Matio' 4
4
'Ku 'dhen :Yusu'-: dih
(Mk 1.12-13; Lu 4.1-13)
1:Yee' Nyorsoa-a' :Zulu kpa :Yusu' 'de :bhehneh'-bluhba ken, 'de 'ku 'ye-or' dih 'dhen, or 'ye deh-zon no. 2'De :Yusu' pa 'suehn-', 'do zorn-we-a' :kwlaa :nyieh-: :korn glu-we-a' :kwlaa :nyieh-: 'di. :Yee' 'moeh: no-or :blaa'a:. 3:Yee' 'ku :on no-a nyor⧾-' dih 'dhen-nyor, mo-: yi 'de or bo, on 'dae:, :Mor :on 'dhu Nyorsoa-a' 'Yu-', :yee' :wlu 'de sobu'⧾ :daa bo, en 'ye 'bhlee: :kpuan'⧾-' :za-dih:.
4'De :Yusu' 'da, Eh 'chle-eh:-' 'de Nyorsoa-a' 'chlee-deh 'di, eh 'da, :Gwlor-nyor se dii-deh :due'-a' 'kmo-' :ne-dih-eh 'beh-dih:, jorwor: wlu-a' klehkpeh :on 'wluh-a 'de Nyorsoa 'worn, mo-: or 'beh-dih: 'kmo :ne-dih-eh.
5:Yee' 'ku kpa-or 'de :Julu'slehn: :or no-a gban 'i :ne gwlor 'di. 'De on :nyna-dih-or dih 'de Nyorsoa-a' 'sla-a' 'kpehehn 'i. 6'De on 'da, :Mor :on 'dhu Nyorsoa-a' 'Yu-', :yee' po :an-a' 'jeh 'zorn. Deh no-eh, eh 'chle-eh:-' 'de Nyorsoa-a' 'chlee-deh 'di, eh 'da,
Or mu or-a'a: 'enjor-nyor⧾ 'tele' 'nyi-: 'do :an-a' dhih bo,
'de on 'ye :on 'sa 'de on 'kwa,
'de :an-a' buh :ne-' sobu' 'i kor.
7'De :Yusu' 'da, Eh 'chle-eh:-' :neheh', eh 'da, Nyor-a' 'dhen :an-a' :Gwlor :baa' Nyorsoa-' dih.
8'De 'ku 'duo-or :neheh', on kpa-or 'de tluh :dhorno' ken. 'De on :torne-or 'bluhba⧾-dlu⧾-a' klehkpeh :en :ne-a dha yao 'zorn-: 'dekorn: en-' 'yi dih :nmor-eh-a' klehkpeh-:. 9'De on 'da, Deh⧾-a' klehkpeh :daa, me-: 'an mu :on 'nyi-:, :mor eh 'dhu, :on bla 'koor-dlu⧾ 'yi glu, 'do 'on 'zorn, 'de :on 'ye 'on :weheh' :za.
10'De :Yusu' :wlu 'de on bo, or 'dae:, 'Wluh :daa 'on ybei', 'ku. Deh no-eh, eh 'chle-eh:-' 'de Nyorsoa-a' 'chlee-deh 'di, eh 'da, :An-a' :Gwlor :baa' Nyorsoa, or-: :on 'ye :weheh' :za, :yee' or :due', or-: :korn 'bhoi-yu-deh: :on 'ye no.
11:Yee' 'ku 'tali-or-: dih, on 'wluh 'o or ybei', 'de 'enjor-nyor⧾ 'yle, on :za-dih-or'.
:Yusu' 'dhu or-a'a: :koan-: glu 'de :Galali'i-bluhba ken
(Mk 1.14-15; Lu 4.14-15)
12:Yee' :Yusu' 'worn-ih' :ka on po-a :Jororn' :kasue 'di. 'De or 'wluh :Judi'a-bluhba ken, or mu 'de :Galali'i-bluhba ken. 13'Do :wor or :jla-dih: 'Nazla-gwlor-', 'de or mu :Kapa'nior-gwlor: 'ti 'da, :or :ne-a 'de :Galali'i-yobo'-pehnu worn 'i, 'de 'Zehbilor-: 'dekorn: 'Natali-: 'de an-a'a: 'bluhba-a' 'for bo. 14Deh :daa, eh :no-eh:-' 'de Nyorsoa-a' wlu 'ye dhih 'jeh-' 'kpa, :ka or-a' wele-eh: :po-nyor: :Azaya' no-a eh-a' :za-a' see, or no-a,
15'Zehbilor-bluhba-: 'Natali-bluhba-:
'bluhba-dlu: :or :ne-a 'noror :gwie 'i 'de yobo' worn 'i-: 'bluhba-dlu: :or :ne-a 'de 'Jorle-ni-a' 'yluh-a' 'kwla 'wluh-dih: 'da-:
'dekorn: :Galali'i-bluhba-a' :yor, nyor⧾ :on :se-a :Jueh'-nyor:⧾, on 'ti-a ken-:
16nyor⧾ :daa :on 'ti-a 'de :kule-' :dee',
mo-: 'ye zorn-pli: :klaba'.
