Luc 20

Yeesu pɔŋŋu nín nyánní laakiŋyee

(Kpèè Maat 21.23-27, Maar 11.27-33)

1Dalba, Yeesu bíi dàkà samaa ki sòoǹ tibɔmɔntiil kunimbɔtidiinee, ní bisaraaŋakpilib nì bimaradakaliibi nì bitindaŋkpilib cílìń bi-pu, 2ní ki bí-u yii: «Nì nsan ŋulɔŋu pu ní a ŋáań tin bí nee ní? Ŋma di pú-si nsan á ŋá míǹ?» 3Ní u kíí-bi yii: «Ma mun làá bàlifì-ni tibɔti tiba. 4Ní tùkù-mi Yoowaneesi nín fùul̀ binib Unimbɔti nyimee, ŋma di tīī-u an pɔŋŋu ní? Unimbɔtaaa, binib?» 5Niinee ní bi kíĺ ki bíi sòoǹ bi-ŋmaniŋma yii: «Ti yaa kíí-u yii: <Unimbɔti di tīī-u an pɔŋŋu,> u làá lì yii: <Kin, ba ŋá ní naa fōō u-bɔti ki kíí?> 6Ti yaa tí kíí-u yii: <Binib di tīī-u,> kunipaau nee kɔkɔ làá yāŋkì-ti ataŋkpee kí kpɔ̀, kun puee báà ŋma nyí ibaamɔn yii, Yoowaneesi sá Unimbɔti bɔnaatiliu ní.» 7Niinee ní bi kíí Yeesu yii: «Taa nyí un di tīī Yoowaneesi mpɔn ú fàl̀ binib Unimbɔti nyimee.» 8Ní u fātìi kíí-bi yii: «Ma mun kaa làá tùkù-ni nì nsan ŋun pu ní m ŋáań mimmee.»

Bipaadaŋkpitib bɔŋmantikaati

(Kpèè Maat 21.33-44, Maar 12.1-11)

9Boonee ní Yeesu dū tibɔŋmantikaal nee ki bíi sòoǹ nì samaa yii: «Uninja ubɔ di kùn̄ fiinyi#20.9 Dūú ŋmàntī nì Yees 5.1. kpaabu, ní ki dūu ŋúbiǹ bipaadambi, ní ki búntì nsan ki yúntìń. 10Isufee biliŋ kìtitam bāańee, ní u túnní u-tɔntɔnliu ubɔ bipaadambee cee ú fōō u-jandi kí cáań-u. Ní bi cúú-u ki gbáń ní ki jìn̄-u ki gíiǹ nì iŋaŋkulim. 11Ní bukpaadaanee gíti túnní u-tɔntɔnliu ubɔ mun bi-cee ní bi tí cúú u mun ki gbáń ki kɔ́ǹ-u icoo ní ki jìn̄-u ki gíiǹ nì iŋaŋkulim. 12Ní u gíti tú utataati, ní bi cúú-u ki ŋá-u tiweendi ní ki jìn̄-u ki nyántì. 13Ní bukpaadaan bí yii: <M làá gíti ŋá mana? See ḿ dū m-jipɔɔn un m néeńee kí tɔ̄. An yaa yíì, bi làá fàŋkì úǹ.> 14Ama bipaadambee nín wál̀ u-jipɔɔn dòońee ní bi bíi lì tɔb yii: <Kpèè, un làá dāá jī bukpaa fool boonee dee! Tí kpɔ̀maan-u, bukpaa ń kpántí ti-yɔbu.> 15Ní bi cìb̄ ki cúú-u ki cáá-u ki nyántì ŋkpaabuku ní ki kūū-u.»

