JAHON 4
4
Jisu khatni Samariameipui
1Jisu ziap rui Jahon ziap suangc geic the khatni kamei rui duiluploumei geic mbu the twmei Pharisimei nunc chu the twmei Poubauhmei thay the. 2(Kaling thu Jisu rui thu duiluplou mak ge, kaziap nunc rui de.) 3Kum la thena, kamei Judia mpatlouna Galili thangc tat the. 4Mi chaenglwan khou tei kamei Samariamei ramv tat ruan khang sw khwan e.
5Khoutei Jisu Sukhar kawmei Samariamei kaidai akhat khou guang the. Hei tei Jakob rui kanac Josep khang tiiloumei ramvpuk daeng khou e.#Tha 33.19; Jos 24.32 6Mi khou tei Jakob duikhunc nai khwan e. Jisu tat lak la thena, mi duikhunc daeng khou tei dungckey the. Hei tei neih ndyng zaengc khou khwan e.
7Khoutei Samariameipui gaanv khat dui zu khang pat khwan e. Kumna, “Ai zangv khang dui tiilou o,” twna Jisu rui kakhou sa the. 8Mi ganv khou tei tu zangvmei tuang liu khang kaziap nunc thu kaidai thangc tei tat kan khwan e.
9“Jihudimei nang rui akumhna Samariamei akhou dui ney tu cho?” twna mi pui tei rui sa the. Kalam thu Jihudimei hei Samariamei lev gansaengc duilwan mak ge.#Ezr 4.1; Neh 4.1-2
10Jisu rui mundawna, “Nang Ravguangc tuang kaipat ti hei thay khwan e thei, khatni nang khou dui ney bammeipu hei thow cho twmei thay khwan e thei, nang rui kakhou ney ni tuang e. Kumna kamei rui nang khang ringhmei dui tii ni tuang e,” twna sa the.
11“Haicpouc, nang khang dui zu ku nuhmei tuang maek ge. Mi duikhunc hei ni nthuk nganv de. Ringhmei dui kiu nang tabui thangc rui laa nina cho?” twna mi pui tei rui sa the.
12“Mi duikhunc hei tiiloumeipu, kamei lev kanac nunc khatni katuang kiruai guay mi khou rui zangvna lungc kanmeipu, aniw pupouc Jakob khang suangc nang daic nah cho?” twna kamei rui sa the.
13Khoutei mundawna Jisu rui sa the, “Mi dui hei zangvmei nunc thu tari dat puni de; 14tiki ai rui tii nimei dui hei zangvmei guay thu tari dat zat lak khe. Ai rui tiilou nimei dui tei kakhou rui duipuakkai kumcna puak patna kakhang ringcsuangmei tiilou puni.”
15“Haicpouc, ai mi khou hei dui guang zu dat bam mak khang, tari dat lakmei dui kiu akhang tiilou o!” twna mi pui tei rui sa the.
16Khoutei, “Nang tatna nang gaanv ta mi khou hei kaw guang o,” twna Jisu rui kakhou sa the.
17Mundawna, “Agaanv maek ge,” twna sa the.
Jisu rui kakhou sa the, “Nang gaanv maek ge twna nang rui samei hei nchumh the. 18Tiki nang gaanv panguh the; kumna ntaw nai bammeipu hei nang gaanv hamh e. Nang rui samei hei kaling the.”
19Mi pui tei rui sa the, “Haicpouc, nang hei muhzwng e twmei ai thay the. 20Aniw pupouc nunc thu mi chyngbut khou hei kalum e; kumna nangniw thu Jerusalem khou kalum nina de twna sa e.”
21Jisu rui kakhou sa the, “Tanpuile, ai rui samei hei lwm o: Pu ta mi chyngbut khou ni hamh, Jerusalem khou ni hamhna kalum nipui ganv guang puni. 22Samariamei nangniw hei nangniw kalum bammeipu ta thay mak ge; tiki Jihudimei aniw thu aniw kalum bammeipu ta thay e. Kalam thu kanloumei hei Jihudimei khou rui guang e. 23Tiki kalum changhmei guay rui Pu ta bumaengh khou khatni nchumhmei khou kalum nipui ganv guang the, ntaw hei the; kalam thu mi kumcna kalumpui mei ta tei kata kalum khang Pu rui phu e. 24Ravguangc hei Bumaengh e, kumna kata kalummei guay rui bumaengh khou khatni nchumhmei khou kalum nina e.”
25“Khrista twna kawmei Messia guang puni twmei ai thay e; kamei guang pwkhou ramh guayna dinclou puni,” twna mi pui tei rui sa ti khou, 26“Nang ta lat kachuc bammeipu ai hei kamei kiu the,” twna Jisu rui daw the.
27Mi dyng khou tei Jisu ziap nunc guang dat the. Kumna kamei ntumei gaanv khat lev lat kachuc bammei ta kaniw how pwkhou kaniw khang ngak the. Tiki, “Nang tabui tuang kakhi bam tu cho?” twna mi pui khou tei, hamh e thei, “Tabui swna nang mi pui lev lat kachuc bam tu cho?” twna Jisu khou meic gaanv khat na sini sa mak ge.
