GENESIS 31
31
Jakob In Laban A Taisan
1Huan, Laban tapate’n, “Jakob in i pa neihsate lamang in, i pa neihsa a kipan hiai thupina tengteng a mu hi,” a chih uh a na zata hi. 2Jakob in Laban mel a en a, ngai in, tuma lam bang in a tung ah a hoih nawn kei, chih a thei hi. 3Toupa’n, Jakob kiang ah, “Na pipute gam ah leh na tanaute kiang ah pai nawnta in. Na kiang ah om ding ka hi” a chi hi.
4Jakob in mi a sawl a, gamlak a a ganhon omna ah Rakil leh Leah a samsaka, a kiang uah, 5“Na pa uh mel ka muh in, tuma lam bang in ka tung ah a hoih nawn kei, chih ka thei hi. Himahleh ka pa Pathian ka kiang ah a om hi. 6Na pa uh nna ka theihtawp in ka sem chih na thei uhi. 7Himahleh na pa un hon zekhem a, ka loh lah sawmvei tak a hihlamdang a; himahleh Pathian in ka siatna ding a khoih a phalkei hi. 8Gial petmah a gialte na loh ahi ding, a chih leh, gan tengteng in gial petmah a gialte a nei uh. A gialte na loh ahi ding, a chih leh, gan tengteng in a gialte a nei zel uh. 9Huchibang in Pathian in na pa gante a laksaka, kei a hon peta hi.
10Hichi ahi a, gante a gai pat lai un, ka mang in ka dak a, ngai in, a pa, ganhonte, a gialte, gial petmah a gialte, a gial a gial iik iakte ahi uh chih ka mu hi. 11Ka mang in Pathian angel in, ‘Jakob,’ hon na chi a; ken ‘hiai ah ka om’ ka chi hi. 12Aman, ‘dak inla, en in, a pa ganhonte tengteng a gialte, gial petmah a gialte, a gial a gial iik iakte ahi uh. Laban in na tung a a thilhih tengteng ka mu hi. 13Kei, suangphuh a sathau na nilh a, ka kiang a thu na chiamna Bethel, huai Bethel Pathian ka hi. Tuin thou inla, hiai gam a kipan pawt inla, na pianna gam ah pai nawnta in’ ” a chi hi.
14Rakil leh Leah in a dawng ua, a kiang ah, “Ka pa uh inn ah kou ading in tantuan leh gouluah ding a om lailai ahia? 15Aman mikhual banglel a honsim hita lou hia? A hon khong khinta a, ka man ulah a ne khinta ngal a. 16Pathian in ka pa uh hauhna a laksak tengteng ei leh i tate a ahi. Pathian in na kiang a a gen peuhmah hih in” a chi uhi.
17Jakob a thou a, a tapate leh a zite sangawngsau tung ah a tuangsak hi; 18Kanan gam a a pa Isak kiang a paiding in a gan tengteng leh a sumkhol tengteng, a gan muhte, Padan-aram gam a a kholte a paipih vek hi. 19Laban a belam mulmet ding in a paimang a; Rakil in a pa milim pathiante a guksak hi. 20Suria mi Laban theihlouh kal in Jakob in a guk paimangsan a, a paimangsan ding thu a hilh kei hi. 21Huchi in a neih tengteng toh a taimangta hi. A thou a, Luipi a kan a, Gilead tanglam zuan in a pai hi.
Laban In Jakob A Nungdelh
22A ni thum ni’n Jakob a taita chih Laban a hilh uh. 23A unaute a pi a, ni sagih lam tan a delh a; Gilead tang ah a delh phata hi. 24Suria mi Laban kiang ah zan in a mang in Pathian a hong a, a kiang ah, “Jakob kiang ah a sia, a pha a bangmah genlou ding in pilvang in,” a chi hi. Laban in Jakob a delh phata hi. 25Jakob in a puanin tang ah a kaikhin a; Laban in leng a unaute toh Gilead tang ah a kai uhi.
26Laban in Jakob kiang ah, “Na thilhih bangchidan ahia oi? Ka theihlouh kal a na guk paimang a, namsau a lak salte bang mai a ka tanute na pimang? 27Bangdia hon taimangsan a, hon guk paisan a, nopsaknate toh, late toh, khuangtate toh, kaihgingte toh k’on khak theihna dia n’on hilhlouh? 28Ka tute leh ka tanute ka tawp na phal kei. Haihuaitakin thil na hih hi. 29Hon hihsethei ka hi a; himahleh na pa Pathian in tu zan in, Jakob kiang ah a sia, a pha bangmah genlou ding in pilvang in, chi’n, a hon houpih hi. 30Na pa inn na ngaih mahmah tak ziak in, pai ut hi tawk lechin leng bangdia ka pathiante hon guksak na hia?” a chi hi.
31Jakob in a dawng a, Laban kiang ah, “Ka lauh ziak ahi. Na tanute n’on laksak teitei kha ding ka chi a, ahi. 32Kuapeuh na pathiante na muhna a hing kei ding. I unaute mitmuh in nang a ka kiang a om enchian inla, la ve” a chi hi.
