Mbete Marki 11
11
1Zezu ke nzuk-dih fal yeri ka̧h Beɗfaze ke Beɗtani. Puh-uri ɗih ya ke Zurusalem mí na fál kasaw ké kpuh Olivehri na ri. Dale Zezu pih nzuk-dih fal yeri seɗe si pol. 2Ke ɓahri : « Í si puh ké na pol woiri sa̧-aw. Ka̧hna woiri, sa gelaw mí i ɓay ko gun bamnde kú-u ŋga̧h ƴo. Gun bamnde ra nzuk kaɓ tulu bɔk mbew ya ɓáy. Í sel bamnde-aw, í gi keni hi̧ mi. 3Nzuk vbi wuri ɓahri, ɓay fe mí i sel bamnde-aw le, í ɓahri, gaŋ bamnde-u mí yih ɓayu. Sa gelaw mí ke ɓay poŋ hi̧ wuri í gi keni. »
4Nzuk-dih fal yeri ké seɗe-aw tɔr. Ku ka̧h, ku ko gun bamnde ra, kú-u ŋga̧h ɗih ya ke ɓel nzakful-rih ɓil puh, mí ku sel. 5Nzuk a hani-uri ké ƴo gelu-aw vbi niri ɓahri : « Ɓay fe mí i sel bamnde-ay le ? »
6Bale ku ɓah ɓay ké Zezu ɓaŋ ndoh nzak woyri ra, mí ku poŋ gun bamnde-u hi̧ niri ku tɔr keni. 7Ku gi ke gun bamnde ra hi̧ Zezu. Ku mbala gar woyri ku̧ tul bamnde ra, mí Zezu kaɓ ri#11.7 Í ki̧ gun ɓay ké si ke gel ki̧na Mbete Luk 19.35 ɓay tu sa̧wɓay-kaɓ tul bamnde. . 8Daɓa nzukri fih gar woyri ku̧ ke ful ful. Nzuk a ɓoruri ba, haw gay kpuhri ké waka, mí fih ku̧ mahful pi. 9Nzuk a haniri si pol. Nzuk a ɓoruri ba, si fal. Ku vba̧ nzak le, ku vba̧ ra ɓáy ɓahri : « Nzuk-ya̧ na, mú ya̧ na. Mgbɔkɔ Gaŋ tul feri riw ku̧ tul wo ké mu gi ke riŋ ɗina ye. 10Mgbɔkɔ-u na tul lák mbay ziih ŋgermbay Daviɗ ké gi-ay. Riŋ ɗina Nzuk-ya̧ na mgbe si ka̧h nunmbam a síɓa sa̧. »
11Ku ka̧h Zurusalem. Ke kal si rih ɓil ila vul kani Ŋgerzah. Ke ko kona ɗoŋ ri gbuk. Gel ƴo sihna wara mí ke ti̧h tɔr ke nzuk-dih fal ye a boh falu seɗeri el si na Beɗtani.
12Tipele-u, ku ti̧h ke Beɗtani el ma Zurusalem, mí ɗaka i Zezu. 13Ke ko kpuh nzu̧y ké mbaŋ riɗiɗi ƴo ɓa ɗih-u. Mí Zezu reh si bɔk nzu̧y ra ɓay ko lehna-u ƴo ri mini ta-a le ? Ka̧hna ye le ke ziŋ ɓa gayuri. Lehna-u ta-a#11.13 Ɓay lah lawɓay kpuh nzu̧y le, í ki̧ Mbete Jérémie 8.13 ke 29.17, Mbete Osée 9.10, Mbete Michée 7.1. ɓayu ké few lehna-u ka̧h ya ɓáy. 14Bale Zezu ɓah hi̧ kpuh nzu̧y ra ɓahri : « Nzuk ta su̧ lehna wo mba wu̧m wara. »
Nzuk-dih fal yeri lah ɓay ké-e ɓah ra.
