AMTAW 8
8
Sawla my palau takhra kamkawmchi ai ana patheng nai
1Naibaly huni kani ly Jerusalem i awm nai palau takhra kamkawmchi ai khri pa-rei ana ai nai amteaung bo; hunaibaly amtaw thau naichi ny y baly nichi ly Judai pri hawi Samari pri meingtym tleirei y ahei bebe bo. 2Naibaly Tameuh ai dawn parai nai amichi my mo Stephana ai ly up u i, khrikhri pa-rei vo hai. 3Na i py Sawla my palau takhra kamkawmchi ai khrikhri pa-rei ana i, yhm tleirei kun iy neampacho neampachychi ai ryh i theaung y khai bo.#Ataw 22.4–5, 26.9–11
Samari pri y Satang Kahawi thui nai
4Naibaly ahei naichi ly meingtym tleirei y chei iy leu thui pi preiprei. 5Naibaly Philipa ly Samari avang y chei iy, mymychi teng y Krista i satang thui pi. 6Naibaly khumi mipuichi ly mymy i leu thui nai hawi, atiti rengrang sa naichi niu iy, Philipa i leu thui pi nai ly paleung vanrei tangai pi. 7Ati mana nai mo nabaly khumi neangneang ai nam naichi i taku theung i dengdairei vawinamchi ly athorei my aeu i theu bo; kamkhyn hawi kheu kambai neangneangchi py hawi pawn veng bo; 8naibaly huni avang y ly khri pa-rei amo theu u na.
9Naibaly amyn Simon khumi leaungrei awm; ni ly “Kai khumi kalen ne,” nanai jangvaini y huni avang y ly Samari i khumichi ai khri pa-rei lyh ai awm nai pa-rei atam sa pi; 10naibaly khumi bawibawichi ly katheang keh nai dengdairei len keh nai khrairei my, “Hini khumi ly Tameuh i atiti sa thai naira Kalen napi nai ly, hini ne bo he,’. nanai ni i leu tangai pi bawibawi veng. 11Mymy ly atam sa iy nichi my kra parai pa-rei lyh ai awm parai nai deaungkho y mymy i leu tangai pi bo. 12Na i py nichi ly Tameuh i peang nai hawi Isu Krista i amyn Satang Kahawi py Philipa my thui pi nai ym u khala ly, neampacho py neampachy py baptisma nga u bo. 13Naibaly Simon khrairei ym rau bo; naibaly mymy ly baptisma nga pajau iy Philipa teng y awm jo i, ka-ma-rachi hawi khrikhri pa-rei lyh ai awm nai sa naichi niu i, rengrang tlai ly, napi.
14Naibaly Jerusalem y awm nai amtaw thau naichi ly Samari i awm naichi Tameuh i leu tangai bo, nanai thai i, mymychi teng y Petera nini Johan ai pato; 15naibaly nini ly tym baly nichi Phailo Kachai nga thai ai nai chiu sa pi; 16hu ti y rai khala y ly nichi theung y ami teng y py tym y rai; nichi ly Areng Isu i amyn y baptisma harei nga nai khyh rai. 17Naibaly nini my mymychi i tlang tleaung y kiu tamam i, nichi ly Phailo kachai nga u bo. 18Naibaly amtaw thau nai nini my kiu tamam nai deaungkho y phailo kachai pei nai ne, nanai Simon my niu iy, 19“Ami i tlang tleaung y kai kiu tamam nai ngierei ly Phailo Kachai nga thai ai nai, hina nai kamta sa thai naira ly kai ai py pei kyh,” nanai nini teng y tangka pei ai nai tau. 20Na i py Petera my ly ni teng y, “Nang i tangka ly nangmy hawi vanrei tamo teang sy, nang ly Tameuh i pei nai ly tangka hawi van ai nai tau lawh nai deaungkho y. 21Hinira y ly nang abawi y leang, abi py abi y leang; nang i paleung ly Tameuh i dawn naira y hawi y leang. 22Hunai deaungkho y nang i kamngo uikhei ly,. Areng teng y chiu so, hunaibaly nang i paleung y nang i dawn nai ly ang pahen pi lym ai mang. 23Nang ly atiti kho naira myh y hawi, kamngo kawm rang naira y awm, nanai kai pany,” napi. 24Naibaly Simon ly, “Nangchi i atiti thui naichi ly kai i tlang tleaung y ati sai py tym y ai nai Areng teng y chiu so pi kyh,’. nanai pathang.
