Yoane 6
6
Yesu arigi aboro 5,000
(Mt. 14:13-21; Mk. 6:30-44; Rk. 9:10-17)
1Fuo agi apai re Yesu ki ndu ku mbiti gu baime yo nga Gariraya, nga gu baime nga Tiberia. 2Bakere rimbasa ki nipe ko, bambiko i abi agu apai i aina pai ti ni ko amanga fu agu yo nadu na kaza. 3Yesu ki biti ku ri bagangara yo, ko ki sungu yo na gako abawiriki. 4Were susiri, nga ga aYudo pumbo, si ki nimbedi. 5Yesu ki nimo ka tuka bangiriko, ki bi bakere rimbasa si niye, ko ki ya fu Firipo, “Wari ani ka ngbe udiudi kpokuta ni, agi aboro ri he re?” 6Ko agumba gere ni asada ko, bambiko ko aini gu pai aina ni tiko ko ka manga. 7Firipo ki karaga ha fu ko ki ya, “Ka rukutu marã feda du 200 tipa udiudi kpokuta i rogo ho rukutu dunduko, si rengbe nga na yo te.” 8Gu gako bawiriki ki ya fu ko sa, nga Andarea, wirina Simona Petero, 9“Gude du re, na udiudi kpokuta ngungo he wa ga mapunga be ko bisue na atĩo ue; ono he nga gere fu dungu aboro wa gere?” 10Yesu ki ya, “Oni yá fu aboro i susungu.” Were bakere nvuo nadu rogo gu ba re. Akumba ki nimo ka susunga, i adu wa ka i du 5,000. 11Yesu ki nimo ka roga udiudi kpokuta; ki fuku he fu agu yo nasusungu, ko nafu atambuahe; ki mangi atĩo a wo wa i akpi nyemu he. 12Ho i ambiki he ni, ko ki ya fu gako abawiriki, “Oni dúngura gu mbusuruhe nye, ka si íngi nga wa sa ya.” 13I ki nimo ka dungura ha, ki hisi baga bawe na ue ni gu mbusuru udiudi kpokuta ngungo he wa ga mapunga nadu bisue, nanye be agu yo nari he. 14Ho aboro abi gu pai ni i aina pai ti ni ko amangi re, i ki nimo ka ya, “Gi kumba re ko nga gu nebi ni rengo naye ku zegino!”
15Yesu ki nimo ka ina ha ya i nikaye ka zia ko, ka sa ko ni bakindo, ko ki di tiko berewe ku ri bagangara yo ni sa ko.
Yesu andu ri baime
(Mt. 14:22-27; Mk. 6:45-52)
16Ho nyemu ada ni, gako abawiriki ki zorõ kuti ngba baime; 17i ki zorõ ku kurungba yo, i ki nisi baime ku Kaparanauma yo. Rago ki biri, ka Yesu ata ye nga koyo du yo ni ya. 18Baime ki nisungbura be bayuge naaya. 19Ho i aruga ha ni wa ka akirometere adu bisue watadu sita, i ki bi Yesu ko nita ri baime, niye koyo du kurungba ni mbembedi, i ki nigunde. 20Ko ki ya fu yo, “Mi du; ka oni gúnde nga ya.” 21I ki nimo ka ida pa dia ko ku gume ku kurungba yo. Kurungba ki da ada ni ba sa ti ngba gango ime ho i andu ku ho ni.
Aboro agbata Yesu
22Rago ki ya giri gu rimbasa naru mbiti baime yo i abi nga kura kurungba yo wa sa te, kina gu sa, ka Yesu azorã nga na gako abawiriki ku kurungba yo ya, gako abawiriki andu andu ni sa yo. 23Ono akurungba aye Tiberia yo mbembedi ku ho i ari kpokuta ni, Gbia nafu atambuahe. 24Ho rimbasa abi nga Yesu ni ya, na gako abawiriki a ya, i ki nimo ka zorã ni tiyo ku kurungba yo, i ki ta ye ku Kaparanauma yo, nigbata Yesu.
