JAHON 5
5
Bethzatha khou Tigayloumei
1Mi tangv hei Jihudimei tuang ngai nai dat khwan e. Kumna Jisu mi ngai khang tei Jerusalem thangc ngangh the. 2Jerusalem khou Lauziu Raengcmun daeng khou, Ibri lat khou Bethzatha#Baanhhy baibal asaekc khou Bethesda twna sa e. kawmei zeic akhat nai khwan e.#Lauziu Raengcmun daeng khou...zeih khat nai khwan e, hamh e thei Lauziu Zeic daeng khou...Bethzatha kawmei zeic nai khwan e. Mi zeic daeng khou tei kaisangh daihmei panguh nai khwan e. 3Mi kaisangc guay khou tei nnaumei meic mpeyna—mik tiatmei, phaybaumei, khatni kapaektheihmei nunc zip padik bam khwan e. 4Kaniw dui kalungmei ta nkhwan bam tuang e, kalam thu kaluan luan Poubauhmei tuang baanchara keyna dui tei kabaw thau raph rap khwan e. Dui tei kabaw thaulou tang pwkhou gut rey reymei tei karavpuat guay gay dat raph rap khwan e.#Baanhhy Baibal asaekc khou kathaek 4 hei maek ge. 5Tingkwm tamrucna tachat nnau bammeipu gaanv khat ni mi khou tei bam khwan e. 6Mi pu tei mi khou tei zip bammei ta how pwkhou, kamei tingkwm hei saan nnau guang the twmei thay lana, “Nang ta tigayloumei ta kahaw bu cho?” twna Jisu rui kakhou thanv the.
7“Haicpouc, dui kalung thaupui ganv khou, ata dui khou laa keylou nimei meic maekna the. Ai gut khang karamc bammei dak khou, meic baihmei rui gut rey raph rap kanna the,” twna mi suanmeipu tei rui daw the.
8“Thau tho, nang zy laa thauna tat tho,” twna Jisu rui kakhou sa the. 9Mi dyng khou tei mi pu tei gay dat the, kumna kazy laa thauna tat the.
Hei tei Sabbathneic khwan e. 10Khoutei Jihudimei kapy nunc rui, “Aseic hei Sabbathneic de, nang zy puancna nang tat bam nuh mak ge,” twna mi pu khou tei sa the.#Neh 13.19; Jer 17.21
11“Ata tigayloumeipu rui azy laa thauna tat tho tw pwna de,” twna kamei rui daw the.
12“Mi kumcna sameipu kiu thow cho?” twna kaniw rui kakhou thanv the.
13Tiki kata tigayloumeipu tei thow cho twmei kamei thay mak ge. Kalam thu mi khou tei meic kangdai bam khwan e, kumna Jisu tei meic pang khou tei tiap maan kan the.
14Katang thangc, Jisu rui kata Ravkai khou ariwna, “Zauclo, nang gay nthan thiak the. Mi khang suangc si ranvmei nang khou guanglou mak khang paapc taanc dat ri tho,” twna salou the.
15Khoutei mi pu tei tat lana, kata tigayloumeipu tei Jisu e twna Jihudimei kapy nunc khou salou the. 16Khoutei, kamei rui mi tigayloumei taanv hei Sabbathneic taanc e twna kata sw kasic khang sw thau the. 17“Apu nthaekc makna taanc bam e, mi zaeng rui ai ni taanc nina e,” twna Jisu rui kaniw khou daw the.
18Khoutei kamei Sabbathneic riak sw bakmei na hamhna, Ravguangc ta kapu twna kawna karana kata Ravguangc lev ti-nchamclou e twna Jihudimei kapy nunc tei kata swluai nii ranv ranv the.
Kanac Mpouh Ngamv
19Jisu rui kaniw khou sa the, “Ai rui nangniw khou kaling siakna sa tuang e: Kanac Mpouh hei ramh khatna sini karana kanyng swna taanc ngam mak ge; Pu rui taanh taanhmei tei zaucna taanc bam tuang de. Pu rui taanhmei tei Kanac Mpouh rui ni taanh tuang de. 20Pu rui Kanac Mpouh ta nzian e, kumna kamei rui taanhmei guay tei Kanac Mpouh khou lyanlou e. Nangniw ngak khang, mi khang suangc charynmei taanv taanh khang Pu rui kakhou lyanlou puni. 21Pu rui theihmei ta tiringcthauloumei kumcna, Kanac Mpouh hei rui ni kamei rui tiringclou nimei nunc ta tiringclou e. 22Pu rui gaanv khatna ta sini latzan sw mak ge. Latzan swmei tuang ngamv guay tei Kanac Mpouh khou tiilou the. 23Mi hei Pu ta chakhwang swmei kumcna, meic guayna rui Kanac Mpouh ta chakhwang sw khang e. Kanac Mpouh ta chakhwang sw makpui mei tei kata ndiu guangmei kaPu ta chakhwang sw mak tuang e.
