LUKA 2
2
Isu pieng thu
1Chun, Kaisar Augustain khawvêl ram po po hming ziek ding thu a pêk a.
2Chu chu Suria rama Kurini Bawrsâp a ni laia hming ziek hmasa tak chu a nih.
3Chuongchun, mi po po chu an hming ziek dingin anni khuo sengah an fe a.
4Josef khawm, David sûnghai le a thla a ni leiin, Galili rama Nazareth khuoa inthawka Judai rama David khuo Bethlehem an tia chun a fe a,
5a nuhmei huol Mari, naupai inhlâtak pum le chun an hming ziek dingin.
6Chun, chutaka an um lai chun a naunei chu a hung hun ta a.
7Chun, a nau lutîrah naupasal a nei a; puonin a tuom a, khuolbûkah an inleng ve naw leiin ran bu pêkna thlêngah ân zâltir a.
Berâmpuhai le vântirkohai
8Chun, chu rama ma chun berâm vêngtuhai an um a, zânah an berâmhai an vêng a, phûlah an riekngha a.
9Chun, Lalpa vântirko pakhat an kâwlah a hung ngîr a, Lalpa ropuinân an vêl chu a hung sun var a; chuongchun, an ṭi ta bêk bêk a.
10Chun, vântirko chun an kuomah, “Ṭi naw unla, ngai ro, mi tin ta ding chanchin ṭha lâwmum bêk bêk ka hung intlun cheu a nih.
11Vawisûn hin in ta dingin David khuoah Sandamtu a pieng tah, Lal Krista chu.
12Chun, hi hi in ta dingin inchikna ding a nih; naute puona tuom, ran bu pêkna thlênga zâl hmûng in tih,” a ta.
13Chun, kârlovin vântirko kuoma chun vâna mihai mipui an hung um ta huk el a, Pathien an inpâk a,
14“A chunghnungtakah Pathien ropuitakin um raw se,
hnuoi chunga a ditsak mihriemhai kuomah, inremna thu inlêng raw se.”
an ti a.
15Chun, vântirkohai chun vân tieng an fe san phingleh, berâm vêngtuhai chun, “Tuhin Bethlehem chenin fêng ei ta, Lalpain thu a mi hril hung tlung chu en ei tiu,” an ti a.
16Chuongchun, an fe vat vat a, Mari le Josef leh, ran bu pêkna thlênga nautê zâl le chun an hmu a.
17Chun, an hmu chun nautê chanchin thu vântirkoin a hril kha an hril vêl a.
18Chun, a hre taphawt chun berâm vêngtuhai thu hril chu mak an ti hle a.
19Mari ruok chun thu hril po po chu a lungrilin a ngaituo a, a vawng zing a.
20Chun, berâm vêngtuhai chun vântirko hril ang ngeia iengkim an hmua an hriet leiin, Pathien chawimawi le inpâk pei pumin an kîr nâwk ta a.
Isu sertanna
21 #
Lev 12.3; Lk 1.31 Chun, a sertanna ding ni riet a hung tling chun, a hminga chun sula a um hma daia vântirkoin a sak tasa ISU an sak a.#Lev 12.6-8
Isu Biekinah an inhlân
22Chun, Mosie dân anga an inthien ni a hung tlung chun ama chu Jerusalemah an hung ṭhuoi a,
23 #
Ex 13.2,12 (Lalpa Dân thua, “Nau lutîr pasal taphawt chu Lalpa ta dinga ruot tîng an tih” ti ziek ang khan),
24Lalpa kuoma inhlân ding le vaṭhu tuok khat amanih, pârva tê pahni amanih Lalpa Dân thua ziek anga that dingin.
25Chun, ngai ta, Jerusalema chun mi pakhat a hming Simeon a um a; ama chu mi feltak le Pathien ngaisaktak a na; Israel thlamuongtu ding chu a nghâk zing a, a chungah Thlarau Inthieng a um a.
26Chun, Lalpa Krista chu a hmu hmakhat chu thi naw ni ti Thlarau Inthiengin a lo inhriettir ta hrim a.