Yesu nga gu kpokuta nga ga unga
25Ho i abi ko ni ku mbiti baime yo, i ki ya fu ko, “Bayugupai mo aye kono ni gini rago?” 26Yesu ki karaga ha fu yo ki ya, “Mi nagumba ha fu roni, ni rengo, ni rengo, oni agbata nga re bambiko oni abi agu apai i aina pai ti ni te, kina gu oni ari he, ki mbiki. 27Ka oni mángi nga sunge tipa gu riahe nago ago ya, kina gu riahe nye anye sa gu nyenye unga, Wiri boro ka fu fu roni. Bambiko Ba, nga Mbori, nangia dezireko.” 28I ki nimo ka ya fu ko, “Ani mangi wãi, ka manga ga Mbori sunge?” 29Yesu ki karaga ha fu yo ki ya, “Gi nga ga Mbori sunge re, nga oni idi pa gu ko ko akedi ko.” 30I ki nimo ka ya fu ko, “Gini gu pai i aina pai ti ni mo amanga tie, ani In he, ki idi pa ro? gini pai mo amanga? 31Abarani anari manu ngbakungba yo; wa du he ni keke he, ya, ‘Ko anafu riahe fu yo ngbangbaturũ yo i niri he’.” 32Yesu ki nimo ka ya fu yo, “Mi nagumba ha fu roni, ni rengo, ni rengo, Mose afu nga gu kpokuta re fu roni ngbangbaturũ yo te; ono Buba nanafu gu ndikidi kpokuta fu roni ngbangbaturũ yo. 33Bambiko ga Mbori kpokuta nga gu naye ngbangbaturũ yo, nifu unga fu aboro zegino.” 34I ki nimo ka ya fu ko, “Gbia, mo nifú gi kpokuta fu rani re a waragoagira.”
35Yesu ki ya fu yo, “Mi nga gu kpokuta nga ga unga. Gu ni ka ye kono du mi ni, gomoro mangi nga ni te, gu ni ka idi pa re gomoro ime mangi nga ni berewe te. 36Ono mi aya fu roni, oni bi re, ka oni aida nga pa re ya. 37Agu yo dunduko Buba ka fu yo fere i ayé aye kono du mi ni; gu ni ka ye kono du mi ni mi do nga ni wa sa te. 38Bambiko mi aye nga ngbangbaturũ yo ka manga wa mi akpi nyemu he te, ono wa kina gu ko akpi nyemu he nakedi re. 39Gere nga gu gu ko akpi nyemu he nakedi re, nga agu yo dunduko fu ko yo fere mi aíngisa nga gu ni wa sa te, mi azíngisa yo azingisa ti yangara rame. 40Bambiko gi Buba akpi nyemu he re, nga gu ni ka bi Wiri, ki idi pa ko, nyenye unga ka du be ni, mi azíngisa ni ti yangara rame.”
41AYudo ki nimo ka gumba rimoko, bambiko ko aya, “Mi nga gu kpokuta naye ngbangbaturũ yo.” 42I ki ya, “A nga Yesu du re, nga wiri Yosefa, ini ani bako na nako te? Wiri ko pa ya wãi awere, ‘Mi aye ngbangbaturũ yo?’” 43Yesu ki karaga ha fu yo ki ya, “Ka oni gúmba nga rimo dagba roni ya. 44A nga boro sa ka ye kono du mi ni gbua te, kina Buba nakedi re ka gbe ni. Mi azíngisa ni ti yangara rame. 45Si ni keke he wa anebi ake he, ya, ‘Mbori ayugo pai ayugo fu yo dunduko.’ Agu yo dunduko gi gu pai dũ yo du Buba ni, ki wiriki he, i niye kono du mi ni. 46Boro abi nga Buba abi te, kina gu ni ye yo du Mbori ni, ni bi Ba. 47Mi nagumba ha fu roni, ni rengo, ni rengo, gu ni ka du na idapase nyenye unga du be ni. 48Mi nga gu kpokuta nga ga unga. 49Abaroni anari manu ngbakungba yo, i akpiki akpika. 50Gi kpokuta re nga gu naye ngbangbaturũ yo, boro ri he, ka ni akpi nga ya. 51Mi nga gu unga kpokuta naye ngbangbaturũ yo. Ka boro ri gi kpokuta re, ni nye anye ni ungani kindi; ii, gu kpokuta mi ka fu si nga pasiore, tipa gu unga nga ga aboro zegino dũ.”
