JAHON 10
10
Lauziu Gaenghmei Latgiam
1Jisu rui kaniw khou sa e, “Ai rui nangniw khou kaling siakna sa tuang e: Chaengmun khou rui hamhna, baihmei chaeng rui nzaekc kuna lauziu kuanc khou gutpui mei tei kaihouhmei khatni kwamtupui mei e. 2Tiki chaengmun khou rui gutmeipu tei lauziu nunc ta tei gaenghmeipu e. 3Chaengmun nkhwanmeipu tei rui kakhang chaengmun tei laanclou puni; lauziu nunc tei kakhwan thay e, kumna kamei rui kaniw zanc kawna nduangh pat puni. 4Kamei rui katuang lauziu guay ta nduangh patpui ganv khou tei, kamei hu khou tat re, kumna lauziu guay tei kathei lay tat re. Kalam thu kaniw kakhwan thay e. 5Meic baihmei thei thu kaniw lay tat ni tu hamh e; zawthay makmeipu khou rui thu kaniw pak tat kan ni de. Kalam thu kaniw kakhwan thay mak ge.”
6Jisu rui mi latgiam hei kaniw khou salou the, tiki kaniw kamei rui sa bammei kabac tei thay mak khe.
Jisu hei Gaymei Lauziu Gaenghmeipu e
7Kum tina Jisu rui kaniw khou sa the, “Ai rui nangniw khou kaling siakna sa tuang e: Ai hei lauziu nunc tuang chaengmun e. 8Ahu khou guang kanmei baihmei guay tei thu, kaihouhmei khatni kwamtumei nunc e. Kumna lauziu nunc rui kaniw khwan thaylou mak ge. 9Ai hei chaengmun e. Akhou rui gutmei guay ta kanlou puni; kumna kamei kakuanc khou gut dat pat datna mpac tu bam puni. 10Kaihouhmei thu houh khang, swluai khang, khatni swmaan khang na guang e. Ai guangmei thu kaniw ringhmei laa khang e—gaat tuang nai dat makmei ringcpaan laatow kan khang e.
11“Ai hei gaymei lauziu gaenghmeipu e. Gaymei lauziu gaenghmeipu rui lauziu nunc khang theiclou e. 12Tiki gaengc phihmeipu, lauziu gaenghmei ling hamhmeipu tei thu, lauziu guay tei katuang hamh lapui zaeng rui, alaih guangmei ta how pwkhou, lauziu guay ta tei ganclouna pak ge. Kum tina alaih tei rui lauziu ta tei nkay the, kumna lauziu pang tei pak phak the. 13Gaengc phihmeipu tei pak tat kan the, kalam thu kamei thu phihmei de, kumna lauziu khang tei kadan tuang maek ge. 14-15Ai hei gaymei lauziu gaenghmeipu e. Apu ata thay e khatni ai aPu ta thay e. Mi kumcna ai atuang lauziu guay ta thay e khatni atuang lauziu guay ata thay e. Ai kaniw khang theiclou e.#Met 11.27; Luk 10.22 16Mi lauziu kuanc khou bam makmei atuang lauziu baihmei ni nai he. Mi nunc ta tei ni ai laaguang puni, kumna gaenghmeipu akhat bangc khou kaniw guay lauziu kang akhat sw puni.
17“Apu rui ata nzian e, kalam thu ai apanty tiipat khang nuh the; hei tei ai laa dat khang e. 18Meic gaanv khat na rui sini apanty laa tu hamh e; achwn rui nuhna ai rui mi hei tii pat tuang de. Mi hei tiipat khang akhou ngamv nai e, laa dat khang ni ngamv nai e. Mi khang hei aPu rui akhou ngamv tiilou the.”
19Mi lat guay zaeng rui, Jihudimei nunc pang khou tei, kalangv pat dat khwan the. 20Kaniw meic mpeyna rui, “Kakhou ravsic gut the! Kamei mba the! Nangniw tabui swna kalat nking bam tu cho?” twna sa the.
