Secunnu Matteu 5
5
1Vidennu Gesù li turbi, acchianau supra la muntagna, ed essennusi assittatu, li soi discipuli s’ accustaru ad iddu,
2Ed aprennu la vucca li nsignava, dicennu:
3Beati li poviri di spiritu: pirchì per iddi è lu regnu di li celi.
4Beati li mansueti: pirchì iddi possedirrannu la terra.
5Beati chiddi, chi chiancinu: pirchì iddi sarrannu cunsulati.
6Beati chiddi, chi hannu fami, e siti di giustizia: pirchì iddi sarrannu saziati.
7Beati li misiricurdiusi: pirchì ad iddi si usirrà misiricordia.
8Beati chiddi, chi sù puri di cori: pirchì iddi vidrannu a Diu.
9Beati li pacifici: pirchì iddi sarrannu chiamati figghi di Diu.
10Beati chiddi, chi patinu pri la giustizia: pirchì d’ iddi è lu regnu di li celi.
11Sarriti beati, quannu vi mmalidirrannu, e vi persequitirrannu, e dirrannu cu minzogna ogni mali contra vuautri, pri causa mia:
12Rallegrativi, e giubilati, giacchì granni è lu vostru premiu in celu: accussì puru foru persequitati li profeti prima di vui.
13Vui siti lu sali di la terra. Giacchì si lu sali perdi la so forza, cu chi si putrà iddu risalari? Allura nun varrà cchiù nenti, forchì pri jittarisi, ed essiri calpistatu di l’ omini.
14Vui siti la luci di lu munnu. Nun si pò ammucciari na città, ch’ è supra un munti.
15Nè s’ adduma la lucerna, e si metti sutta lu munneddu, ma supra lu cannileri, pri fari lustru a chiddi, chi sunnu ntra la casa.
16Accussì risblennissi la vostra luci avanti a l’ omini: acciocchì vidissiru li vostri operi boni, e glorificassiru lu vostru Patri, chi è ntra li celi.
17Nun criditi, ca sugnu vinutu pri sciogghiri la liggi, o li profeti: nun sugnu vinutu pri sciogghiri, ma pri adimpiri.
18In virità vi dicu; fintantu chì passa lu celu e la terra, nè un jota, nè un puntu di la liggi sarà mutatu, finchì ogni cosa nun sia fatta.
19Cui dunca rumpirrà unu di sti cumannamenti minimi, ed accussì nsignirrà l’ omini, sarrà chiamatu minimu ntra lu regnu di li celi: ma cui li mittirrà ’n pratica e li nsignirrà, sarrà chiamatu granni ntra lu regnu di li celi.
20Perciò dicu a vui, ca si la vostra giustizia nun è cchiù granni di chidda di li Scribi e di li Farisei, nun intrirriti ntra lu regnu di li celi.
21Aviti ntisu chiddu, chi fu dittu a l’ antichi: Nun ammazzari: e cui ammazzirrà, sarrà reu in giudiziu.
22Iu però vi dicu: ca cui si adirirrà cu lu frati so, sarrà reu in giudiziu. Ma cui dirrà, raca, a lu so frati: sarrà reu in cunciliu. Cui però dicissi, pazzu: sarrà reu di lu focu di l’ infernu.
23Si però offerisci lu to presenti a l’ otaru, e ddà t’ arrigordi, ca lu to frati avi qualchi cosa contra di tia:
24Lassa ddà la to offerta avanti l’ otaru, e vatti prima a ricunciliari cu to frati: e poi veni ed offri lu to presenti.
25Mettiti d’ accordu prestu cu lu to avversariu, mentri camini cu iddu: acciocchì pri casu nun ti purtassi l’ avversariu avanti lu judici, e lu judici nun ti cunsignassi a lu ministru: e fussi misu in carzari.
26In virità ti dicu, ca tu nun niscirrai di ddà, finchì nun avrai pagatu l’ ultimu granu.
27Aviti ntisu, ca fu dittu a l’ antichi: Nun cummettirrai adulteriu.
28Iu però vi dicu: ca cui vidi na fimmina cu disideriu di possedirla, già ha cummissu adulteriu cu idda ntra lu so cori.
29Ca si lu to occhiu drittu ti scannalia, scippatillu, e jettalu luntanu di tia: pirchì ti cunveni megghiu, chi unu di li toi membri pirissi, chi tuttu lu to corpu sia jettatu ntra l’ infernu.
30E si la to manu dritta ti scannalia, tagghiatilla, e jettala luntanu di tia: pirchì ti cunveni megghiu, ca unu di li toi membri pirissi, chi tuttu lu to corpu fussi jettatu ntra l’ infernu.
31È statu dittu puru, chi qualunqui cacciassi la so mogghi, cci duvissi dari lu libellu di lu ripudiu.
32Iu però vi dicu: Chi qualunqui avrà cacciatu la so mogghi, eccettu pri causa di fornicazioni, la fa divintari adultera: e cui si marita la donna abbannunata, cummetti adulteriu.
33Aviti ntisu puru, ca fu dittu a l’ antichi: Nun spirgiurirrai: anzi manteni a lu Signuri li juramenti toi.
34Ma iu vi dicu, nun jurari affattu, nè pri lu celu, ca è lu tronu di Diu:
35Nè pri la terra, pirchì è lu scabbellu di li soi pedi: nè pri Gerusalemmi, pirchì è la città di lu gran re:
36Nè jurirrai pri la to testa, pirchì nun poi fari un capiddu nè biancu, nè niuru.
37Ma sia lu vostru parrari, sì, sì: no, no: giacchì cchiù di chistu è malu.
38Aviti ntisu, ca è statu dittu: Occhiu pri occhiu, denti pri denti.
39Iu però vi dicu, nun resistiti, a lu mali: ma si qualcunu ti percoti ntra la mascidda dritta, projicci l’ autra.
40Ed a chiddu, chi voli cuntrastari cu tia in giudiziu, e chi voli livariti la vesti, lassacci puru lu mantellu.
41E si qualcunu ti stanchirrà pri milli passi, va cu iddu pri dui mila.
42A cui ti dumanna, dacci: e cui voli in prestitu, nun cci nigari.
43Aviti ntisu, ca fu dittu: Ama lu prossimu to, ed odia lu to nnimicu.
44Iu però vi dicu: Amati li vostri nnimici, fati beni a chiddi, chi v’ hannu odiatu: e pregati pri chiddi, chi v’ hannu persequitatu, e calunniatu:
45Acciocchì siati li figghi di vostru Patri, ca è in celu: chi fa nesciri lu so suli supra li boni e li mali: e fa chioviri supra li giusti e l’ ingiusti.
46Giacchì si amati chiddi, chi vi amanu, chi meritu nni avriti? nun fannu ancu accussì li pubblicani?
47E si salutirriti sulamenti li vostri frati, chi farriti di particulari? ancu li gentili nun fannu lu stissu?
48Siati addunca vui perfetti, siccomu lu Patri vostru celesti è perfettu.
നിലവിൽ തിരഞ്ഞെടുത്തിരിക്കുന്നു:
Secunnu Matteu 5: SCN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published in 1860 and 1861.
