Luku 23

Jisọsu nọ l'iwhu Páyileti

(Mát. 27:1-2,11-14; Mak. 15:1-5; Jọn. 18:28-38)

1Ọo ya bụ igwe-ọha ono, dọru l'ẹka ono zalihu kpulia Jisọsu kpukfushia Páyileti. 2Whẹ rwulewho ẹka ono, whẹ wata okfushi iwhe ọbu whẹ sụru l'o meru sụ: “Anyi whụkwaru nwoke-e ya, gẹ l'ooduwhushi ndibe anyi. Ọ jịkakwaru t'anyi ba atụjeshi akịriko nụ Siza, l'ookfukwawho l'ọo yẹbedua bụ Kuráyisutu, bụru eze.”

3O noo ya, Páyileti jị Jisọsu: “?Ọo gụbedua bụ Eze ndu Ju ọbu?”

Ọ sụ iya: “Ọ kwa ghu whọ b'o shi l'ọnu.”

4Páyileti sụ ndu ishi ndu l'agbajẹ ẹja nụ Chileke mẹe igwe-ọha ono: “Ọ tọ dụkwa ejo iwhe mu whụru nwoke-e meru.”

5Whẹ kabaa okfushi ike sụ: “Iwhe o tsoru ezhiwhe bẹ bụlewho iwhe l'egbuka mkpụkpu anyi egbuka, mbụ o zhikotaakwaru iya alị Judíya mgburumgburu, ntaa ọ bya awata iya ezhizhi lẹ Gálili zhitawa iya rwua ẹka.”

Jisọsu nọ l'iwhu Hẹ́rodu

6Páyileti nụlewho iwhe ono ndu Ju kfuru, ọ bya ajị sụ: “?Ọo onye Gálili?” 7Ọ malẹruwho lẹ Jisọsu bẹ shi l'ibiya ọwhu Hẹ́rodu l'achị, ọ sụ whẹ tẹ whẹ kpụtakwa iya kpụ-kfu Hẹ́rodu. Nteke ono bẹ Hẹ́rodu nọ lẹ Jerúsalẹmu. 8Hẹ́rodu whụlewho Jisọsu, ẹhu tsọo ya ụtso, o noo l'o shihawaa nteke teru ẹnya chọta tẹ ya whụ iya, o noo l'ọ nụnukawaru ọtu ọnu iya. L'ọogukwa iya whọ tẹ ya gude ẹnya iya harụ whụa iwhe-awhụrulenya, l'ọo-harụ mee. 9O noo iwhe meru ọ jịa ya ajị nọo nwọdu, ọle Jisọsu ta adụdu ọnu, o yeru iya. 10Ndu ishi ndu l'agbajẹ ẹja nụ Chileke mẹe ndu o-zhi-iwu bya akfụkube iya ọnwuu ọnwuu whube iwhu ekfushi iwhe ọbu, whẹ sụru l'o meru. 11Hẹ́rodu yẹle ndu ojọgu iya whẹ tụko aja Jisọsu ewenu emekwa iya who iwhe iwhere. A nọnyaa, Hẹ́rodu bya achịta uwe l'ama ụma amashị iya ike, bụ uwe oke-amadụ bya eyee Jisọsu, zhi t'a kpuwhuru iya Páyileti azụ. 12Páyileti yẹle Hẹ́rodu bya abụru ọkpobe ọnya eshi mbọku ono nkele whẹ shi karụ ogvu yeru ibe whẹ l'ẹnya nteke mbụ iwhe ono l'ẹteke emee.

Eekpe Jisọsu nkfugbu

(Mát. 27:15-26; Mak. 15:6-15; Jọn. 18:39—19:16)

13Ọo ya bụ lẹ Páyileti abya ekukobe ndu ishi ndu l'agbajẹ ẹja nụ Chileke mẹe ndu l'achị ọha mẹe ọha ono l'owhu sụ whẹ: 14“Unu dutaru mu nwoke-e bya asụ mu l'ọo eduwhu bẹ l'ooduwhushi ndibe unu, mu byakwa ajịa ya ajị l'iwhu unu, tọ hẹkwa l'ọ dụ iwhe lile ono, unu sụru l'ọo iwhe o meru, ọwhu mu whụru ẹka ikpe iya nmarụ iya. 15O nokwawho gẹ Hẹ́rodu l'ẹte awhụa, meru g'o gude ọ sụ t'a kpuwhuru iya anyi azụ. Unu awhụkwa l'ọ tọ dụdu iwhe nwoke-e metaru nke t'a kfugbua ya. 16O noo iwhe meru mu je l'e-chi iya ẹchachi parụ iya haa.”

