Luku 22

Aachị idzu ẹhu Jisọsu l'edomi

(Mát. 26:1-5; Mak. 14:1-2; Jọn. 11:45-53)

1O bedelewho nteke oge ono, l'aatajẹ buredi l'ekoo eko dụwaa ntse, bụ iya bụ oge ono l'eerije l'eekuje O-je-ghata, 2ndu ishi ndu l'agbajẹ ẹja nụ Chileke mẹe ndu o-zhi-iwu nọdu achọkashi ụzo whẹ l'e-shi gbua Jisọsu, ọle whẹ l'atsụ ọha egvu.

Júdasu l'ekweta lẹ ya l'agbarụ Jisọsu ye

(Mát. 26:14-16; Mak. 14:10-11)

3Sétanu bya abahụ l'ime obu Júdasu onye l'eekujekwawho Isukáriyọtu, bụkwa-a onye lanụ l'ime ụmadzu iri l'ẹbo ono. 4Ọ bya atụgbua jekfu ndu ishi ndu l'agbajẹ ẹja nụ Chileke mẹe ndu ishi ndu ọgbogu eze-ụlo Chileke je akarụ whẹ gẹ ya l'e-shi seru Jisọsu ye whẹ l'ẹka. 5Ẹhu tsọlahaa whẹ. Whẹ kweta iya okpoga. 6O kweta iwhe whẹ kfuru. Ọ wata ole ẹnya nteke ya l'e-seru Jisọsu ye ndu ono l'ẹka t'ọha ba ama.

Nri-ẹnyashi Ikpazụ

(Mát. 26:17-30; Mak. 14:12-26; Jọn. 13:21-30; 1 Kọ́r. 11:23-25)

7Ọo ya bụ, o rwulewho mbọku ono l'eerije buredi l'ekoo eko, bụ iya bụ mbọku l'eegbuje nwatụru ono, e gude anyata O-je-ghata mbụ. 8Jisọsu zhi Pyita yẹle Jọnu sụ whẹ: “Unu je emeeru anyi nri-ẹnyashi nke oge O-je-ghata t'anyi bya eria.”

9Whẹ sụ iya: “?Ọo awee b'ọ dụ ghu t'anyi je anọdu mee ya?”

10Ọ sụ whẹ: “Unu leenu, nteke unu bahụleruwho l'ime Jerúsalẹmu bẹ nwoke vu ite oku mini l'a-byakfutaa unu, unu tsoru iya bahụ l'uwhu, ọ bahụleruwho. 11Unu sụ onye nwe uwhu ono l'ozhi-iwhe sụru t'o goshi unu ime ụlo, mu l'a-nọdu ria nri oge O-je-ghata mu lẹ ndu l'etso ụzo mu. 12Oo-goshi unu ụlo-eli, goshi unu ọma-ụlo, dụ lẹ nke imeli iya, ime mkpu ono ha ọsa mebyi shii, e dozhigewa iya ree gẹ l'ọo-dụ. Unu kwakọberu iya anyi l'ẹka ono.”

13Whẹ tụgbua rwua, ọ bụleruwho lẹge o kfuru whẹ iya bụ lẹge ọ dụ. Whẹ nọdu l'ẹka ono melahaa nri oge O-je-ghata ono.

14Ọ gbabelewho nteke l'eerije oge ono, Jisọsu bya anọdu nke oori nri ono yẹle ndụ-ishi-ozhi iya whẹ iri l'ẹbo. 15Ọ sụ whẹ: “Ọ kwatarụ ewheshi mu uwhere ike tẹ mu l'unu riada nri oge O-je-ghata-a, tẹhenu mu ejede iwhe-ọtsulanu. 16O noo lẹ-a; tẹ mu kfuleruwho unu: Mu te erihekwa iya ọdo jeye nteke mu l'e-ri ọkpobe iya nteke ono, Chileke l'e-goshi l'ọo ya bụ eze.”

17Ọ bya apalia omogo kelegelewho Chileke ekele, ọ sụ whẹ: “Unu narụ ngụ-dzuru lẹge unu ha! 18O noo lẹ mu l'ekfuru unu lẹ shita ntaa bẹ mu l'ẹte angụbahedua mmẹe shi l'akpụru vayịnu jeye nteke Chileke l'e-goshi l'ọo ya bụ eze.”

