GÉNESIS 3
3
Adanampi Evampix janiw Diosarux ist'apkiti
1Diosasti taqi laq'unak lurkatayna uka taypinxa, asirux taqi uka laq'unakat sipan wali sallqänwa, ukatsti warmirux akham sasaw jiskt'äna:
—¿Ukhamasti Diosax sapxtamti: “Janiw kawkïri quqan achunakapsa manq'apxätati” sasa?
2Warmisti ukxarux sarakïnwa:
—Kawkïri quqan achupatsa manq'asipkakiristwa, 3chika taypinkki uka quqan achunakapak janix manq'apkiristti. Diosasti sapxarakituwa: “Janiw uka quqan achup manq'apxätati, llamkt'apxätasa, uktix lurapxätaxa, jiwapxätawa” —sasa.
4Kataristi warmirux sänwa:
—Janiw ukax chiqäkiti, k'ariwa. Janiw jiwapkätati. 5Diosax sum yati, kunapachatix jumanakax uka quqan achunakapat manq'apxasma ukkhaxa, kunatix askïki, kunatix ñanqhäki ukanak yatipxasma, ukatsti Diosjamäpxasmawa —sasa.
6Warmisti uka quqan achupan manqt'añatakisa, yatiñanïñatakisa sumätap uñkatäna. Ukhamasti jupax mä achu apaqasin manq'antäna. Ukatsti chachaparurakiw churäna, jupasti manq'antarakïnwa.#3.1-6 Sab 2.24; Ro 5.12. 7Ukspachaw jupanakan nayranakapax jist'artäna, ukatsti panpachaniw q'alaläsipkatap amuyasipxäna. Ukhamasti higo quqan laphinakap ch'ukthapipxäna, ukampirakiw imxatasipxäna.
8Chachampi warmimpisti, achu churir quqanakan chika taypin jayp'u thayamp chik Tatit Diosar sarnaqaskir ist'apxäna, ukatsti Tatitumpi jan uñjayasiñatakix quqanak taypiruw imantasir jaltxapxäna. 9Ukampis Tatit Diosax chacharuw jawsäna, ukat jiskt'arakïna:
—¿Kawkinktasa? —sasa.
10Chachasti sänwa:
—Aka chiqan sarnaqatam ist'ta, ukat axsarayasta, q'alala uñjasitax laykuw imantasxarakta —sasa.
11Ukat Diosax jiskt'äna:
—¿Khitirak q'alalätaw sistamsti? ¿Janiw manq'ätati sisksma uka quqan achupatti manq'taxa? —sasa.
12Chachasti sarakïnwa:
—Nayamp chika jakañatak churkista uka warmiw uka quqan achup churitu, ukat nayax manq'antta —sasa.
13Ukat Tatit Diosax warmir jiskt'arakïna:
—¿Kunatsa jumax uk lurta? —sasa.
Warmisti sarakïnwa:
—Katariw nayarux sallqjitu,#3.13 2 Co 11.3; 1 Ti 2.14. ukat nayax manq'antta —sasa.
14Ukat Tatit Diosax katarir sarakïna:
—Aka luratamatxa, taqi animalanak taypin ñanqhachatäyätawa. Jichhat uksarux uraqinjam qatatnaqtäta, laq'a manq'arakïta. 15Warmimpi jumampisti wiñayaw timasipxäta, uka warmin wawanakapampi, juman wawanakamampis timasipxarakiniwa. Warmin wawapasti p'iqit takxatätam, jumasti kayu wintut achjarakïta —sasa.
16Warmirusti sarakïnwa:
—Wawachaskäta ukkhasti wali t'aqhisiñampiw ususïta. Ukampis chachamampix wawanïñ munaskakïtawa, jupasti jumaruw apnaqätam —sasa.
17Chacharusti sarakïnwa:
—Warmimar ist'atam layku, ukhamarak “Janiw manq'ätati” sisksma uka quqan achupat manq'atamatxa, jichhax jucham laykuw uraqix ñanqhachatäni; taqi jakawimanxa, wali ch'am tukusaw manq'añam achuyasïta. 18Uraqisti ch'aphinaka, jan wali quranak achurapïtam, ukatsti pampankir alinakan achunakap manq'äta.#3.17-18 Ro 8.20; Heb 6.8. 19Sapüru manq'añamsti jump'imampiw jikxatäta, ukax jiwañamkamäniwa, laq'ata luratäkta uka laq'ar kuttañamkama, laq'ätawa, laq'arurakiw tukxäta —sasa.
20Chachasti warmiparux Eva#3.20 Hebreo arunxa Eva sutix jakaña jan ukax jakiri sañ muni. sutimpiw uchäna, jupan taqi jakirinakan taykapätap layku. 21Ukatsti Tatit Diosax uywanakan lip'ichipat isi lurarapïna, chachampina warmimpin isthapt'asiñapataki, 22sarakïnwa: “Jichhax jaqix jiwasat maynïkaspas ukhamaw tukxi, kunatix askïki, ñanqhäkaraki uksa yatxiwa. Jichhasti jakañ quqan achupatsa manq'antapxakispawa, ukhamat wiñay jakañataki” sasa.
23Ukat Tatit Diosax Edén chiqat jaqirux jaqunuküna, ukatsti kuna laq'at luratäkäntix uka uraqi irnaqañapatakiw usküna. 24Edén chiqat chachampiru warmimpiru jaqunukusinsti, Diosax uka chiqat inti jalsu tuqirux querubines sat chhiqhaninak usküna,#3.24 Aka querubines sat chhiqhaninakasti, khä pachanakanxa Diosan Utapa, qullan chiqanak imapxañapatak uchatäpxänwa. ukansti mä aqkir espada uchäna, ukaw taqi tuqit muytarakïna, ukhamat jan khitis jakañ quqar jak'achasiñapataki.
നിലവിൽ തിരഞ്ഞെടുത്തിരിക്കുന്നു:
GÉNESIS 3: AYOPD
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
