Luku 21

Iwhe nwa-mbunu gude obu iya anụ Chileke

(Mak. 12:41-44)

1Jisọsu bya apalia ẹnya whụa ndu nweru iwhe gẹ whẹ l'eyekaa okpoga l'igbe l'eeyejeru Chileke okpoga l'eze-ụlo Chileke. 2Ọ whụa nwa-mbunu ọbu l'akpaba nri akpaba g'ọ bya bya achịru afụ labọ ye. 3Jisọsu sụ: “Iwhe mu l'emelewho tẹ mu kfuru unu bụ: l'ọ kwa nwa-mbunu-a, l'akpaba mkpaba nri-a bẹ kakọta-gee oye okpoga karụ ndu ọdo ọwhu gẹ whẹ ha. 4Ishi iya bụ l'iwhe ndu ọwhu gẹ whẹ ha l'eyekaa bụ okpoga tsuru etsu, ọle nwa-mbunu-a bẹ l'akpaba mkpaba nri, obenu l'o wotakotawaru iwhe o gude buru bya echee.”

Jisọsu l'ekfu l'ee-bekochaa nwukposhia eze-ụlo Chileke

(Mát. 24:1-2; Mak. 13:1-2)

5Whẹ harụ janyazhiawho eze-ụlo Chileke ono ama lẹ g'e gude, gude ẹwhuru dụ ree, dụkwawho egvu tụa ya ree mẹe nke iwhe a nụru Chileke dụ iya nụ; Jisọsu sụ whẹ: 6“Unu whụru-a iwhe lile-e, unu l'ele ẹnya-a! Mbọku ọbu l'a-byakwaa nteke l'ee-bekochaa kutsushigezhia iwhe lile ono akutsushi, nke bụ l'ọ tọ dụdu m'ọo ẹwhuru lanụ, bya l'a-kpokfuru l'eli ibe iya.”

Mkpamẹhu yẹle iwhe-ọtsulanu, l'a-bya tẹmenu mgboko-o agvụ

(Mát. 24:3-14; Mak. 13:3-13)

7Whẹ jị Jisọsu sụ iya: “O-zhi-iwhe ?o zhia nteke ole bẹ iwhe lile ono l'e-mezhihunua? ?Ọo gụnu bẹ l'a-bụ iwhe l'ee-gude marụ nteke iwhe lile ono l'abya ememe?”

8Ọ sụ whẹ: “Ọlewho t'unu kwabẹkwa onwunu ẹnya tọ bọ dụ onye l'e-duwhu unu. O noo l'igweligwe madzụ l'a-zarụ ẹwha mu bya. Onye ọwhu nọnu, ya asụ l'ọo ya bụ ya, sụkwawho l'ọogbaakwa nteke ọbu. Unu be etsokwa whẹ. 9Nteke unu l'a-nọ anụ l'ọgu-egbe l'ada mẹe lẹ mkpaka l'aswọ l'ibẹka iya ọwhu, ọdua l'ọo l'ụzo ibẹka iya ọwhu, t'unu be ejekwa ọtsu egvu, o noo l'iwhe lile ono g'ọ ha mekotajekwa, ọle oge ikpazụ ono te erwukebekwaa ẹgwegwa nno.”

10Ọo ya bụ, ọ sụ whẹ: “Mba lanụ l'a-gbashi je alwụshi mba ọdo ọgu. Alị-eze agbashikwawho je alwụshi alị-eze ọdo ọgu. 11Oke alị-ọnma-jijiji l'a-nma l'alị lile. Ejo mkpẹgu mẹe ẹhu-ba-dụ-mma l'e-mekota l'ẹka dụ iche iche. Ahụma l'a-nọ emekaa l'akpamigwe mẹwaro eze iwhe-ọhubama ọdo. 12Ọle tẹmenu iwhe lile ono a nwụde bẹ l'ee-vuada ụzo kpaa unu ẹhu, gudeshia unu kpụru je edobe l'ụlo-ndzuko ndu Ju, je ekpee unu ikpe, tụa unu mkpọro, mbụ aa-kpụta-gekwaa kpụta unu bya edobe l'iwhu ndu eze mẹe l'iwhu ndu ọ-chị-ọha l'iswi ẹhu mu. 13O noo nteke ọ gbarụ t'unu kfuje ozhi-ọma ono l'edzudzu-ọha gude goshi l'unu bụ ndu nkemu.” 14Ọ sụ whẹ: “T'unu be evukwa ụzo rịada iwhe unu l'ekfu gude kpefu onwunu. 15Mu l'e-yee unu okfu l'ọnu, mee t'unu marụ iwhe, nke ọwhu ndu ọhogu unu whẹ l'ẹte ama gẹ whẹ l'e-ye ọnu l'iwhe unu kfuru, whẹ ta atukpuhunu unu l'ẹgo. 16Ndu nwụru unu l'a-kpụ-gekwaaru unu nụ t'e gbua, unwune unu whẹ mẹe abụbu unu whẹ mẹe ndu ọnya unu whẹ, bẹ l'a-tụkokwa kpụru unu nụ ndiwhe. Aa-hakwarụ unu gbua. 17Madzụ lile l'e-kwobe nkele ọo l'unu bụ ndu nke mụbe Jisọsu kpọ unu ashị. 18Ọle unu ta abyakwa l'a-la l'iswi, mbụkwa t'ọ ka mma l'ọo m'ọo ẹgbushi lanụ, shi unu l'ishi. 19Unu takwarụ iya nshi, ọ kwa nshi unu l'a-ta nteke ono l'e-me, unu enweru ọkpobe ndzụ.”