19Ọ bya ewotakwawho buredi bya ekelekwawho Chileke ekele bya eworu iya wakashịaru whẹ sụ whẹ: “Ọ waa bụ ogwẹhu mu, mu nụru l'iswi ẹhu unu. Unu meje iya gudeje nyatajẹ mu.” 20Whẹ rigelewho nri ono; ọ bya anụ whẹ omogo ono sụ whẹ: “Omogo ọwa bẹ l'egoshi ọgbandzu ọwhuu, shi Chileke l'ẹka. O gude mmee nkemu, a gbashịru l'okfu ẹhu unu mee iwhe ono, o kweru ụkwa iya o relahaa ire.

21“Ọle t'unu lekwawho l'onye ọbu bụ iya l'e-seru mu ye bẹ mu l'iya tụkokwaru eriko nri. 22O noo lẹ Abụbu-Ndiwhe l'a-la lẹge ọ gbarụ iya l'alala, ọle nshọkwanuro onye ono l'ee-shi l'ẹka iya gbarụ Abụbu-Ndiwhe ye l'ẹka ndu l'achọ ishi iya.”

23Whẹ wata jịde ibe whẹ onye ọwhu ọbu lẹge whẹ ha sụ: “?O zhia onye l'e-mezhia iwhe dụ nno?”

Ntụtu-ẹgo onye ọwhu ka nụ

24Ndu l'etso ụzo iya wata dzọde onye ọwhu bụ iya kakọta shii lẹge whẹ ha. 25Jisọsu sụ whẹ: “Ndu bụ ndu eze lẹ mgboko-o l'anọje akpapyashị ndu whẹ l'achị ishi. Ndu ishi, l'achị l'ikike ọkpehu b'e gbee ekuje o-me-l'uko. 26Ọle ọ tọ dụdu nno l'ẹka ọwhu unubẹdua nọ. L'ẹka ọwhu unubẹdua nọ bẹ gbechia bụru: onye ọwhu bụ ishi lẹge unu ha dụ g'ọo ya kakọta ọlwali. T'onye ishi dobe onwiya g'ọo nwozhi. 27?Ọo onye ole bẹ ka shii ?ọo onye ọwhu nọdu anọdu eri nri ka shii, tọo onye ọwhu l'akwashịru iya nri ono? ?Tọ dụ onye ọwhu nọdu anọdu eri nri ka? Ọle mbẹdua nọdu g'ọo nwozhi unu l'echilabọ unu.

28“Mu l'unu nọkotaru l'iwhe adata mu g'ọ ha. 29Ọo ya bụ l'ọolewho gẹ nna mu meru mu eze bụ gẹ mu l'e-me iya unu, 30nke ọwhu unu l'eri, ngụkwaawho l'ẹka mbẹdua l'eri, l'ẹka ono mu bụ eze, mbụ unu anọdu-gee l'oshi-eze kpee ọzo-ụlo iri l'ẹbo nke ndu Ízurẹlu ikpe.”

Jisọsu l'ekfu nke ẹgo Pyita l'agọ

(Mát. 26:31-35; Mak. 14:27-31; Jọn. 13:36-38)

31A nọnyaa, Jisọsu gbaku Pyita oku sụ iya: “Sáyịmonu, Sáyịmonu, lekwa lẹ Sétanu sụakwaru t'a haa ya t'iya datakọta unu g'unu ha, t'a whụchaa unu gẹ l'aawhụje ẹswa lẹ witi. 32Ọle mu kfuwaru nụ Chileke t'i be ebuha ekwekwe, i kweru. Ọo ya bụ nteke i dawhuleruwho azụ lwakfuta mu, gụ emee t'ụnwunna ghu kfụru kfụshia ike.”

33Pyita sụ iya: “Onye-Nwe-Ọha mẹ mu dozhiakwaru onwomu nke etso ghu eje mkpọro mẹe etso ghu ala maa.”

34Jisọsu sụ iya: “Tẹ mu kfuru ghu iwhe Pyita; okọku-chi-asahụ -bya l'aryadeshia ọrya b'i kfuwaru ugbo ẹto l'ị tị madụ onye mu bụ.”

Okpoga, ẹkpa mẹe ogu-ịgba

35Ọo ya bụ Jisọsu sụ whẹ: “Nteke ono mu zhifujeru unu t'unu je, t'ọ bọ dụkwa iwhe unu l'e-gude eje ono, t'unu be egudekwa nwẹkpa peni, unu te egude ẹkpa, unu te egude akpọkpa ?ọ dụ-zhia iwhe ụko iya kọru unu?”

Whẹ sụ iya l'ọ tọ dụkwa.

