Yoane 11
11
Kpio Razaro
1Were kumba adu na kaza, nga Razaro nga boro Betania, nga gu kporo nga ga Maria na wirinari nga Marata. 2Gu Maria nambedi Gbia ni nzeme, ki wege kpenduko ni mangeriri, ri, kawiri adu na kaza nga Razaro. 3Adawiriko ki nimo ka keda sunge koyo du Yesu ni, kiya, “Gbia mo ngére gu ko mo nakpi nyemu ko, ko na kaza.” 4Ho Yesu agi he ni, ko ki ya. “Gi kaza re si andu nga sa kpio te, ono si tipa kina ga Mbori taarimo, i taasi rimo Wiri Mbori mbiko ho.”
5Were Yesu anakpi nyemu Marata akpi, na wirinari, na Razaro. 6Ho ko agi he ni ya ko na kaza, ni gu rago re ko ki raki ue kina ku rogo gu ba ko adu ni. 7Fuo gere ko ki ya fu abawiriki tie, “Ani ndú ku Yuda yo berewe.” 8Abawiriki ki ya fu ko, “Bayugupai, aYudo naakpi nyemu zumuda ro azumuda ni ambia mbembedi awere; mo nandu koyo berewe?” 9Yesu ki karaga ha ki ya, “A nga saa kina rogo gu uru sa bawe na ue te? Ka boro ta uru ni koto nga te, bambiko ni nabi imarago nga ga gi zegino re. 10Ono ka boro ata yuru, ni koto akota, bambiko imarago kpotoni yo te.” 11Agi apai ko agumba re; fuo gere ko ki ya fu yo, “Badiangbarani ti ni rame nga Razaro, mi nandu ka zingisa ko rame yo.” 12Abawiriki ki nimo ka ya fu ko, “Gbia, si ngia ko ti ati ni rame, ko abáta abata.” 13Were Yesu agumba ha tipa kpioko; ono i aya ti gu ko nagumba ha tipa ongoda rame yo. 14Yesu ki nimo ka ya fu yo nzunzu, “Razaro kpi. 15Rago nangba angba ti re mbiko roni wa mi adu nga yo ya, oni idi pa re; pai te ani ndú koyo du ko ni.” 16Toma, nangia Bi, ko ki nimo ka ya fu akurako nga abawiriki wẽ, “Ani ndú a tigaani, ani kpi na ko.”
Yesu nga zingabekpio na unga
17Ho Yesu aye ni tie, ko agi he ya ko ima raka ku murã yo biama. 18Were Betania adu na Yerusarema mbembedi, si adu wa ka akirometere du biata koyo. 19Dungu aYudo aye koyo du aMarata ni na Maria, ka ngarasa yo be pa kawiriyo. 20Marata, ho ri agi he ni ya Yesu naye, ri ki nimo ka ndu ki gbia ko. Ono Maria asungu asunga dimo yo zaa. 21Marata ki nimo ka ya fu Yesu, “Gbia, ka mo adu erẽ, ka kawire akpi nga te. 22Mi ini aina kina awere ya, gu he mo akpara fu Mbori tipa ha, Mbori afú he afu foro.” 23Yesu ki ya fu ri, “Kawiro azínga azinga berewe.” 24Marata ki ya fu ko, “Mi ini aina ya ko azínga azinga berewe rago zingabekpio ti yangara rame.” 25Yesu ki ya fu ri, “Mi nga zingabekpio, nga unga. Gu ni ka idi pa re, ka ni vura kpi akpi ni du adu ni ungani. 26Gu ni ka du ni ungani ki idi pa re ni kpi nga te. Mo idi pa gere?” 27Ri ki ya fu ko, “Ii Gbia; mi idi pa ro ya Kristo nga mo, nga Wiri Mbori, nga gu ko naye ku zegino.”