24“Ai rui nangniw khou kaling siakna samei kiu mi hei e: Thow pw ni alat hei chu lana, ata ndiu guangmeipu khou lwmloupui mei tei ringcsuangmei laa the. Kamei latzan khou guang dat mak khe, kamei theihmei khou rui ringhmei khou kaan pat tang the. 25Ai rui nangniw khou kaling siakna sa tuang e: Theihmei nunc rui Ravguangc Nac Mpouh khwan chu nimei ganv guang pw the, khatni ntaw guang tangc the. Kumna hei tei chumei guay ringcthau dat puni. 26Pu kakhou ringhmei naimei tei kumcna, Kanac Mpouh khou hei ni ringhmei nai khang tiilou the. 27Khatni kamei rui Kanac Mpouh khou latzan swmei ngamv tiilou the. Kalam thu kamei hei Meic Nac Mpouh e. 28Nangniw mi khou hei ngak nangh e. Theic kanmei guay rui kakhwan chuna, 29ringcthau nipui ganv guang puni. Gaymei taancloumei guay rui ringh khang khatni simei taancloumei guay rui latzan khang ringcthau puni.#Dan 12.2
Jisu lam khou Saloumei
30“Atuang latzan hei nchumh e. Kalam thu arana rui ramh khatna sini sw ngam mak ge. Ai chumei thei layna taanh tuang de. Ai rui sw nii niimei ai sw khang hamh e, ata ndiuloumeipu rui sw o twmei tei sw khang de.
31“Arana alam khou samei tei thu nchumh the twna laa khang hamh e. 32Tiki ai hamhmei baihmei alam khou sa kanmeipu gaanv khat nai e, kumna kamei rui sa kanmei tei nchumhmei e twmei ai thay e. 33Nangniw rui Jahon khou ndiu guang khou tei kamei rui alam khou kalingmei tei salou kan the.#Jhn 1.19-27; 3.27-30 34Alam khou meic gaanv khat rui salou khang kahawna sa bam tu hamh e. Ai rui mi hei sa bammei hei thu, nangniw ta kanlou khang e. 35Jahon hei chuangc bammei thaucmai kumcna gaanc bam khwan e, kumna kariw khou nangniw neihla kanak bam nii khwan e. 36Jahon khang suangc daihmei alam khou samei akhat nai e. Mi kiu thu ai rui taanc bammei, aPu rui akhou tiiloumei taanv guay hei the. Mi taanv guay hei rui ai thow cho twmei dinc the khatni aPu rui ata ndiu guang tuang e twmei lyan the. 37Ata ndiuloumei apu rui ni alam khou dinclou e. Nangniw kakhwan chu zat mak ge, kalwn ni how zat mak ge,#Met 3.17; Mrk 1.11; Luk 3.22 38khatni kalat nangniw lung khou lou mak ge. Kalam thu kamei rui ndiu guangmeipu ta nangniw lwm mak ge. 39Nthanmei Latrik khou tei rui ringcsuangmei laatow puni twna nangniw hei tei kathai e. Mi Nthanmei Latrik tei thu alam khou sa bam tuang de. 40Tiki ringhmei laa khang nangniw akhou guang nii mak ge.
41“Meic nunc rui thuancloumei ta ai kahaw tuang hamh e. 42Nangniw lung khou Ravguangc ta nzianmei maek ge twmei ai thay e. 43Ai apu zanc khou guang tuang e, tiki nangniw ata laalou mak ge. Thowkumhmei karana kacharay swna guang ti thei, nangniw kata laalou puni. 44Nangniw khat khat rui thuanclou kary khang na swna, akhat namei Racguangc rui thuanclou khang thu sw makna, akumhna nangniw akhou lwmlou ngam nina cho? 45Nangniw hei nkhuaimei nunc e twna ai rui aPu khou sa puni twna nangniw ning riu. Nangniw ta nkhuaimei nunc e twna sa nimei thu nangniw lwm bammei Mousi tei de. 46Nangniw Mousi ta lwm changh e thei, nangniw ata lwm ni tuang e. Kalam thu kamei rui hyloumei hei alam khou the. 47Tiki kamei rui hyloumei tei nangniw lwm mak ki, akumhna ai rui samei nangniw lwm ngam nina cho?”
നിലവിൽ തിരഞ്ഞെടുത്തിരിക്കുന്നു:
JAHON 5: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
