LUKA 1
1
Theophil kuoma inhlânna
1Eini laia thil hung tlung tahai chanchin,
2a tira inthawka mita hmutuhai le thu rawngbâwltuhaiin, an mi hril sawng ang tak khan, mi tamtakin ziek an tum ta hlak a;
3chuleiin, Theophil inzâumtak, a bula inthawkin iengkim fimkhur taka suiin, kei khawmin chanchin indawt thlapin ziek pêk lang che ṭhain ka hriet a;
4kha hmaa thu an inchûktir che kha indiktak a nih ti i hriet theina dingin.
Baptistu Johan pieng ding thu hrillâwkna
5 #
1 Chr 24.10
Judai ram lal Herod a dam laiin, Abija pâwla mi a hming Zakaria, thiempu pakhat a um a. Ama chun Aron thlaa mi nuhmeiin a nei a, a hming chu Elizabeth a nih.
6An pahni chun Pathien mithmuah feltakin an um a, Lalpa thupêk le a dân po po chu sawisêlboa zâwm hlak mi an nih.
7Nisienlakhawm, Elizabeth chu a ching leiin nau an nei naw a, an pahni chun upatak an ni si a.
8Chun, a pâwlhai thaw dân ang peia Pathien hmaa thiempu sin a thaw laiin,
9thiempu dân angin Lalpa biekina lût le riminhnik raw sin a chang a.
10Chun, riminhnik chu a raw hun laiin mipui chu an rêngin tuolah an ṭawngṭai a.
11Chun, Lalpa vântirko pakhat thil riminhnik râwna maichâm changtieng chun a hung inlâr a.
12Chun, Zakaria chun a hmu phing- leh a lunginzîng a, ṭi khawm a ṭi a.
13Nisienlakhawm, vântirko chun a kuomah, “Zakaria, ṭi naw, i hni kha hriet a nih, i nuhmei Elizabethin naupasal neipêk a ti che, a hmingah Johan i sak ding a nih.
14Chun, nang hlimin lâwm i ta, ama a pieng chun mi tamtak lâwm bawk an tih.
15 #
Nam 6.3
Lalpa ngaiin mi lien nîng a ta, uoin le zu hrim hrim dâwn naw ni a; a nu phing sûnga inthawkin#A pieng thlaka inthawkin khawm ti thei a nih Thlarau Inthiengin hung sip a tih,
16Israel thlahai tamtak Lalpa an Pathien kuom tieng innghattir nâwk a tih.
17 #
Mal 4.5-6
Chun, pahai lungril chu nauhai tienga innghattir ding dâm, mi kâwmawhai chu mi feltak varna tienga innghattir ding dâm, Lalpa ta dinga mihai lo buotsai dingin Elija lungril le thilthawtheina putin Lalpa hmaah fêng a tih,” a ta.
18Chun, Zakariain vântirko kuomah chun, “Chu chu iengtin am hrieng ka ta? kei putar ka na, ka nuhmei khawm pitar a ni si a,” a ta.
19 #
Dan 8.16; 9.21 Vântirko chun a dawn a, a kuomah, “Gabriel, Pathien hmaa ngîr hlak ka na; a be ding che le, chuong thu ṭha chu hril ding chea hung tir ka nih.
20Ngai rawh, ka thu hrilhai, a hun taka hung tlung ding chu i awi naw leiin chuong thil chu a hung tlung hmakhat chu to zing i ta, ṭawng thei naw ti ni,” a ti a.
21Chun, mipuihai chun Zakaria chu an lo nghâk a, Pathien biekin sûnga a um sâwt lei chun mak an ti hle a.
22Chun, a hung suok chun an kuomah thu a hril thei ta naw a; chuongchun, biekinah inlârna a hmu a nih ti an hriet ta a; anni chu kut zâizirin a biek hlak a, chun ṭawng thei lovin a um ta zing a.
23Chun, a rawngbâwlna ni chu a kim phingleh a inah a fe ta a.
24Chu hnunga chun a nuhmei Elizabeth chu a hung inrai a, thla nga ân thup a.
25“Mi kuoma ka hming sie inkhumna dingin, Lalpain a mi hmu a, hieng ang hin a mi thawpêk a ni hi,” a ta.
