AMTAW 9
9
Sawla paleung amtlau nai
(Ataw 22.6–16, 26.12–18)
1Na i py Sawla my ly Areng teng y abangnaihchi ai ram nai leu hawi mymychi ai padei ai tau nai leu thui nai tarawi y, pathyp pi nai keung kalen keh teng y chei i. 2huni Lam y awm nai niu nai ngierei ai ly, neampacho ai py neampachy ai py kawm iy, Jerusalem y pahawi thai ai nai, Damaska avang i achura yhm bawibawi y pei ai nai cha hnei. 3Naibaly chei nai thym khala y Damaska ahawi y tym ai nai kha y, tlenrei khyh my kangvang ly kani mang i dengdairei mymy i ahawi y angvang hai phang na; 4naibaly mymy ly khaileaung y atlym i mymy teng y, “Sawla, Sawla, ati mana nai nang ly kai ai ana ryry lawh?” napi nai raawi thai. 5Naibaly ni my ly, “Areng, nang ly ami mo?” napi. Ni my ly, “Kai ly Isu, nang i ana nai ne; 6na i py angthau ly avang y kun, hunaibaly nang i sa ai nai sai ang thui pi ai mang,” napi. 7Naibaly mymy teng y chei teang naichi ly amcheng pawp naimy angdo jo i, tyn mang ly thai, na i py ami ai py niu y. 8Naibaly Sawla ly khaileaung i nai angthau; naibaly mei pali i ati sai py niu thai y bo; hunaibaly nichi ly kiu y pahawi naimy ni ai Damaska avang y tym hai bo. 9Naibaly mymy ly sai py niu y naimy kani thomrei awm i, ati sai py cho py cho y, nei py nei y.
10Naibaly Damaska avang y ly abangnai leaungrei awm, amyn ly Anania napi nai ne. Naibaly Areng my amang kamta mymy teng y amteng i, “Anania,” napi. 11Naibaly mymy ly, “Khen cham Areng, kai hi y awm he,’ napi. Naibaly Areng my ly, mymy teng y, “Angthau ly, Lam Kataw napi naira y tako ly, Juda i yhm y Tarsa i khumi, amyn Sawla napi nai ai deng; 12khen cham, mymy ly chiu sa dudu, naibaly amyn Anania napi nai khumi leaungrei kun i, mymy i mei angvang hai ai nai mymy i tlang tleaung y kiu tamam nai amang kamta niu bo,” napi. 13Naibaly Anania my ly, “Areng, huni khumi ly Jerusalem i nang i khumi kachaichi i tlang tleaung y ana nai nawi nai sai ly khumi neangneangchi i labeaung y kathai bo; 14naibaly hi y py nang i amyn palau nai ngiereichi ai ly kawm ai nai, pathyp pi nai keung kalenchi teng i dengdairei cha nga na a,” nanai pathang. 15Na i py Areng my ly mymy teng y, “Chei, chei; Cheng Takhrachi hawi, samrangchi hawi, Israela kangpreangchi teng y kai i amyn apu ai nai vawi nai na a; 16kai i amyn deaungkho y mymy ly mana tanrei patang ai mo, nanai kaimy ni ai pany hai ai,” napi. 17Naibaly Anania ly chei i yhm y kun, naibaly mymy i tlang tleaung y kiu tamam iy, “Be Sawla, nang i mei angvang ai nai hawi, nang ly Phailo Kachai kawi naimy awm thai ai nai py Areng, nang i tako nai lam y nang teng y amteng nai Isu my kai ai ang pato nai he,” napi. 18Naibaly tlenrei khyh my mymy i mei i dengdairei ali ka-tawm tla praw i, mymy i mei ly angvang teang bo; naibaly mymy ly angthau iy baptisma nga bo. 19Naibaly biu cha i amcheng ali teang bo.
Damaska avang y Sawla leu thui nai
20Naibaly mymy ly Damaska avang i awm nai abangnaichi teng y ly kani majirei mo awm, naibaly achura yhm y Isu ly Tameuh i Chapo ne, nanai thui pi praw. 21Naibaly mymy i leu thai nai ngiereichi my ly rengrang tlai ly napi i, “Hini khumi ly Jerusalem avang i hini amyn y ym naichi ai ana reng nai ny y lawh a? Hini khumi ly nichi ai kawm iy pathyp pi nai keung kalenchi teng y hawi ai nai hi y ang jeu khyp nai na a,” napi. 22Na i py Sawla my ly ham ra nai, huni ly Krista ne khypkhyp, nanai thui pi pachai ra veng i, Damaska avang y awm nai Judachi ai ly tlau thai y pa-rei my pathang.
