Luc 22

Yeesu nannanliibi búkú u-pu

(Kpèè Maat 26.1-5,14-16, Maar 14.1-2,10-11, Yoow 11.45-53)

1Jiŋaal un bi ŋmóò kpɔnɔb bin baa ŋáań ŋkpɔnɔnyɔkɔ bi yíì-u Dilákatil jiŋaaliuee tóobiń#22.1 Kpèè Disa 12.1-27.. 2Ní bisaraaŋakpilib nì bimaradakaliibi nìn bíi nyàab̀ nsan kí cúú Yeesu, ama ní ki fàŋkí kunipaau.

Juudasi kíí kí dū Yeesu kí ŋúbíǹ u-nannanliibi

(Kpèè Maat 26.14-16, Maar 14.10-11)

3Niinee ní Sitaan kɔ́ Juudasi un bi yíì Isikaariyɔtee ni. U nìn sá Yeesu kpambaliŋ saalaa nì alee kansikin diba ní. 4Ní Juudasi cūtì ki ká bisaraaŋakpilib nì soojab bin cí kunimbɔtidiiyee kpilib, ki sòon̄ nì bi nsan ŋun pu u làá dī kí cúú Yeesu kí ŋúbíǹ-bee. 5Ní an mɔ́ɔkiǹ-bi ní bi síiǹ kunimbiŋmiiu kun bi làá tīī-uee. 6Ní u kíí ní ki kíĺ ki bíi nyàab̀ ŋyunti ŋun di kítì ú dū Yeesu kí ŋúbíǹ-bi, samaa ń taa bééyee.

Yeesu tú u-boonnooliibi bí bɔ́ntí Dilákatil jiŋaaliu

(Kpèè Maat 26.17-25, Maar 14.12-21, Yoow 13.21-30)

7Jiŋaalee poonee, ŋwiin ŋun bi máaǹ kí kpɔ̀ apibilee bāań, 8ní Yeesu tú Peetroo nì Yoowaneesi yii: «Cùú ŋámaan Dilákatil jiŋaaliu jinti tí jī#22.8 Kpèè Disa 12.3-9..» 9Ní bi bālifì-u yii: «La ní a là tí cù kí ŋá tijin gbanti?» 10Ní u bí-bi yii: «Ní pīlifì, ni yaa làá kɔ́ kitiŋinee ni nì uninja ubɔ làá tin kpāfì u tú dinyimbool. Ní táá-u kí kɔ́ kudii kun ni u yaa kɔ́ee, 11kí bàlifì kudiidaan yii: <Ukpil bàlifī-si yii kudii kulɔkɔn ní u nì u-boonnooliibi làá jī jiŋaal jikaati ní?> 12Niinee, u làá dàkà-ni diditɔntɔkɔl puee, kudikpaaŋŋu kubɔ kun poon tikɔkɔ bɔ́ntì ki sée, niin ní ni làá ŋá tijikaal.» 13Ní bi búntì ki lafun bàn̄ ki ká min u lēe deedee, ní ki ŋá jiŋaalee jinti niin.

Ti-Dindaan jikaati

(Kpèè Maat 26.26-30, Maar 14.22-26, 1 Kɔra 11.23-25)