Isu pieng thu hrillâwkna
26Chun, a thla ruknaa chun Pathienin vântirko Gabriel chu Galili rama khuo pakhat Nazareth an tia chun,
27 #
Mt 1.18
nunghâk inthieng pakhat kuomah a tir a; ama chu David thlaa mi a hming Josef nuhmei huol a na; chu nunghâk hming chu Mari a nih.
28Chun, vântirko chu a kuomah a lût a, “Chibai, Vochuom, Lalpa i kuomah a um#Ziek ṭhenah, “Nang chu nuhmei lai poah inpâk tlâk i nih” ti a ṭhang sa” a ta.
29Chun, chu thu hril lei chun a lunginzîng ta bêk bêk a, “Iengtiziea chibai a mi bûk am nîng a ti aw,” tiin ân ngaituo a.
30Chun, vântirko chun a kuomah, “Mari, ṭi naw, Pathien ngaisak zâwng i nih.
31 #
Mt 1.21
Ngai rawh, inrâi i ta, naupasal nei i ta, a hminga chun Isu i sak ding a nih.
32Ama chu mi lien la nîng a ta, Achunghnungtak Naupa tîng an tih; Lalpa Pathienin a thlatu David ṭhungpha chu pêng a ta;
33 #
2 Sam 7.12,13,16; Is 9.7 Jakob thlahai chungah chatuonin inlal a ta, a ramin tâwp ni nei naw ni,” a ta.
34Chun, Mari chun vântirko kuomah chun, “Chuong chu iengtin am ni thei a ti leh, pasal ka nei si naw a?” a ta.
35Chun, vântirko chun a dawn a, a kuomah, “Thlarau Inthieng i chungah hung tlung a ta, Achunghnungtak thilthawtheina chun hliekhûng a che; chuleiin, naupang hung pieng ding khawm chu mi inthieng, Pathien Naupa tîng an tih.
36Chun, ngai ta, i zuorpuinu Elizabeth khawmin tar hnungin naupasal a vawn ta a; a ching an ti hlak kha, tuta thla hi a thla rukna a ni tah.
37 #
Gen 18.14
Pathien ta ding chun thaw thei naw iengkhawm a um si naw a,” a ta.
38Chun, Marin, “Ngai ta, Lalpa suoknu ka nih, i hril ang tak chun ka chungah tlung raw se,” a ta. Chun, vântirko chun a fe san ta a.
Marin Elizabeth a va sir thu
39Chuong lai chun Mari chu a tho a, thingtlângah, Judai rama khuo pakhata chun a fe ta a;
40chun, Zakaria inah a lût a, Elizabeth chibai a bûk a.
41Chun, Elizabethin Mari chibai bûk chu a hriet phingleh, a phîng sûnga naute chu a châng a; chun, Elizabeth chu Thlarau Inthiengin a sip ta a;
42râwl inringtakin a khêk a, “Nang chu nuhmei lai poah inpâktlâk i nih; i rîla ra khawm inpâktlâk a nih.
43Ka Lalpa nu ka kuoma i hung hi iengtizie am a na?
44Ngai ta, i chibai bûk ri ka naah a lût phingleh a lâwm leiin nautê ka phîng sûngah ân châwm a nih.
45A kuoma Lalpân thu a hril kha a tlung ding a ni ti ringnu chu a hamṭha,” a ta.
Mari inpâkna hla
46 #
1 Sam 2.1-10
Chun, Marin,
“Ka hringnân Lalpa a chawimawi a,
47Ka thlarau khawm a mi sandamtu
Pathien chungah a lâwm bêk bêk a,
48A suoknu tlâwmzie a hmu a, a lunginsiet a,
Ngai rawh, tuta inthawkin ruolthar po poin hamṭha an mi ti ding a nih.
49Mi hrât khan ka chungah thil ropuitak a mi thawpêk a,
50A hming khawm ân thieng a nih,
A ṭituhai chu suon po po chenin a lunginsiet pei hlak.
51A bânin a tha hrâtzie ân entir a,
An inngaituonaa chapohai chu a sukdar ta a.