Ní Yeesu bālifì-bi yii: «Kɔŋkɔnnee, bukpaadaan làá ŋá-bi mana? 16U dòoń ní kí kpɔ̀-bi ní kí dū u-kpaabu kí ŋúbiǹ biba.» Bin pílifèe nín gbìl̄ an bɔtee, ní bi lī yii: «Mbusu ń cù ndan.» 17Ní Yeesu dū u-nimbiliŋ ki báaǹ bi-pu, ní ki bālifì-bi yii: «Unimbɔti gbɔŋku poon nín ŋmàn̄ puee làá lì yii ba dee, yii:

<Ditaŋkpal din bidimaliibi nìn dūu fée,

díǹ di dāa kpántì

ditaŋkpal din ŋúb́ kudii pɔŋŋuee#20.17 Ilan 118.22..>

18Un kamaa di yaa lítì ditaŋkpal gbanti puee làá kɔ̄fì, ní un pu ní ditaŋkpalee yaa tàb̄ee, udaan làá nà ní dúsi dusi.»

Bi bālifì Yeesu yii bí pà lampoooo?

(Kpèè Maat 21.45-46, 22.15-22, Maar 12.12-17)

19Niinee, bimaradakaliibi nì bisaraaŋakpilib bíi nyàab̀ isan kí cúú Yeesu, kun puee bi béè yii bíǹ pu ní u dū tibɔti gbanti ki ŋmāntì, ama binib nín nìn wīikí u-cee puee, bi fāŋkì. 20Ní bi kíĺ ki bíi cɔ́ŋkí Yeesu ní ki nyántì binib biba ki túnní u-cee, bi dū bi-ba ki gíiǹ nnimɔntiyaamin kí píĺ-u tibɔti bí ŋmā kí cúú-u kí dūú ŋúbiǹ gɔmina ń dáaĺ u-tafal. 21Ní binibee bālifì Yeesu yii: «Ukpil, ti nyí yii tin a sòoǹee nì tin a dàkèe bí deedee, báà unil yaa yāntì ki bí miŋyee, aa fātìi tɔ́, ní ki dàkà nnimbɔtisan nì ibaamɔn. 22Míǹ puee, á tùkù-ti, ti-marau pú-ti nsan yii tí pà lampoo kí tīī Room gɔminauaaa, an kaa pú?» 23Yeesu béè bi nín bíi líbití-uee ní ki bí-bi yii: 24«Cáaḿmaan-mi animbil.» Bi cáańee, ní u bālifì-bi yii: «Ŋma yindi nì u-yil di kā animbil pu na?» Ní bi kíí-u yii: «Gɔmina Seesaar.» 25Niinee ní u fātìi bí-bi yii: «Dūmaan tin gɔmina yèe kí tīī gɔmina, kí dū Unimbɔti mun yati kí tīī Unimbɔti.» 26Baa ŋúń ki ká u sòon̄ dinyɔɔbuŋkpitil diba binib nimbiin bí bàà ŋmā kí cúú-u. U nín nìn kíí-bi puee, bi bākatì, ní kaa ti ká tiba kí gàtī.

Bi bālifì Yeesu difìkitil bɔti

(Kpèè Maat 22.23-33, Maar 12.18-27)

27Boonee ní Sadusab biba dɔ́miń. - Bíǹ di sá dikitil din lì yii difìkitil kaa bée#20.27 Dūú ŋmàntī nì Atuun 23.8.. - Bi nìn bālifì Yeesu yii: 28«Ukpil, Mooyiisi ŋmàn̄ mara ki síiǹ-ti yii: <Unil yaa cáá kinabiki ní u kpíì ki yāntì u-nimpuu, kaa màl̄ee, u-nabikee ń fōō ukpiipuee kí màal̀ kí téeǹ u-nabiki kin kpíìyee yil pu#20.28 Kpèè Ditee 25.5-6..> 29Kun pu ti bàlifēe di sá, nnabiyaamu mululi di nìn bí, upeepeekaa cáá unimpu ní ki kpíì ki yāntì u-nimpuu, kaa màl̄. 30Ní uliliiti fōō-u ní ki mun kpíì, kaa màl̄ 31ní utataati mun míǹ. Binib bilulee kɔkɔ cáá-u ki tin tú ki kpíì kpíì kaa màl̄ mbiyaamu. 32Boonee, unimpuee u-ba mun dāa kpíì. 33Mimmee, difìkitil dalee, bi-kɔkɔ yaa láa fīkitèe, bi-kansikin ŋma di dāa yì unimpuee? Kun puee bíǹ binib bilulee kɔkɔ cáá-u ki ká.»

