Mbete Marki 10
10
1Zezu ur ke gelaw si tusiɓa Zude ké na fál kala mbih Zurdeŋ#10.1 Zezu ƴo ɓil tusiɓa Pereya puh lakna Eroɗ. Pereya na ɓil tusiɓa Zude ké na fál kala mbih Zurdeŋ.. Daɓa ziɓri el gi mbu̧h ké ta̧w ye. Kandɔk ké ɓa fe laɓna ye, ke firma nzukri ɓay lák mbay Ŋgerzah.
2Mí fariziri gi ta̧w Zezu. Ku ƴo ndoh law ye ke ɓay. Ku vbiɓay ɓahri : « Bolkusol Ŋgerzah ké Moyiz vbeh hi̧ nzuk ful-ni̧h wu̧y ye le#10.2 Kandɔk ké Zezu ƴo tusiɓa Eroɗ, fariziri ra hɔl nzaw ɓay mgba keni Zezu. Ku ɓahri, ɓay ké Zezu ɓah ɓá toh suk mbay Eroɗ bale, ku ɓay mgba ni ɓay fe le, pol sa̧ mbay Eroɗ kuŋ tul Za̧h ɓayu ké-e hah ni ya̧ hani ke Herodiya. Ɓayu na ɓil Mbete Marki 6.17-18. ? »
3Zezu el vbi niri ɓahri : « Moyiz ɓah hi̧ wuri ani le ? »
4Bale ku ɓahri : « Moyiz hi̧ na ful ɓahri, nzuk ɓá vbeh mbete-ni̧h wu̧y ndoh ndɔk wu̧yu dara ké ni̧h ni ɓáy. »
5Mí Zezu ɓahri : « Ɓay law kpuhna woiri mí Moyiz hi̧ wuri bolkusol-vbeh mbete ɓay ni̧h wu̧y. 6Ke titilu da̧y ké Ŋgerzah laɓ nunmbam ke tusiɓa ra, ke laɓ nzuk pirmatul ɓa wo̧ronzuk ke wu̧ynzuk. 7Sa̧wu mí wo̧ronzuk ɓay poŋ bah ye ke mah ye. Ku yá̧ hani ke wu̧y ye. 8Ku ɓa nzuk ké mbew, ku ɓa nzukri seɗe mba. Wara le ku ɓa nzuk ké mbew yaŋ. 9A a̧w ké Ŋgerzah mbu̧h niri ɓa nzuk pirmatul mbew ra nzuk ɓá kehr niri ya. »
10Zezu rih ɓil vul ɓáy ba, nzuk-dih fal yeri vbi ni ɓay tul ɓay ké-e ɓah ra. 11Ke ɓahri : « Nzuk a suŋ suŋ ké ni̧h wu̧y ye, mí el ya̧ wu̧y a ɓoru soh gelu le, salɓay nunpuki ta tul nzuku. 12Gelke wu̧y ti̧h ke vul wah ye si ya̧ wo̧ro a ɓoru le, salɓay nunpuki ta tul wu̧yu. »
13Nzukri ƴo gi ke gunri ma ta̧w Zezu ɓay ké lu mgbɔkɔ ku̧ tul gunuri, mí nzuk-dih fal yeri hah gina woyri. 14Zezu ɓá ko niri kaŋ le, ke ziŋ law fa̧hna, ke el ɓahri : « Í poŋ gunri ɓá gi ta̧w bi. Í gboh niri ya ɓayu ké lák mbay Ŋgerzah na ɓay sam gun a kandɔkawri. 15Gelu munu. Mi ƴo ɓah ɓayay hi̧ wuri, nzuk a suŋ suŋ ké ya̧ lák mbay Ŋgerzah ma law ye kandɔk gun ya le, ke ta rih ɓilu ya gaŋ. »
16Mí ke el mgba gunri ra ma haŋ ye ɓaŋ ndɔk kan tul woyri. Kandɔkaw mí ke lu mgbɔkɔ ku̧ tul woyri.