17Iwhe bụ-zhia oge O-je-ghata l'eeri awha g'awha ha b'a sụru tẹ Páyileti wefujeru whẹ onye mkpọro lanụ. 18Igwe-ọha ono tụko gẹ whẹ ha chishia sụ: “Wofuru anyi nwoke-e hachia Barábasu t'o jeru onwiya!” 19Nwoke ọbu bụ Barábasu bẹ bụ onye nọ mkpọro ọchi, o gburu mẹe nke ùtsú ọ kụjeru lẹ mkpụkpu kwefuru govumenti ike.

20Páyileti bya ekfuru yeru whẹ ọdo nkele oosebazhiawho gẹ l'ee-shi tẹ ya haa Jisọsu. 21Whẹ chishia ọdo sụ: “Kpọpyabe iya l'oswebe! Kpọpyabe iya l'oswebe!”

22Páyileti sụkwa whẹ ọdo nke ugbo ẹto: “?Ọo gụnu bụ ishi iya? ?Ọo ẹgube ejo iwhe gụnu b'o meru? Ọ tọ dụkwa ejo iwhe mbẹdua whụru, o meru, l'ikpe ọnwu ta anmakwa iya. Iwhe l'e-me nụ bụkwa lẹ mu l'e-chi iya ẹchachi parụ iya haa.”

23Whẹ l'atawarọ wọkowoko ekfushi ike t'a kpogbua ya l'oswebe. Whẹ ryaa ryata. 24Páyileti bya ebua ikpe sụ t'o me lẹ nke whẹ ọbu. 25Ọ bya ewefu nwoke ono, nọ mkpọro ọchi, o gburu mẹe nke ùtsú, ọ kụru, bụkwa nụ onye whẹ sụru t'ọ haarụ whẹ. Ọ sụ t'a kpọpyabe ọwhube Jisọsu l'oswebe, bụ iwhe dụ whẹ ree.

Aakpọpyabe Jisọsu l'oswebe

(Mát. 27:32-44; Mak. 15:21-32; Jọn. 19:17-27)

26Ọo ya bụ, whẹ bya akpụta Jisọsu tụgbua. Whẹ lụfu echi-ụzo, whẹ bya akpachịa nwoke Sayiríni, shi l'ẹgu alwa ẹwha iya bụ Sáyịmonu. Whẹ bo iya oswebe ono, Jisọsu vu sụ iya t'o vuru iya tsoje Jisọsu ọbu l'azụ.

27Ikpoto igweligwe ọha ono l'awụ gidigidi etso iya l'azụ mẹwaro ụnwanyi l'arya ẹkwa, atsọ áwhụ iya. 28A nọnyaa; Jisọsu bya aghaa ẹnya lee whẹ sụ: “Ụnwu-ada Jerúsalẹmu, unu ba aryashi ẹkwa mu, unu ryaa ẹkwa onwunu mẹe ẹkwa ụnwu unu. 29Ishi iya bụru lẹ mbọku ọbu nọwho abya nteke unu l'a-sụ: ‘Ẹhu atsọkwanua ụnwanyi, ẹhu whẹ keru ekeru ụtso l'ẹteke atsụbua ime, nwa ta angụbua whẹ ẹra l'obu.’ 30O noo nteke unu l'a-sụje ugvu g'ugvu ha: ‘Ugvu dapyabẹ anyi!’ Unu asụje ọwhube mgbogidi: ‘Domia anyi!’ 31Sụa ọ -bụru l'ọ waa gẹ whẹ l'eme oshi ntaa ọ dụ oyii ?ndẹ-zhia gẹ l'ee-metabezhia ya nteke ọ kpọru nkụ?”

32Whẹ kpụkwaruwho ụmadzu labọ ọdo etso iya. Ụmadzu labọ ono meru ejo iwhe. A chịta whẹ jeshia akfugbushi. 33Whẹ rwulewho ẹka ọbu l'eekuje “Okpokoro-Ishi”. Whẹ kpọpyabe iya l'oswebe l'ẹka ono mẹe ndu ejo iwhe labọ whọ, onye lanụ l'ẹka-ụtara; onye ọwhu l'ẹka-ịcha. 34Jisọsu sụ: “Nna, gụaru ndu-a meru iwhe-e nvụ nkele whẹ ta amadụ iwhe whẹ l'eme.”

Whẹ tụa ido gude kee uwe iya. 35Igwe-ọha ono kfụkwaruwho l'ẹka ono ele iya ẹnya. Ọwhube ndu l'achị ọha l'aja iya ewenu asụje iya: “Ọodzoje ndu ọdo, t'ọ dzọnua onwiya m'ọ -bụru l'ọo ya bụ Kuráyisutu ọbu, shi l'ẹka Chileke, bụ iya bụ onye ọ họtaru.”

36Ndu ojọgu l'ajakwa iya whọ ewenu. Whẹ byakfuta iya bya anụ iya mmẹe oshihu ụka t'ọ ngụa, 37sụ iya: “Ọ -bụru l'ọo ghu bẹ bụ Eze ndu Ju, dzọnua onwoghu!”

