Secunnu Matteu 4
4
1Allura Gesù fu purtatu ntra lu disertu da lu Spiritu, pirchì fussi tentatu da lu diavulu.
2Ed avennu dijunatu quaranta jorna, e quaranta notti, a la fini appi fami.
3E accustannusi lu tentaturi cci dissi: Si sì figghiu di Diu, dici, ca sti petri divintassiru pani.
4Ed iddu rispunnennu dissi: È scrittu: L’ omu nun campa di sulu pani, ma di ogni palora, chi veni di la vucca di Diu.
5Allura lu diavulu si lu purtau ntra la città santa, e lu pusau supra la cima di lu tempiu,
6E cci dissi: Si sì figghiu di Diu, jettati ddà jusu. Giacchì sta scrittu: Ca ti mannirrà li soi ancili, e ti pigghirrannu ntra li vrazza, acciocchì lu to pedi nun si nfruntassi cu li petri.
7Gesù cci dissi: È scrittu puru: Nun tentirrai lu Signuri Diu to.
8Doppu lu diavulu si lu purtau supra na muntagna auta assai: e cci mustrau tutti li regni di lu munnu, e la so gloria,
9E cci dissi: Ti darrò tutti sti cosi, si nginucchiannuti m’ adurirrai.
10Allura Gesù cci dissi: Vattinni, Satanassu: giacchì è scrittu: Adurirrai lu Signuri Diu to, e servirrai ad iddu sulu.
11Allura lu diavulu lu lassau: ed eccu l’ ancili vinniru, e lu servianu.
12Però comu ntisi Gesù, ca Giuvanni era ’n prigiuni, si nni jiu in Galilia:
13E lassata la città di Nazaret, jiu ad abitari in Cafarnau maritima, ntra li confini di Zabulon, e Neftalim:
14Acciocchì si fussi adimputu chiddu, chi fu dittu da Isaia profeta:
15La terra di Zabulon, e la terra di Neftalim, caminu di lu mari passatu lu Giurdanu, la Galilia di li nazioni,
16Populu, chi stava ntra li tenebri, vitti na luci magna: e stannu in locu di tenebri e di morti, spuntau la luci pri iddi.
17Dipoi Gesù cuminciau a pridicari, e a diri: Faciti pinitenza: giacchì s’ avvicina lu regnu di li celi.
18Caminannu poi Gesù vicinu lu mari di Galilia, vitti dui frati, Simuni, chi si dici Petru, ed Andria so frati, chi jittavanu li riti ntra lu mari (pirchì eranu piscaturi),
19E cci dissi: Viniti appressu di mia, e vi farrò addivintari piscaturi d’ omini.
20Ma iddi subitu, lassati li riti, l’ accumpagnaru.
21E siquitannu a caminari, vitti dui autri frati, Japicu di Zebedeu, e Giuvanni so frati, ntra na varca cu Zebedeu so patri, chi aggiustavanu li soi riti: e li chiamau.
22Iddi allura subitu, lassati li riti e so patri, cci jeru d’ appressu.
23E Gesù firriava tutta la Galilia, nsignannu ntra li soi sinagoghi, e pridicannu lu vancelu di lu regnu, e sanannu ogni malatia, ed ogni nfirmità ntra lu populu.
24E si spargiu la so fama in tutta la Siria, e cci purtaru tutti li malati, e tutti chiddi, chi avevanu nfirmitati e duluri, e chiddi, chi eranu spirdati, e li lunatici, e li paralitici, e li sanau:
25E lu seguevanu turbi di populu di la Galilia, di la Decapoli, di Gerusalemmi, di la Giudia, e di addabbanna lu Giurdanu.
നിലവിൽ തിരഞ്ഞെടുത്തിരിക്കുന്നു:
Secunnu Matteu 4: SCN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published in 1860 and 1861.
