JAHON 11
11
Lazaras Theihmei
1Bethanimei kazanc Lazaras twna kawmeipu nnau bam khwan e. Bethani hei Meri khatni kaswanrey Martha ramc e.#Luk 10.38-39 2(Mi Meri hei Jisu phay khou mwndui thauc teylouna kasam rui thut phuiloumeipui tei e; nnau bammei Lazaras hei kapuningc e.)#Jhn 12.3 3“Poubauhmei, nang nzianmeipu tei nnau bam e,” twna kakai swanrey nei rui Jisu khou tithay guang the.
4Hei tei chu pwkhou, Jisu rui sa the, “Mi nnau bammei hei theih khang hamh e; Ravguangc hym tidaih khang de, kumna mi paan hei rui Ravguangc Nac Mpouh hym ndaw khang e.”
5Jisu Martha kai swanrey nei khatni Lazaras ta nzian e. 6Tiki mi chamv tei chumei tangv kamei bammei bamv khou tei zaeng neih nei bam keylou dat di he. 7Mi tangv tei, “Aniu Judia thangc tat dat di kho,” twna Jisu rui kaziap nunc khou sa the.
8Khoutei, “Rabbi, ntaw Jihudimei nunc nang ta ntauh kwamluai khang phu bam khou, nang mi thangc tei tat dat khang raengc bam tu haih cho?” twna kaziap nunc rui daw the.
9Jisu rui sa the, “Kalaanv dak hei ganvdak ruhna kanei nai tu hamh nah cho? Kalaanv tatmei thu phay kalanv mak ge. Kalam thu mbaanv tuang gaanhmei riw rui kamei how de. 10Tiki kamei zingbangc tat re thei, kaphay kalanv e, kalam thu kakhang gaanhmei maek khe.” 11Khoutei, “Aniu champanv Lazaras zip kan the, ai tatna kata nchyang thaulou dat puni,” twna Jisu rui sa the.
12“Poubauhmei, kamei zip kan e thei, gay dat kan ni the,” twna kaniw rui daw the.
13Jisu rui samei thu Lazaras theic the twmei tuang e; tiki kaniw rui thu kamei zip bam changh tina khuangh e twna ning the. 14Khoutei Jisu rui ndauh phauna sa the, “Lazaras theic the, 15tiki ai mi khou tei bam makmei hei nangniw khang rui ai neihla e. Kalam thu nangniw lwm khang the. Aniu kadaeng thangc tat di kho.”
16Naphinhmei kawmei Thomas rui, “Aniu ni kamei lev theiclou nchamc khang tat di kho,” twna kapammei ziap guay khou sa the.
Jisu hei Ringcthau Datmei Khatni Ringhmei e
17Jisu guang tangc pwkhou, Lazaras ta mbeihloumei zaeng padeih tangc the tw bam khwan the. 18Bethani hei Jerusalem khou rui mail kanei sini tangh mak ge. 19Kum tina Martha kaney Meri ta swmlou khang Judiamei meic mpeyna guang bam khwan e.
20Martha tei Jisu guang e twmei chu lana, kata ariw khang pat the; tiki Meri thu kai khou bam kan de.
21Martha rui Jisu khou sa the, “Poubauhmei, nang bam tu khwan e thei, apuningc theic lak ni tuang e! 22Tiki ntaw ni nang rui ney neymei Ravguangc rui tiilou puni de twmei ai thay e.”
23“Nang puningc ringcthau dat puni de,” twna Jisu rui kakhou sa ti khou, 24“nkhamhpui nungc, theihmei guay ringcthau dat pwkhou kiu, ringc dat puni twmei ai thay e,” twna Martha rui sa the.
25Khoutei Jisu rui kakhou sa the, “ringcthau datmei khatni ringhmei kiu ai hei the. Akhou lwmpui mei tei, kamei theic sini ringc puni; 26ringcna akhou lwmpui mei tei thu, theic dat zat lak khe. Nang mi hei lwm daih?”
27“Ngguay, Poubauhmei! Nang hei mbaanv khou guang punimei, Ravguangc Nac Mpouh Khrista kiu the twmei ai lwm e,” twna kamei rui daw the.
Jisu Kap the
28Mi hei salou lana, Martha kaswanrey Meri ta kaw khang tat kan the, kumna, “Dinhpouc guang bam e, kumna kamei nang ta kaw bam e,” twna suaina salou the.
29Meri hei tei chu pwkhou, dingthauna, kaluak kalat kadaeng thangc pat the. 30(Jisu namv khou guang tangh mak he, Martha rui kata ariwmei bamv khou tei bam di he.) 31Meri chadi chadana tat pat kanmei tei how lana, swmlou khang guang bammei nunc tei ni kathei lay pat the. Kalam thu kamei tarou thangc kap tat ni lana khuangh e twna kaniw ning the. 32Meri Jisu daeng khou guang tangcna kata how rappui lev, kamei kaphaypav daeng khou khuksun keyna, “Poubauhmei, nang bam khwan e thei apuningc theic lak ni tuang e!” twna sa the.