14Ŋyunti bāań Yeesu nì u-kpambaliŋ kāl̀ ki bíi jīǹ tijinee, 15ní u bí-bi yii: «M lēē m-pɔbilin páaa yii man nì ni ń jī Dilákatil jiŋaaliu nee kí wàatī ní ḿ nín jī falaa. 16M tùkù ki cántí-ni yii m gíti kpá kí jī jiŋaal nee kí nīn cí daliŋkin u-taapu làá nyā mpaampiin pu Unimbɔti Beelinee.» 17Niinee ní u yōoǹ ndaam, ní ki jáam̀ Unimbɔti ní ki bí yii: «Fōōmaan kí nyɔ̀ kí kíń tɔb. 18M tùkù ki cántí-ni yii m gíti kpá kí nyɔ̀ ndaam nee kí nīn cí ŋyunti ŋun Unimbɔti Beel làá dāan̄ee.» 19Boonee ní u yōoǹ kpɔnɔ ní ki jáam̀ Unimbɔti ní ki gífì ki tīī-bi ní ki bí yii: «Doo di sá m-wunti tin m tīī ni-puee. Nín̄ ŋáaḿmaan míǹ ki téetí m-pu.» 20Bi ŋmɔ́ ki dóòyee, ní u gíti yōoǹ ndaam mbaantiim ki tīī-bi ní ki bí yii: «Ndaam nee di sá mpèépɔɔn ŋun làá nīn bí Unimbɔti nì binib kansikinee. M-fatikuu un làá nyā nimbi puee di tìì an poondi gbanti#22.20 Dū B. 2 kí ŋmàntī nì Disa 24.8, Yeer 31.31-34.. 21«Kpèè, un làá dū-mi kí tīī m-nannanliibee bí doo, man nì un jīǹ disambibaantiilinee#22.21 Dūú ŋmàntī Ilan 41.10.. 22Tiŋman, man Kinibiki làá kpú kii Unimbɔti nín nìn lī ki síiǹ puee, ama mbusu dɔ̄ ki cí un di làá dū-mi kí nyāfiǹ m-nannanliibee.» 23Ní bi kíĺ ki bíi bàlifī tɔb yii: «Ŋma di bí ti-kansikin ki làá ŋá míǹ?»

Ŋma di sá ukpaan ní?

24Niinee ní Yeesu kpambaliŋ kíĺ ki bíi kpákà ki là kí béé bi-kansikin un di làá nīn sá ukpaanee. 25Ní Yeesu bí yii: «Atimbun bɔtiibi wɔ́b́ binib bin pu bi kā dibeelee ní, ní biyidambi là bí nīn yíì-bi bilaŋŋaŋfitiibi. 26Ama án taa nín̄ sá míǹ nimbi cee. Un sá nimbi cee ukpaanee ń nīn sá kii kiwaayee, ní un là kí nīn sá uyidaanee ń kpántí ni-tɔntɔnliu. 27Ŋma di sá ukpaan ní? Un kā ki jīǹeeyaaa, un yú ki tìì tijinee ní? Un kā ki jīǹee di sá ukpaan. Ama man sá ni-kansikin kii utɔntɔnlee ní, míǹ puee ni mun ń nīn bí kii mamee. 28«Nimbi di bí m-cee m-falaabi poon baabadal, kaa fá-mi. 29Míǹ puee m-Baa bɔ́ntì dibeel kí tīī-mi. Míǹ mbaantiim ní ma mun bɔ́ntì Dibeel kí tīī-ni. 30Ní ŋyunti ŋun m làá kàl̄ Dibeelee, ni làá kàl̄ m-cee m-Beelin kí jī kí nyɔ̀, ní kí kàl̄ abeejal pu kí nīn sòoǹ Isirayeel yab naakɔti saalaa nì tilee bɔti.»

Siimɔn Peetroo làá néé yii waa nyí Yeesu

(Kpèè Maat 26.31-35, Maar 14.27-31, Yoow 13.36-38)

31Ní ti-Dindaan lī yii: «Siimɔn, Siimɔn, á pīlifì, Sitaan bālifì kí bàkal̀-si kii bi nín bàkal̄ idi puee. 32Ama m mēē a-pu án nín làá ŋá pu a-fookiiu ń taa wāŋkèe. Boonee a yaa láa fātìi kpántì a-bee, á dāá nyàatī a-nabiyaamu.» 33Ní Peetroo bí-u yii: «Ukpil, man bɔ́ntì ki cí, an yaa sá sarkaaa, man nì si di làá kɔ́, an yaa tí sá ŋkúmaaa, man nì si di làá kpú.» 34Ní Yeesu fātìi kíí-u yii: «Peetroo, ibaamɔn ní m tùkù-si, díǹ gba kí wàatī ukooja ń bāakèe, a làá néé yii saa nyí-mi, diba dibee mita pu.»

