JAHON 8
8
[1Tiki Jisu thu Olive Chyng thangc tat kan the.#Baanhhy baibal mpeyna khou khatni reydouc hancloumei baibal mpeyna khou 8.1-11 hei maek ge; asaekc khou mi hei 21.24 tangv nai e; baihmei asaekc khou Luk 21.38 tangv nai e; baanhhy baibal akhat khou thu mi hei Jhn 7.36 tangv nai e. 2Nthuanh thauna lauthwan thwanzingh, kamei Ravkai khou guang dat the. Kumna meic guayna kadaeng khou guang kaduai dat pwkhou, kamei dungc keyna kaniw khou nchamlou thau the. 3Khoutei lungcmaanv bam khou nymmei ntumei gaanv khat ta Riakdanv dinhpouc nunc khatni Pharisimei nunc rui zay guangna, meic pang la khou tidinglouna, 4Jisu khou sa the, “Dinhpouc, mi pui hei kamei nkhuaimei taanv taanc bammei dyng khou nym tuang the. 5Mousi tuang Riakdanv rui mi kumhmei ta thu ntauh kwamluai nina e, twna sa the. Nang thu tabui sa tu cho?”#Lev 20.10; Ria 22.22-24 6Mi hei kaniw Jisu khuay nym khang kata nchanvmei tuang e. Khoutei, Jisu nkhum keyna, kabaanczung rui kandih khou hy bam the. 7Kaniw rui thanv dat thanv dat bam ti khou, Jisu khuang thauna, “Nangniw pang khou paapc taanh makpui mei gaanv khat rui nkwam rey tho,” twna Jisu rui kaniw khou sa the. 8Khoutei kamei nkhum key datna, kabaanczung rui kandih khou hy bam dat muay the. 9Hei tei chu pwkhou, kaniw tei, gaanvdaih liangmei khou rui thauna, khat khat swna tat ngam kan the. Nkhamh khou, mi pui na tei ding bam duc the. 10Khoutei Jisu ngangc thauna, “Tanpuile, kaniw tabui thangc tat ngam kan tha? Nang ta nkhuaimeipui e twna sa dat nimei meic maek khah?” twna sa the.
11“Maek khe, Haicpouc,” twna mi pui tei rui daw the.
“Ai rui ni nang ta nkhuaimeipui e twna sa lak khe. Tat tho, paapc taanc dat ri tho,” twna Jisu rui kakhou kadylou the.]
Jisu hei Mbaanv khang Gaanhmei e
12Jisu rui kaniw khou sa dat re, “Ai hei mbaanv khang gaanhmei e. Thow pw ni athei laypui mei tei kakhou ringhmei tuang gaanhmei nai puni, kumna kamei zinghmei khou tat dat ni tu hamh the.”#Met 5.14; Jhn 9.5
13Khoutei Pharisimei nunc rui Jisu khou, “Nang thu nang rana nang lam khou sa bam tuang de. Nang lat tei nchumh e twna laa khang maek ge,” twna sa the.#Jhn 5.31
14Jisu rui mundawna sa the, “Alam khou hei ai rui sa bam sini, ai rui samei hei nchumhmei e. Kalam thu ai tabui thangc rui guang tu cho khatni tabui thangc tat bam tu cho twmei ai thay e. Ai tabui thangc rui guang tu cho khatni tabui thangc tat bam tu cho twmei nangniw thay mak ge. 15Nangniw rui maansei tuang latzan ramsu sw tina e. Ai thu meic gaanv khat na ta sini latzan sw mak ge. 16Tiki ai rui latzan sw e thei, atuang latzan thu nchumh puni. Kalam thu ai arana sw ni tuang hamh e; ata ndiu guangmei aPu lev sw ni tuang de. 17Gaanv nei rui samei tei nchamc e thei, kamei rui samei tei nchumh the, twna nangniw tuang Riakdanv khou hylou e.#Ria 19.15 18Ai rui alam khou sa the, khatni ata ndiu guangmei Apu rui ni alam khou sa the.”
19Khoutei, “Nang Pu kiu tabui thangc tei naina cho?” twna kaniw rui kakhou sa the.
“Nangniw ata ni aPu ta ni thay mak ge. Nangniw ata thay khwan e thei, aPu ta ni thay ni tuang e.”