17Zezu ke nzuk-dih fal yeri mbi mahful ƴo tɔrna bale, nzuk mbew ti̧h ke ɗukna gi huk pol ye. Ke vbi Zezu ɓay ɓahri : « Metere, nzuk a suki, a fe mí-i láɓ ɓay ya̧ puh a a̧y ké ɓay mí kaɓ sew ke sew ɓa ŋgɔh le ? »
18Bale Zezu ɓahri : « Ani mú-u ɗi mi ɓa nzuk a suki le ? Nzuk pirmatul a suki mbew ta-a. Ŋgerzah mbew yaŋ mí ɓa nzuk a suki. 19Mu tu ɓayri ké na ɓil bolkusol Ŋgerzah tu-tu pi. Mú i hul ya, mú mbi wu̧y nzuk mbaŋ wo ya, mú ri-riɓa ya, mú kuŋ ɓay ku̧ nzak nzuk ya, mú gɔɓrɔ nzuk ya, mú hȩk bah wo ke mah wo. »
20Kandɔkaw mí nzuk ra ɓah ɓay ɓahri : « Metere, mi ƴo tul ɓayawri gbam ke seke bi ka̧h guri-ay. »
21Bale Zezu hekre ni zi̧h ke law sana. Mí ke ɓah hi̧ ni ɓahri : « Ɓay mbew toŋ mu ɓáy. Mú si fa̧h fe ziŋna wori yeh riw, mú wal lari-u hi̧ ko̧hkori. Mu ɓay ziŋ suki a nunmbam ŋgi̧ mbamba. Fal walu dale, mú el gi dih fal bi-ay. »
22Ke lah ɓay ké Zezu ɓah bale, mun ye voh, law ye rih ni mba, mí ke tɔr ɓayu ké ndɔk ye ah mbamba. 23Zezu ko kona ma tul nzuk-dih fal yeri ɗoŋ gbuk, ke ɓahri : « Kpuh mbamba ɓay nzukri ké ƴo ke fe ziŋna ɓá hi̧ Ŋgerzah lak mbay ké tul woyri. »
24Nzuk-dih fal yeri ɓá lah ɓay ra le, ɓayu na niri yer. Zezu ba, el ɓahri : « Gun biri, kpuh mbamba ɓay nzuk ɓá hi̧ Ŋgerzah lak mbay ké tul ye. 25Ɓay hi̧ zɔŋzɔŋ ɓá rih lɔkɔ bahtal ti̧h ra, gelu kpuh ya. Mí ɓay hi̧ nzuk va̧na ɓá hi̧ Ŋgerzah lak mbay ké tul ye, gelu kpuh mbamba. »
26Gosoɓay zi nzuk-dih fal yeri zi-zi. Ku el ɓah ɓay ké haŋsekle woyri ɓahri : « Mí kaŋaw ba, nzuk a suŋ mí mah kaɓ ke ɔkna le ? »
27Zezu ko niri zi̧h, ke ɓahri : « Káɓ ke ɔkna le, mba nzuk pirmatul. Wara le Ŋgerzah mah ɓay hi̧ nzuk kaɓ ke ɔkna ɓayu ké fe-mba Ŋgerzah ta-a. »
28Wara mí Piyer ɓahri : « Mú ko, a wah ba, nah poŋ feri riw, mí nah dih fal wo-ay. »
29-30Kandɔkaw mí Zezu ɓahri : « Ɓa ketina. Mi ƴo ɓah hi̧ wuri ɓahri, nzuk ké poŋ sa̧w ye, yi̧n yeri, in yeri, bah ye ke mah ye, gun yeri, waka yeri ɓay tul bi ke ɓay tul ɓaysuki bi #10.29-30 Zezu ɓahri, ɓaysuki bi mí ke ɓah si tul, ɓaysuki hul ye ké-e ɓay ya̧ keni nzukri. le, fe ziŋna ye ɓay ro sɔɗ kal nzuku a pol. Ke zíŋ sa̧w puh, ke zíŋ yi̧n yeri ke mah yeri ke gun yeri ke waka yeri ɓil koseh sew a tukala-ay. Sew a gi-u ba, ke káɓ ɓil ɔkna. 31Kandɔkaw mí daɓa nzukri ké ƴo pol ɓay el si sar fal mgbaɗ. Nzukri ké ƴo sar fal ba, ɓay kal ma pol. »
32Ku ƴo tul mahful ƴo hil ma Zurusalem. A ye ke si pol. Law nzuk-dih fal yeri lu ɗuŋ ɗuŋ. Hȩkme se niri. Zezu mbu̧h nzuk-dih fal ye a boh falu seɗeri bale, ke ɓah ɓay fe ké ɓay ziŋ ni hi̧ niri. 33Ke ɓahri : « Í lah, nah ƴo hil wuri ma Zurusalem, mí nzuk ɓay ndoh gun nzuk pirmatulay ndɔk ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri. Ku ɓay kuŋ salɓay hul kan tul ye. Mí ku él ndoh ni ndɔk sa̧wnzuk a ɓoruri. 34Nzukawri-aw ɓay sak ni. Ku ɓay sa-sam ku̧ tul ye. Ku ɓay vba̧ ni dara mí ku í ni. Nam say falu le, ke tí̧h ke puh záh ke pa̧ymun a foyu. »
