MATIUS 10
10
Mapul᷊o dua Rasuli
(Mrk. 3:13-19; Luk. 6:12-16)
1Pia su silou I Yesus nukumui tumatuhu-E sire mapulo dua pukomol᷊i. Mbuhue i sire nionggol᷊ang-E kawasa panguseri roh ko dal᷊ai dang mupakaul᷊engu kaul᷊i u haghingu saki dingang u apang kurangu badang. 2Arengu manga rasuli mapul᷊o dua e'e: kahimotongange, i Simon (ko nisigho l᷊ai si Petrus) dingang u ana u singkataunge i Andreas, bou e'e i Yakobus dingang u ana u singkataunge i Yohanes, manga anai Zebedeus. 3Tuhue i Filipus, Bartolomeus dingang i Tomas, i Matius mananuntu balasteng, dang l᷊ai i Yakobus ana i Alfeus dingang i Tadeus; 4bou e'e panginsuenge i Simon tau Selot dang i Yudas Iskariot ko nusingking si Yesus.
I Yesus nangoro si sire mapul᷊odua
(Mrk. 6:7-13; Luk. 9:1-6)
5I sire mapul᷊o dua rasuli e'e niparentangi Yesus dang nitanatangu i'i. “Kumbahang makoa sarang wanuangu taumata ko wal᷊inge tau Yahudi. Kumbahang l᷊ai makoa sarang soangu tau Samaria. 6Kateho dakoe tamai sarang koau taumatangu Israel, kahimotongange si sire apang ko napal᷊iri. 7#Luk. 10:4-12Pangul᷊i si sire, seng maehong tempo ngu Mawu Ruata mamarenta kere Ratu. 8Pakaul᷊e ko manga taumata ko masaki; sauko puwiahi apang ko seng nate; pakaul᷊e ko apang ko pia saki e pisi ko makatataku, dingang useri ko apang roh ko dal᷊ai. I kumu seng nanarima kaul᷊i e'e dingang u takoae l᷊uange, inau onggoe l᷊ai kere'e. 9Kumbahang mumbawa doi wul᷊aeng, doi sal᷊aka arako doi witu. 10#1Kor. 9:14; 1Tim. 5:18Kumbahang l᷊ai mumbawa sinasa arako l᷊aahusi duampare, arako sapatu, arako tiking suraral᷊engangu. Watu u taumata ko muhal᷊i, seng hinonge i puwiahi.
11Boko i kumu mahumpa su soa arako kampong, pundeako singkatau ko mal᷊uasi manarima si kumu. Katanae se'e ringange sarangi kumu sau rumal᷊eng. 12Su tempo ngi kumu musumu su wal᷊e pangul᷊i ko, ‘Mal᷊umbako Mawu mangal᷊amati si kumu.’ 13Boko i sire su wal᷊e e'e manarima si kumu, pundoke al᷊amati e'e takateho mahundingang i sire. Boko i sire tamanarima sikumu sul᷊ete sau al᷊amati e'e 14#Wuk. 13:51Arawe boko pia wal᷊e arako soa ta manarima si kumu, arako mandi mundaringihi si kumu, tintangte tampa e'e, bou e'e tontongko awu wou l᷊aeru. 15#Kej. 19:24-28; Mat. 1:24Tinaungete! Su L᷊ou Kiamati, tatahou Sodom dingang u Gomora mborong nangilebe mal᷊owo ampungangu Mawu Ruata, bou manga taumata su soa e'e.”
Papahang ko sarung ruminta
(Mrk. 13:9-13; Luk. 21:12-17)
16 #
Luk. 10:3
“Putuhungko i'i: Ia mundoi si kumu kere domba ko l᷊ome su tal᷊oarau serigala ko wahani. I kumu mambeng pakatiho kere katoang dang pakatulasi kere paluma. 17#Mrk. 13:9-11; Luk. 12:11-12, 21:12-15Pakadiaga, watu u i kumu sarung samekang wawaneng putingo ngu pangadilang. I kumu sarung ipahangeng su wal᷊e pukakal᷊iomanengang. 18I kumu sarung wawaneng sarang tingo ngu mangangawasa dingang u manga ratu ual᷊ingu i kumu tumatuhu si Sia. Dang e'e tempo ngi kumu musaksingu Ia si sire dingang sumanga taumata ko wughangu Mawu Ruata. 19Arawe boko i kumu wawaneng tadeau i hukung, kumbahang mataku apang ko hinongu puwisarangi kumu arako apa ko hinongu pudidatongi kumu. Watu u apang ko hinongi puwisarangi kumu e'e, sarung i pakatitong si kumu su temponge. 20Watu u ko mudidato su tempo e'e wal᷊inge we i kumu, kateho Roh I Yamang su sorga bou mohongi kumu.