33Rakil in a na gu chih lah Jakob in a thei ngalkei a. Jakob puaninte ah, Leah puaninte ah leh sikhanu nihte puaninte ah Jakob a lut a; himahleh a mu kei hi. Leah puanin a kipan a pawt a, Rakil puanin ah a lut hi. 34Rakil in milimte a na la a, sangawngsau van lak ah a na koih a, a na tutkhum hi. Laban in a puanin sung tengteng a maisuak vek a, himahleh a mu kei hi. 35Aman a pa kiang ah, “Na ma a ka din ngaplouh ziak in ka toupa, heh ken aw. Numei omdan ngeina ka tung a a om laitak ahi ngal a” a chi hi. A zongzong a, himahleh milimte a muzou takei hi.
36Jakob a hehta a, Laban a salta hi. Jakob in Laban kiang ah, “Bang ah ka talek a, bang ah ka khial a hon delh na hia? 37Ka van tengteng na mai nung in leng, na inn sung van himhim bang a na muh? Eigel kal a thu a khen theihna ding un ka unaute leh na unaute ma ah na muh pen koihkhia in. 38Kum sawmnih vingveng na kiang ah ka omta; na belampite leh na kelpite’n nou a neikhial ngeikei uh. Na belamhon lak a a pate leng ka ne ngeikei hi. 39Gamsa keih leng na kiang ah k’on tun ngei ngalkei a: a mang sik in ken ka thuak zawzela; sun a guk hiam, zan a guk hiam lah ka dit na phut gige hi. 40Hichibang in ka om zel a; sun nisa leh zan khovot in a hon hihgim thei mahmah a; ihmut leng ka mu ngeikei hi. 41Kum sawmnih sung teng na inn ah ka om a; na tanu nihte loh ding in kum sawmlehli na nna ka sem a, na gante loh ding in kum guk ka sem nawn a; ka loh sawmvei na hih lamdang hi. 42Ka pa Pathian, Abraham Pathian leh Isak Pathian lauhna ka kiang a omlou hile houh, tun vuaktang lel a hon paisak ngeingei ding na hi. Pathian in ka haksat thuakdan leh ka sepgim dan a mu a, tu zan a nang honsal ahi” a chi hi.
Jakob Leh Laban Kithukimna
43Laban in a dawng a, Jakob kiang ah, “Hiai tanute ka tanute ahi ua, hiai naupangte ka naupangte ahi uh. Hiai gante kei gante ahi ua, na muh tengteng kei avek ahi uh. Tuni in hiai ka tanute tung ah leh a ta neihte uh tung ah bang ka hihthei dia? 44Kisa in, kei leh nang thu i khung ding; Kei leh nang kikal ah theihpihna hi hen” a chi hi.
45Jakob in suang a la a, suangphuh in a phut hi. 46Jakob in a unaute kiang ah, “Suang lakhawm un” a chi hi. Suang a la ua, a chiang ua, a suang chiankhawm kiang ah an a ne uhi. 47Laban in huai suang chiankhawm, Jegarsahadutha, a sa a; Jakob in Galeed, a sa hi. 48Laban in, “Hiai suang chiankhawm tuin kei leh nang kikal ah theihpihna ahi” a chi hi. Huaiziak in, a min Galeed chih ahita hi. 49Mizpah chih leng ahi, “Kikhen a i om hun chiang in Toupa’n honveng tuaktuak hen,” a chih ziak in. 50“Ka tanute na suk gentheih a, ka tanute lou zi dang na neih leh, ka tanute chih louh kuamah i kiang ah a omkei na ua, en in, Pathian, kei leh nang kal hon theihpihpa ahi” a chi ngal hi. 51Laban mah in, “Hiai suang chiankhawm en inla, keimah leh nangmah kikal a ka phuh sungphuh leng en in. 52Poi kikhoihsak ding in, kei hiai suang kheng in na kiang ah ka hongpai kei ding, chih leh nang leng hiai suang chiankhawm leh hiai suangphuh kheng in ka kiang ah na hongpai kei ding, chih, hiai suang chiankhawm a theihpihna hi henla, hiai suangphuh leng a theihpihna mah hi hen. 53Abraham Pathian, Nahor Pathian, a pa uh Pathian in i kal ah thukhen hen” a chi hi. Jakob in a pa Isak lauhpa minlou in, a kichiamta hi. 54Jakob in tang ah kithoihna a lan a, a unaute tanghou ne ding in a sam a; tanghou a ne ua, tang ah a giak chiat uhi. 55Zingsang in beltak in Laban a thou a, a tute leh a tanute a tawp a, a vualzawl hi. Laban a pai a, amah omna ah a kiknawnta hi.
നിലവിൽ തിരഞ്ഞെടുത്തിരിക്കുന്നു:
GENESIS 31: PAITBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
