Luc 21

Ukpiipusoodaan ubɔ tɔ́ animbil

(Kpèè Maar 12.41-44)

1Yeesu yáatì ki ká bigaajab nín tòó animbil saraa dakaaun pu kunimbɔtidiinee, 2ní u ká ukpiipusoodaan ubɔ cáań igboo ili ki tɔ́#21.2 Maar 12.42.. 3Ní u bí yii: «Ibaamɔn ní m tùkù-ni, Unimbɔti nimbiinee, ukpiipusoodaan nee tɔ́ ki jítiǹ bin kɔkɔ kíǹee. 4Di sá yii bin kíǹee dū bi-nimbiliŋ ŋin pá baa làá dūú ŋá nì tibee ní ki tɔ́, ama ukpiipu nee nì u-sool poonee, u nín bàà cáá ŋin kí dā tijin kí jēe ní u cáań kɔkɔ ki dūu tɔ́ nee.»

Yeesu sòon̄ kunimbɔtidii wīitam pu

(Kpèè Maat 24.1-2, Maar 13.1-2)

5Binib biba nìn bíi sòoǹ kunimbɔtidii nyaaŋku pu, ataŋkpanyaan ŋin bi nìn dūu máń-kuee, nì tiwammɔntiil tin bi nìn dūu ŋá saraa ki tīī Unimbɔtee. Ní Yeesu bí-bi yii: 6«Kéè ni wāĺ kudii neeyaa, iwiin iba dòoń, naa dāa gíti kāntí ditaŋkpal diba tɔ́kɔ́ di-juti pu. An kɔkɔ làá dāá wīī ní.»

Mbusub bin làá bàń duulinya kúntitamee

(Kpèè Maat 24.3-14, Maar 13.3-23)

7Bi bālifì Yeesu yii: «Ŋyunti ŋulɔŋu ní tin a sòon̄ee làá bàń? Kudaaŋŋu kulɔkɔ di làá dàkà yii an tóobiń?»

8Ní Yeesu bí yii: «Ní nīn nyíǹ ni-ba ubɔ ń taa ŋmàtiǹ-ni, kun puee binib tikpil làá dāá dū man yindi kí kpántí bi-yaŋ, kí bí yii bíǹ di sá man, kí tùkù-ni yii ŋyunti bāań. Ama ní taa nóó-bi. 9Ni yaa láa gbìl̄ bi sòoǹ tijáti nì fìkil fikil kitiŋ puee, ni-pɔbiliŋ ń taa bīil̀. An máaǹ tíǹ kɔkɔ ń bàń kí wàatī. Ní nīn nyí yii duulinya kúntitam kaa dá láá yá.» 10Ní u gíti lī yii: «Kitiŋ kiba yab dāa yíkí ní kí jáǹ kiba yab, ní dibeel diba yab ń yīkì kí jáǹ diba mun yab. 11Ajan tikpil puee, kitiŋ làá dāá cìŋkì ŋkpitim pu, ní bìlbil kúm nì ŋkùm làá dāá nyā atinjan kupaau poon. Tiwan tikpil làá dāá ŋá kí kɔ́ǹ binib tifaandi, ní tidaandi tikpaandi dāa pāantí kutagbɔŋu pu.

12«Kí wàatī tíǹ kɔkɔ ń bàńee, bi làá cūtì-ni kí sàaǹ-ni, kí cáá-ni ibɔsoon akpafidiinni, kí pìin̄-ni sarka. Bi làá cáá-ni bibɔtikpaambi nì biyidambi nimbiin man pu. 13Niin ní ni dāa kāntí mpaan kí sòoǹ nì bi tin ni nyí man puee. 14Míǹ yaa bāań-nee, ní bɔ́ntí ni-ba kí taa nín̄ yáliŋkí tin ni làá tin sòoǹ kí fīī ni-bee pu. 15Kun puee mama m-ba di làá dāá tīī-ni iciin nì tibɔti tin ni làá sòoǹ kí líí ni-nannanliibi, bí taa ŋmā kí kpákáǹ-nee. 16Ni-baabi nì ni-nab nì ni-nabiyaamu nì ni nì bin pēēyee, nì ni-bɔɔbi làá dāá dū-ni kí ŋúbíǹ ni-nannanliibi, ní bíǹ ń kpɔ̀ ni-kansikin biba. 17Báà ŋma làá dāá nīn ná-ni ni nín fōō man ki kííyee pu. 18Ama, nì míǹ kɔkɔee, ni-yikpiliku báà kubɔ kaa làá lēē ni-yil pu kí wāŋkì. 19Yūĺmaan mmɔntiimin, míǹ ní ni ŋūǹ kí dāá fīī ni-ba.»

