MATIUS 9
9
I Yesus nupakaul᷊engu singkatau ko kesohi
(Mrk. 2:1-12; Luk. 5:17-26)
1I Yesus nusul᷊e sarang wanuang-E, nusakaeng namoto rano, nusul᷊e sarang kampong-E.#9:1: sarang kampong-E: Kapernaum (putuhung 4:13). 2Su se'e pia taumata ko numbawa sarang koa i Sie singkatau ko kesohi kal᷊al᷊oka su tupihi. Suapangi Yesus nakawua pangangimangi sire kere'e kal᷊aboe, i Sie nangili su tau ko kesohi e'e, “Pakatatapi, ana-Ku! Apang dosa ngu kaul᷊ie seng niampungang.”
3Pirang katau meteru agama su se'e nuwisara su l᷊al᷊ung u naung i sire, “Taumata i'i nuhinakang Mawu Ruata!”
4I Yesus matitong naungi sire, kute i Sie nangul᷊i, “Nakurawe i kumu pia naung kere kadal᷊ai e'e? 5Sude mapiang: mangul᷊i, ‘Dosa ngu seng niampungang,’ arako mangul᷊i ‘Wangungte dang ral᷊eng te?’ 6Arawe i'i Ia mo mangandaghi si kumu himoneu su dunia i'i Ahusu Taumata pia kawasang-E mu pangampungu dosa.” Bou e'e I Yesus nangul᷊i su tau kesohi e'e, “Wangungte, hengke e wawila nae dingang kapul᷊e e!”
7Tau ko kesohi e'e turusi nuwangung dingang napul᷊e sarang wal᷊enge. 8Su tempong taumata nakawua hal᷊i e'e, i sire kaul᷊ie nataku dang nundalo Mawu Ruata, watu u Mawu Ruata seng nunggile kawasa kere'e kal᷊aboe su taumata.
I Yesus nukumui si Matius
(Mrk. 2:13-17; Luk. 5:27-32)
9Bou e'e I Yesus nanintangu tampa e'e. Su tempong karal᷊enge, i Sie nakawua si Matius, mananuntu balasteng kakaiang su kantorie. I Yesus nangul᷊i si Sie: “Maite tuhu si Sia!”
Kute i Matius turusi nuwua nutumuhu si Yesus.
10 #
Luk. 15:1-2
Su tempo ngi Yesus kapusimokol᷊e su walengi Matius,#9:10: su wal᷊e ngi Matius: arako su wal᷊enge (e'e ko wal᷊e-Ngi Yesus). maul᷊i mananuntu balasteng dang taumata ko tuhungangu hape karal᷊aikange nusumongo kumang singkakang dingang I Yesus dang manga tumatuhu-E. 11Pia tau Farisi nakawua hal᷊i e'e. I sire nukina suapang tumatuhu-E, “Nakurawe meteri kumu nukumang dingang i sire mananuntu balasteng dang dingang u manga taumata ko dal᷊ai?”
12I Yesus nakaringihi kakinai sire, bou e'e i Sie nusumimbahi, “Taumata ko matoghasi ta mundea dokter, kitangu taumata ko masaki. 13#Hos. 6:6; Mat. 12:7Putuhungku apa mangal᷊engu nasi u Buki Susi i'i: ‘Ia mo pukakindaghi wal᷊inge we binatang ko i sumba.’ Watu u Ia nusumongo wal᷊inge mundea taumata ko mupundangu watangenge seng mapia kateho taumata ko tuhungang karal᷊aikange.”
Hal᷊iu puasa
(Mrk. 2:18-22; Luk. 5:33-39)
14Bou e'e manga tumatuhu Yohanes Mananahani nusumongo sarang koa I Yesus. I sire nukina, “Nakurawe i kami dingang i sire tau Farisi mupuasa, arawe tumatuhu I Tuang ta?”
15I Yesus nusumimbahi, “Kirapa su titongi kumu? Botonge taumata ko ninoti su pukawingang mutingkasusa boko pardegong mborong ene ringangi sire? Tantu ta! Katewe pia temponge pardegong e'e al᷊akeng boi sire. Su tempo e'e mbuhue i sire mupuasa.
16Takoa taumata manampeli l᷊aku ko hene dingang u heka ko wuhu. Watu u heka tatampeli e'e kumoho dang makaghehe l᷊aku e'e, hakiu ghehe'e kasaunge mal᷊abo. 17Kere'e l᷊ai takoae taumata mutaho anggori ko wuhu su tampa ko dal᷊ai. Watu u tampa e'e mahitang dang mawuka, bou e'e anggori e'e mawungke. Anggori ko wuhu mambeng taho su tampa ko wuhu, tadeau kaul᷊ie mareso mapia.”
Anau tumbonangu wal᷊e pukakal᷊iomanengang
Tau Wawine ko nanuhung si Yesus
(Mrk. 5:21-43; Luk. 8:40-56)
18Sutempong I Yesus kapudidatonge dingang u manga tumatuhu i Yohanes Mananahani, nusumongo singkatau tumbonangu wal᷊e pukakal᷊iomanengang. I sie nusuba su tingong I Yesus dingang nangul᷊i, “Anaku kowawine wuhu-wuhu nate. Kateho, kere wotonge songoko piloko l᷊imang-U tadeau i sie sau muwiahi.”