27Chun, Thlarau inhriettirin Pathien biekina chun a va lût a; nautê Isu chu a nu le a pain Dân pângngai anga a chunga thawpêk dinga an hung ṭhuoi lût lai chun,
28ama chun a lo pawm a, Pathien ân pâk a;
29“Lalpa, tuhin i thu ang peiin i suok hi thlamuongtakin în fetir ding a na;
30I sandamna chu ka mitin a hmu ta a,
31Mi tin mithmua I siem kha;
32 #
Is 42.6; 49.6; 52.10 Jentailhai kuoma suklangna var le I mi Israelhai ropuina ding chu,”
a ta.
33Chun, nautê thu a hril chu a nu le a pa chun mak an ti hle a.
34Chun, Simeon chun mal a sâwmpêk a, a nu Mari kuomah, “Ngai rawh, hi naupang hi Israel lai mi tamtak tlûkna ding le ngîrsuokna dinga ruot a nih, mi isawisêl ding inchikna ni bawk dingin:
35anih, nanga lungril khawm ngûnhnâmin la sun thleng a tih, mi tamtakin an lungrila an ngaituohai chu ân langna dingin,” a ta.
36Chun, mi pakhat zâwlnei Anna, Phanuel naunu, Aser hnama mi a um a. Ama chu tartak a na, a nunghâk mâka inthawk a pasal leh kum sari a um a.
37Kum sâwmriet pali zet hmeithaiin a um a. Ama chun Pathien biekin fesan lovin asûn azâna bu nghei dâma ṭawngṭaiin Pathien a biek hlak a.
38Chun, chu lai tak chun ama chu a hung a, Pathien kuomah lâwmthu a hril a, Jerusalem intlan beiseihai taphawt kuoma chun Isu chanchin a hril a.
Nazaretha an kîr nâwk
39 #
Mt 2.23
Chun, Lalpa dân ang peia thil po po an thaw zoin, Galili rama anni khuo Nazaretha chun an kîr nâwk ta a.
40Chun, nautê chu a hung inṭhang lien deu deu a, a hung hrât deu deu a, varnain a sip ta a, Pathien lunginsietna a chungah a um bawk a.
Biekina naupang Isu chu
41 #
Ex 12.1-27; Dt 16.1-8 Chun, kum tinin Fekân Ruoiṭhe hunin a nu le pa chu Jerusalemah an fe hlak a.
42Ama chu kum sâwmpahni a niin ruoiṭhe dân pângngaiin an hang fe a.
43An ṭumṭieka an hung chun, naupang Isu chun Jerusalemah a um san ta a; a nu le pa chun an hriet si naw a.
44An intlawnpuihai lai a um ve zing amanih an ta, ni khat lam zet an fe ta a, an laibunghai le an hmêlhriethai lai an zawng a.
45Chun, an hmu naw leiin zawng pei pumin Jerusalemah an kîr nâwk ta a.
46Chun, ni thum chena chun, Pathien biekinah, inchûktirtuhai laia ṭhungin, an thu lo ngai a, lo indawnin an hmu ta a.
47Chun, a thu hre taphawt chun a hrietzie le a dawnzie chu mak an ti hle a.
48Chun, a nu le pa chun ama an hmu chun mak an ti hle a, chuongchun, a nu chun a kuomah, “Ka nau, iengdinga hienga i mi thaw? Ngai ta, i pa le keiin thlaphângtakin kan zawng che a nih,” a ta.
49Ama chun an kuomah, “Iengdinga in mi zawng am a na? Ka pa ina ka um ding in hriet naw am a nih?” a ta.
50Chun, an kuoma a thu hril chu a ngaina an hriet naw a.
51Chun, anni chu a zui thlâk a, Nazareth chu a hung tlung a, an thu zâwmin a um a. Chun, a nu chun chuong thil po po chu a lungrilah a vawng zing a.
52 #
1 Sam 2.26; Tv 3.4 Chun, Isu chu a var deu deu a, a hung lien deu deu a, Pathien le mihriem ditsakin a um deu deu a.
നിലവിൽ തിരഞ്ഞെടുത്തിരിക്കുന്നു:
LUKA 2: HMOVBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
