GENESIS 30
30
1Rakil in Jakob ta himhim a neihsak kei chih a kitheih in a sanggamnu a hazata hi. Jakob kiang ah, “Tate honpia in, huchilou in zaw ka si ding” a chi hi.
2Rakil tung ah Jakob a heh a, “Gilgah hon pelou Pathian bang ka hi ahia?” a chi hi.
3Aman, “En in, ka sikhanu Bilhah luppih in. Huchi in ken leng amah a kipan tate ka neihsam theihna ding in ka phei tung ah ta k’on nei ding hi” a chi hi. 4A sikhanu Bilhah a zi ding in a pia a, Jakob in amah a na luppih hi. 5Bilhah a gai a Jakob ta a neihsakta hi. 6Rakil in, “Pathian in a hon ngaihtuah a, ka aw leng a za a, tapa a honpia” a chi hi. Huaiziak in, a min Dan a sa hi. 7Rakil sikhanu Bilhah a gai nawn a, Jakob tapa dang a neihsak nawn hi. 8Rakil in, “Nakpitak in ka sanggamnu ka buan a, ka zouta” a chi a; a min Naphtali a sa hi.
9Leah in ta dang a nei nawn kei chih a kitheih in, a sikhanu Zilpah a pi a, a zi ding in Jakob kiang ah a pia hi. 10Leah sikhanu Zilpah in Jakob tapa a neihsak hi. 11Leah in, “Vangphathuai mah ei” a chi a; a min Gad a sa hi. 12Leah sikhanu Zilpah in Jakob tapa dang a neihsak nawn hi. 13Leah in, “Hampha natel ing e! Numeite’n hampha honchi ding uh eive” a chi a; a min Asher a sa hi.
14Buhlak lai in Reuben in gamlak ah zawl-ai a va mu a; a nu Leah kiang ah a hontawi hi. Rakil in Leah kiang ah, “Hehpih in na tapa zawl-ai a khen hon pedih,” a chi hi.
15Aman a kiang ah, “Ka pasal n’on suhsak thilduai ahi hia? Ka tapa zawl-ai leng hon suh sak na tum nawn lai maw?” a chi hi. Rakil in “Na tapa zawl-ai sik in tuzan in a hon luppih ding,” a chi hi.
16Nitaklam in Jakob gamlak a kipan a hongtung a, a dawn ding in Leah a kuan a, “N’on luppih ding ahi. Ka tapa zawl-ai in k’on guaita ngal a” a chi hi. Huai zan in amah a luppihta hi.
17Pathian in Leah thumna a ngaikhia a, a gai a, Jakob tapa ngana a neihsak nawn hi. 18Leah in, “Ka sikhanu ka pasal kiang a ka piak ziak in Pathian in ka loh honpia eive” a chi a; a min Issakar a sa hi. 19Leah a gai nawn a, Jakob tapa gukna a neihsak nawn hi. 20Leah in, “Pathian in thil hoihtak a hon neisak a; tuin zaw ka pasal tapa guk ka neihsak tak ziak in, ka kiang ah a tengta ding” a chi a; a min Zebulun a sa hi. 21Huai nung in tanu a nei nawn a, a min Dinah a sa hi.
22Pathian in Rakil a theigige a, Pathian in a thumna a ngaikhia a, a sul a hon sak hi. 23Amah a gai a, tapa a nei a; “Pathian in ka minsia a la mangta” a chi hi. 24“Toupa’n tapa dang honpiak beh ding” chi’n, a min Joseph a sa hi.
Laban Kiang a Jakob Thil Nget
25Hichi ahi a, Rakil in Joseph a neih nung in, Jakob in Laban kiang ah, “Kei ka omna ngei ah, ka gam ah hon paisakta in aw. 26Na nna ka sepsan ka zite leh ka tate honpia inla, hon paisak in. Na nna k’on sepsak dan lah na thei ngal a” a chi hi.
27Laban in a kiang ah, “N’on hehpihtheih leh omtadih lai ve. Toupa’n nang vang in a hon vualzawl, chih aisan in ka thei hi” a chi hi. 28Amahmah in, “Na loh ding sep inla, honhilh dih, k’on pe ding” a chi hi.
29Aman, a kiang ah, “Bangchi’n na nna ka sem a, bangchi’n na gan ka kiang ah a om ua, na thei a kei hiam? 30Ka hong ma in tawmchik kia na nei a, tu’n zaw tampi a hong phata uhi. Ka kalsuanna peuh ah Toupa’n nang a hon vualzawl hi. Himahleh chikchiang in ahia ka inkuante adia ka sepkhiak sam ding?” a chi hi.
31Aman, “Bang k’on pedia?” a chi a; Jakob in, “Bangmah na honpiak ding ahi kei. Hiai thil hihsak leh na ganhon ka khah dia ka chingnawn ding hi. 32Tuni in na ganhon ka va enkhe vek dia, belam lak a, a vom gial petmah a gial leh a vom a gial zekzek leh a vom peuhmah, kel lak a, a kang a gial petmah a gial leh a kang a gial zekzekte huai a kipan ka pituam zel ding hi. Tuban huchibang a hong piang peuhmah ka loh ahita ding hi. 33Tuban na mitmuh a khial a ka omna thu ah na hongpai hun chiang in, ka diktatna in a hon dawnsak mai ding. Kel lak a a kang a gial petmah a gial lou leh a kang a gial zekzek lou leh belam lak a a vomlou ka kiang a na muh peuhmah ka guk in na sepmai ding” a chi hi.
34Laban in, “Ngai in, na gen bang tak hile a ke” a chi hi. 35Huai nitakin keltal a kang a gial leh a kang a gial zekzek teng leh kelnu a kang gial petmah a gial leh a kang a gial zekzek teng a kanna om peuhmah, belam lak a a vom tengteng toh a pituam a, a tapate khut ah a pia hi. 36Amah leh Jakob kikal ah ni thum lam a omsak a; Jakob in Laban ganhon dangte a ching nawn hi.
37Jakob in hiangzau sing leh makha sing leh sesing chiang hing a la a, a hawng a khokngou chiat a, chiangte ah angoute a kilangsak hi. 38A chiang hawng khohte ganhonte’n tui a hong dawnzelna tuikuangte ah, tui luannate ah leh ganhonte mazawn zel ah a koihta hi; tuidawn dia a hongpai chiang ua a gaina ding un. 39Ganhonte chiangte ma ah a gai panta ua, a gialte, gial petmah a gialte, a gial zekzekte a hon neizel uhi.
40Jakob in belamnoute a koihtuam a, ganhonte Laban ganhon lak a, a gial leh a vom tengteng lam a ngasak zel a; amah ganhonte a koihtuam zel a, Laban gan lak ah a koih kei hi.
41Hichi ahi a, gannu hatzawte a huk chiang un, a gai theihna ding un Jakob in tuiluanna ah, gan mitmuh in chiangte a koih zel hi.
42Himahleh gannu a hatloute mai ah a koih kei hi. A nou hatloute Laban a ahi ua, a hatte Jakob a ahi zel uhi. 43Jakob nakpi’n a hongpung a, ganhon thupitak, sikhanute, sikhapate, sangawngsaute leh sabiltungte a neita hi.
നിലവിൽ തിരഞ്ഞെടുത്തിരിക്കുന്നു:
GENESIS 30: PAITBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
