Yoane 12
12
Mbeda Yesu Betania yo
(Mt. 26:6-13; Mk. 14:3-9)
1Rame ki du sita mbata pumbo susiri nikada Yesu ki ye ku Betania yo, yo Razaro adu ni, gu ko Yesu azingisi ko be kpio. 2Si du i amangi riahe ti ni yuru fu ko yo. Marata ki nifu he; Razaro ki du dagba agu yo nasungu na ko pati riahe. 3Maria ki nimo ka dia wene nzeme fuõngua wa bebere ritere, kii genoho akia gbe tipa ngba ha, ki mbedi kpendu Yesu na ni, ki wege kpenduko ni mangeriri. Bambu ki hi ahi be wene fuõ nzeme dũ. 4Yuda Keriota, nanidu dagba gako abawiriki yo, nga gu ko nikakusa ko, ko ki ya, 5“Tipagine i abaga nga gi nzeme abaga ti ni re tipa rukutu marã feda 300, ki fuku he fu rungorungo aboro ya?” 6Were ko agumba nga gere, bambiko pa rungorungo aboro nadu bangiriko te; ko agumba ha bambiko iradĩ nangia ko, mangu anidu be ko ko ki hidĩ agu ahe i anamaa koyo. 7Yesu ki nimo ka ya, “Mo he ri ri ka kuti ni sa rago kpisida re. 8Bambiko rungorungo aboro du na oni waragoagira; ono mi adu nga na oni a waragoagira te.”
Ta bura Razaro
9Were agu aYudo nangia azogo i ki nimo ka ina ya ko yo: i aye nga mbiko kina Yesu sa te, i aye ka bi Razaro a, gu ko ko azingisi ko be kpio. 10Ono abairamotumo ki ta bura ya i imi Razaro a; 11bambiko dungu aYudo andu, ki idi pa Yesu mbiko Razaro.
Yesu arimi na irisa ku Yerusarema yo
(Mt. 21:1-11; Mk. 11:1-11; Rk. 19:28-40)
12Rago ki ya giri gu bakere rimbasa naye sa pumbo, ho i agi he ni ya, Yesu naye ku Yerusarema yo, 13i ki sipi be sikisa, ki ndu ka gbia ko, i ki poi ku ari niya, “Tambuahe! Mbori fu maku fu gu ko naye ni rimo Gbia, nga Bakindo aYisaraere.” 14Yesu, ho ko agbata paranga dongi ni ki bi ru, ko ki sungu auru ru; wa si adu ni keke he, ya,
15“Ka oni gúnde nga ya, aboro Siona;
oni ngére, gaoni bakindo naye,
sungu auru paranga dongi!”
16Agi apai re gako abawiriki aruga nga tiyo na ni ho te; kina ho i ataasi rimo Yesu ni, i ki tingidi he tie ya agi apai re si adu ni keke he tipa ko, i amangi agi apai re fu ko a. 17Gu rimbasa nadu na ko ho ko ayambu Razaro ni murã yo, ki zingisi ko be kpio, i ki du ni dezire gi pai re. 18Si du rimbasa andu ti ni a ki gbia ko, bambiko i agi he ya ko amangi gi pai i aina pai ti ni re. 19AFarusi ki nimo ka ya dagba yo, “Oni bií wa oni adia nga be he wa sa ya, oni ngére, aboro ndu andu fuo ko zegino dũ.”
Agiriki akpi nyemu ka bi Yesu
20Were agu aGiriki adu dagba agu yo nandu ka irisa Mbori rago pumbo; 21agi yo re i ki ye koyo du Firipo ni, gu ko nadu Betesaida yo Gariraya yo, ki sana ko, niya, “Gbia, ani nakpi nyemu ka bi Yesu.” 22Firipo ki niye ki nigumba ha fu Andarea; aAndarea ki niye na Firipo, i ki gumba ha fu Yesu. 23Yesu ki karaga ha fu yo, niya, “Ragoho da, i taasi rimo Wiri boro. 24Mi nagumba ha fu roni, ni rengo, ni rengo, ka gu zende morú ati nga ku rogo sende yo ki kpi ya, si nye ni sa ha; ono ka si kpi, si zu azu bakere gbe. 25Gu ni nakpi nyemu ungani ni ingisi he aingisa; gu ni ka soga ungani asoga rogo gi zegino re ni ka aka kuti ni dati kina nyenye unga. 26Ka boro ra fere, ni nipeke re apeka; ho du mi ni, gi moyambu adú a ho; ka boro ra fere, Buba irisi ni airisa.