38O nwekwaruwho iwhe e deru kpube l'eli oswebe ono sụ: “ỌO ONYE-E BỤ EZE NDU JU.” E deru iya l'okfu Giríku, dee ya l'okfu Látinu, dee ya l'okfu Híburu.

39Onye lanụ l'ime ndu ono, a kpọpyabekotaru whẹ l'iya kọkwaa ya whọ ọnu sụ iya: “?Ọ dụnu mu-a g'ọo ghu bụ Kuráyisutu ọbu? Dzọnua onwoghu, dzọo anyịbedua.”

40Onye ọwhu gbochia ya nchị sụ iya: “?Tị tsụfudua Chileke egvu l'ẹka a nmarụ gụ lẹ nwoke-e ọga ikpe lanụ, bụ iya bụ ikpe ọnwu. 41Ikpe ọwhu a nmarụ anyịbedua kfụru nhamụnha l'ọo iwhe anyi meru bẹ anyi l'eri urwu iya, obenu lẹ nwoke-e ta adụdu iwhe-dụ-ẹji o metaru.” 42Ọ bya asụ Jisọsu nteke ono: “Jisọsu, byiko nyatakwa mu nteke l'ịi-bụlewho eze.”

43Jisọsu sụ iya: “Ee! Iwhe mu l'ekfuleru ghu who bụ: Ntanụ-a bẹ mu lẹ ghu l'a-nọ l'ogboduwhu Chileke.”

Anwụhu Jisọsu

(Mát. 27:45-56; Mak. 15:33-41; Jọn. 19:8-30)

44Ẹnyanwu keleruwho l'ishi; chi jihu l'alị ono, ẹka lile tụko gbakọta tsụurii, jeye o rwua l'oke-eswe-urwẹnyashi. 45Iwhu ẹnyanwu gbakọta ọchi, ẹkwa, e gude gechia ime mkpu ẹka ẹnya ẹka eze-ụlo Chileke dụ, gbajahụ ẹbo tarakata. 46Jisọsu chia mkpu sụ: “Nna, mu yeru ghu ume mu l'ẹka.” O kfugelewho nno, ọ tubuhu ume.

47Onye ishi ndu ojọgu l'achị ndu ojọgu ụkporo ugbo ise whụlewho iwhe meru nụ, ọ jalahaa Chileke ajaja sụ: “Haa! Ọkpobe okfu, nwoke-e bụkwa onye dụ chịriri!”

48Iwhe bụ-gezhia igweligwe ndu ono kụru l'ẹka ono byarụ tẹ whẹ bya awhụ iwhe l'eme nụ, whụlewho iwhe meru nụ, whẹ tsulahaa ẹka l'obu ebu mkpu eje ala. 49Iwhe bụ ndu marwetaru Jisọsu; lụfuchaa l'ụnwanyi ono, shi lẹ Gálili tsoru iya, kfụru otẹnya elekota iwhe lile ono l'eme nụ.

Eeli Jisọsu

(Mát. 27:57-61; Mak. 15:42-47; Jọn. 19:38-42)

50O nweru nwoke ẹwha iya bụ Jósẹfu; onye Ju, shi Arimatíya. Nwoke ono bẹ tso l'ọgbo-ikpe, bụru ezhigbo madzụ; bụkwaruwho onye dụ chịriri. 51Ọ tọ dụdu nteke ọ dụ-zhia l'idzu iwhe ono whẹ chịru mẹe iwhe ono, whẹ meru. Yẹbedua shiwaa nteke teru ẹnya leta ẹnya nteke Chileke l'e-goshi l'ọo ya bụ eze. 52Nwoke ono bya ejekfu Páyileti je aryọo ya t'ọ haa tẹ ya pata odzu Jisọsu je elia. 53E megee, ọ bya eje apazeta iya bya egude ọkpobe ẹkwa ọcha kwaa ya, bya eje enyebe iya l'ilu, a tụhawaru l'eli eze-ẹwhuru, ilu ono tẹke adụbudua onye e lijeru l'ime iya. 54Mbọku ono bụru mbọku nkwakọbe, bụ chi iya sahụ ya abụru mbọku ọtuta-ume, ebebenu mbọku ọtuta-ume ono l'aagbabewaa.

55Ụnwanyi ono whẹ lẹ Jisọsu shi lẹ Gálili lịru tsokwaruwho Jósẹfu jee. Whẹ gbua ilu ono nke; hụbe iya ama; whụkwawho lẹge e nyeberu odzu Jisọsu. 56Whẹ lwa bya egwokoo iwhe l'eshi mkpọ mẹe mmanụ-mbeleke nke ote l'odzu ono.

O rwua mbọku ọtuta-ume, whẹ tuta ume lẹge iwu whẹ sụru tẹ whẹ mejee ya.

നിലവിൽ തിരഞ്ഞെടുത്തിരിക്കുന്നു:

Luku 23: Ezaa

ഹൈലൈറ്റ് ചെയ്യുക

പങ്ക് വെക്കു

പകർത്തുക