Yesu akpari ni aume
28Ho Marata agumba gi ni re, ri ki ndu ki yambu Maria nga wirinari ni gbuko, ki ya, “Bayugupai erẽ, ko nayamba ro.” 29Maria, ho ri agi he ni, ri ki nimo amo ku ari ni ipo, ki ndu koyo du Yesu ni. 30Yesu ada nga ho kporo yo te, ko adu kina rogo gu ba Marata agbia ko ni. 31Agu aYudo nadu na ri dimo yo, nangarasi ri, ho i abi Maria ni, ri namo amo ku ari ni ipo ki kuru ku zegi yo, i ki nipe ri, i ki ya ti gu ri nandu ku pati murã yo ka kpara ni aume yo. 32Maria, ho ri aye ni ku ho Yesu adu ni, ki bi ko, ri ki nimo ka ti pati nduko, ki ya fu ko, “Gbia, ka mo adu erẽ, ka kawire akpi nga te.” 33Ho Yesu abi ri ni ri nikpari ni aume, agu aYudo naye na ri i ki nikpari ni aume a tigayo, nunga ki zi ko toroko yo, ko ki nirungo a. 34Ko ki ya, “Wari moi oni ko ni?” I ki ya fu ko, “Gbia, mo yé ka bi ho.” 35Yesuki nikpari ni aume. 36AYudo ki nimo ka ya, “Oni ngére, wa ko anakpi nyemu ko!” 37Agu yo ki ya, “Gi kumba re nga gu ko nahasi bangiri gu kumba nadu na vurari, ka ko abatasa nga gi kumba be kpio a te re?”
Yesu azingisi Razaro be kpio
38Nunga ki zi Yesu kpotoko yo berewe wa ko aye ku pati murã yo. Were simbia nadu, mbia ki pi ti ngbadimoho. 39Yesu ki ya, “Oni dí mbia ku sa yo.” Marata, nga dawiri gu ko nakpi, ri ki ya fu ko wẽ, “Gbia, ko nafũ afũ wa du rago re; bambiko wa kpi ko ko raki biama.” 40Yesu ki ya fu ri, “Mi naya nga foro, ka mo idi pa re, mo bi ga Mbori taarimo, te?” 41Si du i adi mbia ti ni ku sa yo. Yesu ki ngere ku ari, ki ya, “Buba, mi tambua ro wa gi mo pa re. 42Mi ini aina ya mo nagia pa re a waragoagira; ono gumba mi he gu rimbasa ru vo gbu, i idi pa gu pai nga mo nakedi re.” 43Ho ko agumba ha ni were, ko ki poi ku ari ki ya, “Razaro, mo kúru.” 44Gu kumba nakpi ko ki kuru, na kãikãi beko ni remu murã na nduko: kpakpuko ki du ni kãikãi he ni tambara. Yesu ki ya fu yo. “Oni záki ko, ko ndú.”
Ta bura Yesu
(Mt. 26:1-5; Mk. 14:12; Rk. 22:1-2)
45Agu aYudo naye koyo du Maria ni, i ki bi gu pai ko amangi, i ki nimo ka ida pa ko ni dungu yo. 46Ono agu yo ki ndu koyo du aFarusi ni, ki gumba agu apai fu yo Yesu amangi. 47Abairamotumo ki nimo ka dungura abororondo na aFarusi, ki ya, “Ani amánga wãi? Bambiko gi kumba namanga dungu agu apai i aina pai ti ni. 48Ka ani he ko were, aboro aida pa ko aida dunduko; aRomo ki ye ki di ba rani na ngbatungarani a.” 49Ono gu ko adu sa dagba yo, nga Kayafa, nadu ni gbiamotumo ti ngba gu garã re, ko ki ya fu yo, “Oni aina nga pai wa sa te, 50oni aruga nga tironi na ni ya kpi boro sa tipa aboro ngba ti roni te, ngbatungarani dunduko ka i akpi nga ya.” 51Were ko agumba nga gi ni tiko te re; gbiamotumo nangia ko ti ngba gu garã re. Ko agumba ya Yesu nikakpi tipa ngbatungayo; 52tipa kina ngbatungayo sa te, ko dungura agu awiri Mbori adungura sa anagbandaka tuturũ. 53Si du i atona ta bura ko ti ni ni gu rago re ka imo ko.
54Si du Yesu ata nga ti ni berewe dagba aYudo gbayaga ya, ko ki guari ho ki ndu ku ringara yo mbembedi ku ngbakungba yo, ku rogo gu bakporo i aniya ti ni Efuraima; ko ki raki koyo na gako abawiriki.
55Were ga aYudo pumbo susiri ambeda. Dungu aboro ki kuru ringara yo ka ndu ku Yerusarema yo mbata pumbo susiri nikada, ka girisa tiyo. 56I ki nimo ka gbata Yesu, ki ya dagba yo, wa i aru yekaru yo, “Gini pai oni aberã? Ya ko aye nga sa pumbo te?” 57Were abairamotumo arú ndika na aFarusi, ya, ka boro ini ho du ko ni, ni ki yugu ho, i zi ko.
നിലവിൽ തിരഞ്ഞെടുത്തിരിക്കുന്നു:
Yoane 11: ZB1978
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Sainte Bible en Zande © Alliance Biblique Universelle, 1978.