19I Yesus dingang u manga tumatuhu-E natamai singkatamai dingang u tau e'e.
20-21Su ral᷊eng pia singkatau kowawine masaki niral᷊engangu kotori seng mapul᷊o dua su taunge kal᷊iwuenge, nusumandighi bou l᷊ikur I Yesus. Su naunge, “Asal᷊e ia makasuhung kakingkaeng-E, ia seng maul᷊e.” Bou e'e i sie nanuhung pondol᷊u kakingkaeng I Yesus.
22Su orasi e'e I Yesus nuwihu sarang l᷊ikure dang nakawua tau wawine e'e turusi nangul᷊i si sie. “Pakatatapi naungu ana-Ku! Ual᷊ingu pangangimangu si Sia e'e, i kau maul᷊e!” Singkatempo e'e l᷊ai tau wawine e'e turusi naul᷊e.
23Bou e'e I Yesus nurating wal᷊eng tumbonangu wal᷊e pukakal᷊iomanengang. Suapangu i Sie nakawua munanang musik u susa dingang u taumata magara, 24I Sie nangul᷊i si sire, “Dakoko suwang i kumu kaul᷊ie! Dario e'e tawe nate; i sie kitang katikie.”
I sire kaul᷊ie nahul᷊igheing I Yesus. 25Suapang i sire nusumuwang, I Yesus nusumu su kamaru dario e'e dingang u nuhinggo l᷊imange. Bou e'e nuwangung ana wawine e'e. 26Habari e'e nawombeng su kaul᷊i u tampa e'e.
I Yesus nupakaul᷊engu duangkatau ko wuta
27I Yesus nul᷊umal᷊eng bou tampa e'e, seng su ral᷊eng pia duangkatau ko wuta katuhue si Sie. I sire rua mangkate kakuinge, “Mawu Ahusi Daud, kindaghiteko i kami rua i!”
28Suapangi Yesus nusumu su wal᷊e, i sire rua ko wuta e'e nusumandinghi si Sie. I Yesus nukina si sire rua. “I rua mangimang Ia makaul᷊e si rua?”
“Mangimang Tuang!” sasimbahi sire rua.
29Bou e'e I Yesus nanil᷊iri matangi sire rua dingang u nangul᷊i, “Ual᷊ingu i rua mangimang, kariadite apang ko ikao irua.” 30Kute i sire rua seng nakawua. I Yesus nangonggo u ingati si sire rua, tadeau kumbahang muwukengu hal᷊i e'e si sai-sai.
31Kateho i sire rua mang nul᷊umal᷊eng namombeng habaru hal᷊i I Yesus e'e su kaul᷊i u tampa.
I Yesus nupakaul᷊engu tau ko bobo
32Sutempo ngu tau rarua e'e nul᷊umal᷊eng, pia singkatau ko bobo ko nisukangu roh ko dal᷊ai, niwawau taumata sarang koa I Yesus. 33I Yesus nanguseri roh ko dal᷊ai e'e dang orasi e'e l᷊ai i sie naka pudidato. Taumata maul᷊i naherang dingang nangul᷊i, “Mborong tangkeng nakawua hal᷊i kiri i su Israel!”
34 #
Mat. 10:25, 12:24; Mrk. 3:22; Luk. 11:15 Arawe i sire tau Farisi nangul᷊i, “Tumbonangu roh ko dal᷊ai nangonggou kawasa si Sie panguseri roh ko dal᷊ai e'e.”
I Yesus nukumindaghi nakawua taumata maul᷊i
35 #
Mat. 4:23; Mrk. 1:39; Luk. 4:44 Kere'e I Yesus nul᷊iku bou soa simbau sarang soa simbau, bou kampong simbau sarang kampong simbau. I Sie nanintiro suapang wal᷊e pukakal᷊iomanengang, dang nangul᷊i Habaru Mapia bou hal᷊i u pamarentahangu Mawu Ruata kere Ratu. I Sie mupakaul᷊engu taumata ko mutatahang haghingu saki dingang u pia kurangu wadang. 36#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mrk. 6:34Su tempo ngi Yesus nakawua taumata napene, i Sie turusi nukumindaghi nakawua si sire, watu u i sire seng tamakahingang dang tamakakoa apa-apa, musul᷊ungu domba ko takoae mangangahae. 37#Luk. 10:2Bou e'e I Yesus nangul᷊i su manga tumatuhu-E, “Maul᷊i ko i tipo, kitangu mananiponge mahal᷊i. 38Ual᷊ingu e'e pundo su tataghuangu anseri tadeau mundohongu mul᷊ahal᷊i panipo wuange.”
നിലവിൽ തിരഞ്ഞെടുത്തിരിക്കുന്നു:
MATIUS 9: LAISXN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
2014 Indonesian Bible Society (Lembaga Alkitab Indonesia)