36Ọ sụ whẹ: “Ọle ntaa bụ t'onye nweru nwẹkpa peni, t'onye ọbu wota iya, t'onye nweru ẹkpa mmaanụ, t'onye ọbu wota iya nyarụ. T'onye l'enwee ogu-ịgba, ree uwe iya zụta iya. 37O noo l'iwhe mu l'ekfuru unu bụ l'iwhe ono, e deru l'ẹkwo Okfu Chileke deturu mu bẹ vụjekwa lẹge e deru iya. Mbụ iwhe ono e deru sụ: ‘A gụru iya yeru ndu ẹjo iwhe.’ O noo l'iwhe lile, e deru l'okfu ẹhu mu bẹ l'a-vụkotakwa.”

38Whẹ sụ iya: “Onye-Nwe-Ọha, lekwa ogu-ịgba labọ, anyi gude.”

Ọ sụ whẹ: “Ọ dụwaa ree.”

Jisọsu l'ekfu anụ Chileke l'ugvu Ólivu

(Mát. 26:36-46; Mak. 14:32-42)

39Jisọsu lụfuta bya atụgburu jeshia l'ugvu Ólivu bụ iwhe l'oomejehawaa. Ndu l'etso ụzo iya tsoru iya. 40O rwua ẹka ono ọ sụ whẹ: “Unu kfukwaru nụ Chileke t'o bo kwe t'unu daba l'iwhe adata.”

41Ọ haa whẹ tụgbua kpụliberu ẹka ọbu halẹwho g'ọo nhẹka ẹwhuru, o byishi ikpere kfuru nụ Chileke sụ: 42“Nna, ọ -bụru l'ọ dụ ghu mma l'obu, nafụnu mu omogo iwhe-ọtsulanu-a, ọle t'ọ bọ bụkwa iwhe dụ mbẹdua l'uche l'e-me, t'ọ bụ-chikwaaru iwhe ọwhu dụ gụbedua l'uche l'e-me.” 43Ojozhi-imigwe shi l'imigwe bya ese iya l'iwhu, bya emede t'obu shihu iya ike. 44Obu walahaa ya mini, awashị iyẹ ya ike. Ọ kabaa anọ ekfu anụ Chileke. Ẹwhuru shi iya l'ẹhu dụ-gelewho g'ọo mmee akwa patapata l'alị.

45O kfugelewho nụ Chileke, ọ bya agbashi l'ẹka ono bya ejekfu ndu l'etso ụzo iya. O rwudeshia whẹ l'ekuwaa mgbẹnya awhụ. 46Ọ sụ whẹ: “Ọo gụnu kpatarụ unu l'eku mgbẹnya? Unu gbalihu kfuru nụ Chileke t'o bo kwe t'unu daba l'iwhe adata.”

Eegude Jisọsu

(Mát. 26:47-56; Mak. 14:43-50; Jọn. 18:3-11)

47Jisọsu kpụkwaduru-a okfu ono l'ọnu ekfu, igweligwe ndu madzụ wụru bya ẹka ono. Onye du whẹ nụ bụ nwoke ono, ẹwha iya bụ Júdasu, bụkwa-a onye lanụ l'ime ụmadzu iri l'ẹbo ono l'etso ụzo Jisọsu. Ọ bya ejekube Jisọsu ntse bya etsutsua ya ọnu gude kele iya ekele. 48Jisọsu sụ iya: “Júdasu ?ọo otsutsu ọnu ekele bẹ l'ii-gude seru Abụbu-Ndiwhe ye t'e gbua?”

49Ọ bya ebe nteke ndu nọkube iya nụ whụru iwhe l'abya ememe whẹ sụ: “Onye-Nwe-Ọha, t'anyi gbuwaro mma-a?” 50Onye lanụ gbu nwohuta onye ishi ndu l'agbajẹ ẹja nụ Chileke mma. Ọ bụru l'ụzo-nchị b'o gburu iya mma ono. Ọ tụkole iya whọ nchị ẹka-ụtara pafụ.

51Ọle Jisọsu sụru: “Be emehekwa ọdo!” Ọ bya ebyia nwohuta ono ẹka lẹ nchị ono, nchị ono dụ iya g'o shihawaa dụ iya.

52Jisọsu sụ ndu ishi ndu l'agbajẹ ẹja nụ Chileke mẹe ndu ishi ndu ọgbogu eze-ụlo Chileke mẹe ndu bụ ọgurenya byarụ iya egude: “?Mu bụ onye l'ana nfụ ọwhu unu chịgbaa ogu-ịgba, chịru mkpụru abya? 53Mu l'unu l'anọje mbọku-mbọku l'eze-ụlo Chileke, unu ta awọje mu ẹka. Ọle ntaa b'ọ gbarụ unu l'ememe iya, ntaa bẹ ike Oshifutuswe, bụ ike ẹkpuroochi l'achịwaa.”

