Luka 15
15
Lilim lo köbilityo nagon a likin
(Köti Matayo 18.12-14)
1 #
Luk 5.29, 30 Nyena a kapepenak ti usur se ko katoronyak liŋ gwe i mimijorö nyona ko Yesu yu i yiŋga na lepeŋ.
2A Parusijin se ko katodinok ti Saresi ti Mose suluje wiwinya momora adi, Lo ŋuto wuju katoronyak a nyesi ko se i pirit na geleŋ. 3Ama a nye jamakiŋdye lepeŋat lo lilim adi, 4Ko lele losu gwon ko köbilu mia geleŋ a nene nase geleŋ iŋge likin, nye ŋona ti kolökin merya buŋwan wot buŋwan kune i yöbu a galaddi na nagon aje likin na tojo ko nye a ryö lepeŋ le? 5A na ryeji lepeŋ nye nu, a nye kalakiŋdye lepeŋ kanyit i murut, a lyoŋi lyoŋön; 6a nagon nye aje yitwe mede nu, a nye luluŋgi julin kanyit se ko maratejin kanyit i pirit na geleŋ, a kulyani ko lepeŋat adi, Lyöŋi ta ko nan, kogwon nan aje ryo kobilityo nio nagon aje likin na. 7Nyena nan takiŋdya ta adi, Lyöŋön köti mo kata ki yu ko lele katoronyanit geleŋ a lopuggö töili lwölwöŋ ŋutu merya buŋwan wot buŋwan logon ko loti lo rigwo logon kulya kase ’bayin i löpuggö na toilyet.
Lilim lo kamisatat nagon a likin
8Kode köti, ko nene ŋuto gwon ko kamisajin puök, a ko nye a tolikin nene geleŋ nye ŋona ti mokakiŋdya lombo, a reji kadi, a ga ’yi ga ’yu ’bura, tojo nye a ryö lepeŋ le? 9A nye ko ryeji, a nye luluŋgi julin se ko maratejin kanyit i pirit na geleŋ, a kulyani adi, Lyoŋi ta ko nan, kogwon nan aje ryö kamisa nio nagon aje likin na. 10Nyena nan takiŋdya ta adi, Koti malaikajin ti Ŋun lyölyoŋon ko lele katoronyanit geleŋ a löpuggö töili.
Lilim lo ŋuro logon a likin
11A Yesu kulyani adi, Lele ŋuto kata ko ŋwajik lyan murek. 12A ŋuro loponi lo kulyani ko monye adi, Baba, koraki nan toro ’bo nagon nan mo rurut. A nye korakiŋdye se toro ’bo kanyit.
13A i mukok nagon a ko joŋga perok jore a ŋuro loponi lo tugwoŋi toro ’bo kanyit liŋ, a jölöni i jur lo pajo, nyu a nye tutuŋge kine gurut kanyit ko gwiliŋit lonyit loron. 14A nagon nye aje tutuŋgö ŋo liŋ nu, a dyaŋ duma lo ’duki i ŋilu jur ’bukuluŋ, a nye suluje magora.
15A nye iti tu a morakiŋdye mugun ko lele lo ŋutu ti ŋilu jur, a ŋilu ŋuto soŋdi lepeŋ kanyit i pirit yukit na wuryö. 16A ŋilo ŋuro ’deke toyimönöju mugun ko ka ’boŋgo ti ludweki na nyö wuryo kune; a ŋuto gwe ’bayin lo tiŋdu lepeŋ nene ŋo. 17A nye ko dene mugun a kulyani adi, Köliŋönök muda logon baba ropakin i kita logon kinyo lose a duma pipituŋdyö, a nan lo twane ni ko magor? 18Nan de ŋiŋien a iti ko baba yu, a nan mo kulyani ko lepeŋ adi, Baba, nan a konakiŋdya Ŋun arabat ko do koti, 19a nan köti tine jukin luŋu a ŋuro ilot kwöŋ. Konakiŋdye nan gwoso lele lo ŋutu kulok lo roröpaki i kita. 20Nyena a nye ŋine ŋien a iti ko monye yu. A nagon nye nyuŋ gwon pajo nu, a monye metuŋdye lepeŋ popo, a wone konyen ko lepeŋ; a nye wöki wökön a kalabbi lepeŋ, a ’biuŋdye lepeŋ. 21A Ŋiörö lo kulyani adi, Baba, nan aje konakiŋdya Ŋun arabat ko do köti, a nan köti tine jukin luŋu a ŋuro ilot kwöŋ. 22Ama a monye takiŋdye köliŋönök kanyit adi, Nyoŋgi ta joŋdya boŋgo na ’but parik, ko tojubbi ta lepeŋ, ko sukiŋdye ta katimanti kanyit i morinet ko kamuka kanyit i mokosi.
23Joŋdi ta dwot logon a ’baŋ, ko ’duŋge ta nye, ko ti yi nyesi, ko ti yi lyöŋi ta lyöŋön, 24kogwon lo ŋuro liŋ köju gwoso logon a twan ko aje ru köti, nye köju a likin ko aje rye köti. Nyena a se suluje lyoŋön.
25Ama a ŋuro logon a kayu lo gwe i melesen, a na pöri nye a gwe nyona ko ’dur mede nu, a nye yiŋge ŋutu yoyolo ko gwogwoja. 26A nye luŋgi lele lo koliŋonok a pije ko kinu kulya a nyo.
27A köliŋönit lo waddi lepeŋ adi, Luŋösur aje yitwe, a munyi iŋge ’duŋgo dwöt logon a ’baŋ kogwon ŋuro a yepuŋdya mede ’bura ’bak nene ŋo naron. Ama a nye wore woran a tine ’bon lupö kadi. 28a monye lonyit lupuŋdye kaŋo a mamaŋdi lepeŋ adi, Luponi kadi. 29Ama a nye waddi monye adi, Mete, kilo kiŋajin liŋ nan kitakiŋdya do gwoso ’dupiet, a nan gwe a ko lauŋdya lele saret ilot kwoŋ; ama a do kwoŋ gwe a ko tikin nan ma ’di kilolor anyen nan kodyö lyolyöŋon se ko julin kwe. 30Ama a na yitwe ’i ŋilo ŋuro ilot, logon a kökörökin tukwörien inot i ŋutu wate nagon a kawutejin kunu, kölumbö a do ’duŋokiŋdye lepeŋ dwot logon a ’baŋ, 31A monye kulyani ko lepeŋ adi, Ŋuro liŋ, yi ŋupi gwon ko do. Ŋo kwe liŋ a kunök. 32Yi agu ködyo lyölyöŋön ko nyonyola, kogwon lo luŋösur koju gwoso logon a twan ko aje ru koti, nye köju a likin ko aje rye koti.
നിലവിൽ തിരഞ്ഞെടുത്തിരിക്കുന്നു:
Luka 15: BBE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bari Bible © United Bible Societies, 1979.
