GÉNESIS 2
2
1Ukhamaw alaxpachasa, akapachasa, ukanakan taqi kunanakatix utjki ukanakas tukuyatäxäna. 2Paqallqür urusti Diosax taqi luräwinakap tukuyasin samaräna.#2.2 Samaränwa: hebreo arunxa tukuyaña sañ muni, uka arutwa shabat sutix juti, castellano arunsti sábado satawa, aymara arunxa samarañ uru satarakiwa (Ex 20.11; 31.17; Heb 4.4,10). Ukampix janiw sañ munkiti Diosax luräwip ukkhar tukuyxatapa, jan ukasti luräwipax askïtap uñacht'ayäna. 3Uka paqallqüri ursti Diosax jach'achänwa,#2.3 Paqallqüri uru: Biblianxa paqallqu jakhüwix phuqhata jan ukax, chiqpacha sañ muni. qullanañcharakïnwa, uka urun taqi luräwinakapat samaratap layku. 4Ukhamaw alaxpachana, akapachan lurasïwipaxa.
Jaqin Edén chiqankatapa
Kunapachatix Tatit Diosax alaxpacha, akapacha lurkatayna ukapachaxa, 5janïraw alinakax utjkänti, quranakas uraqit alirkataynati. Diosasti janïraw jallxa uraqir puriykataynati, ukhamarus janirakiw khiti irnaqiris utjkänti. 6Ukampisa, uraqitxa umaw jalsüna, uka umaw uraqir qarpäna. 7Ukxarusti Diosax laq'at jaqirux luräna, nasapat phust'asin jakañ churäna. Ukhamat jaqix jakxäna.
8Ukatsti Diosax Edenat#2.8 Edén uka arux wali suma sañ muni (Is 51.3; Ez 31.8-9). inti jalsu tuqirux achu churir quqanakan mä chiqa wakichäna, ukaruw jupax lurkatayna uka jaqir uchäna. 9Diosasti kunayman achunak churir suma quqanak jilayäna, ukanakasti manq'añatakïnwa. Achu churir quqanakan chika taypirusti jakañ quqa#2.9 Jakañ churir quqa: uka quqan achunakapax jakañ chuririwa. Gn 3.22; Ap 2.7; 22.2,14. usküna, ukatsti askimpi ñanqhampi yatiñ churir quqa uskurakïna.
10Edén chiqat mä jawiraw jalsüna, ukaw achu churir quqanakan chiqarux qarpäna, uka jawirasti pusi tuqiruw jaljtäna. 11Nayrïr jawirax Pisón satänwa, uka jawirasti Havilá sat uraqpacha muyti, kawkhantix qurix utjki uka chiqa. 12Uka chiqan utjir qurix sinti sumawa, ukansti resina sat q'apkir qullampi, ónice sat suma qalampiw utjaraki. 13Payïri jawirasti Guihón satänwa, uka jawirasti Cus sat uraqpach muyti. 14Kimsïri jawirasti Tigris satawa, uka jawirasti Asiria tuqit inti jalsu tuqiruw muytaraki. Pusïri jawirasti Éufrates satawa.
15Kunapachatix Tatit Diosax jaqir Edén chiqan uskkatayna yapuchañapataki, uñjañapataki ukapachasti, 16juparusti akham sänwa: “Aka chiqan utjir taqi quqanakan achupat manq'asïta, 17ukampisa askimpi, ñanqhampi yatiñ churir quqat janiw manq'ätati. Uka quqan achunakap jan manq'amti, manq'äta ukapachasti, chiqpachan jiwäta”#2.17 Ro 6.23. sasa.
18Ukxarusti, Tatit Diosax sänwa: “Janiw walïkiti jaqin sapakïñapaxa. Nayasti jupatakix mayni jupampi chika jakiri, ukhamarak jupar yanapt'iri lurarapï” sasa. 19-20Diosasti, taqi pampankir animalanaka, jamach'inaksa laq'at luräna; ukatsti jaqin ukaruw sutichañapatak apäna. Jaqisti sutinakap usküna taqi uywanakaru, taqi jamach'inakaru, pampan utjir uywanakarusa, uka sutimpi uñt'atarakiwa. Ukampisa uka uywanakatxa janiw kawkïrisa jaqir yanapt'irjamax utjkänti. 21Ukatsti Tatit Diosax jaqirux ikjayänwa, jaqin ikiñapkamasti Tatitux jaraphinakapat maya apsüna, ukatsti wasitat janchipxa jist'thapxarakïna. 22Uka jaraphit Tatit Diosax mä warmi luräna, ukatsti chacharuw uñstayäna, 23chachasti uñjasinxa, sänwa:
“¡Akapï chiqpachansa janchixat janchinixa, ch'akhaxat ch'akhanisa! Jichhasti jupax ‘warmi’ satäniwa, Diosan chachat apsutap layku”#2.23 Hebreo arunxa chacha jan ukax warmi uka arunakax niya kipkakiwa. Ukatpï Diosax chachat mä jaraphi apsusin mä warmi lurt'ataynaxa, ukampix chachasa, warmisa Dios nayraqatan mayakïtap qhanañchi. sasa.
24Ukatpï chachax awkipsa, taykapsa jaytxanixa, warmipampi mayachasxañataki, panpachanisti mä sapa janchïpkaspas ukhamäniwa.#2.24 Mt 19.5; Mc 10.7-8; 1 Co 6.16; Ef 5.31. Aka qillqatanakan utjki uka arunakax kunapachatix mä chachampi, mä warmimpi jaqichasxapxi ukkhax mä sapa janchir tukutap uñacht'ayi.
25Ukapachasti chachasa, warmisa q'alalakïsipkänwa, ukampis jupanakat janiw kawkïrisa ukham sarnaqañ p'inqaskänti.
നിലവിൽ തിരഞ്ഞെടുത്തിരിക്കുന്നു:
GÉNESIS 2: AYOPD
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