Butɔbu làá jàkà Jeerusaleem

(Kpèè Maat 24.15-21, Maar 13.14-19)

20«Ni yaa láa ká soojab dɔ́miń ki māntì ki tú Jeerusaleem tiŋkee, ní béé ŋyunti gbantee yii butɔbu làá jàkà-kì dee. 21An yuntiŋuee, bin yaa láa bíń Juudee tiŋkinee ń nīn sáń ki dàb̀ ajoon. Bin yaa láa bí Jeerusaleem tiŋkinee ń nīn sáń ki nyēē, ní bin yaa láa bíń tisatinee ń taa kpìnní mmɔŋki. 22An dāa sá ipɔntoon wiiŋyi ní, kí ŋá kii Unimbɔti gbɔŋku poon nín ŋmàn̄ ki síiǹ puee#21.22 Dūú ŋmàntī nì Oosee 9.7.. 23Ama, falaa dɔ̄ ki cí bipɔdambi nì bimatib iwiin gbanti poon. An dāa sá kunimbaakpaaŋŋu ní kitiŋ kɔkɔn. Unimbɔti ŋuul làá dāá lítí dinibul nee pu tikpil. 24Bi làá kpɔ̀ binib tikpil nì ntàataajimu, kí cúú tikpil kí cáá cùnnì kuyuŋu atimbun kɔkɔn, ní bin kaa nyí Unimbɔtee ń dāá jī Jeerusaleem kí tāā pùb, kí dāá sāā bi-yuntiŋu.»

Yeesu gítintam

(Kpèè Maat 24.29-35,42-44, Maar 13.24-37)

25«Ni làá dāá ká tidaandi ŋwìiń nì uŋmal nì iŋmalbijaa pu#21.25 Dūú ŋmàntī nì Yees 13.10, Eesee 32.7, Joow 3.3-4.. Kitiŋ puee, atimbun dāa bí ki yáliŋkí nì ŋi-ba, ní tiŋku nyiŋgbanti wooku dāa kɔ̄ntí-bi tifaandi. 26Binib yaa dākafì tin bí ki dòoń kitiŋ puee, an faantee làá dāá kpɔ̀-bi. Ní ipɔn in bí kutaa puee ń dāá cìŋkì. 27Ŋyunti gbantee ní bi dāa kāntí man Kinibiki dòoń ditagbandi pu ki jìl̀ pàlpal nì mpɔn nì tinyool tikpil#21.27 Dani 7.13.. 28Tin bí nee yaa láa bíi ŋáańee, nimbi ń mɔ̀tīí yūĺ kí ká kunyannyaau, ni-fiil tóobiń dee.»

Fiigi subu túkutam bɔŋmantikaati

(Kpèè Maat 24.32-35, Maar 13.28-31)

29Ní Yeesu dū tibɔŋmantikaal nee ki ŋmāntì-bi yii: «Kpèèmaan fiigi subu nì isufi in kɔkɔ kíǹee nín dàkà-ti tiŋyee. 30Ni yaa ká i bíi túkù tifaapɔnee, ni béetí yii kuseeu tóobiń dee. 31Míǹ mbaantiim, ni yaa láa ká tin kɔkɔ m sòon̄ nì ni nee bíi jītée, béémaan yii Unimbɔti Beel tóobiń dee. 32Ibaamɔn ní m tùkù-ni, nimbi waanee nib kaa làá kpú kí kúntí ní an bɔtee kɔkɔ ń bàń. 33Kutagbɔŋu nì kitiŋ dāa bí kí kúntí, ama man bɔti kpá kí kúntí jaanjaan.»

Kun pu an máaǹ tí taa nín̄ gèeǹee

34«Ní nīn nyímaan nì ni-ba kí taa yàntī njinjim nì ndanyoon nì duulinya landɔkɔi ń jī mpaan ni-pɔbiliŋ poon. An yaa sá fám, Unimbɔti bɔsooŋyi wiiŋŋu gbanti làá dāá túuǹ-ni. 35Ŋu dāa tòoń kii kulaaŋŋuee, kun puee an làá dāá bìin̄ kitiŋ kɔkɔ nì ki-nib pu ní. 36Míǹ puee ní taa nín̄ gèem̀maan. Nín̄ mèémaan múlmul, mbusu wiiŋyi gbanti yaa láa bāańee, ní ká mpɔn kí ŋmátí tikɔkɔ poon, kí ŋmā kí dāá yūĺ man Kinibiki nimbiin.»

37Kinyɔŋ gbanti poonee, baabadalee, Yeesu nìn dàkà Unimbɔti bɔti kunimbɔtidiin, ní kunyeeuee ú cù kitimbilii kin bí dijool din bi yíì Ɔliifi sufii joolee pu kí dòon̄. 38Ní samaa kɔkɔ nìn kíntiń-u kutaafaau pɔ̀lpɔl kunimbɔtidiin kí pīlifì tin u sòoǹee.

നിലവിൽ തിരഞ്ഞെടുത്തിരിക്കുന്നു:

Luc 21: BASSARDC

ഹൈലൈറ്റ് ചെയ്യുക

പങ്ക് വെക്കു

പകർത്തുക