Bɔ́ntí kí cīití falaa un dòońee

35Ní Yeesu gíti bí-bi yii: «M nín nìn tú-ni ki bí yii ní taa yòon̄ animbil nì ditɔkɔl, nì anaatakee, tiba nìn lóò-naaa?» Ní bi kíí yii: «Aayee.» 36Ní u bí-bi yii: «Kɔŋkɔnnee un yaa cáá animbilee ń yòon̄, un cáá ditɔkɔlee mun ń yòon̄, un kaa cáá kitàataajikee ń nyāfì u-bɔkutil kí cùú dā. 37Di sá yii m tùkù ki cántí-ni yii, see án bàń m-pu kii an nín ŋmàn̄ ki síiǹ Unimbɔti gbɔŋku poon puee, yii: <Bi kàan̄-u ki tɔ́ bikpitibin#22.37 Yees 53.12..> Tiŋman tin kɔkɔwoooo Unimbɔti bɔnaatiliibi ŋmàn̄ ki síiǹ m-puee làá ŋá míǹ.» 38Niinee ní u-boonnooliibi bí yii: «Ukpil, kpèè, ntàataajimu muli sèé.» Ní Yeesu bí-bi yii: «An ŋmāntì.»

Yeesu bíi mèé Ɔliifi sufii jool pu

(Kpèè Maat 26.36-46, Maar 14.32-42)

39Bi lī míǹ ki dóòyee, ní u nyáń ki búntì Ɔliifi sufii jool pu kii u nín pée kpààa cá puee. Ní u-boonnooliibi nóó-u. 40Bi bāań niinee ní u bí-bi yii: «Ní nīn mèémaan kí taa gèeǹ án nín làá ŋá pu ni yaa kɔ́ icɔŋkinee, ní taa lítée.» 41Ní u sútì ki cūtì nyɔkɔpu ki ŋmāntì kii bi nín tòó ditaŋkpal puee ní ki gbāaǹ ki mēē yii: 42«M-Baa, a yaa là, kàkatī falaa un an sá ḿ nyɔ̀ nee kí wàatī-mi. Nì míǹ kɔkɔee, án taa nín̄ sá man lammi ní ń ŋá, án nīn sá sii yam.» [ 43Niinee ní Unimbɔti tuuŋŋu ŋubɔ nyánní yilpu ki dɔ́miń ki tīī-u kunyannyaau. 44Dinimbinaamandi din nìn kɔ́-uee puee, u nìn mɔ̄tìi bíi mèé tiŋan tiŋan, áli u-tuntuŋku tin kpántì kii afatikudindikee ki lítí kitiŋ#22.44 B. 43-44 kaa bí tigbɔŋkpikil tiba poon..]

45U mēē ki dóòyee ní ki yíkì ki nín gítiń u-boonnooliibi cee. U bāańee, bíǹ dɔ̄ ki gèeǹ, ki gīī púb, kun puee kunimbaau nìn kɔ́-bi tikpil. 46Ní u fīntì-bi ki bālifì-bi yii: «Ba pu ní ni gèeǹ? Yīkìí mèèmaan kí taa ti gèeǹ, án nín làá ŋá pu ni yaa kɔ́ icɔŋkinee, ní taa lítée.»

Bi cúú Yeesu

(Kpèè Maat 26.47-56, Maar 14.43-50, Yoow 18.2-11)

47Yeesu kaa láá sòon̄ ki ŋmíl̀, ní dinikitil diba cílìń. Juudasi un sá u-kpambaliŋ kansikin dibee līiń bi-nyɔkɔpu, ní ki sútì ki pìlìń Yeesu kí kpàl̄-u. 48Ní Yeesu bālifì-u yii: «Juudasi, mimmee nì dikpàldi poon ní a làá dū man Kinibiki kí ŋúbíǹ m-nannanliibaaa?» 49Yeesu boonnooliibi béè yii bi là kí cúú-uee, ní bi bālifì-u yii: «Ti-Dindaan, tí dū ntàataajimu kí gàatì-baaa?» 50Niinee, bi-kansikin ubɔ dū kitàataajiki ki gāā ki wúkutì usaraaŋakpil tɔntɔnliu ŋaŋgiitafal#22.50 Dūú ŋmàntī nì Yoow 18.10,26.. 51Ama ní Yeesu bí yii: «Yàntīmaanee! An ŋmāntèe,» ní ki gbēē utɔntɔnlee tafal, ní u pɔ́ɔkì. 52Ní Yeesu bālifì bisaraaŋakpilib nì bin cí kunimbɔtidiiyee kpilib, nì bibɔsoonliibi bin dɔ́miń kí cúú-uee yii: «Ba pu ní ni ŋúbiń ntàataajimu nì atambɔn kí dāá cúú-mi kii m sá unikpitee? 53Man nì ni di pée bí kunimbɔtidiin baabadal, ba pu ní naa cúú-mi niin? Ama ŋyunti bāań ni nì dibɔmbɔndi bɔtiu ń tɔ̄ ni-tundi.»

