Matio' 5
5
Nyorsoa-a' tubo-wlu:⧾ :Yusu' po-a 'do tluh ken
1:Yee' :yeh :Yusu' 'ye-a :gwlor-nyor:⧾ :doru' :dao', :yee' or mu 'de tluh ken, 'de or :dhe dih. 'De or-a'a: bo :na-nyor⧾ yi 'o or bo, 2'de or 'dhu an-a' deh :torne-eh glu, or 'dae:,
:Bhorlie' 'jeh :neh
(Lu 6.20-23)
3:Bhorlie' 'do nyor⧾ :on se-a an-a' 'jeh-a' 'kpih :gwlii' dhe, 'de :on dhe-a Nyorsoa :gwlii'.
Deh no-eh, mo-: Nyorsoa :korn wlu 'ken :naa.
4:Bhorlie' 'do nyor⧾ :an 'zlu-a :naa bo.
Deh no-eh, an mu :porluh⧾ 'di dih :dhe-eh:.
5:Bhorlie' 'do nyor⧾ 'yi 'beh :zulu se-a-' :ne.
Deh no-eh, an mu :bhorlie'-a' klehkpeh Nyorsoa 'da-a or mu-a on 'nyi-:, 'ye-:.
6:Bhorlie' 'do nyor⧾ :on :korn-a :porluh⧾-a sin-a 'do 'yi 'sleh-deh⧾-a' no-a' bo 'gabaa.
Deh no-eh, Nyorsoa-a mu an-a' :porluh⧾ dih 'pehn-dih:, 'do eh-a' dhih bo.
7:Bhorlie' 'do :wehlih: :korn-nyor⧾ bo.
Deh no-eh, Nyorsoa-a mu an-a' :wehlih 'ye-:.
8:Bhorlie' 'do nyor⧾ :on :korn-a :porluh⧾ :gweh-a :vlehehn'-' bo.
Deh no-eh, an mu Nyorsoa-a' 'yuba 'ye-:.
9:Bhorlie' 'do nyor⧾ :on no-a nyor⧾ 'yi zela-nyor⧾ bo.
Deh no-eh, an mu Nyorsoa-a' 'nynuu 'da-dih-eh:.
10:Bhorlie' 'do nyor⧾ an 'ye-dih-a 'kle, 'do Nyorsoa-a' 'yi 'sleh-deh⧾-a' dhih bo.
Deh no-eh, mo-: Nyorsoa :korn wlu 'ken :naa.
11:Bhorlie' 'do a bo, :mor nyor⧾ :taa a 'jle-dih, :mor on :taa a 'kle 'ye-dih, 'de :mor on :taa a 'kulu-dhih-a' 'doror: 'dor ken dih 'dhu-dih, 'do 'an dhih bo. 12:Yee' a 'kpa 'mona-', a 'ye :porluh-a' dih 'pehn-eh 'ble. Deh no-eh, geli' :za-dih-deh: 'kawehn:, eh-: a 'ble, 'de Nyorsoa 'bli yai'. 'Ka-: 'o on no Nyorsoa-a' :zai'-wele-eh: :po-nyor⧾-a' 'kle 'ye-dih-eh :ke.
'Torn-: 'dekorn: zorn-pli-:
(Mk 9.50; Lu 14.34-35)
13:Yee' a :mor 'dhu 'bluhba-a' 'torn-'. Jorwor: :mor 'torn :gweh worn, :yee' :eh mu-or 'torn-' :no :neheh' :eh? :Yee' deh-beh:, eh-: or :se-' 'dhu-eh: :neheh'. Deh :due' on 'ye-or'-' :no-dih:, eh-: 'dhu, or-a' 'bluhbor: :po-eh, nyor⧾ 'ye-or' ken dih :na.
14A :mor 'dhu 'bluhba-a' zorn-pli-'. :Yee' :gwlor :klaba' :ne-a 'o tluh 'dlu, or se 'zile-eh :korn. 15'De :mor eh 'dhu, nyor tba 'nape, :yee' or :se-eh' 'de :yabe 'zorn :po i. Jorwor: or dhe-eh :dha eh :korn-a dih, 'de eh 'ye nyor⧾-a' klehkpeh :on :ne-a 'de 'gbu, zorn-pli 'nyi. 16'Ka-: 'o eh :ne, a 'nyi a-a' zorn-pli fan 'do :gwlor-nyor⧾ ybei', 'de on 'ye a-a' noo-deh:⧾ 'jeh 'ye, 'de on 'ye a :Baa' :or :ne-a 'de yai'-a' 'nyne dhih-a' 'i 'beh-a' 'nyi.
