യെശ. 35
35
വീണ്ടെടുക്കപ്പെട്ടവരുടെ സന്തോഷം
1മരുഭൂമിയും വരണ്ടനിലവും ആനന്ദിക്കും;
നിർജ്ജനപ്രദേശം ഉല്ലസിച്ചു പനിനീർപുഷ്പംപോലെ പൂക്കും.
2അത് മനോഹരമായി പൂത്ത് ഉല്ലാസത്തോടും ഘോഷത്തോടും കൂടി ഉല്ലസിക്കും;
ലെബാനോന്‍റെ മഹത്ത്വവും
കർമ്മേലിന്‍റെയും ശാരോന്‍റെയും ശോഭയും അതിന് നൽകപ്പെടും;
അവർ യഹോവയുടെ മഹത്ത്വവും
നമ്മുടെ ദൈവത്തിന്‍റെ തേജസ്സും കാണും.
3തളർന്ന കൈകളെ ബലപ്പെടുത്തുവിൻ;
കുഴഞ്ഞ മുഴങ്കാലുകളെ ഉറപ്പിക്കുവിൻ.
4മനോഭീതിയുള്ളവരോട്: “ധൈര്യപ്പെടുവിൻ,
ഭയപ്പെടണ്ടാ; ഇതാ, നിങ്ങളുടെ ദൈവം!
പ്രതികാരവും ദൈവത്തിന്‍റെ പ്രതിഫലവും വരുന്നു!
അവൻ വന്നു നിങ്ങളെ രക്ഷിക്കും” എന്നു പറയുവിൻ.
5അന്നു കുരുടന്മാരുടെ കണ്ണ് തുറന്നുവരും;
ചെകിടന്മാരുടെ ചെവി അടഞ്ഞിരിക്കുകയുമില്ല.
6അന്നു മുടന്തൻ മാനിനെപ്പോലെ ചാടും;
ഊമന്‍റെ നാവും ഉല്ലസിച്ചു ഘോഷിക്കും;
മരുഭൂമിയിൽ വെള്ളവും
നിർജ്ജനപ്രദേശത്തു തോടുകളും പൊട്ടി പുറപ്പെടും.
7മരീചിക ഒരു പൊയ്കയായും
വരണ്ടനിലം നീരുറവുകളായും തീരും,
കുറുക്കന്മാരുടെ പാർപ്പിടത്തിൽ, അവ കിടന്ന സ്ഥലത്തുതന്നെ,
പുല്ലും ഓടയും#35:7 ഓട നദിയരികെ വളരുന്ന ഒരുതരം സസ്യം. ഞാങ്ങണയും വളരും.
8അവിടെ ഒരു പ്രധാനവീഥിയും പാതയും ഉണ്ടാകും;
അതിന് വിശുദ്ധവഴി എന്നു പേരാകും;
ഒരു അശുദ്ധനും അതിൽകൂടി കടന്നുപോവുകയില്ല;
അവൻ അവരോടുകൂടി ഇരിക്കും;
വഴിപോക്കർ, ഭോഷന്മാർപോലും, വഴിതെറ്റിപ്പോവുകയില്ല.
9ഒരു സിംഹവും അവിടെ ഉണ്ടാവുകയില്ല;
ഒരു ദുഷ്ടമൃഗവും അവിടെ കയറി വരുകയില്ല;
ആ വകയെ അവിടെ കാണുകയില്ല;
വീണ്ടെടുക്കപ്പെട്ടവർ അവിടെ നടക്കും.
10അങ്ങനെ യഹോവയാൽ വീണ്ടെടുക്കപ്പെട്ടവർ മടങ്ങി
ഉല്ലാസഘോഷത്തോടെ സീയോനിലേക്കു വരും;
നിത്യാനന്ദം അവരുടെ തലമേൽ ഉണ്ടായിരിക്കും;
അവർ ആനന്ദവും സന്തോഷവും പ്രാപിക്കും;
ദുഃഖവും നെടുവീർപ്പും ഓടിപ്പോകും.
നിലവിൽ തിരഞ്ഞെടുത്തിരിക്കുന്നു:
യെശ. 35: IRVMAL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
MAL-IRV
Creative Commons License
Indian Revised Version (IRV) - Malayalam (ഇന്ത്യന്‍ റിവൈസ്ഡ് വേര്‍ഷന്‍ - മലയാളം), 2019 by Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.