20Jisu rui mi guay hei kamei rui Ravkai khou, puatkat khuk pang loumei bamv khou nchamlou khou sa tuang e. Tiki meic gaanv khat na rui sini kata nym mak ge. Kalam thu katuang ganv tangh mak he.
Ai Tat Nimei Bamv Thangc tei Nangniw Guang Ngam Ni tu Hamh e
21Jisu rui kaniw khou sa dat re, “Ai tat kan puni, mi khou kiu nangniw ata phu puni, tiki nangniw paap khou nangniw theic puni. Ai tat nimei bamv thangc tei nangniw guang ngam ni tu hamh e.”
22Khoutei, “Kamei tat nimei bamv thangc tei aniu guang ngam ni tu hamh e twna kamei rui sa bammei hei, kamei karana kata swluai ni tw lana cho?” twna Jihudimei kapy nunc rui sa the.
23Jisu rui kaniw khou sa the, “Nangniw thu mbaanv khou rui e, ai thu kauh thangc rui e. Nangniw thu mi mbaanv tuang e, ai thu mi mbaanv tuang hamh e. 24Hei zaeng rui, nangniw hei nangniw paap khou theic puni twna ai sa tuang e. ‘Ai hei Ai kiu the’ twna lwm mak ge thei, nangniw hei nangniw paap khou theic puni.”
25“Nang thow cho?” twna kaniw rui Jisu khou thanv the.
Khoutei Jisu rui daw the, “Thaurey khou na rui ai rui nangniw khou salou kanmei tei the.#nangniw khou salou kanmei tei the; hamh e thei tabui khang ai nangniw khou sa bam nina cho? 26Ai nangniw lam khou sa khang khatni nangniw ta latzan sw khang mpeyna nai e. Tiki ata ndiu guangmeipu hei thu nchumhmei e, kumna kakhou rui chumei tei ai rui mbaanv khou dinc kadai bammei tuang e.”
27Mi kumcna Jisu rui kaPu lam khou, kaniw khou sa bammei tei kaniw kabah thay mak khwan e. 28Kum tina, Jisu rui kaniw khou sa the, “Nangniw rui Meic Nac Mpouh ta thaengcthau pwkhou, Ai hei kamei kiu the, twmei nangniw thay puni. Mi khou kiu ai arana anyng swna ramhkhat sini taanh mak ge, tiki aPu rui sa o twmei tei sa kadai bammei tuang de twmei, nangniw thay puni. 29Ata ndiu guangmeipu tei ai lev tat nchamc bam e. Kamei arana ta mpatlou mak ge. Kalam thu ai kaganv kathuic kamei rui ningmei taanc bam e.”
30Jisu rui mi guay hei sa pwkhou, meic mpeyna lwmlou the.
Nyngswmei khatni Bangh
31Jisu rui kakhou lwmloumei nunc khou sa the, “Ai rui dincloumei hei nangniw piu bam e thei, nangniw aziap ling the; 32kumna nangniw nchumhmei tei thay puni. Kumna nchumhmei tei rui nangniw ta bangh khou rui tiduaklou puni.”
33“Aniw thu Abraham kikta de, aniw mei gaanv khat na bangc sini sw mak ge. ‘Nangniw ta bangh khou rui tiduaklou puni,’ twna nang samei hei tabui kabac cho?” twna kaniw rui sa the.#Met 3.9; Luk 3.8
34Jisu rui kaniw khou sa the, “Ai rui nangniw khou kaling siakna sa tuang e: Paapc taanhpui mei tei paapc bangc e. 35Bangh tei thu kaikhunhmei swna tingsaeng bam mak ge; kanac mpouh tei rui tingsaeng bam tuang de. 36Kanac Mpouh hei rui nangniw ta tiduaklou e thei, nangniw duak changh puni. 37Nangniw Abraham kikta e twmei ai thay e, tiki nangniw ata swluai khang sw bam e, kalam thu nangniw lung khou alat khang kabamv maek ge. 38Apu khou rui ai howmei tei ai sa tuang e, tiki nangniw thu nangniw pu rui samei taanh tuang e.”
39Khoutei kaniw rui mundawna, “Aniw pu thu Abraham de,” twna kakhou sa the.