23Naibaly kani kra parai nai bo y ly Judachi my Sawla ai padei ai tau nai arum u; na i py mymy ly nichi my bawm ai tau nai ly pany bo.#2 Kor 11.32–33 24Naibaly nichi ly ni ai padei ai tau nai apai pa-kho tleirei y vum kanithun amo jojo. 25Na i py abangnaichi my ni ai vum y pahawi iy apai thaibeng pa-kho mang y saipa mang pala kathiu bo.
Sawla ly Jerusalem y tym ali teang nai
26Naibaly Sawla ly Jerusalem y tym baly abangnaichi hawi amkawm ai nai tau; mymy ai ly nichi bawibawi jei, mymy py abangnai ne teang bo, nanai ym y. 27Na i py Barnaba my ly ni ai hawi i, amtaw thau naichi teng y chei hai iy, ni ly lam y Areng ai niu nai hawi arum nai sai py, Damaska avang y Isu i amyn y vam parai pa-rei leu thui pi nai sai py mymychi teng y thui pi bo. 28Hunaibaly Sawla ly Jerusalem y nichi teng y kun py kun, theu py theu i, Areng i amyn y vam parai pa-rei my leu thui pi. 29Naibaly mymy ly Krik pri i Judachi teng y leu thui i aei; na i py nichi my ly mymy ai padei ai nai tau. 30Naibaly amjo amnauchi my ly huna nai pany i mymy ai Kaisari avang y hawi u kathiu iy, Tarsa avang y pato vui.
31Hunaibaly Judai pri y hawi, Kalili pri y hawi, Samari pri tengtang y py palau takhra kamkawm ly khaw ryh khaw ryh i awmnem bo; naibaly Areng ai tahm khai naimy Phailo Kachai i awmnem naira y awm iy peung ryh peung ryh bo.
Ludda hawi Joppa y Petera tym nai
32Naibaly hina nai awm, Petera my meingtym tleirei y amki nai tarawi y Ludda avang y awm nai khumi kachaichi teng y py chei. 33Hu y ly khumi leaungrei amyn Ainia napi nai ai amkhyn nai deaungkho y saneng tajarei ira y aseaung jojo nai niu. 34Naibaly Petera my ly mymy teng y, “Ainia, Isu Krista my ang hawihai nai bo, angthau ly, nang i nihbai taeang,” napi. Hunaibaly mymy ly angthau praw ryp. 35Naibaly Ludda hawi Saron adym y awm naichi bawibawi ly mymy ai niu i, Areng mang y mo hi u bo.
36Naibaly Joppa avang y amyn ly Tabitha napi nai abangnai leaungrei awm; (Tabitha nanai sai ly Dorka ne;) huni neampachy i atiti kahawi sa nai hawi, atiti sabawm nai py neangneang awm. 37Naibaly hunai thym khala y ly ni ly no i dei bo; naibaly nichi ly mymy ai tui pahiu pan iy, salo i sambeu y paseaung bo. 38Naibaly Ludda ly Joppa kasa nai deaungkho y abangnaichi ly Petera hu y awm, nanai pany i, “Kra y naimy kaichi teng y jeu ba,” nanai takeng ai nai mymy teng y khumi leaung nyhrei pato. 39Naibaly Petera ly angthau i myni teng y chei teang bo. Naibaly tym bo nabaly ni ai salo i sambeu y chei hai; naibaly neampachy lumai bawibawichi ly mymy i ahawi y angdo iy Dorka mymychi teng y awm nai khala y baichu sa naichi, kanih sa naichi patei nai tarawi y vo u lengleang. 40Na i py Petera my ly nichi ai patheu bebe i, kheukhu di iy chiu sa; naibaly veu mang y mo tha iy, “Tabitha, angthau,” napi. Hunaibaly mymy ly mei pali i Petera ai niu baly angthau i ateh. 41Naibaly Petera my kiu thawi pi i ni ai pathau bo; hunaibaly khumi kachaichi hawi, neampachy lumaichi ai palau iy heng teang nai patei bo. 42Naibaly Joppa avang bawibawichi ly pany be i, khumi neangneang Areng ai ym bo. 43Naibaly Petera ly kani neangneang Joppa avang y Simon, mawipeih sa nai keung i yhm y awm jo.
നിലവിൽ തിരഞ്ഞെടുത്തിരിക്കുന്നു:
AMTAW 9: KCL02
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khumi Common Language Bible © Bible Society of Myanmar, 2005.