35Mí Zak ke Za̧h gun Zebederi loh ma ta̧w Zezu ɓahri : « Metere, nah yih goŋ mu fe ɓay mú laɓ fe-u hi̧ na. »
36Mí ke ɓahri : « A fe mí i yih ɓay mí laɓ hi̧ wuri le ? »
37Mí ku ɓahri : « Mú hi̧ na náh kaɓ ɓil riŋ ɗina wo ziŋ mu. Nzuk a mbewu ɓá kaɓ ndɔk lakna wo, nzuk a ɓoru ba, ɓá kaɓ ndɔk kperu wo. »
38Mí Zezu ɓah hi̧ niri ɓahri : « Fe ké i goŋaw, i tu ya. Koɓ koseh ké mi nzo-u ra wa i mah ɓay nzo pi le ? Batem koseh ké mi rih ɓilu ra ba wa, i mah ɓay rih ɓilu pi gaŋ le ? »
39Mí ku ɓahri : « Nah ma-mah. »
Zezu el ɓahri se : « Koɓ koseh ké mi nzo-u ra i ɓay nzo-u gaŋ. Batem koseh kú-u ndoh mi ɓilu ra, i ɓay rih ɓilu pi. 40Mí ɓay hi̧ nzukri ɓá kaɓ ndɔk lakna ke ndɔk kperu bi ra, ɓa fe bi ya wara le, ɓa fe bah bi ké lek gel kaɓna-aw ɓay hi̧ niri. »
41Tɔr nzuk-dih fal Zezu ké boh ɓá lah goŋna Zak ke Za̧h bale, haŋ woyri fa̧h niri ké tul Zak ke Za̧h ra. 42Mí Zezu ɗi niri gi ma ta̧w ye. Ke ɓahri : « A woiri i tu-tu, nzukri kú-u tu niri ɓa mbay tusiɓari ƴo lak mbay tul nzuk woyri ke ŋgerna. Nzuk a lukiri ƴo pih bolnzak woyri hi̧ nzukri laɓ. 43Mí a woiri le i na kandɔk nzuk riŋ ɗinari-aw ya. Wara le nzuk a a̧y ké yih ti̧h ɓa ŋgernzuk tul mbaŋ yeri le, ke ná ɓa gun-laɓ pihna hi̧ mbaŋ yeri. 44Nzuk a suŋ suŋ ké yih na ɓa tul ké sakra mbaŋ yeri le, ke ná ɓa mgbal mbaŋ yeri gbam. 45Ɓayu ké gun nzuk pirmatul gi tusiɓa ɓay hi̧ nzukri ɓá laɓ pihna hi̧ ni ya. Wara le ke gi ɓay laɓ pihna hi̧ nzuk mbaŋ yeri. Ke gi ɓay poŋ mun ye ɓa fe puhna ɓay sel daɓa nzukri ke ndɔk hul. »
46Sina woyri ma Zurusalem, ku si ka̧h Zeriko. Zezu ƴo ti̧h ke puh-aw ke nzuk-dih fal yeri ke daɓa nzukri mah fe bale, ra̧w a hani kaɓ ɓel mahful ƴo rah ndɔk goŋ fe. Riŋ ye ɓa Bartime. Ke ɓa gun Time. 47Ke lah ɓahri, Zezu ké Nasareɗ ƴo kalna dale, ke vba̧ nzak ɓeleŋ ɓahri : « Gun zih ŋgermbay Daviɗ, Zezu wo, mú laɓ law in ziŋ mi ge. »
48Mí daɓa nzukri pom ni ɓay ké tuh nzak ye, mí ke toŋ vba̧ nzak ɓa mgbe-u ma síɓa síɓa ɓahri : « Gun zih ŋgermbay Daviɗ, mú laɓ law in ziŋ mi ge. »
49Zezu ta̧h ƴo, mí ke ɓahri, kú ɗi ra̧w ra ɓá gi. Nzukri ɗi ni. Ku ɓahri : « Mú su̧h law. Mú ur si ta̧w ye. Ke ɗi mu. »
50Bale ra̧w ra poŋ gar ye vbu biŋ, ke ur ɓa gah-u, mí ke si ta̧w Zezu. 51Zezu ba, ɓahri : « A fe mú-u yih ɓay mí laɓ hi̧ mu le ? »
Ra̧w ra yih nzak ye ɓahri : « Metere, mi yih ɓay ko gel. »
52Kandɔkaw mí Zezu ɓahri : « Mú si ɓa suki. Law wo ké te tul bi lu salɓay suya ké tul wo lu-lu. »
Sa gelaw mí nun ye teh, mí ke dih fal Zezu.
നിലവിൽ തിരഞ്ഞെടുത്തിരിക്കുന്നു:
Mbete Marki 10: SIAFNK
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators, Inc. All rights reserved.