15Kandɔkaw mí ku ka̧h Zurusalem. Zezu si rih ɓil ila vul kani Ŋgerzah, wara mí ke ni̧h nzukri ké kaɓ ke fe hɔlnari ɓay hi̧ nzukri ɓá yeh ɓa fe puhna woyri, ke ni̧h nzukri ké ƴo yeh fe hɔlnari-aw kara pi. Ke ziŋ nzukri ké kom lari ŋgomna ke lari misoŋ ké nzak tabele woyri,#11.15 Í ki̧ gun ɓay ké si ke gel ki̧na Mbete Matiye 21.12 ɓay tu ɓay nzukri ké kom lari ŋgomna. ke ziŋ nzuk-yeh ndoy mbɔreri#11.15 Í ki̧ gun ɓay ké si ke gel ki̧na Mbete Matiye 21.12 ɓay tu ɓay nzuk-yeh ndoy mbɔreri. ké tul fe kaɓna woyri mí ke sɔkrɔ fe-uri mgborvboŋ mgborvboŋ ku̧ siɓa. 16Ke hah nzuk-suk fe yehnari kalna si ɓil ila vul kani Ŋgerzah. 17Mí ke ƴo firma nzukri ɓahri : « Ŋgerzah ɓah ɓil mbete ye ɓahri, vul ye ɓa vul-ɓah ɓay ziŋ ni hi̧ sa̧wnzukri riw. A woiri ba, i sɔɓ gelu ɓa hoh nam riɓari. »
18Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri lah fe ké Zezu firma daɓa nzukri ra, mí ku ƴah ful ɓay i ni, ɓayu ké hȩkme ye laɓ niri. Ku ɓahri se, fe firma ye-aw na nzukri yer. 19Gel sih bale, Zezu ke nzuk-dih fal yeri ti̧h ke Zurusalem tɔr.
20Tipele-u Zezu ke nzuk-dih fal yeri el si ma Zurusalem, mí ku ko kpuh nzu̧y ra hu yɔh ka̧h sa̧wu. 21Piyer ker si tul haɓna ké Zezu ɓah ra, mí ke ɓahri : « Metere, mú ko, kpuh nzu̧y ké mu haɓ fe ku̧ tulu ra ho̧k wɔh ka̧h sa̧wu. »
22-23Bale Zezu ɓahri : « Law woiri ƴo mbew ke law Ŋgerzah gaŋ le, mi ƴo ɓah hi̧ wuri ɓahri se, nzuk a suŋ suŋ ké ɓah hi̧ baw kasaw ké na-aw ɓahri, kasaw ɓá loh ke gelaw si vbu ɓil mahmbih-aw, mí law nzuku na mbew ke law Ŋgerzah, fahɓay ta law ye ya le, fe-u ɓay laɓ kandɔk ké-e ɓah gaŋ ba. 24Sa̧wu mí-i ƴo ɓah ɓayay hi̧ wuri, ɓay feri gbam ké i ƴo ɓah ɓayu ziŋ Ŋgerzah mí i ƴo vbi ni le, law woiri ké ƴo mbew ziŋ ni gi tu ɓahri, i ziŋ fe-u da, le Ŋgerzah ɓay laɓ fe-u hi̧ wuri. 25Gelke i ƴo ɓah ɓay ziŋ Ŋgerzah mí i ƴo ke ɓay ziŋ nzuk le, í sel nzuk ké laɓ wuri suya hi̧ bah woiri ké ƴo nunmbam ɓá lu salɓay-mba nzak ye ké tul woiri. » 26#11.26 Mbete sa̧w nzak kopi mbew yaŋ mí ƴo ke gunu 26. A ɓoruri ta keni ya. Sa̧wu mí nzuk-sɔɓ mbeteri sɔɓ ya.
27Ku ka̧h Zurusalem ra ɓáy, mí Zezu si rih ɓil ila vul kani Ŋgerzah. Ke ha̧rma ri, mí ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ke ŋgernzuk puh woyri gun Izarayelri gi ta̧w ye. 28Ku ɓahri : « Ke bolkusol ge mú-u laɓ keni pihna wo-ayri le ? A ge mí hi̧ mu ŋgerna-u le ? »
29Bale Zezu ɓahri : « A bi kara mi vbi wuri ɓay mbew. Í yih vbiɓayu hi̧ mi, mí lah dara mí-i sɔ́k wuri ke bolkusol ge mí-i ƴo laɓ pihna biri-ay ɓáy.
30Batem ké Za̧h soh nzukri ra wa, sa̧wu ɓa nunmbam mini ɓa nzuk pirmatulri le ? Í yih nzak bi, mí lah. »
31Ku fah ɓay ké sakra woyri ɓahri : « Nah ɓah ra ri se, sa̧wu ɓa nunmbam le, ke él vbi na ɓay fe mí nah sa ya̧ ɓay ké Za̧h ɓah ra ya. 32Mí náh ɓahri, sa̧wu ɓa nzuk pirmatulri le, nzukayri riw ɓay i na. »
Hȩkme nun nzukri tuh nzak ŋgernzukri-aw ɓayu ké daɓa nzukri riw tu Za̧h ɓa gun nzak pihna Ŋgerzah. 33Mí ku yih nzak Zezu ɓahri : « Nah tu sa̧wu ya. »
Le Zezu el ɓahri : « A bi kara mi ta sɔk wuri ke bolkusol ge mí-i laɓ keni pihna-ayri ya pi. »
നിലവിൽ തിരഞ്ഞെടുത്തിരിക്കുന്നു:
Mbete Marki 11: SIAFNK
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators, Inc. All rights reserved.