Jisu rui mundawna sa the, “Nangniw Abraham nac nunc e thei, kamei rui swmei tei kumcna sw ni tuang e.#Baanhhy baibal asaekc khou Nangniw Abraham nac nunc e thei, Abraham kumcna sw o twna hylou e. 40Tiki Ravguangc khou rui chumei tei dinc kadailoumeipu ata swluai khang nangniw sw bammei hei, Abraham thu mi hei kumcna sw mak ge. Nangniw pu rui sw kanmei tei nangniw sw bam tuang de.”
41“Aniw nkhahnanac nunc hamh e, akhat namei aniw pu kiu Ravguangc e,” twna kaniw rui sa the.
42Khoutei Jisu rui kaniw khou sa the, “Ravguangc hei nangniw pu e thei, nangniw ata nzian ni tuang e. Kalam thu ai Ravguangc khou rui guang tuang e. Ai arana anyng swna guang tu hamh e; kamei rui ndiu guang tuang e. 43Tabui sw tina ai samei hei nangniw kabah thay mak tu cho? Mi hei nangniw alat nking zih tina hamh nah cho? 44Nangniw hei nangniw pu ravsic nac nunc e, kumna nangniw pu rui kahawmei tei nangniw taanc nii e. Thaurey khou na rui kamei thu meicdowmei de. Kumna kamei nchumhmei biak thangc ding zat mak ge. Kalam thu kakhou nchumhmei twmei hei maek ge. Kamei saraamhmei lat samei hei katuang lwnlung thei layna sa bammei tuang e. Kalam thu kamei hei saraamhmei e khatni saraamhmei guay pu e. 45Tiki ai thu nchumhmei lat sa tina nangniw ata lwm mak ge. 46Ata ‘nang paap kiu mi hei the,’ twna sa ngammei nangniw pang khou thow nai cho? Ai rui nchumhmei sa tina, nangniw tabui swna ata lwm mak tu cho? 47Ravguangc mei guay thu Ravguangc lat nking puni. Nangniw hei thu Ravguangc mei hamh lapui zaeng rui, kalat nking mak khe.”
Jisu khatni Abraham
48“Nang hei Samariamei e khatni nang khou ravsic gut the twna aniw rui samei hei nchumh mak nah cho?” twna kaniw rui sa the.
49“Akhou ravsic bam mak ge, ai aPu ta chakhwang sw e, tiki nangniw thu ata chakhwang sw mak ge,” twna Jisu rui daw the. 50“Ai thu arana ahym tidaih khang phu mak ge, tiki ahym tidaiclou khang swmei khatni akhang latzan swloumeipu gaanv khat nai e. 51Ai rui nangniw khou kaling siakna sa tuang e: Alat hei piupui mei tei theic dat lak khe.”
52Kaniw rui Jisu khou sa the, “Nang khou ravsic gut the twmei aniw nthanna thay the. Abraham theic kan the, muhzwng guay ni theic kan the. ‘Thow pw ni alat piupui mei guay theic dat lak khe,’ twna nang rui sa bammei hei nang khou ravsic bam tina the. 53Aniw pu Abraham theic kan the. Nang hei Abraham khang suangc daihmei e twna sa bam tu cho? Muhzwng guay ni theic kan the. Nang rana nang ta thow e twna ningna cho?”
54Jisu rui daw the, “Ai rui arana ahym tidaih khang sw e thei, mi hym tei nsa de. Tiki nangniw rui, ‘Aniw Racguangc’ twna kawmeipu, aPu rui ahym tidaiclou tuang e. 55Nangniw thu kata thay mak ge, tiki ai thu kata thay e. Ai kata thay mak ge twna ai sa e thei, ai ni nangniw kumcna saraamhmei sw puni the. Ai kata thay e, kumna ai kalat piu e. 56Nangniw pu Abraham, ai guangmei ta how puni twna neihla bam khwan e; kamei hei tei howna neihla the.”
57“Nang tingkwm riakngu sini tangh mak he ki, nang Abraham ta how thena cho?”#Baanhhy baibal asaekc khou thu nang ta Abraham how thena cho? twna hylou e. twna kaniw rui sa the.
58“Ai rui nangniw khou kaling siakna sa tuang e: Abraham puanh mak khou rui ai nai bam tuang di the,” twna Jisu rui daw the.
59Khoutei kata nkwam khang kaniw ntauh khuaic thau the, tiki Jisu nkamhna Ravkai khou tei rui tat pat kan the.
നിലവിൽ തിരഞ്ഞെടുത്തിരിക്കുന്നു:
JAHON 8: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