52An ṭhungphaa lal inṭhunghai chu a hnûk thlâk a.
Mi inhnuoihai chu a dawm sâng ta a.
53Phîng ṭamhai chu thil ṭhatakin a sukkhawp ta a,
Hausahai chu kutruokin ân fe hmangtir ta a.
54A siehlaw Israelhai chu a sawmdâwl ta a,
Ei thlatuhai kuoma a lo hril ta ang ngei khan;
55 #
Gen 17.7
Abraham le a thlahai chu chatuona a lunginsiet dingzie hriet zingna dingin,” a ta.
56Chun, Mari chu thla thum lai a kuomah a um a; chun, a in tieng a fe nâwk ta a.
Baptistu Johan pieng thu
57Chun, Elizabeth nau nei chu a hung hun ta a; naupasal a nei ta a.
58Chun, a vênghai le a laibunghai chun, Lalpân a lunginsiet ti an lo hriet a, an lâwmpui a.
59Chun, ni riet nia chun nautê ser tan dingin an hung a; a hmingah a pa hming bawk, Zakaria sak an tum a.
60Nisienlakhawm, a nu chun, “Ni lo e, ama chu Johan sak lem ding a nih,” a ta, a dawn a.
61Chun, annîn a kuomah, “I laibunghai lai hi hming put hi tukhawm an um lêm,” an ta.
62Chun, a pa kuoma chun kut zaizirin, “A hmingah ieng am sak inla i nuom a?” an ta.
63Chun, lekha ziekna lung phêk a hni a, “A hming Johan a nih,” tiin a ziek a. An rêngin mak an ti hle a.
64Chun, kârlovin a lei le a bau chu a hung insût a. Pathien inpâkin a hung ṭawng suok ta a.
65Chun, an vêla umhai po po chun an ṭi ta a. Chun, chuong thu chu Judai ram thingtlâng po poah ân thang ta a.
66A hre taphawt chun an lungrilah lungkhamah an nei a, “Chu nautê chu iengtin takin am la hung um a ti aw,” an ta; Lalpa kutin ama a ṭhangpui si a.
Zakaria thu hrillâwk
67Chun, a pa Zakaria chu Thlarau Inthiengin a sip a, a hrillâwk a,
68“Lalpa Israel Pathien chu, inpâkin um raw se,
A mihai chu a hung kan a, intlanna a siempêk a,
69A siehlaw David sûnghai lai chun,
Sandamna ki a mi siempêk ta si a;
70(Leihnuoi insieng tîra a zâwlnei inthienghai baua a hril ang khan).
71Ei hmêlmahai le a mi theidatuhai po po kuta inthawka mi sansuok dinga a lo intiem thu dâm;
72Ei thlâtuhai kuoma a ngilneina suklang a lo tiem thu le,
A thuthlung inthieng hre zing dingin,
73Chu thuthlung chu inkhâmin ei thlâtu Abraham kuomah a lo tiem ta a;
74Chuongchun, ei hmêlmahai kuta inthawka mi sanhimin, ṭi lova a rawng ei bâwl theina ding le,
75Ei dam sûnga a mithmua inthieng le feltaka ei um zing theina ding chu, a mi hung ruotpêk ta a nih.
76 #
Mal 3.1
Anih, Bawipu, nang hi Achunghnungtak zâwlnei tîng an ti che.
A lampuihai siem dingin Lalpa hmaah i fe ding a ni si a;
77An suolhai ngaidamna dinga,
A mihai kuoma sandamna thu inhriettir dingin;
78Ei Pathien lunginsietna leiin,
Chungtienga inthawkin nisa suokin mi hung sir a ta,
79 #
Is 9.2
Inthim lai le thina hlima inṭhunghai ên ding le,
Thlamuongna lampuia ei kehai mîn pêntir dingin,” tiin.
80Chun, nautê chu a hung lien deu deu a, a thlarau tieng a hung hrât ta deu deu a, Israelhai kuoma a hung insuklang hmakhat chu thlalêrah a um zing a.
നിലവിൽ തിരഞ്ഞെടുത്തിരിക്കുന്നു:
LUKA 1: HMOVBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
