni na ko ya?” 46Abaziaboro ki karaga ha ki ya, “Boro agumba nga pai mbata wo te.” 47AFarusi ki nimo ka karaga ha fu yo ki ya, “I ingisi roni a? 48Abazogo aboro idi pa ko na aFarusi? 49Ono gi rimbasa re nga agu yo aina nga rugute ya i tiwa yo.” 50Nikodemo ki ya fu yo nga gu ko naye koyo du ko ni mbata, nidu dagba yo, 51“Gaani rugute nisapu ngbanga boro, mbata si nikagia kina sangbani ki ini gu pai mangi ni?” 52I ki karaga ha fu ko ki ya, “Boro Gariraya nga mo a tigamo? Mo gbáta ha, ki bi he ya nebi aenga nga Gariraya yo te.”
De i azi ri na pa bari
[ 53Aboro ki ndu andu ku kpuyo yo dunduko.
നിലവിൽ തിരഞ്ഞെടുത്തിരിക്കുന്നു:
Yoane 7: ZB1978
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Sainte Bible en Zande © Alliance Biblique Universelle, 1978.
