JAHON 7
7
Jisu khatni Kakainac nunc
1Mi tangv hei, Jihudimei kapy nunc rui kata swluai khang rik bam tina kamei Judia thangc ngangh dat nii makna Galili ramv khou tat bam khwan e. 2Ntaw Jihudimei tuang Chaengkai Ngai ana guang khwan the.#Lev 23.34; Ria 16.13 3Khoutei kakainac nunc rui Jisu khou sa the, “Mi khou hei bam ri tho, nang rui taanc bammei taanv guay hei how khang Judia thangc tat tho. 4Meic guayna rui thaylou pwtu laa niipui mei thu nkamhna taanh mak ge. Nang mi guay hei taanc bam changh e thei, kandih kapwm rui nang ta thay khang lyanlou ti tho!” 5(Kalam thu kakainac nunc rui nganv kata lwm mak ge.)
6Jisu rui kaniw khou sa the, “Atuang ganv tangh mak he. Nangniw khang thu tat nuhpui ganv rana de. 7Mbaanv rui nangniw ta thu karaeng mak ge, tiki ata thu karaeng e. Kalam thu kaniw taanv si e twna ai rui sa bam tipui zaeng rui e. 8Ngay khang tei nangniw ngangh tho, mi ngai khang hei ai ngangh lak he.”#Baanhhy baibal asaekc khou ai thu tat lak he twna hylou e. Kalam thu ai tat nipui ganv tangh mak he.” 9Mi kumna sana kamei Galili khou bam duc the.
Chaengkai Ngai khou Jisu
10Mi ngai khang tei kakainac nunc tat kanmei tangv, Jisu ni ngangh the. Kamei ndauhna ngangh mak khe, nkamhna ngangh the. 11“Jisu tabui khou bam bu cho?” twna Jihudimei kapy nunc rui mi ngai khou tei kata phu the.
12Meic pang khou kalam khou tadiuh tadiu bam geic the. Meic gaanvsaekc rui, “Kamei hei meicgaymei e,” twna sa the. Gaanvsaekc rui, “Kamei hei kandihmei ta guatmeipu de,” twna sa the. 13Kalam khou meic gaanv khat na sini ndawna sa pat ngam mak khe, kalam thu kaniw Jihudimei kapy nunc ta ping the.
14Ngay kabung zaengc khou, Jisu Ravkai khou guangna nchamlou thau the. 15Khoutei, Jihudimei kapy nunc tei ngakna, “mi pu hei ncham mak ki tabui thangc rui mi guay hei thay lana cho?” twna sa the.
16Jisu rui mundawna sa the, “Ai rui sa bammei hei akhou rui pat tuang hamh e, ata ndiu guangmeipu Ravguangc khou rui de. 17Thow pw ni kamei Ravguangc ningmei sw ni twna ning e thei, ai rui dinc bammei hei Ravguangc khou rui guang tuang ny, achwnphuakh khou rui cho twmei kamei thay puni de. 18Karana kachwnphuakh khou rui sapui mei tei thu, karana kahym tidaih khang sw e; tiki kata ndiu guangmeipu hym tidaih khang phumeipu hei thu latling sa e, kumna kamei saraamh mak ge. 19Mousi rui nangniw khang Riakdanv tiilou mak nah cho? Tiki nangniw gaanv khat na sini hei tei piu mak ge. Tabui swna nangniw ata swluai khang phu bam tu cho?”
20“Nang khou ravsic bam the! Nang ta thow rui swluai khang sw bamna cho?” twna meic kangdai tei rui sa daw the.
21Jisu rui mundawna sa the, “Ai rui taanv akhat taanclou tiki, nangniw khang kadath dat the. 22Nangniw nac mpouh nunc ta gihruamh khang Mousi rui latdanv pat the, (Kaling thu hei tei kahouhmei hei Mousi khou rui hamh e, nangniw pupouc nunc khou rui de) kumna nangniw Sabbathneic gihruamc e.#Tha 17.10; Lev 12.3 23Mousi tuang Riakdanv ngaek khang rui Sabbathneic gihruamc e thei, ai rui Sabbathneic meic gaanv khat ta tigay nthan thiakhlou e twna tabui swna nangniw ata lungh puamc bam tu cho?#Jhn 5.9 24Meic zaw zaucna latzan sw riu, nchumhna latzan sw o.”
Kamei hei Khrista Kiu Lana the Ny?
25Khoutei Jerusalemmei gaanvsaekc rui sa the, “mi pu hei swluai khang phu bammeipu tei hamh nah cho? 26Zauclo, Kamei charuangc khou lat sa tat bam de, tiki kaniw kata lat khat na sini nchyanlou mak ge. Kamei hei Khrista the twmei kaniw thay changh lana the ny? 27Khrista ta thu kamei lungc guangmei bamv meic gaanv khat na sini thay ni tu hamh e; mi pu hei kamei tabui bamv khou rui guang tu cho twmei aniu thay de.”
28Jisu Ravkai khou nchamlou bam khou, kauc ranvna sa the, “Ai thow cho khatni tabui thangc rui cho twmei nangniw thay changh daih cho? Ai arana anyng swna guang tuang hamh e. Ata ndiu guangmeipu hei thu nchumhmeipu e. Nangniw kata thay mak ge; 29tiki ai thu kata thay e. Kalam thu ai kakhou rui guang tuang e khatni kamei rui ata ndiu guang tuang e.”