I ka tumba Wiri Boro ku ari
27“Mbisimore narungo arungo awere; mi aya wãi? ‘Buba, mo bátasi re ti gi rago re.’ A si mi aye sa ni kuti gi rago re. 28Buba, mo táasi rimoro.” Fugo ki nimo ka paa ngbangbaturũ yo, niya, “Mi taasi he, mi atáasa ha ataasa berewe a.” 29Gu rimbasa naru ho, ki gi he, i ki nimo ka ya gumba du. Akura yo ki ya, “Maraika gumba pai fu ko.” 30Yesu ki karaga ha ki ya, “Gi fugo re si aye nga mbiko re te, kina mbiko roni. 31Sapangbanga gi zegino re awere; gbia gi zegino re i abá ko aba awere. 32Mi, ka i tumba re sende ku ari, mi gbe aboro dunduko kono du mi ni.” 33Ono ko agumba gere, ka yugo gu kpio ko ka kpi. 34Rimbasa ki nimo ka karaga ha fu ko ki ya, “Ani gi he rugute yo ya Kristo anye anye kindi. Wiri mo pa ya wãi, i atúmba Wiri boro atumba ku ari? Da nga gi Wiri boro re?” 35Yesuki nimo ka ya fu yo, “Imarago aima ku dagba roni ngbutuko. Oni tá ata wa du imarago na oni kindi re, rago ka bira roni! Gu ni ka ta bitimo ni ini nga ho ni andu ku ho ni te. 36Wa du imarago na oni kindi re, oni ídi pa imarago, oni du ni awiri imarago.”
AYudo azanga idapase
Yesu agumba agi apai re, ko ki guari ki gbu ti yo. 37Ono ko avura nimangi dungu agu apai i aina pai ti ni ku bangiriyo vurũ, ka i aida nga pa ko ya. 38Gu pai nga ga Yesaya nga nebi si da ti rengo, wa ko agumba ha ya,
“Gbia, da idi pa gu pai i agia ngbarani?
Yugu yo be Gbia fu da?”
39Si du si adu nga ti ni wa ka i idi pa ko ya, bambiko Yesaya agumba ha berewe ya,
40“Ko fu vurari ku bangiriyo yo, ko ki nyakasi kpotoyo yo;
i ka ngera ni bangiriyo, ki rugu tiyo na pai kpotoyo yo,
ki sa tiyo,
mi ki nusi yo.”
41Yesaya agumba agi apai re, bambiko ko abi gako taarimo; ko agumba ha tipa ko. 42Pai te dungu aboro ki idi pa ko dagba abazogo aboro yo; ono ka i agumba nga ha ya bambiko aFarusi, i ka kusa yo bambutiria yo: 43bambiko i anakpi nyemu kina gu taarimo nga ga aboro bakere ti ga Mbori taarimo.
Fugo Yesu nga sapangbanga
44Yesu ki poi ku ari ki ya, “Gu ni ka idi pa re, ni aida nga pa re te, kina pa gu ko nakedi re. 45Gu ni ka bi re ni bi gu ko nakedi re. 46Mi ye nga imarago ku zegino, gu ni ka idi pa re ni nye nga bitimo te. 47Ka boro gi gimi apai, ka ni aka nga kuti ni ya, mi sapu nga ngbanga ni te, bambiko mi aye nga ka sapa ngbanga zegino te, mi aye ka batasa zegino abatasa. 48Gu ni ka he re ka ni adia nga gimi apai ku gume ya, gu ni kina ho ka sapu ngbanga ni; gu pai mi agumba si nikasapa ngbanga ni rogo yangara rame. 49Bambiko mi agumba nga ha ni tire te; kina Buba nakedi re, ko fu gu rugute fere mi ka gumba, na gu mi ka tungusa. 50Mi ini ya gako rugute nga nyenye unga; si du mi agumba ha ti ni, kina agu apai gumba Buba fere, si mi agumba.”
നിലവിൽ തിരഞ്ഞെടുത്തിരിക്കുന്നു:
Yoane 12: ZB1978
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Sainte Bible en Zande © Alliance Biblique Universelle, 1978.