Peetroo néé yii waa nyí Yeesu

(Kpèè Maat 26.57-58,69-75, Maar 14.53-54,66-72, Yoow 18.12-18,25-27)

54Ní bi cúú Yeesu ki cáá-u ki búntì usaraaŋakpil dumpu, ní Peetroo nóó-u aboon aboon. 55Bi nìn kpāā ŋŋmi dicindi kansikin ki bíi wùl̀, ní Peetroo dɔ́miń ki kāl̀ bi-cee. 56Usapɔɔn ubɔ nìn tūǹ ditundi niin. U ká Peetroo nín kā ki kɔ́ĺ ŋŋmee, ní u dū u-nimbil ki báaǹ u-pu ki kpēē-u címmm, ní ki bí yii: «Uninja nee mun bí kijapaai kin bi cúú nee cee ní.» 57Ní Peetroo néé yii: «Unimpu, man kaa nyí-u.» 58An kútì fiiiyee, ní ubɔ mun gíti ká-u, ní ki bí yii: «A mun sá bin nóó-uee kansikin ubɔ ní.» Ní Peetroo kíí-u yii: «Maa sá u-yɔu.» 59An yúntì ki bàn̄ kii kukúluu kubɔ nyɔkɔmee, ní ubɔ mun gíti bí yii: «An pée sɔ̄ kí lā, uninja nee mun nìn bí kijapaai nee cee ní, kun puee u sá Galiilee ní.» 60Ní Peetroo kíí-u yii: «M-bɔɔ, maa nyí tin tin a sòoǹee.» U bíi sòoǹee, niin niin ní ukooja báakì. 61Ní ti-Dindaan fātìi kpēē Peetroo dímmm. Niinee ní Peetroo téetì ti-Dindaan nín bàà tùkū-u puee yii: «Díǹ, a làá néé yii saa nyí-mi diba dibee mita pu ní ukooja ń bāakì.» 62Ní Peetroo nyáń ki bíi sūǹ ki yáliŋkí.

Bi bēel̀ Yeesu ki gbáń-u

(Kpèè Maat 26.67-68, Maar 14.65)

63Binib bin nìn cí Yeesuee nìn bíi bèel̄-u ní ki gbáà-u, 64ní bi dū ŋŋaabu ki bóob́ u-nimbiin ní ki lì-u yii: «Béé un fáá-see kí lì.» 65Bi nìn gíti sīī-u asiibil tikpil ki kútì.

Bi cáá Yeesu bibɔsooŋkpilib cee

(Kpèè Maat 26.59-66, Maar 14.55-64, Yoow 18.19-24)

66Kutaa wúntèe, Juuda yab tindaŋkpilib nì bisaraaŋakpilib nì bimaradakaliibi kpáfì ki làá sòoǹ u-bɔti, ní ki yāntì bi cáá-u ki cūnnì bi-cee. 67Ní bi bālifì-u yii: «Tùkù-ti sii di yaa sá Meesiya?» Ní u kíí-bi yii: «Báà m yaa pée tùkū-naaa, naa làá fōō kí kíí, 68m yaa tí bālifì-ni tibɔtaaa, naa làá kíí-mi. 69Ama kí kíĺ kɔŋkɔnnee kí nīn cée, man Kinibiki làá nīn kā Unimbɔti Mpɔŋkɔdaan ŋaŋgiil pú#22.69 Ilan 110.1..» 70Ní bi-kɔkɔ bí yii: «Mimmee a sá Unimbɔti Jipɔɔn deeyaa!» Ní u kíí-bi yii: «Kii nimbi ni-ba nín lī puee.» 71Niinee ní bi bí yii: «Ti làá gíti ŋá ba biseeradambi! U sòon̄ timbi ti-ba gbìl̄ dee.»

നിലവിൽ തിരഞ്ഞെടുത്തിരിക്കുന്നു:

Luc 22: BASSARDC

ഹൈലൈറ്റ് ചെയ്യുക

പങ്ക് വെക്കു

പകർത്തുക