25Hunaibaly nini my ly Areng i leu pany hai iy thui pajau nai bo y, Samrai pri i avang neangneangra y Satang Kahawi thui pi preiprei naimy Jerusalem y vawi teang bo.
Philipa hawi Ethiopia i miteaung keh
26Naibaly Areng i kani pri i amtaw thau nai leaungrei my Philipa teng y, “Angthau ly, tokalawi mang, Jerusalem dengdairei Kaza avang y theu nai lam y tako ba; huni ly daichi ka-vym ne,” napi. 27Hunaibaly ni ly angthau i tako bo. Naibaly khen cham, Ethiopia pri i khumi leaungrei Ethiopia samrang nu Kandak i anui i tli chum nai khumi, areng tahm asang parai nai, ni i yhmtheaung bawibawi kry nai keung ly Jerusalem y Tameuh ai chiu ai nai chei bo; 28naibaly mymy ly vawi mang y ly ka-ri tleaung y atang nai tarawi y amo Isaia i cha-iu phain prei prei. 29Naibaly Phailo my ly Philipa teng y, “Huni ka-ri ahawi y chei ly, amkawm ba,” napi. 30Naibaly Philipa ly ni teng y angpreng iy amo Isaia i cha-iu phain nai thai i, “Nang i phain nai ly awm nai sai pany thai a?” napi. 31Naibaly ni my ly, “Ami py kai ai thui pi pachai y baly mana pany thai ai mo? napi. Naibaly mymy teng y ateh ai nai Philipa ai chi bo. 32Naibaly mymy i Tameuh cha-iu phain nai ly hini ra y ne,
“Beram tleh ai nai kamta ni ai ly mymychi my pahawi;#Is 53.7–8
Beram mui vau nai keung i mo y
beram cho hang y nai kamta ly,
Ni py leu katheu y.
33Mymy tahm apanem nai thym khala ly
mymy i tlang tleaung y tara chih ai nai pei y leang.
Mymy i kangpreangchi i satang ly ami my thui ai mo?
Khaileaung pri i dengdairei
mymy i hengra ly la pi bo,” nanai he.
34Naibaly tli chum nai khumi ly Philipa hawi arum i ni teng y, “Amo my hini leu ly ami i leu thui nai mo? Mymy i leu a. khumi takhra i leu a? nanai kang deng nai he,” napi. 35Naibaly Philipa my ly thui i, huni Tameuh cha-iu i leu pakeung i dengdairei amteaung iy mymy teng y Isu i satang thui pi. 36Naibaly lam y chei hawi nai thym khala y ly mani tui awm naira y mo tym i, tli chum nai khumi my ly, “Khen cham, hi y tui awm, kai baptisma nga ai nai ly ati my ang paka rai mo?” napi. 37[Naibaly philipa my, “Nang ly nang i paleung verei y ym baly avo,” napi. Naibaly mymy ly pathang i, “Isu Krista ly Tameuh i chapo ne, nanai kai ym,” napi.] 38Naibaly ka-ri ai ly anawn hai iy nini leaung nyhrei, Philipa hawi tli chum nai khumi ly tui y satla hawi, naibaly mymy ly ni ai baptis sa bo. 39Naibaly tui i nai theu kalau bo nabaly Areng i Phailo my ly Philipa ai la vui bo; naibaly tli chum nai khumi my ly ni ai niu ali y i, amo theu parai naimy chei prei bo. 40Na i py Philipa ai amichi my Azota avang y niu ali teang bi bo; naibaly mymy ly tako prei i Kaisari avang y tym pa-rei avang tleirei Satang Kahawi thui pi preiprei.
നിലവിൽ തിരഞ്ഞെടുത്തിരിക്കുന്നു:
AMTAW 8: KCL02
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khumi Common Language Bible © Bible Society of Myanmar, 2005.