Ẹgo Pyita

(Mát. 26:57-58,69-75; Mak. 14:53-54,66-72; Jọn. 18:12-18,25-27)

54Whẹ kpachịa Jisọsu kpụta jeshia ibe eze onye ishi ndu l'agbajẹ ẹja nụ Chileke. Pyita nọduro otẹnya etso whẹ azụ azụ. 55Whẹ mekwatalewho ọku l'echi ogboduwhu ono bya anọ-whe iya mgburumgburu, Pyita je anọkube whẹ. 56A nọnyaa, nwata nwamgbọko, l'eezhije ozhi l'ụlo; whụa Pyita l'ẹka ọ nọ l'iwhoro ọku ono, ọ dazhịbe iya ẹnya sụ: “Nwoke-e bẹ yẹle Jisọsu shikwawho alịje.”

57Pyita gọfu sụ iya: “Nwanyị-a, mu ta amakwa iya ilile.” 58A nọpobe nwanshị, onye ọdo whụkwaa ya whọ sụ iya: “Gụbedua lịkwawho lẹ ndu ono l'etso iya.” Pyita sụ iya: “Nwoke ibe mu, mu ta alịkwa iya-o!”

59A nọnya-zhiakwaro, onye ọdo kfushilahaa ike sụ: “Ọ kwa ọkpobe-okfu lẹ nwoke-e bẹ yẹle Jisọsu shi atụ ọli eshi-ọwhu ọ bụ onye Gálili.”

60Pyita sụ iya: “Nwoke ibe mu, mu ta amakwa iwhe l'iikfu-o!”

Ọ kpụkwaduru-a okfu ono l'ọnu ekfu, okọku ha ẹnu. 61Onye-Nwe-Ọha bya agha ẹnya lee Pyita. Pyita nyata okfu, Onye-Nwe-Ọha kfuru lẹge o gude sụ iya, lẹ tẹhenu okọku aryaa ọrya ntanụ-a bẹ l'ii-kfuakwanu ugbo ẹto l'ị tị madụ onye ya bụ. 62Ọ tụgbua lụfu etezhi, je anọdu ryatagezhia ẹkwa ẹgube-ẹ aryabaa ya whọ.

Eechi Jisọsu iwhe; aja iya ewenu

(Mát. 26:67-68; Mak. 14:65)

63Ọo ya bụ, ndu ono swiru Jisọsu jalahaa ya ewenu, echi iya iwhe. 64Whẹ kechikwa ya whọ ẹnya, asụje iya: “Kọodaru anyi onye bụ iya chiru ghu ẹka ono!” 65Whẹ l'ekfushiwaro iwhe ọdo ha l'igweligwe gude akọ iya ọnu.

Jisọsu nọ l'iwhu ọgbo-ikpe ndu Ju

(Mát. 26:59-66; Mak. 14:55-64; Jọn. 18:19-24)

66O rwua l'ụtsu iya ndu bụ ọgurenya ndu Ju mẹe ndu ishi ndu l'agbajẹ ẹja nụ Chileke mẹe ndu o-zhi-iwu, bya anọkobe kpụta iya jeshia l'iwhu ndu ọgbo-ikpe whẹ. 67Whẹ sụ iya: “Ọ -bụnuru l'ọo ghu bụ Onye-Ndzọta ọbu Chileke kweru ụkwa iya ọbu, kfuleru iya who anyi.”

Ọ sụ whẹ: “Ọ -bụru lẹ mu kfuru iya unu bẹ unu l'ete ekwekwa. 68Nteke bụ l'ọo ajị bẹ mu jịru unu, unu te ekwekwa eyeru mu iya ọnu. 69Ọle shita ntaa bẹ Abụbu-Ndiwhe l'a-nọdu l'ẹka-ụtara Ọkalibe ono, kakọta ike bu Chileke.”

70Whẹ tụko sụ: “?Bụ iya bụ l'ọo ghu bụ Nwa Chileke ọbu?”

Ọ sụ whẹ: “Ọ kwa unu sụru l'ọo mu bụ iya.”

71Whẹ sụ: “?Ọ hụnu ẹgube ẹka-ebe, dụ ọ dụ aghaa ọdo bẹ anyi l'ele ẹnya iya? Anyi nụwaru iya l'ọnu iya l'onwanyi.”

നിലവിൽ തിരഞ്ഞെടുത്തിരിക്കുന്നു:

Luku 22: Ezaa

ഹൈലൈറ്റ് ചെയ്യുക

പങ്ക് വെക്കു

പകർത്തുക