Nyor⧾ :Mose'-a' 'tele' :torne-dhih:
17:Yee' a-a' :na-dih-eh' :gwluhuh' dih, :eh :mor 'on yi :Mose'-a' 'tele'-: 'dekorn: Nyorsoa-a' wele-eh: :po-nyor⧾-a' nyor⧾ deh :torne-eh-: ya :gba 'da. 'On :se 'de yi 'on 'ye-ih ya gba. Jorwor: 'on yi-: 'de, 'on 'ye-ih 'dlu 'yi-dih:. 18Dhih 'jeh, 'an zela a :gwluhuh', 'tele' :daa, eh-a' deh-beh-deh-beh :se-' :zi i, 'de 'bluhba-: yao-: en 'ye 'dlu-' :jla, 'de deh⧾-a' klehkpeh 'ye dhih 'jeh-' 'kpa. 19Eh-a' dhih, nyor-beh-nyor-beh: :or wa-a 'tele' :daa, eh-a' deh-beh, 'de :or torne-eh nyor⧾ :noo', on 'ye-a' deh-a' 'jeh :dao' no, :yee' an mu-or 'yu-yu 'da-dih: ti Nyorsoa-a mu-a nyor⧾ wlu 'ken :korn-dih:. Jorwor: nyor-beh: :or mu-a 'o 'tele'-a' klehkpeh :daa dih :dhe, 'de :or mu-eh nyor⧾ :torne:, :yee' an mu-or nyor :klaba' 'da-dih: 'do ti :dao' bo. 20Eh-a' dhih, 'an zela a :gwluhuh', a :korn a 'ye 'yi 'sleh-kplen no, a 'ye 'o :Falasi'i-nyor⧾-: 'dekorn: nyor⧾ 'tele' :torne-nyor⧾-' :zi. :Mor eh 'dhu, a se-eh no, :yee' a 'se 'ba Nyorsoa-a' nyor⧾ wlu 'ken :korn-eh 'zorn pa.
'Chehn 'kpa-eh-a' dhih
21:Yee' :Yusu'-a kpa or-a' wlu 'dlu bo, or 'dae:, A 'worn-eh' :mloror' :zai', :ka on no-a eh-a' :za-a' 'de nyor⧾ bo :dee' see, :eh 'dhu-a, Nyor-a' 'dba-:-' nyor, 'de nyor-beh: :or 'dba-a nyor, :yee' or-a' zabe :korn en 'ye :zi-eh:. 22Jorwor: 'an zela a :gwluhuh', nyor-beh-nyor-beh: :or 'kpa-dih:-a or-a' 'de-di' 'chehn-', :yee' or-a' zabe-a mu :zi-eh:. :Yee' :neheh', nyor-beh: :or :gbo-a 'de or-a' 'de-di' 'yli, :or no-a, :An-a' 'yi dih :nmor-deh no 'plo, :yee' nyor :dao', an mu-or 'o :Jueh'-nyor⧾-a' zabe: :zi-nyor:⧾ :klaba'⧾ ybei' :kpa. 'De nyor-beh: :or 'da-dih-a or-a' 'de-di' :bobo-nyor, :yee' or na 'de 'ku 'bli-neh-a' :mu-eh 'worn dih. 23'Do eh-a' dha, :mor eh 'dhu :on :taa :an-a'a: 'slaa: :za-dih-deh kpa, 'do Nyorsoa-a' 'slaa ken :za-dih-deh ken, 'de :an-a' 'de-di' 'ye :on 'di dih 'ble-dih:, 'de :on 'ye-eh' :gwluhuh' bo :po-dih:, 24:yee' sie-eh 'o 'slaa ken :za-dih-deh ybei', 'de :on 'ye 'de or bo mu, a 'ye wlu-' dih 'worn-eh: :zai', 'de :on 'ye de yi, :on 'ye :an-a'a: 'nyii'-deh :to.
