JAHON 3
3
Nikodim Jisu Daeng khou Guangmei
1Jihudimei nunc tuang baanhza, kazanc Nikodim kawmeipu gaanv khat nai khwan e. Kamei hei Pharisimei akhat re. 2mi pu hei zingbangc akhat Jisu daeng khou guangna, “Rabbi, nang hei Ravguangc rui ndiu guangmei dinhpouc akhat re twmei aniw thay e. Kalam thu Ravguangc kazauh makna meic gaanv khat na sini, nang rui sw bammei sw-nchinmei taanv guay hei taanc ngam ni tu hamh e,” twna sa the.
3Mundawna Jisu rui sa the, “Ai rui nang khou kaling siakna samei kiu mi hei e: Thow pw ni, puanc thanh mak ge thei,#puanc thanh mak ge thei; hamh e thei kauh thangc rui puanh mak ge thei. kamei Ravguangc guangcdic how ngam mak ge.”
4Khoutei, “Maansei gaanvdaih kanmei gaanv khat hei akumhna puanc dat nina cho? Kamei kapui bung lungc khou gut datna puanc dat nuh dina cho?” twna Nikodim rui sa the.
5Jisu rui sa the, “Ai rui nang khou kaling siakna sapui tuang e: Dui lev Bumaengh rui puanh mak ge thei, meic gaanv khat na sini Ravguangc guangcdic gut ngam mak ge. 6Meic pumc khou rui puanhmei tei meic pumc e, Bumaengh khou rui puanhmei tei Bumaengh e. 7‘Nangniw puanc thanh#kathaek 3 tuang d tei zauc o nina e’ twna ai rui nang khou samei khou hei ngak riu. 8Mpwan hei aliu nii nii thangc aliu tat re; kakhwan chu e, tiki tabui thangc rui guangna tabui thangc tat kan tu cho aniu thay mak ge. Bumaengh khou rui puanhmei kiu ni mi hei kumhmei tuang e.”
9“Mi kiu akumhna puanc nuh nina cho?” twna Nikodim rui thanv the.
10Jisu rui sa the, “Nang thu Isaraelmei tuang dinhpouc daihmei akhat di the, tiki nang mi hei kabah thay mak nah cho? 11Ai rui nang khou kaling siakna sapui tuang e: niw thaymei tei aniw sa e khatni aniw howmei tei aniw raclou e, tiki nangniw gaanv khat na sini aniw lat laalou mak ge. 12Ai rui mi kandic tuang sa tina nangniw lwm mak ge thei, tingkauh thangc tuang sa tina nangniw tabui kumhna lwm nina cho? 13Tingkauh thangc rui keymei Meic Nac Mpouh hamhna meic gaanv khat na sini tingkauh ku mak he.
14“Mousi rui kuanzinc rui kasiamhmei nrui pauh twan khou louna tazikramv khou zay thaumei tei kumcna, Meic Nac Mpouh ta ni zay thau puni.#Sin 21.9 15Hei tei kakhou lwmloumei guay ringcsuangmei laa khang e. 16Kalam thu Ravguangc rui mbaanv maanseina ta heidikamv nzianpui zaeng rui, kanac mpouh akhat namei ta tiilou the. Thow pw ni kakhou lwmmei guay theic dat makna ringcsuangmei laatow khang e. 17Kalam thu Ravguangc rui Kanac Mpouh ta mbaanv khou ndiu guangmei hei mbaanv ta latzan sw khang hamh e; tiki kapaan rui mbaanv ta kanlou khang e.
18“Kanac Mpouh khou lwmloupui mei ta tei thu latzan sw mak khe; tiki lwmlou makpui mei khang tei thu latzan luai tang the. Kalam thu Ravguangc Nac Mpouh akhat namei khou tei kamei lwmlou mak ge. 19Latzan kiu mi hei e: Gaanhmei tei mbaanv khou guang the; tiki meic nunc hei gaanhmei ta suangc zinghmei ta kahaw the. Kalam thu kaniw tuang taanv si the. 20Kataanv sipui mei tei gaanhmei ta laa zih e, kumna kataanv guay tei ndauh pat puni tina kamei gaanhmei khou guang mak ge. 21Tiki nchumhmei taanhpui mei tei, kataanv guay tei Ravguangc khou taanhpui taanv e twmei ndauh pat khang gaanhmei khou guang e.”
Jisu khatni Jahon
22Mi tangv, Jisu khatni kaziap nunc Judia ramv khou guangna mi khou tei kaniw bam kanaklouna duiluplou bam khwan e. 23Jahon ni Salim khou rui duh makmei, Ainon kawmei bamv khou duiluplou bam khwan e. Kalam thu mi bamv khou tei dui mpeyna nai e. Kamei rui kaniw ta duiluplou bam khwan e. 24(Mi hei Jahon ta kangkai khou lou makmei hu khou e.)#Met 14.3; Mrk 6.17; Luk 3.19-20
25Jahon ziap nunc lev Jihudimeipu gaanv khat sw-nthanmei lam khou agi thau khwan e. 26Kumna kaniw Jahon daeng khou guangna, “Rabbi, Jordan paengc thangc nang bam nchamcloumeipu, nang rui kalam khou saloumeipu tei, duiluplou bam the. Kumna meic guayna kadaeng khou nzwan guang bam the,” twna sa the.
27Jahon rui sa the, “Ravguangc rui tiilou ti mak ge thei, nai nii sini nai ngam tuang hamh e. 28‘Ai thu Khrista hamh e; kahu kasuakc guangmeipu de’ twna ai rui sa kanmei tei nangniw chu kan dyng the cho.#Jhn 1.20 29Nowpeic ta laa nimei thu nowpouc tei de; tiki kadaeng khou ding bammei nowpouc pammeipu tei nowpouc khwan tei chuna neihla e. Hei tei kumcna, ai ni neihlamei rui padik bam tuang e. 30Kamei thu mbu thau puni the; tiki ai thu key kan puni the.”
Tingkauh thangc rui Guangmeipu
31Kauh thangc rui keymeipu hei meic guayna ruc khou daic liangmeipu e. Mbaanv khou rui guangmeipu hei thu mbaanv tuang de, kumna kamei mbaanv tuang lam khou sa e; tiki kauh thangc rui keymeipu hei thu meic guay ruc khou daic liangmeipu e. 32Kamei rui how kahakmei khatni chu kahakmei tei kamei sa e; tiki meic gaanv khat na sini kalat ta laalou mak ge. 33Tiki kalat hei laaloumei kathuic tei rui Ravguangc hei nchumh e twmei kamei laa the twna hei tei rui nchin the. 34Ravguangc rui ndiu guangmeipu hei rui Ravguangc rui samei lat tei sakadailou the. Kalam thu Ravguangc rui Bumaengh karyan kadath maekna kakhou tiilou the. 35Kapu rui Kanac Mpouh ta nzian e, kumna ramh katana kabaanc khou tiilou the.#Met 11.27; Luk 10.22 36Thow pw ni Kanac Mpouh khou lwmloupui mei tei ringcsuangmei laatow the; Kanac Mpouh lat tei piu makpui mei tei ringhmei laa ni tu hamh the. Kalam thu karuc khou Ravguangc lungpuam nai bam e.
നിലവിൽ തിരഞ്ഞെടുത്തിരിക്കുന്നു:
JAHON 3: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