33Meri kap bammei ta, khatni kadaeng khou bammei guay ni kap bammei ta how lana Jisu kalung mpeyna kabiu the.
34“Kata tabui thangc mbeihlou kan tu cho?” twna Jisu rui thanv the.
“Poubauhmei, guangna zauc tho,” twna kaniw rui sa the.
35Jisu kap the. 36“Zauclo, kamei Lazaras ta adih nzian cho!” twna meic nunc tei rui sa the.
37Tiki meic gaanvsaekc rui thu, “Kamei mik tiatmei ta tiraklou ngam e thei, Lazaras ta titheih mak khang thu ngam mak khe nah cho?” twna sa the.
Lazaras ta Tiringcthaulou Datmei
38Jisu kalung mpeyna kabiuna tarou thangc tat the. Hei tei kamun khou ntauh rui daengc thingcloumei khowlang e. 39“Ntauh hei laa ganc tho!” twna Jisu rui sa the.
Theihmeipu tanpui Martha rui, “Poubauhmei, zaeng padeih tangc the. Namh si puni di the,” twna sa the.
40“Nangniw lwm e thei, nangniw Ravguangc tuang hym how puni twna ai nangniw khou sa mak nah cho?” twna Jisu rui kakhou sa the. 41Kaniw rui roukhamtauc tei laanc pat the. Khoutei Jisu tingkauh thangc zauc thauna sa the, “He apu, nang rui alat chulou bammei khang rui nang ta thuancku e. 42Nang rui alat chulou tanh tan bam de twmei ai thay e, tiki nang rui ata ndiu guangmei tuang e twmei mi khou bammei guay hei lwm khang, kaniw khang rui ai mi hei sa tuang e.” 43Kamei mi hei salou lana kauc ranvna, “Lazaras, pat tho!” twna sa the. 44Lazaras tei kaphay kabaanc pheynuaih rui kasiatclouna khatni kazaw pheyzai rui duamlouna pat the. Khoutei, “Kata riclouna titat ti tho,” twna Jisu rui sa the.
Jisu ta Swluai khang Swmei
45Meri daeng khou guang bammei nunc tei Jisu rui taancloumei tei how lana kaniw meic mpeyna Jisu khou lwmlou the. 46Tiki kaniw gaanvsaekc thu Pharisimei nunc daeng thangc tatna, Jisu rui taancloumei tei kaniw khou poulou the. 47Khoutei Pharisimei nunc khatni amuh daihmei nunc pei kawna sa the, “Aniu tabui tuang sw kho cho? mi pu hei rui sw-nchinpui taanv mpeyna swna bam the. 48Aniu rui kata mi kumcna mpatlou bam ti thei, meic guayna kakhou lwm ngam kan pungh di the. Kumna Rommei guangna aniu tuang nthanmei bamv khatni aniu zaat ta swmaan ngam pungh di the!”
49Kaniw pang khou gaan khat, mi kwm tei Tingkuh sw bammei, kazanc Kaiapha kawmeipu rui sa the, “Nangniw ramhkhat na sini thay mak khe! 50Zaatc kapwm ta swmaanmei suangc, meic gaanv khat rui meic guay khang theicloumei rui nangniw khang gaeng e twmei nangniw thay mak nah cho?” 51Mi hei kamei kachwnphuakh khou rui sa tu hamh e; tiki mi kwm tei kamei tingkuh sw bammei thei layna, Jisu Jihudimei zaat khang theiclou puni twna dinc kasuakcloupui tuang e. 52Kaniw khang na hamh e, zinphak tat kanmei Ravguangc nac nunc ta pumh akhat na khou khuam guang kariulou dat khang e.
53Mi nungc tei rui thauna Jihudimei kapy nunc tei Jisu ta swluai khang kaphianh thau the. 54Kum tina Jisu Judia khou, meic pang khou ndauhna tat dat mak khe, kumna tazikramv daeng thangc naimei Ephraim twna kawmei kaidai thangc tatna mi khou tei kaziap nunc lev bam kan the.
55Kaanpatpui Ngai ana guang ti thena, nngay hu khou pumh sw nthanmei thouc sw khang namv namv thangc rui Jerusalem khou ngangh geic the. 56Kum tina kaniw Jisu ta phu the, kumna kaniw Ravkai khou ding kaduaina, “Kamei nngay khou thu guang pw lak khe ni? Nangniw akumhna ning bo?” twna khat khat khou sa the. 57Mi ganv khou tei, Jisu ta nym khang, kamei bammei bamv thay thaymei rui dinclou nina e, twna amuh daihmei nunc khatni Pharisimei nunc rui latdanv patlou bam khwan e.
നിലവിൽ തിരഞ്ഞെടുത്തിരിക്കുന്നു:
JAHON 11: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