28Mi pui tei katuang duilai ganclouna, kaidai thangc tei tat the. 29Kumna, “Ai rui taanc kanmei guay thay parimeipu bam e, pat zauc lo. Kamei hei Messia kiu lana the ny?” twna meic nunc khou tei sa the. 30Kaniw kaidai khou tei rui patna, Jisu daeng khou guang the.
31Mi ganv khou tei ziap nunc tei rui, “Rabbi, tu di kho,” twna sa ti khou, 32“Nangniw thay makmei taektw ai tu khang nai de,” twna Jisu rui daw the.
33Khoutei, “Meic gaanvsaekc rui taektw laaguang tina the ny?” twna ziap nunc tei khat khat khou sa the.
34Khoutei Jisu rui sa the, “Atuang taektw twmei kiu ata ndiu guangmeipu rui ningmei tei taanhmei khatni kamei rui tiiloumei taanv taanc luailoumei hei the. 35‘Bw padeih tangv rui lautay nina de,’ twna nangniw sa bam e. Tiki ai rui nangniw khou sa e: Laupuk ti hei zauc tho, minc mphwan phumh phum the. 36Lau taypui mei khang kaphy nai e, kumna khuam guangmei kathai tei ringcsuangmei khang e. Kumna lingcloumeipu tei lev taymeipu tei neihla nchamc puni. 37‘Gaanv khat rui lingclou e, baihmei rui tay e,’ twmei latchap hei nchumh the. 38Nangniw rui taanclou makmei lau tay khang ai rui nangniw ta ndiulou tuang the. Baihmei rui taanclou the, nangniw rui tay the.”
39“Ai rui taanclou kanmei guayna kamei rui akhou salou dat ngam the,” twna mi pui tei rui salou tina, mi kaidai khou bammei Samariamei meic mpeyna Jisu khou lwmlou the. 40Kumna Samariamei nunc kadaeng khou guangna neih keylou khang sa the. Kum tina, Jisu mi khou tei zaeng neih nei neihlou the.
41Kalat chulouna meic baihmei mpeyna ni lwmlou dat di he. 42Kumna, “Ntaw thu nang lat khou rui aniw lwm tu hamh the, tiki kamei rui samei tei aniw chu kahakna kachangc changhna kamei hei mbaanv ta kanloumeipu kiu di the twmei aniw thay the,” twna kaniw rui sa the.
43Mi khou tei, zaeng neih nei bamloumei tangv, kamei Galili thangc tat the. 44Kumna, “Muhzwng ta kakandih khou thu chakhwang sw mak ge,” twna kamei rui sa the.#Met 13.57; Mrk 6.4; Luk 4.24 45Kamei Galili key tangc pwkhou, meic nunc rui kata laalou the. Kalam thu kaniw ni Kaanpatmei Ngai khou tei, Jerusalem khou nganghna kamei rui mi ngai lungc khou tei taancloumei guay tei how the.#Jhn 2.23
Jisu rui Meicdaihmeipu Nac ta Tigayloumei
46Jisu mi tangv tei, kamei rui dui ta drakha zouc tiguanhlou kanmei bamv Galili tuang Kana thangc tat the. Kapharnahum khou bammei meicdaihmei gaanv khatpu, kanac nnau ran sihna theic ni kumcna bam khwan e.#Jhn 2.1-11 47Jisu Judia khou rui Galili khou key dat the twmei chu lana, kamei Jisu daeng khou guangna, kamei keyna kanac ta tigaylou khang huaycha the. 48Khoutei, “Nangniw charynmei sw-nchinmei taanv how mak ge thei lwm zat ni tu hamh e,” twna Jisu rui kakhou sa the.
49“Kaipouc, anac theih mak khou keylou tho,” twna mi pu tei rui sa the.
50“Tat tho, nang nac theih mak khe,” twna Jisu rui kakhou sa the, mi pu tei Jisu rui samei tei lwmna tat kan the. 51Kamei kakai thangc key datmei chaenglwan khou, kabangc nunc kata ngangh riuna, “Nang nac gay dat the!” twna sa the.
52Mi nac tei akumhmei ganv khou rui gay dat tu cho twna thanv ti khou, “Douclaneic neih ndyng tangv rui kapumc chaenghmei nchu key kan the,” twna sa the. 53Khoutei, hei tei Jisu rui, “Nang nac gay dat the,” twna saloumei ganv tei the twmei kamei thay the. Khoutei kamei khatni kakai kaikhunhmei guay lwmlou the.
54Mi hei Jisu, kamei Judia khou rui Galili khou key khou kaneimei sw-nchinmei taanv e.
നിലവിൽ തിരഞ്ഞെടുത്തിരിക്കുന്നു:
JAHON 4: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