52AYudo ki nimo ka zinga dagba yo, niya, “Ka gi kumba wiri pa fu pasioko fu rani wãi re ani ri he?” 53Yesu ki nimo ka ya fu yo, “Mi nagumba ha fu roni, ni rengo, ni rengo, ka oni ari nga pasio Wiri boro ki mbiri kureko ya, unga du nga kpotoroni yo te. 54Gu ni ka ri pasiore ki mbiri kurere nyenye unga du adu be ni; mi azíngisa ni azingisa ti yangara rame. 55Bambiko pasiore nga riahe ni rengo, kurere nga mbirimbirihe ni rengo a. 56Gu ni ka ri pasiore ki mbiri kurere ni ta nye kpotore yo, mi ninye kpotoni yo. 57Wa Buba du ni ungako akedi re, mi ni ungare mbiko Buba; wo gu ni ka ri re, ni du a ni ungani mbiko re. 58Gi nga gu kpokuta naye ngbangbaturũ yo re. Si wa aba anari he ki nikpiki akpika te; gu ni ka ri gi kpokuta re ni nye anye ni ungani kindi.” 59Ko agumba agi apai re bambutiria yo, wa ko ayugu pai Kaparanauma yo.
Pa nyenye unga
60Ho dungu gako abawiriki agi gi ni re, i ki nimo ka ya, “Nyanyaki pai nga gere; da ka gi he?” 61Yesu ki niini he kpotoko yo ya gako abawiriki nagumba rimoko tipa ha, ko ki ya fu yo, “Gi oni akota be he re? 62Ka oni bi Wiri boro ko niga ku ho ko adu ni mbata wãi tie? 63Si nga toro nafu unga; pasio amanga nga he wa sa te; agu apai gumba mi fu roni si nga toro, na unga. 64Ono agu yo kina dagba roni adu nga na idapase ya.” Bambiko Yesu aima ina agu yo mbata naida nga pa ko ya, na gu ni nikakusa ko. 65Ko ki ya, “Si du ya mi ti ni fu roni, a nga boro sa ka ye kono du mi ni gbua te, kina gu ka Buba fu he afu fu ni.”
66Dungu gako abawiriki ki karaga tiyo be gere, ka i ata nga na ko berewe ya. 67Yesu ki nimo ka ya fu agu yo nadu bawe na ue, “Oni naguari a tigaoni?” 68Simona Petero ki karaga ha fu ko ki ya, “Gbia, ani andú koyo du da ni? Wa du mo du agu apai be ro nga ga nyenye unga. 69Ani idi pa ro ki ini ya mo nga gu Ziazia Ko nga ga Mbori ko.” 70Yesu ki karaga ha fu yo ki ya, “Mi asia nga roni asia du bawe na ue te, gu ni dagba roni yo nga bakitingbanga?” 71Were ko agumba ha tipa Yuda nga wiri Simona Keriota, bambiko ko nangia gu ko nakusi ko, nanidu dagba agu yo yo nanidu bawe na ue.
നിലവിൽ തിരഞ്ഞെടുത്തിരിക്കുന്നു:
Yoane 6: ZB1978
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Sainte Bible en Zande © Alliance Biblique Universelle, 1978.