30Khoutei kaniw kata nym khang sw the, tiki meic gaanv khat na sini karuc khou baanh keylou ngam mak khwan e. Kalam thu katuang ganv tangh mak he. 31Tiki meic mpeyna thu kakhou lwmlouna, “mi pu suangc mbumei sw-nchinmei taanv taanclou nimei Khrista guang puni di he nah cho?” twna kaniw rui sa the.
Jisu ta Nym khang Swmei
32Meic kangdai tei rui mi kumcna tadiuna sa bammei tei Pharisimei nunc rui chu lana, Jisu ta nym khang kaniw khatni amuh daihmei nunc rui ravkai rigaanv nunc ta ndiulou the. 33Khoutei Jisu rui sa the, “Ai nangniw daeng khou bam kanaklou puni he, kumna ata ndiu guangmeipu daeng thangc tat dat kan puni. 34Mi khou kiu, nangniw ata phu puni, tiki phu tow dat ni tu hamh the, kalam thu ai bammei bamv thangc tei nangniw guang ngam ni tu hamh e.”
35Khoutei Jihudimei kapy nunc khat khat khou sa the, “Aniu kata phu tow dat lak nimei kiu, kamei tabui thangc tat ni lana cho? Aniu mei nunc lungc bammei Grikmei kaidai guay thangc tatna Grikmei nunc ta ncham tat ni lana cho? 36‘Nangniw ata phu puni, tiki phu tow dat ni tu hamh the,’ khatni ‘Ai bammei bamv thangc tei nangniw guang ngam ni tu hamh e,’ twna kamei rui sa bammei kiu, tabui kabac cho?”
Ringhmei Duiriang
37Ngay luai nimei tingmik, twmei thu nngay kadaic nungc, Jisu dingthauna kaucna sa the, “Thow pw ni tari e thei akhou guang zangv o.#Lev 23.36 38Thow pw ni akhou lwmpui mei tei, Nthanmei Latrik rui samei kumcna, ‘kalung khou rui ringhmei duiriang luangc pat puni,’ ”#Kathaek 37 twan lev 38 hei mi kumna hanc nuh e: “Tarimei guay akhou guang nina e, khatni akhou lwmmei guay zangv nina e. 38 Nthanmei Latrik rui samei kumcna ‘ringhmei tiimei duiriang kalung khou rui luangc pat puni.’ ” #Eze 47.1; Zek 14.8 39Jisu rui mi hei kakhou lwmloumei guay laatow punimei Bumaengc lam khou samei tuang e. Mi ganv khou tei thu Bumaengh tei tiilou mak he. Kalam thu Jisu ta kahym tidaiclou mak he.
Meic nunc tei Lat Nchamc Mak Khe
40Kamei rui mi hei samei tei chumei pang khou gaanvsaekc rui, “Mi pu hei muhzwng kiu changc kan di the!”#1.21 tei zauc o. twna sa the.
41“Kamei hei Khrista de!” twna meic baihmei gaanvsaekc rui sa the.
Tiki meic baihmei gaanvsaekc rui thu, “Khrista kiu Galili khou rui guang puni nah cho? 42Khrista thu David kaikhwang khou rui khatni David ramc Bethlehem khou rui guang puni de twna, Nthanmei Latrik khou nai e,” twna sa the.#2 Sa 7.12; Mai 5.2 43Kumna Jisu lam khou meic kangdai khou tei lungh chamc mak khe. 44Meic gaanvsaekc thu kata nym nii khwan the, tiki meic gaanv khat na sini karuc khou baanh keylou mak khwan e.
Jihudimei Kapy nunc Lwm Makmei
45Ravkai rigaanv nunc tei guang dat pwkhou, amuh daihmei nunc khatni Pharisimei nunc rui, “Nangniw tabui swna kata nym guang mak tu cho?” twna sa the.
46Khoutei, “mi pu rui samei kumcna meic gaanv khat na sini sa mak ge!” twna kaniw rui daw the.
47“Nangniw ta ni guat mbiangh thena cho?” twna Pharisimei nunc tei rui kaniw khou sa the. 48“Baanhza pang khou rui hamh e thei Pharisimei pang khou rui thowkumhmei kakhou lwmloumei nai the twmei nangniw chu thena cho? 49Mi mei pang hei Mousi tuang Riakdanv thay mak khe, kumna kaniw ruc khou ravsyang keylou puni the!”
50Pharisimeipu, kazanc Nikodim kawmeipu, kahunungc Jisu ta guang ariw kanmeipu tei rui kaniw khou sa the,#Jhn 3.12 51“Aniu tuang Riakdanv thei layna, meic gaanv khat ta kamwang khou rui chu kahak mak saanv, khatni kamei rui taanc kanmei tei mi hei the twmei nsihsyng mak saanv, karuc khou latzan key mak tu hamhna cho?”
52Khoutei, “Nang ni Galilimei lana the ny? Nthanmei Latrik tei kathai zauc o: Galili khou rui muhzwng khat na sini cha pat mak ge,”#Baanhhy baibal akhou khou, Muhzwng kiu thu Galili khou rui guang ni tu hamh e. twna kaniw rui sa the.
നിലവിൽ തിരഞ്ഞെടുത്തിരിക്കുന്നു:
JAHON 7: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