25:Yee' mor-: 'dekorn: :an-a'a: dhih 'ble-nyor-: a 'woorn-dih: wlu-' dih :dueh'leh: 'do :gwie 'i, :mor or :taa 'de :on 'koti-' kpa, 'de or :ne-' :on 'kwla :za, 'de zabe: :zi-nyor bo, 'de zabe: :zi-nyor :ne-' :on :poli'si-yu 'kwla :za-dih:, 'de or :ne-' :on :kasue 'di po. 26Dhih 'jeh, 'an zela a :gwluhuh', :on 'se 'ba 'de :kasue 'di :dao' 'wluh :chio'lo:, :on 'ye :de 'bor-dih-kaba-yor-eh kpa, 'de :on 'ye 'de eh 'di 'wluh.
:Yusu' zela: 'nyne :zaan'-deh ken dih
27:Yee' a 'worn-eh' :mloror' :ka on no-a eh-a' :za-a', Nyor-a' :no-' 'nyne :zaan'. 28Jorwor: 'an zela a :gwluhuh', :ka nyor-beh: :or pobo:-a 'nynor ken dih :kao', 'de 'bhorn-a' ka 'di, :yee' or 'bhorn-or' klehkpeh 'do or-a' :porluh ken :weh. 29:Yee' :mor eh 'dhu, :an-a' :dila-yli-eh no-eh, 'de :on 'ye deh-zon no, :yee' za-eh 'de, :on 'ye-eh' 'kwla po. Eh :nmor-: 'yi :on 'ye deh :due' 'ma-dih: 'do :on 'bhun, :eh :zi 'o :an-a' yau-a' klehkpeh 'ye 'i gba, 'de :on 'ye 'de 'ku 'bli :po-eh:. 30:Yee' :mor eh 'dhu, :an-a' :dila-son no-eh, 'de :on 'ye deh-zon no, :yee' chehn-uh 'o, :on 'ye-uh' 'kwla po. Eh :nmor-: 'yi :on 'ye deh :due' 'ma-dih: 'do :on 'bhun, :eh :zi 'o :an-a' yau-a' klehkpeh 'ye 'i gba, 'de on 'ye 'de 'ku 'bli mu.
'Nynor-a' 'kwla :za-eh-a' dhih
(Mt 19.9; Mk 10.11-12; Lu 16.18)
31:Yee' eh :za-eh:-' 'weh see, :ka :mor nyor-beh :taa or-a'a: 'nynor 'kwla za, :yee' or :korn or 'ye-or' 'kwla :za-chlee-deh 'nyi. 32Jorwor: 'an zela a :gwluhuh', nyor-beh-nyor-beh: :or mu-a or-a'a: 'nynor 'kwla :za, :mor eh 'dhu, 'nynor se 'nyne :zaan' no 'do or bo, :yee' or no-eh', 'de 'nynor no 'nyne :zaan', :mor or 'ti nyor :noror' 'bli. :Yee' nyor-beh: :or mu-a 'nynor :or :za-eh 'kwla :korn, :yee' or no 'nyne :zaan' :ke.
:Yusu' zela: wlu :dhama'-' :po-eh-a' dhih ken dih
33:Yee' :neheh' a 'worn-eh' :mloror' :zai' :ka on no-a eh-a' :za-a' 'de nyor⧾ bo :dee' see, :eh 'dhu-a, Deh :korn-wlu a po-a :dhama'-', 'do :Gwlor :baa' ybei', a :korn a 'ye-eh' no :gbor :gbor. 34Jorwor: 'an zela a :gwluhuh', :mor a po wlu :dhama'-', :yee' a 'bor deh⧾ ken :zlehn-dih-eh klehkpeh klehkpeh, :eh beh 'de Nyorsoa 'bli yai'-: deh no-eh, 'de no Nyorsoa-a' 'keen :kpala', 35:eh beh 'noror yao 'zorn-: deh no-eh, 'noror no Nyorsoa-a' buh⧾ ken dih :tba-deh:, :eh beh 'de :Julu'slehn-: deh no-eh, :Julu'slehn no :gwlor :klaba' 'do 'keen :klaba' bo. 36'De mor :an-a' :zlehn-dih:-' :an-a' 'dlu ken :ke, deh no-eh, :on se 'mii-eh :due' :sloror'-a' 'jeh :kpe-dih-eh 'beh-dih:, 'de mor :on se eh-a' 'plu-dih-eh 'beh-dih: :ke. 37'Do eh-a' dha, a 'nyi a-a' keen' no keen'. :Yee' a 'nyi a-a' 'kei no 'kei. :Mor a :za-dih: 'o deh :neheh', :yee' eh 'wluh 'de 'ku bo.