Jisọsu l'ekfu l'aa-kwakpọshi Jerúsalẹmu

(Mát. 24:15-21; Mak. 13:14-19)

20“Sụa, nteke unu whụleruwho gẹ ndu ojọgu nowheru Jerúsalẹmu mgburumgburu, t'unu marụ lẹ nteke ọbu l'aa-kwakpọshi iya bẹ dụwaa ntse. 21Ọo ya bụ tẹ ndu nọ lẹ Judíya nteke ono gbalakwaa lashia l'ugvu ugvu, tẹ ndu ọwhu kụru l'ime mkpụkpu wụfutachaa, tẹ ndu ọwhu jeru l'ẹgu be ejekwa ọdawhu azụ lẹ mkpụkpu ono. 22O noo lẹ mbọku ono bụkota mbọku Chileke l'a-gwa ndiwhe ọchi t'e gude nno t'iwhe, e deru l'ẹkwo Okfu Chileke vụkota. 23Nshọo ụnwanyi dụ ime mẹe ndu l'eche nwa ẹra nteke ono. O noo l'ejo iwhe parụ ẹka l'a-dụ l'eliwhe nteke ono, tẹhenu Chileke egude oke-ẹhu-eghughu iya kpee ndu Ízurẹlu ikpe. 24Aa-harụ whẹ gbua lẹ mma, harụ whẹ kpụta lẹ ndzụ chịkaa whẹ laa mba lile. Ndu l'ẹte abụa ndu Ju l'e-gwe Jerúsalẹmu aryaka eryune jeye nteke l'oo-rwube whẹbedua.”

Nteke Abụbu-Ndiwhe l'e-me whẹrekete

(Mát. 24:29-31; Mak. 13:24-27)

25“Iwhe ọhubama l'a-nọ emekaa l'ẹnyanwu mẹe l'ọnwa mẹe lẹ kpokponde. Ọwhube l'eliwhe bẹ eze-ẹnyimu mẹe ọchi-ọku mini l'a-nọ eme ẹngiringaa nke ọwhu meji l'a-tọfu ndiwhe l'owhu, ya abụru egvu, whẹ l'a-nọ atsụ l'e-me iya. 26Madzụ l'a-tsụje egvu vẹkpeshihu nteke whẹ l'a-nọ ele ẹnya iwhe l'a-nọ abya ememe lẹ mgboko nkele iwhe lile, dụkota l'igweli l'a-nmawokota anmawo, sweshihu. 27Ọo ya bụ whẹ awhụa Abụbu-Ndiwhe nteke ono g'ọ nọ l'urwukpu egbu zaazaa, gude ike iya, parụ ẹka abya. 28Nteke iwhe lile ono watalẹruwho ememe, t'unu gbalihu palia ẹnya l'o rwuwaru nteke l'aa-gbata unu.”

Iwhe figu l'ezhi

(Mát. 24:32-35; Mak. 13:28-31)

29Jisọsu bya anmakwaaru whẹ whọ ẹtu-a sụ: “Unu lekwaawho ẹnya l'oshi figu mẹe l'oshi mmaanụ ọdo. 30Ọobuje nteke o rwudeleruwho irwu, unu awhụa ya marụ l'okpomọku l'abyawaa. 31O nokwawho gẹ ọwa dụ: nteke iwhe lile watalẹruwho ememe, unu amarụ lẹ nteke Chileke l'e-goshi l'ọo ya bụ eze dụwaa ntse.

32“Iwhe mu l'ekfuru unu bụ, ọgbo elenu-a ta abyakwa l'a-gvụ jeye nteke iwhe lile ono g'ọ ha l'e-mekota. 33Igwe l'a-gvụkwa, alị agvụ, ọle okfu mu ta abyadụ l'e-rebuhu ire.

Unu cheje nche

34“Ọle ọbu, unu chejekwa onwunu nche. Unu be ekwekwa t'ike gvụ unu nke l'ọo l'unu l'eri g'ẹhu ha unu, angụnuka mmẹe, mẹe l'unu l'achọ-whe ẹku nke mgboko-o, ọdua bẹ mbọku ono l'e-mekwa unu lẹ nzirizẹhu. 35O noo l'iwhe bụ ndu mgboko-o l'owhu gẹ whẹ hakọta bẹ l'ọo-nmata g'ọo ọnya. 36Ọle t'unu cheje nche nteke nteke, unu ekfu anụ Chileke nggẹ unu dụ ike kfụshia ike mẹ iwhe lile ono mede nke ọwhu bụkwanu nteke e megeeru, unu akfụru l'iwhu Abụbu-Ndiwhe.”

37Ọo ya bụ, Jisọsu l'anọje ezhi iwhe l'eze-ụlo Chileke ono mbọku-mbọku. L'ọobuje o -rwua l'ẹnyashi ya eje aradụ l'ugvu ọbu l'eekuje Ólivu. 38Chi bebe asahụ asahụ, e kporu rwuturwutu wukfuta iya, bya adojia eze-ụlo Chileke ono anụ iwhe l'ookfu.

നിലവിൽ തിരഞ്ഞെടുത്തിരിക്കുന്നു:

Luku 21: Ezaa

ഹൈലൈറ്റ് ചെയ്യുക

പങ്ക് വെക്കു

പകർത്തുക