34Ní Yeesu kíí-bi yii: «Duulinya nee poon ní bininjab cāab̀ binimpoobi, ní binimpoobi mun mɔ́ń bininjab. 35Ama bininjab nì binimpoobi bin Unimbɔti ká yii bi máaǹ kí dāá fìkitī ditaŋkpiilin kí dāá kàl̄ duulinyapɔɔn un dòoń boonee, dinimpucaal nì dicamɔndi dāa kpá. 36Baa dāa gíti kúù, ní ki dāa bí kii Unimbɔti tuuŋyi nín bí puee, ní ki dāa sá Unimbɔti jipɔmbi, kun puee bi fātìi fīkitì ditaŋkpiilin. 37Mooyiisi nìn ŋmàn̄ ki cántì yii bitaŋkpiibi làá dāá fìkitī, laakin u sòoǹ kisugbooi kin nìn fōō ŋŋmee bɔtee. U nìn yíiń ti-Dindaan yii: <Abraam Nimbɔtiu, Isaaki Nimbɔtiu, Jaakɔb Nimbɔtiu#20.37 Kpèè Disa 3.2,6..> 38Unimbɔti sá bin wāĺee Nimbɔtiu ní, waa sá bitaŋkpiibi Nimbɔtiu, kun puee úǹ ceeyee bíǹ kɔkɔ kaa kpíì.» 39Niinee ní bimaradakaliibi biba bí-u yii: «Ukpil, a nín sòon̄ puee ŋān̄ tikpil.» 40Kun puee baa nìn gíti ŋūǹ kí bàlifì-u tibɔti tiba kí kpèè u-nyɔkɔn.

Meesiya sá Daafiidi Dindaan

(Kpèè Maat 22.41-46, Maar 12.35-37)

41Ní Yeesu bí-bi yii: «Nì mana ní ni ŋūǹ kí lì yii Meesiya sá Daafiidi naantiiu? 42Daafiidi u-ba lī Inyɔŋki laŋyi gbɔŋku poon yii:

<Ti-Dindaan tùkū m-Dindaan yii:

Kàl̄ m-ŋaŋgiil pú yéè

43kí nīn cí ŋyunti ŋun m làá yàntī a-nannanliibi ń kpántí

a-taaŋi tɔ́kɔŋkaatee#20.43 Ilan 110.1..>

44Daafiidi u-ba yíì-u u-Dindaan ní: kin mana ní u ŋūǹ kí nīn sá Daafiidi naantiiu mun?»

Yeesu kpáafì u-boonnooliibi bimaradakaliibi pu

(Kpèè Maat 23.1-36, Maar 12.38-40, Luuki 11.37-54)

45Yeesu bíi sòoǹ kunipaau bíi pílifíǹ-uee ní u bí u-boonnooliibi yii: 46«Ní nīn nyíǹ ni-ba nì bimaradakaliibi. Bi néeń ki pèentí abɔkutikpaan ki yìiǹ, ki néeń bí nīn jáaḿ-bi sampaambi pu, ní ki néeń ki kàal̀ nyɔkɔpu jaliŋ akpafidiinni nì diinabin, 47ní ki fìkì bikpiipoobi wanti, ki mèé ŋwimmeem yúntí, kí dàkà binib yii bi sá bimɔntiibi. An puee ditafadaaldi din gíti lákatèe dɔ̄ ki cí-bi.»

നിലവിൽ തിരഞ്ഞെടുത്തിരിക്കുന്നു:

Luc 20: BASSARDC

ഹൈലൈറ്റ് ചെയ്യുക

പങ്ക് വെക്കു

പകർത്തുക