:Yuh :on :dhe-a dih 'de 'meh-a' :kule-',
mo-: zorn-pli-a fan-dih ken dih.
17:Eh 'wluh-a 'o ti :dao' 'di, :yee' :Yusu'-a po Nyorsoa-a' tubo-wlu⧾ 'weh, or 'dae:, A 'tali: a-a' deh⧾-zon⧾ dih, 'de a 'ye 'de Nyorsoa bo 'bili:. Deh no-eh, Nyorsoa-a' nyor⧾ wlu 'ken :korn-eh 'koan'-: bo.
:Yusu' 'da zimi 'dba-nyor⧾ :nyieh on 'ye 'o or klei' zi
(Mk 1.16-20; Lu 5.1-11)
18:Yee' :Yusu'-a na-dih :Galali'i-yobo'-pehnu worn dih. 'Do :wor or 'ye-dih: 'de-di'-boi' 'sororn', Samor' an 'da-dih-a :Piteh'-: 'dekorn: or-a' dei' Andlu'-: mo-: :an po sor 'do 'ni worn 'i. Deh no-eh, on no zimi: 'dba-nyor:⧾. 19:Yeh or :yeh-dih-uh-a ken, :yee' or :wlu-' 'de on bo, or 'dae:, A 'yle. A zi 'o 'on klei'. 'An mu-eh :no, a 'ye nyor⧾ 'de Nyorsoa bo :ya-nyor⧾ no, :eh :zi 'o zimi: :kpon-eh-'. 20:Yee' 'do :dha :due' 'jeh :dao', on 'pehn-dih: an-a'a: sor⧾-: dih, 'de on zi 'o or klei'.
21:Yeh on 'ken-dih:-a 'o dih :neheh', :yee' or 'ye 'de-di'-boi' 'sororn' :noo', 'Jeen-: 'dekorn: or-a' dei' :Jororn'-: :on no-a :Zehbehli'-a'a: 'nynuu, :yee' on :ne on :baa' :Zehbehli', an 'pa an-a'a: sor⧾ 'de 'blagbe 'di. :Yeh :Yusu' 'ye-uh'-a, :yee' or 'da-uh' on 'ye 'o or klei' zi. 22:Yee' 'do :dha :due' 'jeh :dao', on sie 'blagbe-: 'dekorn: on :baa'-: 'weh, 'de on zi 'o or klei'.
:Yusu' 'puh-dih: puhba-nyor:⧾
(Lu 6.17-19)
23:Yee' :Yusu'-a na :Galali'i-bluhba-a' klehkpeh ken dih, 'de or torne nyor⧾ deh⧾, 'de an-a' 'di :gweh-dih-sla⧾ 'zorn dih, 'de or po tubo-wlu:⧾ 'jeh, :en kor-a Nyorsoa-a' nyor⧾ wlu 'ken :korn-eh 'i, or 'puh-dih nyor⧾-a' klehkpeh :on 'ble-a puhba-deh:⧾ 'doror: 'dor-: 'dekorn: :nea-nyor:⧾ :on :ne-a nyor⧾ 'nyne bo dih-:. 24Eh-: no-eh, 'de or-a' 'nyne gweh 'de 'Silia-bluhba ken-a' klehkpeh 'dlu, 'de an ya 'de or bo nyor⧾-a' klehkpeh :on 'ble-a puhba-deh:⧾ 'doror: 'dor, nyor⧾ :yuh puhba-deh⧾-a :nee' :nee'-a 'ye-dih-a 'kle-: nyor⧾ :yuh 'kwla 'ye-dih-deh⧾-a 'beh-dih-a 'worn dih-: 'dlu-deh-nyor⧾-: 'dekorn: 'tiei-a' 'meheh'-nyor⧾-: 'de or 'puh-dih-uh. 25:Gwlor-nyor:⧾ :doru', mo-: 'wluh :Galali'i-bluhba ken-: 'bluhba-a' 'for :or :ne-a Gwlor⧾ :bhue: an 'da-dih-a :Deka'poli 'de dih-: :Julu'slehn-: :Judi'a-bluhba ken-: 'dekorn: 'bluhba-a' 'for :or :ne-a 'de 'Jorle-ni-a' 'yluh-a' 'kwla 'wluh-dih: 'da worn dih-: an-a' klehkpeh :daa, mo-: :an zi 'o or klei'.
നിലവിൽ തിരഞ്ഞെടുത്തിരിക്കുന്നു:
Matio' 4: TCHKR
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament in Tchien Krahn published as KUO :DELE' © The Bible Society in Liberia, 1995.