21Tiki baihmei gaanvsaekc rui thu, “Ravsic gutpui mei rui thu mi kumhmei lat hei sa ni tu hamh e! Ravsic rui mik tiatmei ta tigaylou ngam puni dina cho?” twna sa the.
Jisu ta Laalou Makmei
22Mi tangv Ravkai Katgutpui Ngai, Jerusalem khou tat key bam khwan e. Hei tei tingsei khou khwan e. 23Khoutei Jisu, Solomon Kaisangc twna kawmei bamv khou tat bam khwan e. 24Khoutei meic nunc tei kadaeng khou huamc guangna, “Nang thow cho twmei dinclou makna asaanh bam ni hena cho? Nang hei Khrista kiu the ni, sa nthanlou tho,” twna sa the.
25Jisu rui mundawna sa the, “Ai nangniw khou salou kan the, tiki nangniw lwm mak khe. Apu rui tiiloumei ngamv paan rui taanclou kanmei taanv guay tei rui ai thow cho twmei dinclou kan the; 26tiki nangniw lwm mak ge. Kalam thu nangniw atuang lauziu hamh e. 27Alauziu guay thu akhwan nking e; ai kaniw ta thay e, kumna kaniw athei lay e. 28Ai rui kaniw khou ringcsuangmei tiilou the, kumna kaniw theic dat lak khe. Meic gaanv khat na rui sini kaniw ta abaanc khou rui asut pat dat ngam ni tu hamh the. 29Kaniw ta akhou tiiloumeipu aPu hei daic liangmei di the, kumna gaanv khat na rui sini kaniw ta aPu baanc khou rui asut pat dat ngam ni tu hamh the. 30Apu lev ai akhat de.”
31Khoutei kata nkwam khang kaniw ntauh khuaic thau dat sanv the. 32Khoutei Jisu rui kaniw khou sa the, “Apu khou rui ai rui nangniw hu khou gaytaanv mpeyna taanc lyanlou kan the; mi pang khou tei akumhmei taanv zaeng khou tei rui nangniw ata ntauh kwamluai nina cho?”
33Kaniw rui mundawna sa the, “Gaytaanv zaeng rui aniw nang ta ntauh kwamluai nina hamh e; tiki nang rui Ravguangc ta sw chapavpui zaeng rui de! Nang maansei di ki, nang rana nang ta Ravguangc tiswloupui zaeng rui e.”#Lev 24.16
34Khoutei Jisu rui sa the, “‘Nangniw rav nunc e, twna Ravguangc rui sa e’ twna nangniw tuang Riakdanv khou hylouna nai e.#Kal 82.6 35Nthanmei Latrik rui samei hei thu kalaic dat mak khe; kumna Ravguangc rui katuang lat kaniw khou tiiloumei nunc ta tei rav nunc twna kaw the. 36Kum e thei, ‘Ai hei Ravguangc Nac Mpouh e.’ twna sa e twpui zaeng rui, aPu rui reic patna mi mbaanv khou ndiu guangmei ati hei, Ravguangc ta swchapahpui mei e twna nangniw akumhna sa tu cho? 37Ai aPu tuang taanv taanh mak ge thei, ata lwm nangh e. 38Tiki aPu tuang taanv taanc e thei, nangniw ata lwm ni tuang e, kumna ai Apu khou bam e khatni aPu akhou bam e twmei nangniw thay ni tuang e.”
39Kaniw Jisu ta nym khang sw dat khwan e, tiki kamei kaniw baanc khou rui tiap duak kan the.
40Mi tangv, Jisu Jordan kaan pat datna, thaurey khou Jahon rui duiluploumei bamv khou tei guangna bam kan the.#Jhn 1.28 41Meic mpeyna mi khou tei guangna, “Jahon thu sw-nchinmei taanv taanh mak ge, tiki kamei rui mi pu lam khou saloumei guay hei thu nchumh dyng the,” twna kaniw rui sa the. 42Kumna mi bamv khou tei meic mpeyna kakhou lwmlou the.
നിലവിൽ തിരഞ്ഞെടുത്തിരിക്കുന്നു:
JAHON 10: RONGBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