Nyor⧾ kpa-a' dih :za-dih-eh:
(Lu 6.29-30)
38:Yee' a 'worn-eh' :mloror' :ka eh :za-eh:-', :eh no-a, 'Yli-eh :korn 'de 'yli-eh bo, 'de 'nyne-eh :korn 'de 'nyne-eh bo. 39Jorwor: 'an zela a :gwluhuh', a-a' :za-' kpa 'do nyor⧾ :an no-a deh⧾-zon⧾ 'do a bo. Jorwor: :mor nyor tba :an-a' :dila-gea 'kpa, :yee' :to 'o 'for-a' 'sororn' nor :ke. 40:Yee' :mor eh 'dhu, nyor-beh 'bhorn or 'ye :on 'koti-' po, 'de or 'ye :an-a'a: 'wla kpa, :yee' 'nyi :an-a'a: 'korlor, or-uh :ke. 41:Mor eh 'dhu, nyor :kpa-dih: :on 'kpih, :on 'ye-or' :gwie 'i kpa, :on 'ye-or' :gwie-' 'kplo :due' :na-dih:, :yee' :na-dih-or :gwie-' 'kplo⧾ 'sororn'. 42:Mor nyor :zlor deh 'de :on bo, :yee' 'nyi-eh or. :Yee' :mor nyor 'yba-dih: :on deh, or 'ye-eh' de :ya, :yee' :an-a' :no-' 'kei.
A :ybeh nyor⧾ :on 'nyeh-a a-uh'
(Lu 6.27-28, 32-36)
43:Yee' a 'worn-eh' :ka eh :za-eh:-', :eh no-a, :Ybeh nyor⧾ :on :ne 'ti-a :dha :due', :yee' 'nyeh :yuh :on 'nyeh-a :on-'. 44Jorwor: 'an zela a :gwluhuh', a :ybeh nyor⧾ :on 'nyeh-a a-uh'. :Yee' a :wlu 'de Nyorsoa bo, 'do :yuh :an 'ye-dih-a a 'kle, 'do an-a' dhih bo, 45'de a 'ye a :Baa' :or :ne-a 'de yai', or-a'a: 'nynuu-' 'dhu-eh:. Deh no-eh, or no-eh' 'de or-a'a: 'yluh-a fan-dih deh⧾-zon:⧾ :no-nyor⧾-: 'dekorn: nyor⧾ 'jeh-: ken dih. 'De or dbo 'ni, eh dba-dih 'yi 'sleh-nyor⧾-: 'dekorn: se 'yi 'sleh-nyor⧾-a' klehkpeh-:. 46:Mor eh 'dhu, a :ybeh nyor⧾ :on :ybeh-a a-uh', :yee' geli' :za-dih-deh-a' :yeheh a mu 'ye 'de Nyorsoa bo :eh? Eh se :ka 'taa-deh:⧾ :za-nyor:⧾ :sloror'-a' 'jeh-a no-a :ke :e? 47:Yee' :mor eh 'dhu, a :gble-dih: a-a' 'de-di'-boi' :ne :due', :yee' deh a no :naa :eh 'ye 'o nyor⧾ :noo' :zi :eh? Eh :se :ka se Nyorsoa yubo-nyor:⧾ :sloror'-a' 'jeh-a no-a :ke :e? 48'Do eh-a' dha, a :mor :mloror', a :korn a 'ye 'yi 'sleh-nyor⧾ no, :ka a :Baa' :or :ne-a 'de yai', or :ne-a :ke.
നിലവിൽ തിരഞ്ഞെടുത്തിരിക്കുന്നു:
Matio' 5: TCHKR
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament in Tchien Krahn published as KUO :DELE' © The Bible Society in Liberia, 1995.