21 #
Mrk. 13:12; Luk. 21:16 Sarung mariadi taumata manarakang ghe'e sisane pakipate. Dang e'e ko sarung mariadi su tal᷊oara i amang dingang u anae. Manga rario sarung mundoka si mama papange dang manarakangi sire pakipate. 22#Mat. 24:9, 13; Mrk. 13:13; Luk. 21:17I kumu sarung i pubinsi u taumata, watu u i kumu tumatuhu si Sia. Arawe taumata ko mutatahang sarang panginsuenge sarung i pakasal᷊amati. 23Boko i kumu pahangeng su soa simbau, tal᷊angte sarang soa tuhue. Ia mangul᷊i si kumu: Su horo u kaul᷊i u soangu Israel masue l᷊uhunge si kumu, Ahusu Taumata seng tuwei sumongo.
24 #
Luk. 6:40; Yoh. 13:16, 15:20 Tumatuhue ta mangilebe l᷊aboe bou meteri, dang l᷊ang ta mangilebe l᷊abo bou mawunge. 25#Mat. 9:34, 12:24; Mrk. 3:22; Luk. 11:15Seng kapapiange boko singkatau tumatuhue makoa musul᷊ungu meteri, dang singkatau l᷊ang makoa musul᷊ungu mawunge. Boko timbou tatahou wal᷊e seng i sigho Be'elzebul, apa l᷊ai tatahou wal᷊enge. I sire sarung nggilenang l᷊ai areng ko kadal᷊aikange.”
Kataku ko su Mawu Ruata
(Luk. 12:2-7)
26 #
Mrk. 4:22; Luk. 8:17 “Tawahal᷊uasi mataku u taumata. Takoae ko mawawuni, ko ta sarung i kawua dang takoae ko i pakarumasi ko ta sarung i wombeng. 27Apang ko Daku puwisara si kumu su rundunge, mambeng sau puwisarangi kumu su suange. Dang apang ko niwurung su tul᷊ingu, wohang ko e'e pakal᷊iku! 28Ariwe kataku si sire ko tahapate badangu taumata, kateho ko takoae kawasa mamate jiwa. Kataku te su Mawu Ruata ko kawasa mupakawinasangu badang dingang u jiwa su l᷊al᷊ungu naraka. 29Sal᷊umpito darua kal᷊uangengu doi simbau ko kadiokange. Maning kere'e takoae sarang simbau manawo su tana boko wal᷊inge su kao I Yamangu. 30Kaul᷊iu uta su timbou seng mararekeng. 31Watu u e'e ari kataku! I kumu nangilebe mahariga bou sal᷊umpito!”
Mangakung I Yesus su tingo ngu hape
(Luk. 12:8-9)
32“I sai-sai mangaku su tingo ngu hape ko i sie tumatuhu si Sia, Ia sarung mangakungi sie l᷊ai su saruang I Yamang-Ku su sorga. 33#2Tim. 2:12Arawe i sai-sai musunial᷊u Ia su tingo ngu hape ko i sie tumatuhu si Sia, Ia l᷊ai sarung musunial᷊i sie su sarung I Yamang-Ku su sorga.”
Bal᷊ingewe purarame, kateho purarendehi
(Luk. 12:51-53, 14:26-27)
34“Kumbahang manika Ia mumbawa purarame su dunia i'i. Ia tamumbawa purarame, kateho puraroka. 35#Mi. 7:6Ia musumongo sarung mukoa ana koese mundoka si papange, ana kowawine mundoka si mamange, manuhang kowawine mundoka si emponge kowawine. 36Kuteu sarung makoa roka kal᷊abokange, seng tatahou wal᷊engu watangeng.
37Taumata ko mukumindaghi si papange arako si mamange nangilebe bou Ia ta hinonge makoa tumatuhu-Ku. Kere'e l᷊ai taumata ko makindaghi anae koese arako anae kowawine ko mborong nangilebe bou Ia. 38#Mat. 16:24; Mrk. 8:34; Luk. 9:23Dang taumata ko mandi mamikul᷊i salipe l᷊au tumuhu si Sia, ta hinonge makoa tumatuhu-Ku. 39#Mat. 16:25; Mrk. 8:35; Luk. 9:24, 17:33; Yoh. 12:25Taumata ko mutatahangu puwawiahe, sarung kailangengu puwawiahe, arawe taumata ko kailangengu puwawiahe watu u satia tumuhu si Sia, sarung makahombang puwawiahe.”
Wawal᷊isu kakanoa ko mapia
(Mrk. 9:41)
40 #
Mrk. 9:37; Luk. 9:48, 10:16; Yoh. 13:20 “Taumata ko manarima si kumu, manarima si Sia. Dang taumata ko manarima si Sia, manarima si Sie ko nundoi si Sia. 41Taumata ko manarima singkatau nabi, ual᷊ingu i sie nabi, sarung makatarima wawal᷊isu singkatau nabi. Dang i sai ko manarima singkatau taumata ko mapia, sarung makatarima wawal᷊isu taumata ko mapia. 42I sai ko munggile inung, maning kitang ake matinoung su singkatau ko kahinange, ual᷊ingu i sie tumatuhu si Sia, pangimangte i sie seng nal᷊ahe sarung makatarima wawal᷊ise.”
നിലവിൽ തിരഞ്ഞെടുത്തിരിക്കുന്നു:
MATIUS 10: LAISXN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
2014 Indonesian Bible Society (Lembaga Alkitab Indonesia)
